Blog - Page 402 of 708

January 23, 2020

મુંબઇમાં પબ અને બાર રાત્રે દોઢ વાગ્યા સુધી જ ખુલ્લા રાખવા મંજૂરી

મહારાષ્ટ્ર કેબિનેટે આખી રાત રેસ્ટોરાં, મલ્ટિપ્લેકસ અને મૉલ્સ ખુલ્લા રાખવાના નિર્ણયને બુધવારે લીલી ઝંડી આપતા ૨૭ જાન્યુઆરી ને સોમવારથી આ નિર્ણય અમલમાં આવશે. જોકે બાર અને પબ એક્સાઈઝના નિયમો પ્રમાણે જ ચાલશે, આથી તે રાત્રે ૧.૩૦ વાગ્યે બંધ થઈ જશે. આ નિર્ણય અગાઉ વિધાનસભામાં થઈ ગયો હોવાથી સત્તાવાર રીતે કેબિનેટમાં પ્રસ્તાવિત થયો હતો, માત્ર આ મુદ્દે પર્યટન પ્રધાન આદિત્ય ઠાકરેએ કેબિનેટને જાણકારી આપી હતી.

જે બિનરહેવાસી વિસ્તારોમાં એકમો છે અને તેમને પોતાનું કમ્પાઉન્ડ અને ગૅટ છે, તે તમામ એકમો આ નિર્ણયનો લાભ લઈ શકે છે. રેસ્ટોરાં, મોલ્સ, શૉપિંગ સેન્ટર કે પછી થિયેટર કે મલ્ટિપ્લેકસ આ નિર્ણયનો લાભ લઈ શકે. આ નિર્ણયને લીધે જનતાને રાત્રે પણ ખાવા-પીવા કે પિક્ચર જોવાની સવલત મળશે અને પર્યટકો માટે આ બહુ મહત્ત્વનો નિર્ણય સાબિત થશે, સાથે રાજ્યની મહેસૂલી આવક પણ વધશે.

મુંબઇમાં પબ અને બાર રાત્રે દોઢ વાગ્યા સુધીની જ ખુલ્લા રાખવા મંજૂરી

ઠાકરેના જણાવ્યા અનુસાર આ અંગે તેમણે છેલ્લા બે વર્ષથી અભ્યાસ કર્યો છે અને સતત દોડતા મુંબઈને આ સવલતની જરૂર છે. તેમણે એમ પણ જણાવ્યું હતું કે આ નિર્ણયથી મુંબઈ પોલીસ માટે કામ આસાન થશે. તેમણે અગાઉ દોઢ વાગ્યા બાદ એકમો બંધ છે કે નહીં, તે જોવાનું રહેતું હતું, પરંતુ હવે તેઓ કાયદો અને વ્યવસ્થા પર ધ્યાન કેન્દ્રીત કરી શકશે.

પર્યટકો અને શહેરના લોકોને ભૂખ લાગે તો દસ વાગ્યા પછી ક્યાં જવું તે સવાલ થતો હતો. લંડન જેવા શહેરોમાં આ વ્યવસ્થા છે અને મહેસૂલી આવક પણ છે. મુંબઈ સુરક્ષિત શહેર છે અને દરેક મોલ્સ કે રેસ્ટોરાંમાં સીસીટીવી કેમેરા હોય છે. જો કોઈને વધારે સુરક્ષા જોઈતી હોય તો તેમણે નાણાં ચૂકવવા પડશે.

January 23, 2020

રોટરી ક્લબ ઓફ સૂરતનું ધો.10-12 બોર્ડના વિદ્યાર્થીઓ માટે કારકિર્દી માર્ગદર્શનનું સમયસરનું આયોજન

રોટરી ક્લબ ઓફ સૂરત દ્વારા જીવન ભારતી મંડળના સહયોગથી સૂરત સમેત સમગ્ર દક્ષિણ ગુજરાતના વિદ્યાર્થીઓ માટે કેરીયર ગાઇડન્સ મહોત્સવનું સમયસરનું આયોજન હાથ ધરવામાં આવ્યું છે. તા.22મી જાન્યુઆરી 2020ને બુધવારે બપોરે 4 કલાકે સૂરતના નાનપુરા સ્થિત જીવનભારતી સંકુલના રોટરી હોલ ખાતે કારકિર્દી માર્ગદર્શન મહોત્સવનો આરંભ જાણીતા કારકિર્દી માર્ગદર્શનક જયેશ બ્રહ્મભટ્ટના સેશન સાથે થયો હતો. એ પછી પી.પી. સવાણી યુનિવર્સિટીના ફેકલ્ટી ડો. તેજલ પટેલએ પીપી સવાણી યુનિવર્સિટી સંકુલમાં ચાલતા અભ્યાસક્રમો અંગે વિગતવાર ચર્ચા કરી હતી. રોટરી કલબ ઓફ સૂરતના નિખિલ મદ્રાસીએ વાલીઓ અને વિદ્યાર્થીઓને કારકિર્દી માર્ગદર્શન મહોત્સવની રૂપરેખા આપી હતી.

રોટરી ક્લબ ઓફ સૂરત આયોજિત કરિયર મહોત્સવના પહેલા દિવસે જયેશ બ્રહ્મભટ્ટે મુદ્દાની વાત એ કરી કે કોલેજ કેમ્પસ (આલ્ફાબેટ સી) નહીં પણ કોર્સ કન્ટેન્ટ (આલ્ફાબેટ સી) ને જોઇ-જાણીને પ્રવેશ મેળવવો એ સમયનો તકાજો છે. બી.કોમ.માં કે બીબીએ ફાઇનાન્સમાં ટેલી અકાઉન્ટ કે જીએસટી જો શીખવાડવામાં આવતું ન હોય તો એ કોર્સ કરવા એટલે સમય વેડફવા સમાન છે.

તા.22મી જાન્યુઆરીએ કારકિર્દી મહોત્સવના પહેલા દિવસે જયેશ બ્રહ્મભટ્ટે ધો.12 કોમર્સ અને આર્ટસ પછી ઉપલબ્ધ કારકિર્દીના વિકલ્પો અંગેની જાણકારી આપતા જણાવ્યું હતું વિશ્વમાં જેમ દરેક ક્ષેત્રોમાં ડાઇવર્સિટીનો ટ્રેન્ડ છે એમ હાયર એજ્યુકેશનમાં પણ ડાઇવર્સિટીએ સ્થાન લીધું છે. મોટા ભાગના લોકોને એવી જ ગેરસમજ હોય છે કે આર્ટિફિશ્યલ ઇન્ટેલિજન્સ, ડેટા સાયન્સ, એક્ચ્યુરીયલ સાયન્સ વગેરે જેવા અભ્યાસક્રમો સાયન્સ બેઝ હોય છે અને તેમાં કોમર્સના વિદ્યાર્થીઓ પ્રવેશ ન લઇ શકે. પરંતુ, આ વાત ભૂલભરેલી છે. કોમર્સના વિદ્યાર્થીઓ પણ હવે ઉપરોક્ત કોર્સમાં પ્રવેશ મેળવીને ફ્યુચર ટ્રેન્ડમાં છવાયેલા અભ્યાસક્રમોમાં કારકિર્દીનું ઘડતર કરી શકે છે.

જયેશ બ્રહ્મભટ્ટે વાલીઓ અને વિદ્યાર્થીઓને કહ્યું કે હાલ જાન્યુઆરી અને ફેબ્રુઆરીનો સમયગાળો બોર્ડના વિદ્યાર્થીઓ માટે એટલા માટે નિર્ણાયક હોય છે કેમકે આ સમયગાળામાં જુદી જુદી પ્રવેશ પરીક્ષાઓના રજિસ્ટ્રેશન પ્રોસેસ હાથ ધરાય છે. સાયન્સ કરતા વધુ પ્રવેશ પરીક્ષા કોમર્સના વિદ્યાર્થીઓ માટે લેવાતી હોય છે અને ધો.12ના પરીણામના આધારે પ્રવેશ મળતો હોય તેવા અભ્યાસક્રમો કરતા પ્રવેશ પરીક્ષાના આધારે મેરીટ બનતું હોય તેવા અભ્યાસક્રમોનું કન્ટેન્ટ પ્રમાણમાં વધુ અસરકારક જણાય છે. એટલે ધો.12 કોમર્સ અને આર્ટસના વિદ્યાર્થીઓએ એવો અભિગમ રાખવો જોઇએ કે વધુને વધુ સ્પર્ધાત્મક પ્રવેશ પરીક્ષા આપીને તેના આધારે સારુ કન્ટેન્ટ ધરાવતા કોર્સમાં પ્રવેશ મેળવવો જોઇએ.

આખું સપ્તાહ જારી રહેશે રોટરી કલબ ઓફ સૂરતનું કારકિર્દી માર્ગદર્શન સપ્તાહ

January 23, 2020

ચેમ્બર ઓફ કોમર્સના 12માં ઉદ્યોગ Expoનું આયોજન 24થી 27 જાન્યુઆરી દરમિયાન

ચેમ્બરના પ્રમુખ શ્રી કેતન દેસાઇએ ‘ઉદ્યોગ પ્રદર્શન’ અંગે પત્રકારોને માહિતી આપતા જણાવ્યુ હતુ કે, દક્ષિણ ગુજરાતના વ્યાપાર અને ઉદ્યોગના વિકાસ માટે સતત પ્રયત્નશીલ એવી સંસ્થા ધી સધર્ન ગુજરાત ચેમ્બર ઓફ કોમર્સ એન્ડ ઈન્ડસ્ટ્રી દ્વારા વર્ષોથી વિવિધ પ્રદર્શનોનું સફળતાપૂર્વક આયોજન કરવામાં આવે છે. ચેમ્બરના ફલેગશીપ એવા ઉદ્યોગ પ્રદર્શનનું દર બીજા વર્ષે આયોજન થાય છે. જેના ભાગરૂપે ચેમ્બર દ્વારા આ વર્ષે ઉદ્યોગ પ્રદર્શનની ૧રમી આવૃત્તિ તરીકે ‘ઉદ્યોગ– ર૦ર૦’નું ભવ્ય આયોજન સરસાણા સ્થિત સુરત ઈન્ટરનેશનલ એકઝીબીશન એન્ડ કન્વેન્શન સેન્ટર ખાતે આગામી તા. ર૪ જાન્યુઆરીથી ર૭ જાન્યુઆરી ર૦ર૦ દરમિયાન કરવામાં આવ્યુ છે.

તેમણે વધુમાં જણાવ્યુ હતુ કે, એમએસએમઇના હબ તરીકે ઓળખાતા દક્ષિણ ગુજરાતને ટેક્ષ્ટાઇલ મશીનરી મેન્યુફેકચરીંગનું હબ બનાવવાની દિશામાં પણ ચેમ્બર દ્વારા પ્રયાસ કરવામાં આવી રહયો છે. આ અંગે વિદેશી હુંડીયામણને પ્રોત્સાહન આપવા માટે માનનીય વડાપ્રધાન શ્રી નરેન્દ્રભાઇ મોદીને ચેમ્બર દ્વારા અનુરોધ કરવામાં આવ્યો હતો. તાજેતરમાં જ માનનીય ટેક્ષ્ટાઇલ મંત્રી શ્રીમતી સ્મૃતિબેન ઇરાની સાથે પણ સુરતમાં ટેક્ષ્ટાઇલ મશીનરીના ઉત્પાદન માટે કઈ રીતે આગળ વધી શકાય તે અંગે ચર્ચા કરવામાં આવી હતી. જેના ભાગરૂપે પણ ચેમ્બર દ્વારા આ દિશામાં પ્રયાસ કરવામાં આવી રહયો છે.

‘ઉદ્યોગ–ર૦ર૦’ પ્રદર્શનનો ઉદ્‌ઘાટન સમારોહ શુક્રવારે, તા. ર૪/૦૧/ર૦ર૦ના રોજ સવારે ૧૦ઃ૩૦ કલાકે યોજાશે. જેમાં મુખ્ય મહેમાન તરીકે ગુજરાતના આરોગ્ય અને પરીવાર કલ્યાણ, તબીબી શિક્ષણના રાજય કક્ષાના માનનીય મંત્રી શ્રી કિશોરભાઇ કાનાણી (કુમાર) પધારશે અને તેમના વરદ હસ્તે પ્રદર્શનનું ઉદ્‌ઘાટન કરવામાં આવશે. માનનીય સાંસદ શ્રી સી.આર. પાટીલ અને શ્રીમતી દર્શનાબેન જરદોશ તથા રાજયના ઇન્ડસ્ટ્રીઝ કમિશનર ડો. રાહુલ બી. ગુપ્તા (આઇએએસ) અને યસ બેંક મુંબઇના સિનિયર પ્રેસિડેન્ટ શ્રી અરૂણ ટીકૂ સમારોહમાં અતિથિ વિશેષ તરીકે સ્થાન શોભાવશે.

‘ઉદ્યોગ પ્રદર્શન’ જાહેર જનતા માટે સવારે ૧૦:૦૦ થી સાંજે ૬:૦૦ કલાક સુધી ખુલ્લુ રહેશે

ચેમ્બરના એકઝીબીશન સેલના હેડ શ્રી દેવેશ પટેલે જણાવ્યુ હતુ કે, ચેમ્બરે આ મહિનામાં જ ‘સિટમે’ પ્રદર્શનનું આયોજન કર્યુ હતુ. જેમાં કવોલિટી ફેબ્રિકસના ઉત્પાદન માટે પ્રદર્શિત કરવામાં આવેલી એમ્બ્રોઇડરી મશીનરીની ભારે ડિમાન્ડ જોવા મળી હતી. સામાન્યપણે સુરતમાં લૂમ્સના ચારથી પાંચ મોટા ઉત્પાદકો છે. ટીએફઓના પાંચ મોટા અને સાત જેટલા નાના ઉત્પાદકો છે. જયારે ટેક્ષ્ચ્યુરાઇઝીંગના પાંચ, સ્પીલિટીંગ મશીનના પાંચ અને યાર્ન ડાઈંગ મશીનના પાંચ ઉત્પાદકો છે. આથી નાના મશીનરી ઉત્પાદન ક્ષેત્રને બહોળું કરવા માટે ‘ઉદ્યોગ પ્રદર્શન’ ખૂબ જ મહત્વનું બની રહેશે. સુરત સહિત દક્ષિણ ગુજરાતમાં ટેક્ષ્ટાઇલ મશીનરીનાં ઉત્પાદકોને અત્યાધુનિક ટેકનોલોજીવાળી મશીનરીનું ઉત્પાદન લેવા માટે કઈ મુશ્કેલી નડી રહી છે તે પણ પ્રદર્શનમાં ભાગ લેનારા ઉદ્યોગ સાહસિકો સાથેના સંવાદના માધ્યમથી જાણી શકાશે.

‘ઉદ્યોગ ર૦ર૦’ પ્રદર્શનના ચેરમેન શ્રી વિજય મેવાવાલાએ જણાવ્યુ હતુ કે, સરસાણા સ્થિત એકઝીબીશન સેન્ટરમાં કુલ ૧,રપ,૦૦૦ સ્કવેર ફૂટ વિસ્તારમાં ઉદ્યોગ પ્રદર્શન યોજાયુ છે. જેમાં ટેક્ષ્ટાઈલ મશીનરી, ટેક્ષ્ટાઈલ એન્સીલરી, એન્જીનિયરીંગ મશીનરી એન્ડ મશીન ટૂલ્સ, ઈલેકટ્રીકલ – ઈલેકટ્રોનિકસ એન્ડ ઈન્સ્ટ્રુમેન્ટેશન, બેન્કીંગ એન્ડ ફાયનાન્સ, ગવર્નમેન્ટ પીએસયુ અને કોર્પોરેટ પેવેલિયન (જેડા, ધોલેરા, ટૂરીઝમ, જીઆઇડીસી, ટોરેન્ટ) અને ઈન્ડસ્ટ્રીયલ સેફટી એન્ડ સિકયુરીટીના ઉત્પાદકો દ્વારા તેમની પ્રોડકટ્‌સ અને સર્વિસીઝ પ્રદર્શિત કરવામાં આવશે.

તેમણે વધુમાં જણાવ્યુ હતુ કે અમદાવાદ, વડોદરા, રાજકોટ, સુરત, વાપી, ઉમરગામ, મુંબઇ, દિલ્હી, ગુરૂગ્રામ, પાણીપત, નોઇડા અને કોઇમ્બતુરના કુલ ર૦૦ જેટલા સાહસિકોએ પ્રદર્શનમાં ભાગ લીધો છે.

ઉદ્યોગ પ્રદર્શન દરમિયાન ચેમ્બર, સુરત ટેક્ષ્ટાઇલ કલબ અને એનઆઇએફટીના સંયુકત ઉપક્રમે શુક્રવારે,

તા. ર૪/૦૧/ર૦ર૦ના રોજ સાંજે ૭:૦૦ કલાકે ફેશન શોનું આયોજન કરવામાં આવ્યુ છે. જેમાં સુરતમાં બનતા વિવિધ ફેબ્રિકસનું મોડેલ્સ દ્વારા પ્રદર્શન કરવામાં આવશે. આ ઉપરાંત રવિવારે, તા. ર૬/૦૧/ર૦ર૦ના રોજ સાંજે ૭:૦૦ કલાકે લોકડાયરાનું પણ આયોજન કરાયુ છે. જેમાં જાણીતી ગાયિકા સુશ્રી કિંજલ દવે અને ગાયક શ્રી ઘનશ્યામ કળથીયા દ્વારા રમઝટ બોલાવવામાં આવશે.

ચેમ્બરના આ આયોજનમાં રાજય સરકારના ઇન્ડસ્ટ્રીયલ એક્ષ્ટેન્શન બ્યુરો, ગુજરાત ઇન્ડસ્ટ્રીયલ ડેવલપમેન્ટ કોર્પોરેશન, ઇ–ગવર્નન્સ અને સાયન્સ એન્ડ ટેકનોલોજી વિભાગનો સહકાર પ્રાપ્ત થયો છે. ગોલ્ડ સ્પોન્સર તરીકે રીલાયન્સ ઈન્ડસ્ટ્રીઝ લિ., સિલ્વર સ્પોન્સર તરીકે કલર ટેક્ષ, એમએસએમઇ બેન્કીંગ પાર્ટનર તરીકે યસ બેંક જોડાયુ છે. આ ઉપરાંત સુરત મહાનગરપાલિકા, વેડરોડ આર્ટસિલ્ક સ્મોલ સ્કેલ કો–ઓપરેટીવ ફેડરેશન લિ., માંગરોળ તાલુકા ઇન્ડસ્ટ્રીઝ વેલફેર એસોસિએશન, સુરત ટેક્ષ્ટાઇલ કલબ, સચીન ઈન્ડસ્ટ્રીયલ કો–ઓપરેટીવ સોસાયટી અને પાંડેસરા વિવર્સ કો–ઓપરેટીવ સોસાયટી લિ. ચેમ્બરની સાથે એસોસિએટ્‌સ તરીકે જોડાયા છે.

January 23, 2020

ઈન્ટરપોલ દ્વારા દુષ્કર્મ, યૌન ઉત્પીડનના આરોપી સ્વયંભૂ બાબા નિત્યાનંદની તલાશ માટે બ્લ્યૂકોર્નર નોટિસ જારી કરાઈ છે. બાબાને શોધવામાં મદદ માટે આ નોટિસ જારી કરાઈ હોવાના સમાચારને ગુજરાત પોલીસે બુધવારે સમર્થન આપ્યું હતું.

ગત ડિસેમ્બરમાં ગુજરાત પોલીસે દાવો કર્યો હતો કે, સ્વયંભૂ બાબા નિત્યાનંદ દેશ છોડીને ફરાર થઈ ગયો છે. તેની તલાશ માટે વિદેશ મંત્રાલય પણ મદદ કરી રહ્યું છે. ગુજરાતમાં બાળકોનું અપહરણ કરી, અમદાવાદ સ્થિત આશ્રમમાં બંધક બનાવીને અનુયાયીઓ પાસેથી ફાળો એકઠો કરવાના કામે લગાડી દેવાનો બાબા પર આરોપ છે.

કર્ણાટકમાં પણ બની બેઠેલા બાબા નિત્યાનંદ વિરુદ્ધ અપહરણ અને દુષ્કર્મના કેસ થયેલા છે. પોલીસે બાબાની બે મહિલા શિષ્યા સાધ્વી પ્રાણ પ્રિયાનંદ અને પ્રિયાતત્ત્વ રિદ્ધિકરણની ધરપકડ કરાઈ હતી.

ઈન્ટરપોલ એવા ફરાર અપરાધીની તલાશ માટે બ્લ્યૂકોર્નર નોટિસ જારી કરે છે જેની ઓળખ થઈ ચૂકી હોય અથવા ન થઈ હોય કે અપરાધી કાયદાનો ભંગ કરીને ફરાર થયો હોય.
મોજશોખવાળી જીવનશૈલી માટે જાણીતા બની ગયેલા બાબા નિત્યાનંદે દક્ષિણ અને રિકાના એક દેશ ઈકવાડોરમાં એન ટાપુ ખરીદી તેને આઝાદ દેશ જાહેર કરી દીધો છે.

January 23, 2020

આગામી તા.24 જાન્યુઆરી 2020ને શુક્રવારે પોષ વદ અમાસે સવારે 9 કલાક અને 54 મિનિટે ન્યાયના દેવતા શનિ પોતાની સ્વરાશિ મકરમાં પ્રવેશ કરશે. શનિનું મકર રાશિમાં આગમન થતાં જ વૃષભ, કન્યા અને વૃશ્ચિક રાશિને પનોતી ઉતરશે તો મિથુન, તુલા અને કુંભ રાશિને પનોતી શરૂ થશે. શનિ મહારાજ 24 વર્ષ પછી પોતાની સ્વરાશિ મકરમાં ભ્રમણ કરશે. શનિ જ્યારે જ્યારે મકરમાં હોય ત્યારે ત્યારે દેશમાં ઉથલ-પાથલ થઈ છે. આ શનિના મહાપરિવર્તન અંગે અલગ અલગ જયોતિષીઓએ કથન કર્યું છે.

છેલ્લા સવાસો વર્ષનો ઈતિહાસ જોઈએ તો 1900 થી 2020 સુધીમાં શનિ ચાર વખત પોતાના સ્વગૃહે ભ્રમણ કરી ચૂકયો છે. હવે પાંચમી વાર 24મી જાન્યુઆરી 2020ના રોજ પોતાની રાશિમાં ભ્રમણ કરશે. શનિનું પરિવર્તન આગામી સમયમાં રાજકીય ઉથલ-પાથલ કરાવે. સરહદે તનાવ રહે પણ યુદ્ધ થવાની શકયતા નથી. શનિના રાશિ પરિવર્તનથી વૃષભ અને કન્યા રાશિના જાતકોને નાની પનોતી પૂરી થશે અને મિથુન તથા તુલા રાશિના જાતકોને લોખંડના પાયે નાની અઢી વર્ષની પનોતી થશે. જ્યારે વૃશ્ચિક રાશિના જાતકોને સાડા સાતી પનોતી પૂરી થતા તે હાશકારો અનુભવશે.

કુંભ રાશિના જાતકોને સાડા સાતીનો પ્રથમ તબક્કો શરૂ થશે. ધન રાશિના જાતકોને ચાંદીના પાયે ઉતરતી પનોતી લાભદાયી નિવડશે.

જે દિવસે શનિ મહારાજ મકર રાશિમાં પ્રવેશ કરશે તે દિવસે પોષ વદ અમાસ છે અને આ સમયે ચંદ્ર પણ મકર રાશિમાં છે. શનિ ન્યાયના દેવતા છે. સારૂ કામ કરે તેને સારૂ ફળ આપે છે અને ખરાબ કર્મ કરે તેને ખરાબ ફળ આપે છે.

ભારત દેશની રાશિ પ્રમાણે જોતા મકરનો શનિ ભારતને આર્થિક પ્રગતિ કરાવશે અને મંદીમાંથી ઉગારશે. જ્યોતિષ શાત્રના અભ્યાસુ જયપ્રકાશ માઢકે જણાવ્યું કે, 24 જાન્યુઆરી 2020થી શનિ મકર રાશિમાં પ્રવેશ કરી રહ્યો છે. જે વક્રી-માર્ગી ભ્રમણ કરતા તા.17 જાન્યુઆરી 2023 સુધી મકર રાશિમાં રહેશે. 2020ની સાલમાં જ 23 સપ્ટેમ્બરના રોજ રાહુ પણ મિથુન રાશિ છોડી વૃષભ રાશિમાં પ્રવેશ કરશે જે દોઢ વર્ષ સુધી ત્યાં રહેશે. આ દોઢ વર્ષ દેશ માટે સાવધ રહેવા જેવો સમય હશે.

ભૂતકાળમાં જ્યારે શનિ મકર રાશિમાં હતો ત્યારે નોંધપાત્ર ઘટનાઓ બની છે જેમાં ચીન સાથે યુદ્ધ, કાશ્મીરમાંથી પંડિતોનું પલાયન, રાજીવ ગાંધીની હત્યા, બાબરી મસ્જિદની ઘટના, મુંબઈમાં શ્રેણીબદ્ધ વિસ્ફોટો, લાતુરનો ભૂકંપ જેવી ઘટનાઓ બની હતી.

રાશિ પર અસર

મેષ (અ.લ.ઈ.): મેષ રાશિના લોકોને મકરનો શનિ કર્મ ભુવનમાંથી પસાર થશે. વેપારમાં લાભ અપાવે. નોકરીમાં ઉન્નતિના યોગો. મકાન, વાહનો ખરીદવામાં સાવચેતી રાખવી.
વૃષભ (બ.વ.ઉ.): આ રાશિના જાતકોને શનિ ભાગ્ય ભુવનમાંથી પસાર થશે. ભાગ્યોદય કરાવે. વિદેશથી લાભ, આર્થિક લાભ અપાવે અને વિજય અપાવે. શત્રુઓ કાબુમાં રહે.
મિથુન (ક.છ.ઘ.): મિથુન રાશિના લોકોને મકરનો શનિ આઠમાં સ્થાનેથી પસાર થશે. નાની પનોતી લોઢાના પાયે છે જે વારસાગત લાભ અપાવે. નોકરી ધંધામાં મુશ્કેલી થાય. માનસીક તાણ રહે.
કર્ક (ડ.હ.): આ રાશિના જાતકોને શનિ સાતમાં સ્થાનમાંથી પસાર થશે. માનસીક શાંતિ રાખવી. દાંપત્ય જીવન સારૂ રહે. જમીન-મકાન ખરીદવા માટે શુભ સમય. વિવાહમાં વિલંબ થાય.”
સિંહ (મ.ટ.): મકરનો રાશિ છઠ્ઠા સ્થાનેથી પસાર થશે, માટે ખર્ચ પર કાબુ રાખવો, સાક્ષીમાં પડવું નહી, કોઈના ઝઘડામાં વચ્ચે પડવું નહીં. કોર્ટમાં વિજય મળે. આરોગ્ય માટે સંભાળવું.
કન્યા (પ.ઠ.ણ.): આ રાશિના લોકોને નાની પનોતિ દૂર થશે. પાંચમાં સ્થાનેથી શનિ પસાર થતો હોવાથી શેરબજારથી લાભ મળે. ભાગીદારીમાં તથા દાંપત્ય જીવનમાં સુમેળ રાખવો જરૂરી. લાભ મળતા અટકે.
તુલા (ર.ત.): ચોથા સ્થાનેથી પસાર થતો મકરનો શનિ લોઢાના પાયે નાની પનોતી શરૂ કરાવશે. છૂપા શત્રુમાં વધારો થાય. વેપારમાં ખૂબ ધ્યાન રાખવું જરૂરી. આળસ છોડી દેવી. મિલકતની લે-વેંચ શુભ ફળ આપશે.
વૃશ્ચિક (ન.ય.):’ શનિ મહારાજ આ રાશિના જાતકોને પરાક્રમ સ્થાનમાંથી પસાર થશે. તેમજ મોટી પનોતીમાંથી રાહત મળશે. સાહસ, પરાક્રમમાં વધારો કરી આર્થિક લાભ અપાવે. મહેનતનું પુરતુ ફળ મળે. યાત્રા-પ્રવાસમાં સાવચેત રહેવું. અકસ્માતથી સંભાળવું.
ધન (ભ.ધ.ફ.): આ રાશિના લોકોને મકરનો શનિ ધન ભુવનમાંથી પસાર થાય છે. ચાંદીના પાયે પનોતીનો અંતિમ તબક્કો આર્થિક લાભ, સફળતા આપશે. આરોગ્ય અંગે સંભાળવું.
મકર (ખ.જ): શનિની પનોતીનો બીજો તબક્કો સોનાના પાયે છાતીએથી પસાર થાય. નાણા ફસાઈ જવાથી માનસીક તનાવ રહે. ભાગીદારીના વ્યાપારમાં ધ્યાન રાકવું. ભાઈ-બહેન સાથે વિવાદ થાય.
કુંભ (ગ.સ.શ.): આ રાશિના લોકોને શનિની પનોતીનો પહેલો તબક્કો લોઢાના પાયે પસાર થાય. ખર્ચમાં વધારો કરાવે. ખોટી દોડધામથી બચવું. ઝઘડા ટાળવા. ભાગ્યોદયમાં વિલંબ કરાવે પણ વિદેશ ગમનના યોગ થાય.
મીન (દ.ચ.ઝ.થ): મકરનો શનિ લાભ સ્થાનમાંથી પસાર થાય. જે સારો એવો લાભ અપાવે. વિદેશ જવાની તક પણ મળે. આળસથી બચવું. શેરબજારમાં લાભ મળે. વિદ્યાર્થીઓને અભ્યાસમાં સફળતા અપાવે.

January 23, 2020

લૂઈ વિટોંએ વર્ષ ૧૯૦૫ બાદ શોધાયેલો સૌથી મોટો ડાયમંડ ‘સૅવેલો’ ખરીદી લીધો છે. હીરાના ઈતિહાસમાં સૌથી મોટા કદના બીજા નંબરના હીરાને હવે લૂઈ વિટોંના રૂપમાં નવો માલિક મળ્યો છે. લૂઈ વિટોંના હાથમાં આવેલા સૅવેલો નામના હીરાનું વજન ૧૭૫૮ કૅરેટ્સનું છે. આ ડાયમંડ વર્ષ ૧૯૦૫ પછી શોધાયેલો બીજો મોટા કદનો હીરો છે. એપ્રિલ મહિનામાં ખાસ્સી ધામધૂમ સાથે એકદમ જાણે પ્રગટ થયેલા સૅવેલોનું નામકરણ જુલાઈ મહિનામાં થયું અને પછી એ હીરો પાછો લોકોની નજરમાંથી અદૃશ્ય થઈ ગયો હતો. હવે પાછો નવા માલિક સાથે સૅવેલો લોકોની નજરમાં પ્રગટ્યો છે.

જોકે, એના માલિકના નામને તમે ઝડપથી નહીં જ કલ્પી શક્યા હોય! સૅવેલોનો નવો માલિક જાત જાતની મૂલ્યવાન અને મહત્ત્વની જણસો મેળવવા માટે જાણીતો જેફ બેઝોસ નથી કે નથી શોભા માટે કોઈ જણસ શોધનારું શાહી ખાનદાન. ડાયમંડ માર્કેટનું સર્જક ડી બીયર્સ જૂથ પણ નથી. વળી, ડાયમંડના ખાં ગણાતા ‘ગ્રાફ લેસેડી લા રોના’ નામના હીરાના માલિક ગ્રાફ પણ નવા વિશાળ કદના હીરા સૅવેલોના માલિક નથી, પણ લૂઈ વિટોં માલિક છે. આ લૂઈ વિટોં તેની ચામડાંની હૅન્ડબૅગો માટે ખ્યાતનામ બ્રાન્ડ છે. વળી, તે એક દશક કરતાં વધુ સમયથી જ્વેલરી બજારમાં પણ ખાસ્સા આદરથી લેવાતું નામ છે! લૂઈ વિટોંની વિશાળ કદની પિતૃકંપની એલવીએમએચ દ્વારા લક્ઝરી જ્વેલરીની ગિફ્ટ આઈટમો બનાવતી અને વેચતી ટિફની ઍન્ડ કો ૧૬.૨ અબજ યુરોમાં ગયા નવેમ્બર મહિનામાં ખરીદી લેવાઈ ત્યારે જ લૂઈ વિટોં હાઈ એન્ડ જ્વેલરી બજારમાં ધમાકો કરશે એવા સંકેતો ઝવેરાત બજારમાં પહોંચ્યા હતા. એ પછી આ સૅવેલો હીરો ખરીદીને કંપનીએ જાણે બમણો ધમાકો કર્યો છે.

એન્ટવર્પ ડાયમંડ એક્સચેન્જના ભૂતપૂર્વ પ્રમુખ અને ઈન્ટરનેશનલ ઈકોનોમિક સ્ટે્રટેજી એડવાઈઝરી ફર્મના મૅનેજિંગ ડાયરેક્ટર માર્સેલ પ્રુવરે કહ્યું હતું કે, “જગતમાં ૧૦ કરતાં પણ ઓછી વ્યક્તિ છે જે જાણે છે કે આવા મૂલ્યવાન રત્નું શું કરવું અને તેને કેવી રીતે કટ કરવો કે એનું મૂલ્ય બમણું થઈ જાય અને એ લોકો જ એવા સ્ટોનની ખરીદી કરવા માટે ટેબલ પર નાણાં મૂકી શકે છે. આટલેથી માર્સેલ પ્રુવર અટક્યા નથી. તેમણે વધુમાં કહ્યું હતું કે,”એવો સ્ટોન ખરીદવો અને પછી એને પાંચ કરોડ યુરોના સ્ટોન તરીકે વેચવા માટે તમારી પાસે ટૅક્નિકલ યોગ્યતા-લાયકાત હોવી જોઈએ અને એ ઉપરાંત મોટી રકમનો ચેક લખવાની અને એ મોટું જોખમ લેવાની હામ હોવી જોઈએ. આવા જોખમ લેનારાઓમાં આ એક કંપની છે, લૂઈ વિટોં એમ માર્સેલ પ્રવરનું કહેવું હતું.

જોકે, લૂઈ વિટોંના ચીફ એક્ઝિક્યૂટિવ માઈકલ બર્કે કંપનીએ આ ખરીદી માટે કેટલો ખર્ચ કર્યો છે એ અંગે કશું કહ્યું નથી, પણ એમણે એટલું કબૂલ કર્યું હતું કે, “આ ખર્ચ ‘મિલિયન્સ’માં છે.

કેનેડાના ખાણમાલિક લુકારા ડાયમંડ કૉર્પની માલિકીની બોટ્સવાના ખાતે કેરોવે ખાણમાંથી એપ્રિલ ૨૦૧૯ના દિવસે આ બૅઝબૉલ કદનો જગતનો બીજા ક્રમનો વિશાળ કાચો-રફ હીરો મળ્યો હતો. સૌથી મોટા કદનો હીરો ૩,૧૦૬ કૅરેટનો કુલીનાન નામનો હીરો હતો. જે વર્ષ ૧૯૦૫માં સાઉથ આફ્રિકામાંથી મળ્યો હતો. જે હવે બ્રિટિશ તાજમાં છે. વળી, સૅવેલો બોટ્સવાનામાં મળેલા હીરામાંનો સૌથી વિશાળ કદનો કાચો હીરો છે અને કેરોવે ખાણમાંથી મળેલો મોટા કદનો ત્રીજા નંબરનો હીરો છે. લુકારા કંપનીએ આ હીરાનું નામ પાડવાની રાખેલી સ્પર્ધામાં બોટ્સવાનાના ૨૨૦૦૦ લોકોએ ‘સૅવેલો’ નામની હિમાયત કરી હતી. સેટ્સવાના ભાષામાં ‘સૅવેલો’ એટલે ‘વિરલ શોધ’ એવો અર્થ છે. મોટા કદના કોઈપણ મૂલ્યવાન સ્ટોનમાંથી કેટલા કિંમતી અને ચમકદાર સ્ટોન-રત્નો મળે છે તેના પર તેની સફળતાનો આધાર છે અને એ ‘બહુ મોટું જોખમ’ છે, કારણ કે એની ચમકદમક અને મૂલ્યવાનપણા પર જ નફાનો આધાર છે. કટ થયા પછી અને શ્રેષ્ઠ પ્રકારે કટ્સ પડ્યા પછી તેના તેજમાં વધારો થાય તે રીતે તેનું ઉત્પાદન થાય તો જ ખરીદકર્તાનું જોખમ લેખે લાગે નહીં તો તમામ મહેનત અને ખર્ચ કરેલાં નાણાં પરત મેળવવા માટે અન્ય કિંમતી શોધ સુધી રાહ જોવી પડે!

અંધારામાં એક નાનકડી ‘વિન્ડો’ દ્વારા લેસર અને સ્કેનિંગ વગેરેથી ચકાસણી કરનારી ખાણ આવા સ્ટોનને ક્યારેક હાઈ-ક્વોલિટી વ્હાઈટ જૅમના ક્ષેત્રનો ‘નીઅર જૅમ’ ક્વોલિટીનો ગણાવે છે એટલે કે આ સ્ટોન રત્ન કહેવાવાની નજીક છે એમ કહેવાય! ડાયમંડમાં હજારો ગ્રેડેશન છે. જેમાં ‘ડી’થી માંડીને ‘ડી-ફ્લોલેસ’ (અતિ વિરલ જણસ) અને ઔદ્યોગિક સ્ટોન્સ સુધીના ગ્રેડ હોય છે. આ ઈન્ડસ્ટ્રિયલ પથ્થરો કટિંગ અને મેન્યુફેક્ચરિંગમાં વપરાશમાં લેવામાં આવે છે. આ ખરીદી અંગે બર્ક કહે છે કે, આ હીરો ‘ડી’ છે છે કે ‘ડી-ફ્લોલેસ’ છે એની મને ખબર નથી, પણ એની ખરીદીમાં થોડી હિંમત અને અમારા નિષ્ણાતોમાં ભરોસો હોવો જરૂરી છે. જોકે, જાણકારો કહે છેકે, “સાચું કહીએ તો, એલવીએમએચને આ ખરીદી પરવડી શકે એમ છે. વર્ષ ૨૦૧૮ની એની આવક ૪૬.૮ અબજ યુરોની અથવા બાવન અબજ યુરોની હતી.

This is what the second largest diamond in the world looks like

Introducing the world’s second ever biggest rough diamond, which comes in at an impressive 1,758 carats.

To put things into perspective, it is roughly the size of a tennis ball. The diamond was revealed as part of a partnership between Louis Vuitton and Lucara Diamond Corporation and the HB Company of Antwerp, to transform the diamond specimen.

It was discovered in April 2019 (it has since been named Sewelô, meaning Rare Find in the Setswana language) at the Karowe mine, Botswana. Weighing 352 grams, the Sewelô is the second largest rough gem diamond in recorded history, eclipsed only by the Cullinan, at 3,106 carats, discovered in South Africa in 1905, and fashioned into historic diamonds that are now in the British Crown Jewels and royal collection.

Now the next step is to assess the quality of the diamond, and then comes the fun bit: making jewellery. At the moment, the rough crystal is covered in a very thin layer of black carbon, and Louis Vuitton is working with master diamond cutters, HB Company, from Antwerp, to study it by opening a window onto the stone to gain visibility, and plot various permutations of size, colour and shape.

January 23, 2020

સર્વોચ્ચ અદાલતે નાગરિકત્વ સુધારા ધારા અને નૅશનલ પૉપ્યુલેશન રજિસ્ટર (એનપીઆર)ની પ્રક્રિયાનો અમલ હાલમાં અટકાવવાનો બુધવારે ઇનકાર કર્યો હતો અને કેન્દ્રને સંબંધિત અરજીઓનો જવાબ આપવા માટે ચાર અઠવાડિયાંનો સમય આપ્યો હતો.

સર્વોચ્ચ અદાલતે આ ધારાની બંધારણીય યોગ્યતાને પડકારતી અરજીઓ બંધારણીય બૅન્ચને સુનાવણી માટે મોકલવાનો નિર્ણય લીધો હતો.

દેશના મુખ્ય ન્યાયાધીશ એસ. એ. બોબડેએ જણાવ્યું હતું કે અમે કાયદાના અમલને એકપક્ષી રીતે હાલમાં અટકાવી ન શકીએ. અમે બધી અરજીઓનો અભ્યાસ કર્યા બાદ નિર્ણય લઇશું. તેમણે જણાવ્યું હતું કે દેશભરમાં આ ધારાને મુદ્દે મોટા પાયે ચર્ચા થઇ રહી છે અને અમે કેન્દ્રની દલીલ સાંભળ્યા વિના કોઇ નિર્ણય નહિ લઇએ.

સર્વોચ્ચ અદાલતમાં આ ધારાની વિરુદ્ધ અત્યાર સુધીમાં કુલ ૧૪૩ અરજી કરાઇ છે. આ અરજીઓની સુનાવણી કરનારી બૅન્ચમાં મુખ્ય ન્યાયાધીશ બોબડે ઉપરાંત ન્યાયાધીશ એસ. અબ્દુલ નઝીર અને ન્યાયાધીશ સંજીવ ખન્નાનો સમાવેશ થાય છે.

વકીલ અભિષેક મનુ સિંઘવીએ જણાવ્યું હતું કે ઉત્તર પ્રદેશમાં નાગરિકત્વ (સુધારા) ધારા હેઠળ નાગરિકત્વ આપવાની કામગીરી શરૂ પણ કરી દેવાઇ છે. જેઓને નાગરિકત્વ અપાઇ જશે, તેઓ પાસેથી પાછું લેવાશે નહિ અને તેથી આ કાયદાના અમલ પર તાત્કાલિક પ્રતિબંધ મૂકવો જરૂરી છે.

વકીલ વિકાસ સિંહે આસામમાં નાગરિકત્વ (સુધારા) ધારાના અમલના સંબંધમાં એકપક્ષી ચુકાદાની માગણી કરી હતી અને દલીલ કરી હતી કે આ કિસ્સામાં આસામની હાલત અલગ છે. આ કેસને લગતી છેલ્લી સુનાવણીથી અત્યાર સુધીમાં અંદાજે ૪૦,૦૦૦ લોકો રાજ્યમાં ઘૂસી ગયા છે.

દેશના મુખ્ય ન્યાયાધીશે જણાવ્યું હતું કે આસામ અને ત્રિપુરાના કિસ્સાને અન્ય રાજ્યોથી અલગ રીતે હાથ ધરાશે.

વકીલ કપિલ સિબલે નાગરિકત્વ સુધારા કાયદાનો બે મહિના અમલ નહિ કરવા, આગામી સુનાવણી ફેબ્રુઆરીમાં રાખવા અને નૅશનલ પૉપ્યુલેશન રજિસ્ટરનો એપ્રિલથી થનારો અમલ રોકવાની વિનંતિ કરી હતી.

ઍટર્ની જનરલ વેણુગોપાલે જણાવ્યું હતું કે અમને અત્યાર સુધીમાં માત્ર ૬૦ અરજીની નકલ મળી છે. કેન્દ્ર સરકારને બધી અરજીની નકલ આપવા અરજ કરીએ છીએ. અમને જવાબ આપવા માટે છ અઠવાડિયાંનો સમય લાગશે.

તેમણે જણાવ્યું હતું કે દેશની બધી વડી અદાલતોને નાગરિકત્વ સુધારા ધારાને લગતી અરજીઓની હાલમાં સુનાવણી નહિ કરવાની સૂચના આપવી જોઇએ.

સર્વોચ્ચ અદાલતે કેન્દ્રને જવાબ આપવા માટે ચાર અઠવાડિયાંનો સમય આપ્યો હતો અને વડી અદાલતોને સંબંધિત સુનાવણી હાલમાં નહિ કરવાનો આદેશ આપવા સહમત થઇ હતી.

નાગરિકત્વ સુધારા ધારાના વિરોધમાં સર્વોચ્ચ અદાલતમાં અગાઉ ૬૦ અરજી કરાઇ હતી, પરંતુ છેલ્લા થોડા દિવસ દરમિયાન નવી ૮૩ અરજી કરાઇ હતી.

સર્વોચ્ચ અદાલતે જણાવ્યું હતું કે આસામ, ત્રિપુરા અને ઉત્તર પ્રદેશમાંના આ કાયદાના અમલને પડકારતી અરજીઓની સુનાવણી બે અઠવાડિયાં પછી અલગથી જ કરાશે. જે અરજીઓ કેન્દ્રને નથી મળી તેઓનો જવાબ આપવા ચાર અઠવાડિયાંનો સમય આપીએ છીએ. અમે અમુક અરજીની સુનાવણી ચૅમ્બરમાં કરીશું.

January 22, 2020

મોટર વીમા ઉદ્યોગમાં ટૂંક સમયમાં વપરાશ આધારિત પ્રીમિયમ લાગુ થવાની શક્યતા છે. વીમા કંપનીઓ એકથી વધારે કાર ધરાવતા સિંગલ માલિકને પ્રત્યેક કારના અપેક્ષિત વપરાશ આધારિત કવર આપવાના પ્લાન લોન્ચ કરી રહી છે. આમ, પહેલીવાર ગ્રાહકને મલ્ટિપલ વ્હિકલ્સ માટે સિંગલ પોલિસી ખરીદવાનો વિકલ્પ મળશે, જેમાં પ્રત્યેક કારની સબ-લિમિટ અલગ-અલગ હશે.

ICICI લોમ્બાર્ડ દ્વારા ‘ફ્લોટર’ પોલિસી વિકલ્પ લોન્ચ કરવામાં આવ્યો છે, જેના કારણે ગ્રાહકો જ્યાં સુધી એકસાથે બે વાહનો નહીં ચલાવે ત્યાં સુધી તેમની સમ ઇન્સ્યોર્ડનો ઉપયોગ કરી શકશે. ICICI લોમ્બાર્ડની ‘સિંગલ ઓનર, મલ્ટિપલ વ્હિકલ’ ફ્લોટર પોલિસી એપ્લિકેશન આધારિત ઇન્ટરફેસ છે, જેનાથી મલ્ટિપલ વાહનોને એકસાથે લિન્ક કરવામાં મદદ મળશે. આ ‘ફ્લોટર’ વિકલ્પ અત્યારે ફેમિલી હેલ્થ પોલિસીમાં ઉપલબ્ધ છે, જેમાં પરિવારનો એક સભ્ય સિંગલ સમ ઇન્શ્યોર્ડ દ્વારા પરિવારના અન્ય સભ્યોને પણ આવરી લે છે.

“એક ફ્લોટર પોલિસી હેઠળ જ ત્રણથી ચાર કારનો વીમો લઈ શકાશે, જેનો અર્થ એ થયો કે, એક જ પોલિસી દ્વારા ત્રણ કારનું કવર મળશે. આ પ્રોટોટાઇપ છ મહિના માટે માન્ય રહેશે અને આ સમયગાળામાં તે કારગત નીવડશે તો કંપનીઓ તેને લોન્ચ કરી શકશે. કંપનીઓ વપરાશ-આધારિત મોટર ઇન્શ્યોરન્સ લોન્ચ કરશે, જેથી ગ્રાહકને તેની ડ્રાઇવિંગ પસંદગીના આધારે તેમના પ્રીમિયમની ચુકવણી કરવાનો વિકલ્પ મળશે.

મોટા ભાગની ઇન્શ્યોરન્સ કંપનીઓ અત્યારે ગ્રાહકો પાસેથી ‘ઓન ડેમેજ પ્રીમિયમ’ ચાર્જ કરે છે, જેનો આધાર વાહનોના મોડલ, બનાવટના વર્ષ, સ્થળ પર રહેલો છે અને આ પોલિસી પર નો-ક્લેમ બોનસ લાગુ પડે છે. નવી પોલિસીમાં વાહન માલિકની ડ્રાઇવિંગ આદતને પણ ધ્યાનમાં રાખવામાં આવશે.

ગ્રાહક કેટલી ઝડપથી વાહન ચલાવે છે, કેટલું ટ્રાવેલ કરે છે અને કેટલીવાર સખત બ્રેક મારે છે જેવી બાબતોને ધ્યાનમાં લઈને પ્રીમિયમ નક્કી કરવામાં આવશે. ડ્રાઇવિંગની આદતનું મોનિટરિંગ કરવા માટે એપ્લિકેશનનો ઉપયોગ થશે અને જો ગ્રાહક સલામત સવારી કરતો હશે તો તેને રિવોર્ડ પણ મળશે. રિન્યુઅલ વખતે ગ્રાહકના ‘ઓન ડેમેજ પ્રીમિયમ’માં ગ્રાહકો તેમનો સ્કોર જોઈ શકશે. ગ્રાહકો એક વર્ષ કરતાં ઓછા સમયગાળા માટે આ વિકલ્પ પસંદ કરી શકશે.

January 22, 2020

ઓસ્ટ્રેલિયા ઓપનમાં આજે 2008ની ચેમ્પિયન રશિયાની ખેલાડી મારિયા શારાપોવા પ્રથમ રાઉન્ડમાં જ બહાર થઈ ગઈ હતી. તેને વાઇલ્ડ કાર્ડથી ટુર્નામેન્ટમાં એન્ટ્રી મળી હતી. શારાપોવાને’ ક્રોએશિયાની ડોના વેકિચે 6-3, 6-4થી હાર આપી હતી.

32 શારાપોવા ડબલ્યુટીએ રેન્કિંગમાં 145માં સ્થાને છે. બીજી મેન્સ સિંગલ્સમાં વર્લ્ડ નંબર 1 સ્પેનના રાફેલ નડાલે જીત સાથે ટુર્નામેન્ટની શરૂઆત કરી છે. તેણે બોલીવિયાના હુગો ડેલિયનને 6-2, 6-3, 6-0થી હરાવ્યો હતો.

મેન્સ સિંગલ્સના અન્ય મુકાબલામાં સ્ટેન વાવરિકા, રશિયાની કરેન ખાચાનોવા, ઓસ્ટ્રિયાના ડોમિનિક થિએમ અને ક્રોએશિયાના મારિન સિલિચે જીત મેળવી હતી. 2014ના ચેમ્પિયન વાવરિકાએ દમિર જુમહૂરને 7-5, 6-7 (4), 6-4, 6-4થી હાર આપી હતી. ખાચાનોવે સ્પેનના મારિયો વિલેલા માર્ટિનેજને 4-6, 6-4, 7-6 (4), 6-3થી હરાવ્યો હતો. થિએમે ફ્રાન્સના એડ્રિયન મનારિનોને 6-3, 7-5, 6-2થી હરાવ્યો. સિલિચે ફ્રાન્સના કોરેટિન માઉંતેને 6-3, 6-2, 6-4થી હાર આપી હતી.

મહિલા વિભાગમાં વર્લ્ડ નંબર 2 ઝેક રીપબ્લિકની કેરોલિના પ્લિસકોવાએ પહેલા રાઉન્ડમાં જીત મેળવી છે. તેણે ફ્રાન્સના ક્રિસ્ટિના મલાડેનોવિચને 6-1, 7-5થી હરાવીને બીજા રાઉન્ડમાં પ્રવેશ કર્યો છે. પ્લિસકોવા હજુ એકપણ ગ્રાન્ડસ્લેમ ટુર્નામેન્ટ જીતી નથી. તે 2016માં યુએસ ઓપન ફાઇનલમાં જર્મનીની એંજેલિક કર્બર સામે હારી હતી.

ભારતનો ખેલાડી પ્રજનેશ ગુણેશ્વર ઓસ્ટ્રેલિયન ઓપનના મેન્સ સિંગલ્સના પહેલા રાઉન્ડમાં જ હારીને બહાર થઇ ગયો છે. આથી તેણે નોવાક જોકોવિચ સામે બીજા રાઉન્ડમાં રમવાનો મોકો ગુમાવી દીધો છે. દુનિયાના 122મા નંબરના ખેલાડી પ્રજનેશ પહેલા રાઉન્ડમાં જાપાનના ખેલાડી તત્સુમા ઇતો સામે 4-6, 2-6 અને 5-7થી હારી ગયો હતો. હવે આ જાપાની ખેલાડી બીજા રાઉન્ડમાં જોકોવિચ સામે ટકરાશે

January 22, 2020

સાત-સાત કલાક સુધી વાટ જોયા પછી આખરે દિલ્હીનાં મુખ્યમંત્રી અરવિંદ કેજરીવાલ વિધાનસભા ચૂંટણી માટે પોતાની ઉમેદવારી નોંધાવી શક્યા હતાં. તેઓ નામાંકન દાખલ કરવા માટે બપોરે 12 વાગ્યા આસપાસ પહોંચી ગયા હતાં પણ ત્યાં ઉપસ્થિત અપક્ષ ઉમેદવારોએ તેમને વચ્ચેથી ઉમેદવારી નોંધાવવા દીધી નહોતી. જેને પગલે કેજરીવાલને સાત કલાકની લાંબી અકળાવનારી રાહ જોવી પડી હતી.

દિલ્હીનાં જામનગર હાઉસ સ્થિત કલેક્ટર કચેરીએ કેજરીવાલ બપોરે પહોંચી ગયા હતાં. તેમની પાસે ટોકન નંબર 4પ હતો. જેને પગલે ત્યાં અગાઉથી પોતાનાં વારાની વાટ જોઈ રહેલા અપક્ષ ઉમેદવારોએ તેમને વહેલા અંદર જવા દીધા નહોતા.’ ઉપમુખ્યમંત્રી મનીષ સિસોદિયાએ આ વિશે ભાજપ ઉપર આક્ષેપ કરતાં કહ્યું હતું કે, ભાજપ ગમે તેટલી સાજીશ કરે તો પણ કેજરીવાલને ઉમેદવારી નોંધાવતા રોકી નહીં શકે. એક દિવસ પહેલા સોમવારે પણ પોતાના રોડ શો માં ભારે ભીડના કારને બપોરે 3 વાગ્યનાં નિયત સમય સુધીમાં તેઓ જામનગર હાઉસ ખાતે ઉમેદવારી પત્ર દાખલ કરી શકયા ન હતા.

કેજરીવાલે પણ ટ્વિટર ઉપર લખ્યું હતું કે, તેઓ નામાંકન માટે વાટ જોઈ રહ્યા છે. ઉમેદવારી નોંધાવવામાં મોટી કતાર છે. લોકતંત્રનાં પર્વમાં આટલા લોકો ભાગ લઈ રહ્યા છે એ ખુબ જ ખુશીની વાત છે.

જે લોકો કેજરીવાલ પહેલા ઉમેદવારી નોંધાવવા પહોંચી ગયા હતાં એ ડીટીસીનાં કર્મચારીઓ હતાં. જેમને 2018નાં ધરણા દરમિયાન નોકરી ઉપરથી હાંકી કાઢવામાં આવેલા. એ વખતે કુલ 250 જેટલા કર્મચારીઓને કાઢી મૂકાયા હતાં અને તેમાંથી 30 દ્વારા આજે ઉમેદવારી નોંધાવાઈ હતી. તે કેજરીવાલ વિરુદ્ધ ચૂંટણી લડી રહ્યા છે. તેમને ચાતરીને કેજરીવાલ જ્યારે આજે ઉમેદવારી નોંધાવવા અંદર પ્રવેશી ગયા ત્યારે ભારે હોબાળો મચ્યો હતો અને પછી નાછૂટકે કેજરીવાલને રાહ જોવાનો વારો આવ્યો હતો.

Newer Posts

Older Posts

Blog - Page 402 of 708 - CIA Live

મુંબઈમાં પોતાનું કમ્પાઉન્ડ ધરાવતી મિલકતોમાં રેસ્ટોરેન્ટ અને શોપિંગ સોમવારથી આખી રાત OPEN

મુંબઇમાં પબ અને બાર રાત્રે દોઢ વાગ્યા સુધી જ ખુલ્લા રાખવા મંજૂરી

મુંબઇમાં પબ અને બાર રાત્રે દોઢ વાગ્યા સુધીની જ ખુલ્લા રાખવા મંજૂરી

રોટરી ક્લબ ઓફ સૂરતનું ધો.10-12 બોર્ડના વિદ્યાર્થીઓ માટે કારકિર્દી માર્ગદર્શનનું સમયસરનું આયોજન

આખું સપ્તાહ જારી રહેશે રોટરી કલબ ઓફ સૂરતનું કારકિર્દી માર્ગદર્શન સપ્તાહ

ઉદ્યોગ અને ટેક્નોલોજી અંગે લેટેસ્ટ નોલેજ મળશે ચેમ્બરનો ઉદ્યોગ 2020 Expo માં : Don’t Miss

ચેમ્બર ઓફ કોમર્સના 12માં ઉદ્યોગ Expoનું આયોજન 24થી 27 જાન્યુઆરી દરમિયાન

‘ઉદ્યોગ પ્રદર્શન’ જાહેર જનતા માટે સવારે ૧૦:૦૦ થી સાંજે ૬:૦૦ કલાક સુધી ખુલ્લુ રહેશે

નિત્યાનંદ સામે ઈન્ટરપોલની નોટિસ

24 જાન્યુઆરી 2020થી શનિદેવનું મહા-પરિવર્તન

રાશિ પર અસર

બીજા નંબરનો સૌથી મોટા ડાયમંડ ‘સૅવેલો’નું વજન ૧,૭૫૮ કૅરેટ્સ

This is what the second largest diamond in the world looks like

CAA નો અમલ રોકવા સુપ્રીમ કોર્ટનો સ્પષ્ટ ઇન્કાર

Single Policy : એકથી વધારે કાર માટે એક જ વીમા પોલિસી

Australian Open : શારાપોવા પ્રથમ રાઉન્ડમાં જ હારી

7 કલાક વાટ : પછી કેજરીવાલ ઉમેદવારી નોંધાવી શક્યા