પેટ્રોલ-ડિઝલના ભળકે બળતા ભાવોના વિરોધમાં કોંગ્રેસ અને તેના સાથી પક્ષો દ્વારા આજરોજ તા.10મી સપ્ટેમ્બર 2018ના દિવસ એક દિવસ પૂરતા આપવામાં આવેલા બંધના એલાનની આર્થિક નગરી, ટેક્સટાઇલ સિટી, ડાયમંડ સિટી સુરત પર આંશિક અસર પણ જોવા મળી ન હતી. 20થી 25 જગ્યાઓ પર કોંગ્રેસી નેતાઓએ ખાસ કરીને સ્થાનિક નેતાઓએ ભેગા મળીને બંધ પળાવ્યો એ સિવાય સુરત શહેર રાબેતા મુજબ ધમધમતું હતું. ટેક્સટાઇલ માર્કેટ, લિંબાયત, પૂણા જેવા વિસ્તાર સિવાય સુરતમાં બંધમાં કોઇ જોડાયા ન હતા. રિક્ષા હડતાળનો તો ભારે ફિયાસ્કો થયો હતો. રિક્ષા ચાલકોને જ ખબર ન હતી કે શહેરમાં આજે રિક્ષા હડતાળ છે. આમ, સુરત શહેરમાં બંધની આંશિક અસર પણ જોવા મળી ન હતી.

આજે સવારના સેશનમાં અમરોલી, ધારુકાવાળા તેમજ અન્ય કેટલીક શૈક્ષણિક સંસ્થાઓ સિવાય બાકીની શાળા કોલેજો રાબેતા મુજબ શરૂ રહી હતી. સવારે સાડા  દસ વાગ્યાથી ટેક્સટાઇલ માર્કેટ પણ રાબેતા મુજબ કાર્યાન્વિત થયેલી જોવા મળી હતી. બેંકો, સરકારી કચેરીઓ, ચૌટાબજાર, રાજમાર્ગ, અઠવાલાઇન્સ, અડાજણ, વરાછા રોડ વગેરે વિસ્તારોમાં સવારથી જ દુકાનો, ઓફિસો રાબેતા મુજબ શરૂ થઇ હતી. આજના બંધ અંગે કોંગ્રેસી નેતાઓ દ્વારા કોઇ જ આગોતરી વ્યવસ્થા કરવામાં આવી ન હતી પરીણામે જ્યાં કોંગ્રેસી નેતાઓનું વર્ચસ્વ હતું ત્યાં પણ બંધની કોઇ જ અસર જોવા મળી ન હતી. શહેરના રિંગ રોડ પર ટ્રાફીક રાબેતા મુજબ હતો, એવી જ રીતે રાજમાર્ગ, અઠવાલાઇન્સ મેઇન રોડ, ઘોડદોડ રોડ, ઉધના મગદલ્લા રોડ, ઉધના મેઇન રોડ, કતારગામ, વરાછા રોડ, પૂણા રોડ વગેરે વિસ્તારમાં સવારના સેશનમાં બંધની કોઇ જ અસર જોવા મળી ન હતી.

બંધની ક્યાં અસર જોવા મળી

પૂણાના યોગી ચોક, કાપોદ્રા, લિંબાયત વગેરે વિસ્તારોમાં આજે સવારે કોંગ્રેસી કાર્યકરોએ દુકાનો, ઓફિસો બંધ કરાવવામાં સફળતા મેળવી હતી. જોકે, થોડા સમયમાં પોલીસ પહોંચી જતા બાદમાં આ વિસ્તારોમાં પણ દુકાનો, ઓફિસો રાબેતા મુજબ ધમધમતી થઇ જવા પામી હતી. કોંગ્રેસી કોર્પોરેટર અને વિદ્યાર્થી નેતા ભાવેશ રબારીના જણાવ્યા અનુસાર ધારુકાવાળા કોલેજ કેમ્પસ, અખંડ આનંદ અને અમરોલી કોલેજોને બંધના એલાનના ભાગરૂપે બંધ કરાવવામાં સફળતા મેળવી હતી. ટેકસટાઇલ માર્કેટ વિસ્તારમાં માર્કેટ ખુલે એ પહેલા કેટલાક નેતાઓએ બંધ રાખવા માટે પ્રયાસો કર્યા હતા જોકે, વેપારીઓએ રાબેતા મુજબ માર્કેટ શરૂ કરી દેતા ટેક્સટાઇલ વ્યાપારી વિસ્તાર રિંગરોડ પર પર પણ બંધની કોઇ અસર જોવા મળી ન હતી. ટેક્સટાઇલ માર્કેટ વિસ્તારમાં તારાચંક કાસટ અને તેમના કેટલાક સમર્થકોએ દુકાનો બંધ રાખી હતી એ સિવાય તમામ માર્કેટો રાબેતા મુજબ શરૂ કરી દેવામાં આવી હતી. લિંબાયત વિસ્તારમાં રવિન્દ્ર પાટીલની આગેવાની હેઠળ સવારે ટાયરો સળગાવીને કેટલીક સ્કુલ બસ તેમજ રીક્ષાઓ રોકીને બંધ પાળવા માટે પ્રયાસ કરાયો હતો જોકે પોલીસે તેમને વિખેરી નાંખ્યા હતા.

કોંગ્રેસીઓ પોતાના ગઢમાં પણ બંધ કરાવી ન શક્યા

આજના કોંગ્રેસ પ્રેરિત બંધના એલાનમાં સુરતમાં કોંગ્રેસીઓનું પ્રદર્શન સાવ જ નબળું રહ્યું. પેટ્રોલ અને ડિઝલના ભડકે બળતા ભાવોથી સામાન્ય લોકો દુભાયેલા છે જ પરંતુ, કોંગ્રેસના બંધના એલાનમાં સ્થાનિક કોંગ્રેસી નેતાઓ સામાન્ય લોકોને સાંકળવામાં નિષ્ફળ નિવડ્યા. કોંગ્રેસના કોર્પોરેટરો જ્યાંથી ચૂંટણી લડ્યા છે એ વિસ્તારોમાં પણ બંધની અસર વર્તાવી શક્યા નહીં. એકાદ બે કલાક દુકાનો જબરદસ્તી બંધ રખાવી કોંગ્રેસીઓએ ફોટા પડાવી લીધા. એ પછી સવારે 10.30થી બધું ધમધમતું જોવા મળ્યું હતું.

કોંગ્રેસ કાર્યાલયની આસપાસમાં, કોંગ્રેસના પ્રમુખના ઘરની આસપાસ ઉધના દરવાજા વિસ્તારમાં જ બંધની કોઇ અસર જોવા મળી ન હતી. આમ કોંગ્રેસનું પરફોર્મન્સ બિઝનેસ સિટીમાં બંધ કરાવવામાં સાવ નબળું જોવા મળ્યું હતું.

Download CIA LIVE app from GOOGLE Play Store

Jayesh Brahmbhatt.   98253 44944

Me and Mummyવાળા ડો. પ્રફુલ દોશી પર થયેલી પોલીસ ફરીયાદ બાદ શહેરના તબીબો પેનિકની સ્થિતિમાં હોવાની કેફિયત સાથે આજે વીસથી વધુ તબીબોએ સુરત શહેર પોલીસ કમિશનર શ્રી શર્માને મળીને કેટલીક રજૂઆતો કરી હતી.

ડો.અનિતા શાહ, ડો. આશા ભટ્ટ, ડો. પ્રફુલ છાશટીયા, ડો.પ્રશાંત નાયક, ડો.સમીર દેસાઇ, ડો.અનિલ પટેલ, ડો.ઇન્દ્રવદન શાહ, ડો. ભૂપેશ ચાવડા, ડો. વિનોદ શાહ, ડો.અનિલ ગોસ્વામી, ડો.પ્રકાશ ભટ્ટ, ડો.મનિષા ઝવર, ડો. તોરાવાલા, ડો.અનિલ શાહ, ડો.હિરલ શાહ વગેરેનું પ્રતિનિધિ મંડળ આજે બપોરે પોલીસ કમિશનર શ્રી સતીશ શર્માને મળવા પહોંચ્યું હતું.

પોલીસ કમિશનરને મળ્યા બાદ તેમની મુલાકાત અંગે પ્રતિનિધિમંડળ દ્વારા મિડીયાને જણાવાયું હતું કે તેઓ ડો. પ્રફુલ દોશી સામેના પોલીસ પ્રકરણ પછી ભયની સ્થિતિમાં આવી ગયા છે. તબીબ સામે આક્ષેપો સરળતાથી થઇ શકે તેવી સ્થિતિમાં તબીબોએ કેવી રીતે કામ કરવું એ અંગે રજૂઆતો કરવામાં આવી હોવાનું પ્રતિનિધિ મંડળના કેટલાક તબીબોએ જણાવ્યું હતું.

પોલીસ કમિશનર શ્રી શર્માએ આ મુદ્દા પર તેમના ગાઇડન્સ આપ્યું હોવાનું જણાવતા પ્રતિનિધિ મંડળે કહ્યું કે પોલીસ કમિશનરે તેઓને કન્સલ્ટીંગ રૂમમાં વિડીયો કેમેરા રાખવા તેમજ દર્દીની તપાસ થાય ત્યારે તેના પરિવારજનો પૈકી કોઇકને સાથે રાખવાની સલાહ આપી હતી.

તબીબોનું પ્રતિનિધિ મંડળ પોલીસ કમિશનર ને મળવા પહોંચ્યું ત્યારે એવી વાતો વહેતી થઇ હતી કે તેઓ ડો. પ્રફુલ દોશીની તરફેણમાં મળવા પહોંચ્યા હતા. જો કે, પ્રતિનિધિ મંડળે કહ્યું કે તેમણે આવી કોઇ રજૂઆત કરી ન હતી.

શહેરના રિંગ રોડ ટેક્સટાઇલ માર્કેટ વિસ્તારમાં પાર્કિંગની વકરી રહેલી સમસ્યા અને તેના પર હાલ ચાલી રહેલા વિવાદ વચ્ચે સુરત શહેર પોલિસ કમિશનર શ્રી સતીશ શર્માએ આજે બપોરે રિંગ રોડ પર ટેક્સટાઇલ માર્કેટ વિસ્તારમાં ગીચ માર્કેટ રોડ્સ પર રાઉન્ડ લીધો હતો.

પોલીસ કમિશનર શ્રી શર્મા તેમની ટીમ સાથે જે જે માર્કેટ નજીક પાર્કિંગની સમસ્યા સર્જાઇ રહી છે ત્યાં પગપાળા ચાલીને ગયા હતા. તેમણે સમગ્ર પશ્ન અંગે સવાલો કરીને જાત માહિતી મેળવી હતી.

અત્રે એ ખાસ નોંધનીય છે કે ટેક્સટાઇલ માર્કેટ વિસ્તારમાં પાર્કિંગની જગ્યાઓ કવર કરી દેવામાં આવી છે અને વ્યાપારીઓ તેમજ મુલાકાતીઓ રોડ પર વાહનો પાર્ક કરી રહ્યા હોઇ, શહેરના હાર્દ સમા રિંગ રોડ  વિસ્તારમાં ટ્રાફિકની ભારે સમસ્યા સર્જાય રહી છે.

સુરત શહેર મ્યુનિસિપલ કમિશનર અને પોલીસ કમિશનર બન્ને સંકલન સાધીને હાલમાં આ મુદ્દાને ઉકેલવાનો પ્રયાસ કરી રહ્યા છે.

જયેશ બ્રહ્મભટ્ટ

સુરત સમેત સમગ્ર દક્ષિણ ગુજરાત માટે ખેતી સિંચાઇ તેમજ પીવાના પાણીના સૌથી મોટા સ્ત્રોત સમાન ઉકાઇ ડેમમાં પાણીની સપાટી ધીમે ધીમે વધી ગઇ છે અને તા.23મી ઓગસ્ટને ગુરુવારે બપોરે 3 કલાકે ઉકાઇ ડેમની સપાટી 311 ફૂટના લેવલને આંબી ગઇ છે.

ઉકાઇ ડેમ અંગે બે બાબતો હાલમાં ચર્ચાસ્પદ છે એક સકારાત્મક અને એક નકારાત્મક. સકારાત્મક બાબત એ છે કે ધીમે ધીમે ખરું પણ ઉકાઇ ડેમમાં પાણીનો આવરો થઇ રહ્યો છે અને સપાટી 292 ફૂટ પરથી વધીને તા.23મી ઓગસ્ટ 2018ના રોજ 311.34 ફૂટ પર પહોંચી છે. આમ, ઉકાઇ ડેમના કેચમેન્ટ એરીયા કે જ્યાં વરસાદ શરૂ થયો છે અને ત્યાંથી પાણીનો આવરો ડેમમાં થઇ રહ્યો છે.

નકારાત્મક બાબત એ છે કે રાજ્ય સરકારે ઉકાઈ ડેમમાં પાણીનું લેવલ મેઇન્ટેન કરવા માટે કેટલાક નીતિ નિયમો બનાવ્યા છે. જેમાં એક નિયમ રુલ લેવલની જાળવણીનો છે. દર વર્ષે ચોમાસા દરમિયાન જે તે તારીખે ડેમમાં પાણીનું લેવલ કેટલું જાળવવું તે અંગે ચોક્કસ ગણતરી સાથે કાર્યવાહી થાય છે. તા.23મી ઓગસ્ટ 2018ના દિવસે ઉકાઇ ડેમમાં પાણીની સપાટીનું રૂલ લેવલ 335 ફૂટ હોવું જોઇએ. તેના કરતા આજના દિવસે પાણીની સપાટી 24 ફૂટ ઓછી છે.

પણ દેર આયે દુરસ્ત આયે એ રુએ પણ મધ્યપ્રદેશ અને મહારાષ્ટ્ર ખાતે આવેલા ઉકાઇ ડેમના કેચમેન્ટ એરિયામાં પડી રહેલા વરસાદનું પાણી ઉકાઇ ડેમને ધીમી ધારે ભરી રહ્યું છે એ પોઝિટીવ બાબત સમગ્ર દક્ષિણ ગુજરાતના માથેથી ધીમે ધીમે જળસંકટ ઓછું કરી રહી છે.

અગાઉ ઉકાઇ ડેમના ઉપરવાસમાં વરસાદ નહીં પડવાને કારણે ડેમમાં પાણીનો આવરો નહીં થતા ચોમાસાના પ્રારંભે ચિંતાનું મોજું ફરી વળ્યું હતું. પરંતુ હવે જિલ્લા પ્રશાસન તેમજ દક્ષિણ ગુજરાતના લોકોને પણ ઉકાઇ ડેમની પાણીની સપાટી વધવાથી હાશકારો થઇ રહ્યો છે.