અમેરિકાના પ્રમુખ ડોનલ્ડ ટ્રમ્પે ફરી એકવાર વ્યાપાર યુદ્ધ શરૂ કરવાનું શંખ ફૂંક્યું છે ત્યારથી વૈશ્ર્વિક ઇક્વિટી માર્કેટની દશા બેસી ગઇ છે. રોકાણકારોએ ઇક્વિટી તરફથી સેફ હેવન ઇન્વેસ્ટમેન્ટ તરફ દોડી ગયા હોવાથી વૈશ્ર્વિક શેરબજારોનું સેન્ટિમેન્ટ ડહોળાયું છે.
ટ્રેડવોર વકરવાના ભય વચ્ચે સેન્સેક્સમાં 488 પોઈન્ટ્સનું ધોવાણ જોવા મળ્યું હતું. અમેરિકા ચીન વચ્ચે ટ્રેડવોર ગંભીર સ્વરૂપ ધારણ કરે તેવી આશંકા સાથે આજે વૈશ્ર્વિક શેરબજારોની
સાથે સાથે ભારતીય ઈક્વિટી માર્કેટમાં પણ ભારે વેચવાલી જોવા મળી હતી અને સેન્સેક્સ 488 પોઈન્ટના કડાકા સાથે 38,000 પોઇન્ટની નીચે ગબડી ગયો હતો.
આ તરફ એ જ કારણે રોકાણકારો સેફ હેવન ગોલ્ડ તરફ દોડી ગયા હોવાથી આંતરરાષ્ટ્રીય બજારમાં સોનું એક સપ્તાહની ઊંચી સપાટીએ પહોંચ્યું હતું.
લંડન સોનું 0.2 ટકા વધીને 1287.20 ડોલર બોલાયું હતું. સ્થાનિકમાં પણ સોનાના ભાવમાં રૂ. 120નો ઉછાળો હતો. આ તરફ ફોરેક્સ માર્કેટમાં ડોલર સામે રૂપિયો 28 પૈસા ગબડ્યો હતો.
અમેરિકાએ ચીન પર અગાઉ સધાયેલી સમજૂતીમાંથી પીછેહઠ કરી હોવાનો આક્ષેપ કર્યો હતો અને તેને કારણે વૈશ્ર્વિક બજારોમાં ગભરાટ ભરી વેચવાલી જોવા મળી હતી.
મિડકેપ અને સ્મોલકેપ ઈન્ડેક્સ અનુક્રમે 0.96 ટકા અને 1.21 ટકા ઘટીને બંધ રહ્યા હતા. સેન્સેક્સની પડતી માટે મુખ્ય કારણ રિલાયન્સ ઇન્ડસ્ટ્રીઝ, એચડીએફસી, એચડીએફસી બેન્ક, આઇસીઆઇસીઆઇ બેન્ક અને સ્ટેટ બેન્કના શેરોમાં જોવા મળેલું 3.35 ટકા સુધીનું ધોવાણ છે.
વિશ્ર્વબજારમાં નરમાઇનો માહોલ રહ્યો હતો. એક્સચેન્જ પાસેથી ઉપલબ્ધ પ્રારંભિક માહિતી અનુસાર વિદેશી સંસ્થાકીય રોકાણકારો (એફઆઇઆઇ)એ પાછલા સત્રમાં રૂ. 645.08 કરોડની વેચવાલી નોંધાવી હતી જ્યારે સ્થાનિક સંસ્થાકીય રોકાણકારો (ડીઆઇઆઇ)એ રૂ. 818.84 કરોડના શેર ખરીદ્યા હતાં.
રોકાણકારો 23મી મેએ લોકસભાની ચૂંટણીના રિઝલ્ટની રાહ જોઈ રહ્યા હોવાથી બજાર રેન્જબાઉન્ડ થઇ ગયું છે. જોકે એક વર્ગ અનુસાર એનડીએ સરકારના વિજય અને નીતિમાં સાતત્યનું પરિબળ બજારમાં ડિસ્કાઉન્ટ થઈ ગયું છે. આ સ્થિતિમાં હવે બજાર પર વૈશ્ર્વિક પરિબળોની અસર વધુ વર્તાવા માંડી છે.
