Blog - Page 661 of 709

August 11, 2018

ધોરણ 12 સાયન્સની પ્રાયોગિક પરીક્ષા માર્ચ 2019 થી ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્રારા યોજાશે. અત્યાર સુઘી આ પરીક્ષા સ્કૂલ દ્વારા લેવાતી હતી, પરંતુ માર્ચ 2019 થી આ પરીક્ષા બોર્ડ દ્વારા લેવાશે. સાયન્સમાં મુખ્ય ત્રણ વિષયની પ્રાયોગિક પરીક્ષા માટે બોર્ડ દ્વારા પ્રશ્ર્નપત્રો અને જરૂરી સાહિત્ય મોકલવામાં આવશે. ઉપરાત, પરીક્ષા માટે બોર્ડ દ્વારા પરીક્ષકોની નિમણૂક પણ કરવામાં આવશે. આ પરીક્ષા જિલ્લાના નિયત કરેલા પરીક્ષા કેન્દ્રોખાતે લેવામાં આવશે. આમ, સ્કૂલ દ્વારા લેવામાં આવતી આ પ્રાયોગિક પરીક્ષામાં ચાલતી ગેરરીતિઓ પર બ્રેક વાગશે.

રાજ્ય સરકાર દ્વારા ઘોરણ 11 અને ધોરણ 12 સાયન્સમાં સેમેસ્ટર પદ્ધતિ રદ કર્યા બાદ પરીક્ષા પદ્ધતિમાં ઘણા ફેરફારો કર્યા છે. હવે સાયન્સની પ્રાયોગિક પરીક્ષામાં પણ બોર્ડ ફેરફાર કર્યા છે. ધોરણ 12 ની પરીક્ષા અત્યાર સુધી સ્કૂલ દ્વારા લેવામાં આવતી હતી. જોકે, સ્કૂલ દ્વારા લેવાતી પરીક્ષામાં પોલમપોલ ચાલતી હતી અને અમુક શાળાઓ પરીક્ષા લીધા વગર જ માર્ક મોકલી આપતી હતી. જોકે, હવે આ પોલમપોલ પર બ્રેક વાગે તે માટે બોર્ડ ધોરણ 12 સાયન્સની પ્રાયોગિક પરીક્ષા લેવાનો નિર્ણય લીધોે છે.માર્ચ 2019 થી ધોરણ 12 સાયન્સની પ્રાયોગિક પરીક્ષા બોર્ડ દ્વારા લેવામાં આવશે. ધોરણ 12 સાયન્સમાં રસાયણ વિજ્ઞાન, ભોતિક વિજ્ઞાન અને જીવ વિજ્ઞાન વિષયની પ્રાયોગિક પરીક્ષા બોર્ડ દ્વારા લેવાશે જેના માટે બોર્ડ દ્રારા પ્રશ્ર્નપત્રો અને જરૂરી સાહિત્ય મોકલાવામાં આવશે. પ્રાયોગિક પરીક્ષાના 3 વિષયોના પરીક્ષકોની નિમણૂકો પણ બોર્ડ દ્વારા જ કરવામાં આવશે. વિજ્ઞાન પ્રવાહની પ્રાયોગિક પરીક્ષા જિલ્લામાં નિયત થયેલા કેન્દ્રોના પરીક્ષા સ્થળ ખાતે જ લેવાશે. પ્રાયોગિક કાર્યની જનરલ બોર્ડ દ્વારા લેવામાં આવનારી પરીક્ષા સમયે જે તે કેન્દ્ર ખાતે રજૂ કરવાની રહેશે. બોર્ડ દ્વારા સાયન્સમાં પ્રાયોગિક પરીક્ષા નક્કી કરવામાં આવેલી તારીખ, સમય અને જે તે બેચ પ્રમાણે લેવામાં આવશે. પ્રાયોગિક પરીક્ષા પૂર્ણ થયા બાદ ગેરહાજર રહેનાર વિઘાર્થીઓ માટે કોઇ પણ સંજોગોમાં ફરી પરીક્ષા લેવામાં આવશે નહીં તેમ બોર્ડ દ્વારા સ્પષ્ટ જણાવી દેવાયું છે.

August 11, 2018

ગુજરાતમાં છેલ્લા ચાર વર્ષથી ચાલી રહેલા પાટીદાર અનામત આંદોલનથી વ્યાપક નુકસાન વેઠનારી ભાજપની સરકારે ગત વિધાનસભાની ચૂંટણી પહેલા બિનઅનામત વર્ગ કે સવર્ણો માટે અલગ આયોગની રચના સહિતની સમાધાનકારી યોજનાઓ અમલમાં મૂક્યા બાદ હવે જ્યારે પાસના નેતા હાર્દિક પટેલે આગામી 26મી ઓગસ્ટથી આમરણાંત ઉપવાસનું એલાન આપ્યું છે ત્યારે ભાજપ સરકારે આજે શુક્રવારે બિનઅનામત વર્ગની 50થી વધુ જ્ઞાતિઓ માટે જુદી જુદી પાંચ યોજનાઓની જાહેરાત કરી છે.

નાયબ મુખ્ય પ્રધાન નીતિન પટેલે આ અંગેની જાહેરાત કરતા કહ્યું હતું કે, બિન અનામત વર્ગ માટે સરકારે કેટલીક યોજના બનાવી છે. આ યોજનાનો લાભ વિદ્યાર્થીઓ અને સમાજના એવા વર્ગને થશે જેઓને અનામતનો લાભ નથી મળતો. આ યોજનાથી અનામત મેળવતા વર્ગને કોઇ નુકસાન થશે નહીં. રાજ્યમાં ચાલતા મેડિકલ, ડેન્ટલના સ્વનિર્ભર સ્નાતક કક્ષાના અભ્યાસક્રમો, વ્યવાસિયક અભ્યાસક્રમો, ઇજનેરી, ટેકનોલોજી, ફાર્મસી, આર્કિટેક્ચર, આયુવેર્દિક, હોમિયોપેથી, ફિઝિયોથેરાપીસ વેટરનરી વગેરે અભ્યાસક્રમો માટે (હાયર એજ્યુકેશન જેવા કે બીબીએ, બીકોમ, બીએસસી, બીએ વગેરે સિવાય) સમગ્ર અભ્યાસક્રમની કુલ ટ્યૂશન ફી અથવા 10 લાખ રૂપિયા તે બે પૈકી તે ઓછું હોય તે પ્રમાણેની લોન 4 ટકાના સાદા વ્યાજે નિગમ તરફથી આપવામાં આવશે.

તેમણે વધુમાં કહ્યું હતું કે, વિદ્યાર્થીએ ધોરણ 10માં 60 ટકા કે તેથી વધુ મેળવેલા હોવા જોઇએ, વ્યાજનો દર વાર્ષિક 4 ટકા લેખે સાદું વ્યાજ, તો કુટુંબની વાર્ષિક આવક મર્યાદા રૂપિયા 3 લાખ કે તેથી ઓછી હોવી જોઇએ. અરજદાર બિન અનામત વર્ગના હોવા જોઇએ. આ યોજનાનો લાભ મેળવવા ઇચ્છતા અરજદારે ધોરણ 12 પછી એમબીબીએસ માટે , ડિપ્લોમા પછી ડીગ્રી માટે, સ્નાતક પછી અનુસ્નાતક માટે અને રિસર્ચ જેવા ટેક્નિકલ પેસમેડિકલ, પ્રોફેશનલ વગેરે જેવા કોઇપણ પ્રકારના વિદેશમાં ઉચ્ચ અભ્યાસ માટે બિન અનામત વર્ગના વિદ્યાર્થીઓ માટે કુલ રૂપિયા 15 લાખની વિદેશ અભ્યાસ લોન નિગમ તરફથી આપવામાં આવશે. અરજદારે ધોરણ 12માં 60 ટકા કે તેથી વધુ મેળવેલા હોવા જોઇએ. આ લોન વાર્ષિક 4 ટકાના લેખે સાદું વ્યાજ આપવામાં આવશે. કુટુંબની વાર્ષિક આવકમર્યાદા 4.50 લાખ કે તેથી ઓછી હોવા જોઇએ.

August 10, 2018

મુંબઇને માથે કોઇને કોઇ આપત્તિ મંડળાયેલી રહેતી હોય છે. હાલમાં મેઘરાજાએ મુંબઇમાં પોરો ખાધો છે ત્યારે હવે દરિયો મુંબઇવાસીઓ માટે નવું સંકટ લઇને આવી રહ્યો છે. આગામી સપ્તાહમાં મુંબઇના દરીયાકાંઠે મોટી ભરતી આવશે અને આ મોટી ભરતી સમુદ્રનો કચરો મુંબઇના દરીયા કિનારાઓ પર ઘસડી લાવશે. આ સમસ્યાથી છુટકારો મેળવતા ફરીથી મુંબઇગરાઓ સમેત તંત્રવાહકોએ દિવસો સુધી સફાઇ કામગીરી કરવી પડશે.

જાણકારો કહે છે કે આગામી સપ્તાહમાં દરિયામાં મોટી ભરતી આવશે અને દરિયાઇ મોજાં ઉંચા ઉછળશે તેની સાથે જ મુંબઈના કિનારા પર મોટા પ્રમાણમાં કચરો તણાઈને આવવાની શકયતા છે. આ મહિને દરિયામાં છ દિવસ મોટી ભરતી છે. દસમી ઑગસ્ટથી 15 ઑગસ્ટ દરમિયાન મોટી ભરતી છે, જેમાં સૌથી ઊંચી ભરતી સોમવાર 13 ઑગસ્ટના છે, તે દિવસ દરિયામાં 4.96 મીટર ઊંચા મોજાં ઉછળશે. તો આજે 4.60 મીટર, શનિવારે 4.82 મીટર, રવિવારે 4.95 મીટર, મંગળવારે 4.85 મીટર અને બુધવારે 4.62 મીટર જેટલા મોજાં ઊંચા ઉછળશે. છેલ્લાં થોડાં વર્ષમાં દરિયામાં કચરો નાખવાનું પ્રમાણ વધી ગયું છે. ચોપાટી પર મોટી સંખ્યામાં પર્યટકો આવતા હોય છે. તેમાંથી મોટાભાગના લોકો દરિયામાં કચરો નાખતા હોય છે. તો જહાજના માધ્યમછી પણ નાખવામાં આવતો કચરો ભરતીના સમયમાં મોજાની સાથે કિનારા પર ધસડાઈને આવતો હોય છે. 15 જુલાઈના મોટી ભરતી હતી અને મોજાં 4.97 મીટર ઊંચાં ઉછળ્યાં હતાં ત્યારે કચરાના ઢગલા ને ઢગલા મરીન ડ્રાઈવ, જૂહુ, દાદર, માહિમ ચોપાટી પર પાણીની સાથે તણાઈને આવ્યા હતા. લગભગ 2015 મેટ્રિક ટન જેટલો કચરો મુંબઈના દરિયા કિનારા પર ઠલવાયો હતો. તેથી આજથી છ દિવસ ભરતીના છે ત્યારે ફરી મોજાની સાથે મોટા પ્રમાણમાં કચરો તણાઈ આવવાની શકયતાને પગલે પાલિકાએ મોટી સંખ્યામાં સફાઈ કામગારોને તહેનાત રાખ્યા છે.

મુંબઈમાં વરસાદી પાણીનો નિકાલ કરનારી પાઈપલાઈનની ક્ષમતા કલાકના 50 મિલીમીટર વરસાદી પાણીનો નિકાલ કરવાની છે પણ દરિયામાં મોટી ભરતી હોય અને દરિયામાં મોજા 4.5 મીટરથી ઊંચા ઉછળતા હોય અને બરોબર તે જ સમયે મુશળધાર વરસાદ પડતો હોય તો મુંબઈના નીચાણવાળા વિસ્તારમાં પાણી ભરાઈ જતા હોય છે. તેને કારણે દર વર્ષે ચોમાસામાં મોટી ભરતીના દિવસની પાલિકા યાદી બનાવીને તે દિવસે દરિયા કિનારા પર પાલિકા યંત્રણા સુજ્જ રહેતી હોય છે.

August 10, 2018

સુરતના ઐતિહાસિક અને પ્રસાદીભૂત સ્વામિનારાયણ મંદિરના મહંત કોઠારીપદે વડતાલના પી.પી.સ્વામી તરીકે જાણીતા સંત પુરુષોત્તમપ્રકાશદાસજીની નિમણૂક થઇ છે. પી.પી.સ્વામી એક વિદ્વાન અને સાથે એક વિકાસશિલ સંત છેઃ સ્વામીએ હોસ્પિટલ અને મંદિરના નિર્માણના પરોપકારના કાર્યો કર્યાં છેઃ સ્વામી હાલ જલગાવ ખાતે લાલ પથ્થરનું કલાત્મક મંદિરનું નિર્માણ કરી રહ્યા છેઃ પી.પી.સ્વામી વહિવટ નિપૂણ સંત છેઃ આ અગાઉ તેમણે માલેગાંવ સાવદા ખંભાત વડોદરા અને મુંબઇ વગેરે મંદિરોમાં કોઠારી તરીકે સેવા આપી અને વિકાસના કાર્યો કર્યાં છેઃ

સ્વામી એક સારા વક્તા પ્રવક્તા અને જાણીતા કથાકાર છેઃ અમેરિકા લંડન વગેરે દેશોમાં ગુજરાતી સમાજમાં તેમનો પ્રભાવ છેઃ સ્વામીના દાદા ગુરુ કૃષ્ણકેશવ શાસ્ત્રી સંપ્રદાયના વિદ્વાન પુરુષ હતા.

પી.પી.સ્વામીના બે નાના સંતો નયન સ્વામી તથા વિનય સ્વામી યુવા કથાકાર છેઃ પી.પી.સ્વામીના ગુરુ પૂજ્ય ગોવિંદપ્રસાદ સ્વામી, શાસ્ત્રી હરિચરણ સ્વામી તથા ભંડારી ગોપાલજીવન સ્વામી તથા પાર્ષદ પોપટ ભગત વગેરેનું એક સારુ મંડળ ગણાય છેઃ

સુરત રામપુરાના વિશાળ સત્સંગ સમાજને કથાવાર્તા માટે પી.પી.સ્વામીના ઘડાયેલા સંતોનો સારો લાભ મળી રહેશે. વડતાલ મેનેજિંગ ટ્રસ્ટી બોર્ડે પી.પી.સ્વામીની સુરત રામપુરા મંદિરના કોઠારી તરીકે નિયુક્તિ કરતા પૂજ્ય નૌતમ સ્વામીએ પી.પી.સ્વામી સહિતના મંડળના સંતોને શુભેચ્છાઓ પાઠવી પૂષ્પમાળાઓ પહેરાવી હતી. પૂજ્ય નૌતમ સ્વામીનું આ માનીતું મંડળ છેઃ જલગાંવમાં જે મંદિરનું નિર્માણ થઈ

રહ્યું છે તેમાં પણ પૂજ્ય નૌતમ સ્વામીનો પૂર્ણ સાથ સહયોગ છેઃ

❏ અનેક શુભેચ્છાઓ…….. ચેરમેન પૂજ્ય દેવપ્રકાશ સ્વામી: કોઠારી પૂજ્ય ઘનશ્યામ સ્વામી: પૂજ્ય બાપુ સ્વામી વગેરે સંતોએ પણ પી.પી.સ્વામીને શુભેચ્છાઓ પાઠવી હતી.

❏ બાલુભાઇ વરિષ્ઠ પત્રકાર

વડતાલ સેન્ટર આણંદ ગુજરાત

August 10, 2018

દિલ્હી પોલીસ કમિશનર અમૂલ્ય પટનાયકની દેખરેખમાં મહિલા સ્વૉટ કમાન્ડો નામનું એક વિશેષ દળ બનાવવામાં આવ્યું છે જેમાં 36 વુમન કોન્સ્ટેબલને 15 મહિના ટ્રેનિંગ આપવામાં આવી છે. આ મહિલા કમાંડૉમાં તાજેતરમાં જ દિલ્હી પોલીસમાં ભરતી થયેલી દેશભરની મહિલા કોન્સ્ટેબલમાંથી અસમમાંથી 13, મણિપુરમાંથી 5, અરૂણાચલ પ્રદેશમાંથી 5, સિક્કીમમાંથી 5, મેઘાલયમાંથી 4, નાગાલેન્ડમાંથી 2 અને મિઝોરમ અને ત્રિપુરામાંથે 1-1 કોન્સ્ટેબલની ભરતી કરવામાં આવી છે. હાલમાં તેમને રાજપથ અને વિજય ચોક પર તૈનાત કરવામાં આવશે. તેમની ટ્ટ્રેનિંગ પીટીસી ઝડૌદા કલાં અને માનેસરમાં થઈ છે.

આગામી સ્વતંત્રતા પર્વ, 15મી ઓગસ્ટ 2018ના રોજ વડાપ્રધાન શ્રી નરેન્દ્ર મોદી દિલ્હીના લાલ કિલ્લાની પરથી દેશને સંબોધી રહ્યાં હશે ત્યારે તેમની સુરક્ષામાં એસપીજી અને લોકલ પોલિસ સાથે દિલ્હી પોલીસની વુમન સ્વૉટ કમાંડો ટીમ પણ તૈનાત હશે. દિલ્હી પોલીસની આ કમાંડૉ ટીમ દેશના કોઈ પણ રાજ્ય પોલીસમાં આ પહેલી ટીમ છે.

દિલ્હી પોલીસે તૈયાર કરેલી આ મહિલા કમાન્ડોને કમાંડૉ ટ્રેનિંગ 12 મહિનાથી આપવામાં આવી હતી. આ દળ પુરૂષ કમાંડૉ કરતા પણ વધારે તાલિમબદ્ધ છે. ઉપરાંત તેમને એનએસજીની કમાંડૉ ટ્રેનિંગ પણ આપવામાં આવી છે. આ મહિલા કમાંડૉ બુલેટપ્રૂફ ગાડીઓમાં તૈનાત હશે. આ ગાડીઓને પણ વુમન કમાંડૉ જ ચલાવશે. શુક્રવારે કેન્દ્રીય ગૃહમંત્રી રાજનાથસિંહે આ દળને દિલ્હીની જનતાને સમર્પિત કર્યું હતું.

દિલ્હી પોલીસનું કહેવું છે કે, વર્તમાનમાં દેશના કોઈ પણ રાજ્ય પોલીસ પાસે આ કક્ષાની મહિલા કમાંડૉ ટીમ નથી.

August 10, 2018

આજે સવારથી જ મુંબઇ ફરીથી સમગ્ર દેશમાં ચર્ચાનું કેન્દ્ર બન્યું છે કેમકે મુંબઇ ATS ટીમને નાલાસોપારા ખાતેથી 8 જેટલા ક્રુડ બોંબનો જથ્થો મળી આવ્યો છે. આ જ કારણથી મુંબઇ ક્રુડ બોંબના ન્યુઝ વાઇરલ થયા છે.

મુંબઇ પોલીસ સૂત્રો પાસેથી મળેલી પ્રાથમિક માહિતી મુજબ મુંબઇ ATS આતંકવાદ વિરોધી ટીમને નાલા સોપારાના એક ઘરમાંથી આઠ દેશી બોમ્બ મળી આવ્યા છે. આટલા મોટા જથ્થામાં ક્રુડ બોંબ મળી આવતા પોલીસ હરકતમાં આવી ચૂકી છે. જેના ઘરમાંથી ક્રુડ બોંબનો જથ્થો મળી આવ્યો છે એ વ્યક્તિની ઓળખ વૈભવ રાઉત નામથી કરવાં આવી છે.

નાલા સોપારામાં દરોડા પાડવા પહોંચેલી ટેરરિસ્ટ સ્ક્વૉડને નજીકમાં આવેલી એક દુકાનમાં પણ વિસ્ફોટક પદાર્થ મળી આવ્યો હતો. આ સામાનની તપાસ કરતા તેમાં ગન પાઉડર તેમજ ડીટોનેટર હોવાનું જણાયું હતું. એવી આશંકા છે કે આ સામાન દ્વારા ઓછામાં ઓછા બે ડઝન બોમ્બ બનાવી શકાય તેમ હતા.

આ વૈભવ રાઉત કોઇ હિન્દુવાદી સામાજિક સંસ્થા સાથે જોડાયેલો હોવાની પ્રાથમિક માહિતી મળી છે. જોકે, જે સંસ્થા સાથે તે જોડાયો છે એ સંસ્થાએ કહી દીધું છે કે તેમને સંજય રાઉત સાથે કોઇ સંબંધ નથી.

ક્રુડ બોંબ રાખવાના ગંભીર ગુના હેઠળ ઝડપાયેલા નાલાસોપારાના વૈભવ રાઉતને કોર્ટમાં રજૂ કરવામાં આવી રહ્યો છે. તેના રિમાન્ડ દરમિયાન વધુ સ્ફોટક વિગતો પ્રકાશમાં આવે તેમ મનાય છે.

August 10, 2018

સાબરમતી નદી પર એલિવેટેડ વે બનાવવાનો આરંભ

metro

વડા પ્રધાન નરેન્દ્ર મોદીના ડ્રીમ પ્રોજેક્ટ મેટ્રો રેલ માટે અમદાવાદમાં યુદ્ધના ધોરણે કામકાજ હાથ ધરાઇ રહ્યું છે. ગુજરાતના સૌપ્રથમ મેટ્રો રેલ પ્રોજેક્ટમાં અમદાવાદમાં સાબરમતી નદી પર એલિવેટેડ વે બનાવવાનું કામ પણ ઝડપભેર હાથ ધરી દેવાયું છે. સૂત્રોના જણાવ્યા અનુસાર ગુજરાતની પહેલી મેટ્રો ટ્રેનનું અમદાવાદમાં ટ્રાયલ-રન આગામી ડિસેમ્બર મહિનામાં ધરાશે.

અમદાવાદમાં મેટ્રો રેલ ઈસ્ટ-વેસ્ટ કૉરિડોર અને નૉર્થ–સાઉથ કૉરિડોર એમ બે કૉરિડોરમાં ચાલશે. અમદાવાદના લોકો જેનો ઇન્તેજાર કરી રહ્યા છે એ મેટ્રો રેલની ટ્રાયલ-રન ૮ ડિસેમ્બરે વસ્ત્રાલથી અપૅરલ પાર્ક સુધી શરૂ કરવાનું પ્લાનિંગ હાથ ધરવામાં આવ્યું છે, જ્યારે નૉર્થ–સાઉથ કૉરિડોરમાં વાસણાથી શ્રેયસ સુધી ૨૦૧૯માં ટ્રાયલ-રન શરૂ કરવાનું આયોજન છે. મેટ્રો રેલનો આ આખો પ્રોજેક્ટ જુલાઈ-૨૦૨૦ સુધીમાં પૂરો કરવાનો ટાર્ગેટ રાખવામાં આવ્યો છે.’

વસ્ત્રાલથી થલતેજ સુધીના રૂટ પર વચ્ચે સાબરમતી નદી આવે છે. સાબરમતી નદી પર મેટ્રો રેલ માટે બ્રિજ બનાવવાની કામગીરીની શરૂઆત કરવામાં આવી છે. સાબરમતી રિવરફ્રન્ટ અને નદીમાં પ્લૅટફૉર્મ બનાવવાની કામગીરી યુદ્ધના ધોરણે આરંભાઈ છે. એકાદ વર્ષમાં મેટ્રો રેલ માટે સાબરમતી નદી પર બ્રિજ બની જશે. ૨૦૧૯ સુધીમાં નદી પર મેટ્રો રેલ માટેનો એલિવેટેડ વે ઉપયોગ માટે લઈ શકાય એ રીતે કામગીરી પૂરી કરવાનો ટાર્ગેટ રાખવામાં આવ્યો છે.

August 10, 2018

ભારત જ નહીં વિશ્વભરમાં દરેક ઘરમાં માબાપને એક જ ફરીયાદ હોય છે કે ભણતા સંતાનો ગેડ્જેટ્સમાં કલાકો વેડફી નાંખે છે. મોબાઇલ, ટેબ્લેટ, આઇપોડ વગેરેને કારણે કુછંદે પણ ચઢી જતા હોય છે. ભાગ્યે જ કોઇ સંતાન રચનાત્મક કાર્ય કરીને નાની ઉંમરમાં મોટું કામ કરે છે. અમદાવાદની એક કિશોરીએ આવું જ રચનાત્મક કામ કરીને સમગ્ર વિશ્વનું ધ્યાન પોતાના તરફ કેન્દ્રીત કર્યું છે.

અમદાવાદમાં રહેતી ૧૨ વર્ષની ઈશા મજીઠિયાએ રામાયણના સુંદરકાંડ પર આધારિત ૩૫ ચિત્રોની એક શ્રેણી તૈયાર કરીને ઇન્ડિયા બુક ઑફ રેકૉર્ડ્સમાં સ્થાન મેળવ્યું છે.

સુંદરકાંડના પાંચમા અધ્યાયમાં ૩૫ તસવીરોની મદદથી સુંદરકાંડની ચોપાઈઓ દર્શાવવામાં આવી છે. આ ચિત્રોમાં કાગળ પર ઍક્રેલિક, ક્રેયોન અને ચારકોલ દ્વારા ચિત્રણ થયું છે. તસવીરોના માધ્યમથી કોઈ શાસ્રનું નિરુપણ થાય એવી પહેલવહેલી ચિત્રકારી આ છે. ઈશા જ્યારે માત્ર ૬ વર્ષની હતી ત્યારથી તેણે આ વિષય પર કામ શરૂ કરેલું.

આ ચિત્રોની શ્રેણીનું અમદાવાદમાં પ્રદર્શન પણ થયેલું અને એ વખથે એક પુસ્તક પણ પ્રકાશિત થયું હતું. ઈશાની મમ્મી પ્રિયાનું કહેવું છે કે બાળકો આપણા પ્રાચીન અને પવિત્ર ગંથોના પ્રચાર અને સંરક્ષણમાં જોડાય એ આ પુસ્તક અને ચિત્રો બનાવવાનો ઉદ્દેશ છે. પુસ્તકમાં સુંદરકાંડના મૂળ પાઠનો ગુજરાતી, હિન્દી અને અંગ્રેજીમાં અનુવાદ પણ કરવામાં આવ્યો છે. આ કામ માટે તાજેતરમાં ઈશાનું નામ ઇન્ડિયા બુક ઑફ રેકૉર્ડ્સમાં નોંધવામાં આવ્યું છે.

isha2

isha

અમદાવાદની ઈશા મજીઠિયાએ ચિત્રો થકી સુંદરકાંડ સાર્થક કર્યું

August 10, 2018

કૉંગ્રેસે 41 વર્ષ પછી પહેલીવાર રાજ્યસભાના નાયબ અધ્યક્ષની ચૂંટણીનો હારનો સામનો કરવો પડ્યો છે અને બિનકોંગ્રેસી સાંસદ ચૂંટાયા છે. જોકે, હજુ આ પદ પર ભાજપના સાંસદ હજુ બેસી શક્યા નથી. તેમ છતાં વડાપ્રધાન નરેન્દ્ર મોદી અને ભાજપના અમિત શાહની ચાલ’ને સમજવામાં રાહુલ ગાંધીએ ફરી એકવાર ગોથું ખાધું છે. રાહુલ ગાંધીએ એવી ઘણી ભૂલો કરી કે રાજ્યસભા ઉપાધ્યક્ષની ચૂંટણીમાં કોંગ્રેસે હારનો સામનો કરવો પડ્યો ?

જો કોંગ્રેસ અધ્યક્ષ રાહુલ ગાંધીએ આ પાંચ ભૂલ ન કરી હોત અને સક્રિય રહ્યાં હોત તો હરિવંશ સામે બીકે હરિપ્રસાદ કદાચ જીતી પણ શક્યા હોત. બી.કે. હરિપ્રસાદની પસંદગી સાવ છેલ્લી ઘડીએ કરાઇ. જ્યારે એનડીએ દ્વારા ચૂટણીની જાહેરાત સાથે જ ઉમેદવાર નક્કી કરાયો. વિપક્ષમાં ફોર્મ ભરવાના દિવસ સાથે ઉમેદવાર મામલે માથાકૂટ ચાલતી રહી. વિપક્ષ તરફથી પહેલાં એનસીપીના વંદના ચવ્હાણનું નામ આવ્યું, બાદમાં રાહુલે અંતિમ પત્તુ ખોલ્યું અને બીકે હરિપ્રસાદના નામની જાહેરાત કરી.

કોંગ્રેસે બીકે હરિપ્રસાદને ઉમેદવાર જાહેર કર્યા, એટલે આ ચૂંટણીજંગ વિપક્ષોની સંયુક્ત રીતે નહીં પરંતુ કોંગ્રેસનો વ્યક્તિગત જંગ બની ગયો. એટલે કોંગ્રેસ તરફથી સમર્થન મેળવવાની કોશિશ કરાઈ, પરંતુ યુપીએના બાકી પક્ષોની ભૂમિકા ફક્ત મત આપવા પૂરતી સિમિત થઈ ગઈ. જ્યારે એનડીએ તરફથી હરિવંશ ઉમેદવાર હતા, તેમ છતાં વડાપ્રધાન મોદી અને ભાજપ અધ્યક્ષ અમિત શાહએ એનડીએના સહયોગી દળો અને વિપક્ષના કેટલાક દળોના સમર્થન માટે વાતચીત કરી હતી.

રાજ્યસભાના ઉપાધ્યક્ષની ચૂંટણી જીતવામાં એનડીએ પહેલાંથી જ સક્રિય રહ્યું. જ્યારે કોંગ્રેસ તરફથી ખાસ સક્રિયતા જોવા મળી નહીં.

ભાજપના નેતૃત્વયુક્ત એનડીએમાં જેડીયૂના ઉમેદવાર હરિવંશને જાહેર કર્યા ત્યારથી જ શિવસેના અને અકાલીદળે ખુલ્લીને નારાજગી જાહેર કરી હતી. આ બંને પક્ષો જેડી (યુ)ને બદલે પોતાના ઉમેદવારની પસંદગી થાય તેમ ઈચ્છતા હતા. તેમ છતાં આ પક્ષોની નારાજગીનો ફાયદો કોંગ્રેસ ઉઠાવી શકી નહીં. જ્યારે સમયને વહેણને જોઈને મોદી અને અમિત શાહે શિવસેના અને અકાળી દળ સાથે વાતચીત કરીને મનાવી લીધા.

August 10, 2018

ભારતની મહિલા ક્રિકેટ ટીમના કોચ બનવા ક્રિકેટ બોર્ડને કુલ ૨૦ અરજીઓ મળી છે જેમાં ભૂતપૂર્વ ભારતીય સ્પિનરો સુનીલ જોશી અને રમેશ પોવારનો સમાવેશ છે. તમામ અરજીકર્તાઓના આજે મુંબઈમાં ઇન્ટરવ્યૂ લેવામાં આવશે.

અન્ય અરજી કરનારાંઓમાં ભૂતપૂર્વ ભારતીય વિકેટકીપર અજય રાત્રા તેમ જ વિજય યાદવ, ભારતની ભૂતપૂર્વ મહિલા કૅપ્ટન મમતા મબેન તેમ જ સુમન શર્મા, મારિયા ફાહે અને પૂર્ણિમા રાવનો સમાવેશ છે. આ બધામાં ભૂતપૂર્વ સ્પિનરો જોશી અને પોવાર સૌથી મજબૂત દાવેદાર ગણાય છે.

તાજેતરમાં તુષાર અરોઠેને તાજેતરમાં ટીમની અમુક ‘સિનિયર’ ખેલાડીઓની ‘સલાહ’ને આધારે કોચના હોદ્દા પરથી દૂર કરવામાં આવ્યા હતા અને તેમના સ્થાને પોવારને વચગાળાના કોચ બનાવવામાં આવ્યા છે.

સુનીલ જોશી ભારત વતી ૧૫ ટેસ્ટ અને ૬૯ વન-ડે રમ્યો હતો. પોવાર ભારત વતી બે ટેસ્ટ અને ૩૧ વન-ડે રમ્યો હતો.

Newer Posts

Older Posts

Blog - Page 661 of 709 - CIA Live

ધોરણ 12 વિજ્ઞાનપ્રવાહની પ્રાયોગિક પરીક્ષા હવે ગુજરાત શિક્ષણ બોર્ડ લેશે

ફક્તને ફક્ત સવર્ણો માટે ગુજરાત સરકારની 8 યોજનાઓની જાહેરાત અને આ વર્ષથી જ અમલ

આજથી દરિયાની મોટી ભરતી મુંબઇના બીચો પર ટનબંધી કચરો ઘસડી લાવશે

સુરત રામપુરા સ્વામિનારાયણ મંદિરના કોઠારીપદે પી.પી.સ્વામીની નિયુક્તિ

દિલ્હી પોલીસની વિશેષ મહિલા કમાન્ડો લાલ કિલ્લા પર પ્રધાનમંત્રીની સુરક્ષા કરશે

મુંબઇ ATSએ નાલાસોપારામાંથી 8 ક્રુડ બોંબ સાથે એકને ઝડપ્યો

ડિસેમ્બરમાં થશે અમદાવાદ મેટ્રો રેલની ટ્રાયલ-રન

અમદાવાદની 12 વર્ષિય ઇશાએ ૩૫ ચિત્રોમાં સમજાવ્યું આખું સુંદરકાંડ !!

રાહુલ ગાંધીની ભૂલોને કારણે રાજ્યસભામાં ચૂંટણી હાર્યા

મહિલા ક્રિકેટ ટીમના કોચ માટે આજે ઇન્ટરવ્યુ, સુનીલ જોશી, પોવાર સહિત ૨૦ દાવેદારો