Slider Archives - Page 460 of 488

August 15, 2018

સુરત,2018:બીએનઆઇસુરત દ્વારા આજરોજ સ્વતંત્રતા પર્વની ઉજવણી સાથે જ પોતાના બાહુબલી ચેપ્ટરનું 3rd લૌંચિંગ કરવામાં આવ્યું હતું. સમગ્ર કાર્યક્રમ સ્વતંત્રતા દિવસની થીમ પર યોજાયો હતો. BNI સુરતના બાહુબલી ચેપ્ટર ના પ્રેસિડેંટ રિઝવાન રાણાએ જણાવ્યુ હતું કે બાહુબલી ચેપ્ટરના સપોર્ટ ડાઇરેક્ટર મુકુલ ગોયલ અને BNI સુરતના સિનિયર ડાઇરેક્ટર અસ્ફાક કલકત્તાવાલા ખાસ ઉપસ્થિત રહ્યા હતા. આ ઉપરાંત કાર્યક્રમમાં મુલાકાતીઓ, આમંત્રિતો સાથે જ વિભિન્ન ક્ષેત્ર ના ઉદ્યોગ સાહસિકો જોડાયા હતા અને પોતાના બિજનેસ વિશે તેમજ નેટવર્કિંગ ના અનુભવો વિશે જણાવ્યુ હતું.

ઉલ્લેખનીય છે કે શહેરના અગ્રણી અને ખ્યાતનામ સીએ ગૌરવ વી. સંધવી અને ડો. નિધિ સંધવી બિઝનેસ નેટવર્કિંગ ઇન્ટરનેશનલ (બીએનઆઇ)સુરતના એક્ઝિક્યુટિવ ડિરેક્ટર છે અને હાલમાં 1,000થી પણ વધુ સભ્યો ધરાવે છે. બીએનઆઇ સુરતને 3સેન્ટેનિયલ ચેપ્ટર્સ અને વિશ્વભરમાં સૌથી વધુ ચેપ્ટર સાઇઝ ધરાવવાનું સન્માન મળેલું છે. 72દેશોમાં 900થી વધુ રિજનમાં બીએનઆઇ સુરતે વિશ્વમાં પ્રથમ ક્રમના રિજન હોવાનું પણ ગૌરવ પ્રાપ્ત કરેલું છે.

-x-x-x-x-

August 15, 2018

સંત વિભૂતિ અને શાસ્ત્રોના પ્રખર જ્ઞાતા સદગુરૂ શાસ્ત્રી પૂજ્ય હરિપ્રકાશદાસજી તથા શાસ્ત્રી પૂજ્ય જ્ઞાનપ્રકાશદાસજી

દેવદર્શનાર્થે વડતાલ પધાર્યા હતા અને સાથે હીંડોળા મહોત્સવ પ્રદર્શન નિહાળી પ્રભાવિત થયા હતા.!!

—————————–—————-

સહાયક કોઠારી ડૉ.સંતવલ્લભદાસજી

તથા Associate પૂજ્ય શ્યામવલ્લભ

સ્વામીએ બંને સંત વિભૂતિઓનું સ્વાગત

કર્યું હતું. દેવદર્શન કરાવ્યા બાદ શાસ્ત્રી

પૂજ્ય હરિપ્રકાશદાસજીને વ્હીલચેરમાં

બેસાડીને પૂજ્ય જ્ઞાનપ્રકાશ સ્વામી સાથે

હીંડોળા પ્રદર્શનમાં દોરી ગયા હતા.

વડતાલમાં યોજાયેલ પ્રથમ

હીંડોળા મહોત્સવની વિવિધ ઐતિહાસિક

કલાકૃતિઓ નિહાળી તેઓ પ્રભાવિત

થયા હતા અને આવા આયોજન બદલ

ડૉ.સંત સ્વામી તથા પૂજ્ય શ્યામ સ્વામીને

આશિર્વાદ સાથે અભિનંદન ધન્યવાદ

આપ્યા હતા. બંને સંત વિભૂતિઓએ

આધુનિક ભોજનાલયની પણ મુલાકાત

લીધી હતી અને પૂર્ણ સંતોષ વ્યક્ત

કર્યો હતો. શાસ્ત્રી પૂજ્ય હરિપ્રકાશદાજી

ગાંધીનગર સ્વામિનારાયણ ગુરુકૂળના

પ્રણેતા છે અને હાલ તેમની વય ૯૦

વર્ષની છે અને નાદુરસ્તીને કારણે તેઓ ચાર વર્ષ બાદ આજે પ્રથમવાર બહાર

આવી વડતાલધામમાં પધાર્યા હતા.!! શાસ્ત્રી પૂજ્ય જ્ઞાનપ્રકાશ

સ્વામી તો સ્વામિનારાયણ સંપ્રદાયના વર્તમાન સમયના શ્રેષ્ઠ અને

વિદ્વાન સંત શિરોમણી વિદ્વતજન ભૂષણ અને સકળ શાસ્ત્રોના અર્થજ્ઞાતા છેઃ આમ

જોઇએ તો બંને સંતો સ્વામિનારાયણ

સંપ્રદાયના શાસ્ત્રોના પ્રખર વિદ્વાનો અને

વંદનીય સંતપુરુષો છેઃ

____________।। @ બાલુભાઇ વરિષ્ઠ પત્રકાર Vadtal

August 14, 2018

ટાટા મોટર્સે ટિયાગો અને ટિગોર કારની સારી માંગના પગલે ગુજરાતના સાણંદ પ્લાન્ટ ખાતે 100 ટકા ક્ષમતા પર ઉત્પાદન નોંધાવ્યું છે અને કંપની આગામી સમયમાં તેની ક્ષમતામાં થોડો વધારો કરશે. કંપની ટિગોરના ઇલેક્ટ્રિક વ્હિકલનું ઉત્પાદન પણ સાણંદ પ્લાન્ટ ખાતે કરે છે અને કંપની 2020 સુધીમાં સાણંદ પ્લાન્ટને સેન્ટર ઓફ મેન્યુફેક્ચરિંગ એક્સેલન્સ બનાવવાનું લક્ષ્ય ધરાવે છે.

સાણંદ પ્લાન્ટ ખાતે અમારી શરૂઆત ધીમી રહી હતી પરંતુ ટિયાગો અને ટિગોરનું ઉત્પાદન અહીં શરૂ કરવામાં આવ્યા બાદ ઉત્પાદનમાં ઝડપી વૃદ્ધિ નોંધાઈ છે.

જાન્યુઆરી 2017માં આ પ્લાન્ટમાં કુલ 3 લાખ કાર ઉત્પાદનના સ્તરે પહોંચ્યા બાદ જાન્યુઆરી 2018માં અમે ચાર લાખ યુનિટનો આંક વટાવ્યો હતો અને હવે ઓક્ટોબર મહિનામાં જ આ પ્લાન્ટમાં બનેલી કારની સંખ્યા પાંચ લાખનો આંક વટાવી જશે.

હાલમાં પ્લાન્ટ 1.50 લાખ યુનિટની ક્ષમતા સાથે સંપૂર્ણ ક્ષમતા પર કાર્યરત છે અને અમે એફિશિયન્સી વધારીને ઉત્પાદન ક્ષમતા વધારી રહ્યા છીએ. હાલમાં દરરોજ 450 કારનું ઉત્પાદન થાય છે તે ચાલુ નાણાકીય વર્ષના અંત સુધીમાં ૫૦૦ કાર પર પહોંચવાની ધારણા છે. સાણંદ પ્લાન્ટ અમારા પેસેન્જર વાહનોના ઉત્પાદનમાં 60 ટકા યોગદાન આપે છે.

પેસેન્જર વ્હિકલ ઉદ્યોગની વૃદ્ધિની સરખામણીએ ટાટા મોટર્સ ઘણી ઝડપી વૃદ્ધિ નોંધાવી રહી છે અને તેથી ઉત્પાદનમાં વૃદ્ધિ થઈ રહી છે. સાણંદ પ્લાન્ટ ખાતે કંપની લગભગ 35 ટકા રિન્યુએબલ એનર્જીનો ઉપયોગ કરે છે અને તેના દ્વારા ખર્ચમાં ₹8 કરોડની બચત કરી છે.

ગુજરાતને ઓટોમોબાઇલ હબ બનાવવાનું શ્રેય ટાટા મોટર્સના નેનો પ્લાન્ટને આપવામાં આવે છે પરંતુ નેનો કાર અપેક્ષા જેટલી સફળતા મેળવી શકી નહોતી અને ટાટા મોટર્સના સાણંદ પ્લાન્ટ ખાતે નજીવું ઉત્પાદન થતું હતું. જોકે, ટિગોર અને ટિયાગોના લોન્ચ બાદ આ પ્લાન્ટ ધમધમતો થયો છે. ટાટા મોટર્સ અહીં એન્જિનનું ઉત્પાદન પણ કરે છે.

હાલમાં સાણંદ પ્લાન્ટમાં દર મહિને 8,000 જેટલી ટિયાગો અને 3,000 જેટલી ટિગોર કારનું ઉત્પાદન કરવામાં આવે છે. અમે એફિશિયન્સી વધારીને પ્લાન્ટની ઉત્પાદન ક્ષમતામાં વધારો કર્યો છે. ગયા વર્ષે અમે દર મહિને 6500 યુનિટનું ઉત્પાદન કર્યું હતું, પરંતુ હાલમાં દર મહિને 11,000 યુનિટ ઉત્પાદન કરી રહ્યા છીએ. આ ક્ષમતા ઓક્ટોબર સુધીમાં જ વધારીને દર મહિને 12,500 યુનિટની કરી દેવાશે.

August 14, 2018

અન્ડરવર્લ્ડ ડૉનમાંથી રાજકારણી બનેલો અરુણ ગવળી ગાંધી વિચારોની પરીક્ષામાં પહેલા નંબરે પાસ

મુંબઈની દગડી ચાલ પર એક સમયે ગુંડાગીરી કરીને જીવતો અરુણ ગવળી હાલ નાગપુરની જેલમાં સજા ભોગવી રહ્યો છે.
શિવસેનાના નગરસેવકની હત્યાના કેસમાં અરુણ ગવળી નાગપુરની સેન્ટ્રલ જેલમાં સજા ભોગવી રહ્યો છે.

દર વર્ષે નાગપુર જેલમાં સહયોગ ટ્રસ્ટ, સર્વોદય આશ્રમ અને મુંબઈ સર્વોદય મંડળ એમ ત્રણેય મળીને ગાંધી વિચારોની પરીક્ષાનું આયોજન કરે છે. પરીક્ષા સ્વૈચ્છિક હોય છે. જેલમાં એક મહિના પહેલાં ગાંધીના જીવન પરનાં અમુક પુસ્તકો આપવામાં આવે છે અને એના આધારે પરીક્ષા આપવાની હોય છે. અરુણ ગવળીને આ પરીક્ષા આપવાની ઇચ્છા થતાં તેણે પણ આ પરીક્ષા માટે નામ આપ્યું હતું.

અરુણ ગવળીને ગાંધી વિચારોના પેપરમાં કુલ ૮૦ માર્કમાંથી ૭૪ માર્ક મળ્યા છે. જેલમાં રહેલા હજારો કેદીમાંથી ૧૬૦ કેદીઓએ આ પરીક્ષા આપી હતી. એમાં અરુણ ગવળી પહેલા નંબરે પાસ થયો છે.

August 14, 2018

Jayesh Brahmbhatt 98253 44944

તાજેતરમાં સુરતના હજીરા રોડ, ઓએનજીસી સામે શરૂ થયેલી કોર્ટયાર્ડ મેરિયટને ફાઇવ સ્ટાર રેટિંગ્સ મળ્યું છે. આ સાથે જ તાજ ગેટ-વે અને ટીજીબી પછી સુરતની ત્રીજા ફાઇવસ્ટાર હોટેલ બની છે સુરતની કોર્ટયાર્ડ મેરિયટ.

દેશમાં કોઇપણ હોટેલને સ્ટાર રેટિંગ મેળવવું હોય તો એ હોટેલ મેનેજમેન્ટએ ટુરીઝમ મંત્રાલય સમક્ષ એપ્લિકેશન કરવી પડે છે. ટુરીઝમ મંત્રાલય દ્વારા જે તે હોટેલના ઇન્સ્પેકશન માટે પાંચ સભ્યોની કમિટી બનાવીને તેને સ્થળ તપાસ, સ્થિતિ ચકાસવા માટે મોકલવામાં આવે છે અને એ કમિટી દ્વારા જાંચ-પડતાલ કરાયા બાદ જે તે હોટેલને કેટલા સ્ટારનું સ્ટેટસ મળી શકે તે અંગે ભલામણ કરવામાં આવે છે.

સુરતના હજીરા રોડ પર ઓએનજીસી સામે આવેલી કોર્ટયાર્ડ મેરિયટ હોટેલ દ્વારા ફાઇવ સ્ટાર રેટિંગ માટે ટુરીઝમ મંત્રાલયને અરજી કરાયા બાદ ગઇ તા.10મી ઓગસ્ટ 2018ના રોજ તેનું ઇન્સ્પેકશન કરવામાં આવ્યું હતું. કમિટીએ કોર્ટયાર્ડ મેરિયટ હોટેલમાં નિર્ધારિત પેરામિટર્સ ચેક કર્યા બાદ સંતોષકારક સ્થિતિ જોઇને કોર્ટયાર્ડ મેરિયટ હોટેલને ફાઇવસ્ટાર રેટિંગ આપવાનું નક્કી કર્યું હતું. આમ, કોર્ટયાર્ડ મેરિયટ સુરતની ત્રીજા ફાઇવસ્ટાર હોટેલ બની છે.

ફાઇવસ્ટાર રેટિંગ માટે હોટેલમાં કયા પરિબળોને પ્રાથમિકતા અપાય

(1) શારીરિક રીતે સક્ષમ ન હોય તેવા ટુરીસ્ટ્સ માટે કેવા પ્રકારની સુવિધાઓ હોટેલમાં વિકસાવવામાં આવી છે એ સૌથી પહેલા જોવામાં આવે છે.

(2) હોટેલ પ્રિમાઇસીસમાં ગાર્બેજ કલેકશનથી લઇને તેના નિકાલની શું સુવિધાઓ હોય છે એ બાબતને પ્રાથમિકતા આપવામાં આવે છે. ઘન કચરો, પ્રવાહી કચરો અલગ રીતે અેકત્રિત થાય છે કે કેમ, પ્રવાહી કચરાને ખાતરમાં તબદિલ કરીને ફરીથી ઉપયોગમાં લેવાય છે કે કેમ તે જોવામાં આવે છે.

(3) હોટેલ પ્રિમાઇસીસમાં સુએઝ ટ્રીટમેન્ટ પ્લાન્ટ પોતાનો છે કે કેમ તે ખાસ જોવામાં આવે છે.

(4) સિક્યુરિટી સિસ્ટમ્સ કેવી છે, અહીં બેગેજ સ્કેનર્સ છે કે કેમ, મુસાફરો તેમજ અન્ય વાહનોની અવરજવર સ્કેન થાય છે કે કેમ આવી સુવિધાઓ હોવાની ખાસ તકેદારી રાખવામાં આવે છે.

(5) સેફ ટુરિઝમ માટે હોટલ લાયક છે કે કેમ, જેમાં વુમન ટ્રાફિકિંગ, ચાઇલ્ડ એબ્યુઝિંગને પ્રોત્સાહન ન મળે એ અંગે પ્લેજ પણ લેવડાવવામાં આવે છે અને જો આવું કંઇ બનતું હોય તો ત્વરિત તેની જાણ હોટેલ ઓથોરિટીને કરવી પડે છે.

(6) હાઇજિન સ્ટાન્ડર્ડ કેવા છે, આ ફેક્ટરમા ંસ્ટાફ કાફેટેરિયા, સ્ટાફ વોશરુમ્સ, ટોઇલેટ્સ, રેસિડેસ્ન્સ વગેરે ખાસ જોવામાં આવે છે. હોટેલ મેનેજમેન્ટ સ્ટાફને કેવી રીતે રાખે છે તેના પરથી સ્ટાફ ગ્રાહકોને કેવી સુવિધા પુરી પાડતા હોય તે નિયત કરવામાં આવે છે.

(7) રસોડામાં વેજ-નોનવેજ માટેના વાસણો, જગ્યા, ટુલ્સ વગેરે અલગ છે કે કેમ, અલગ કઇ રીતે તારવવામાં આવે છે તેની નિશાનીઓ વગેરે સુવિધા વિકસાવવામાં આવી છે કે કેમ તે અંગે જોવામાં આવે છે.

ઉપરોક્ત અનેક બાબતો પરથી ટુરીઝમ મંત્રાલય દ્વારા નિયુક્ત કમિટી જે તે હોટેલને સ્ટાર રેટિંગ્સ આપે છે.

August 14, 2018

રાજ્યભરમાં ૨૦૧૨થી ૨૫,૦૦૦ એઇડ્સના દર્દીએ સારવાર લેવાનું બંધ કરી દીધું છે અને તેમાંથી અડધાથી વધુ દર્દીનો કોઇ પત્તો નથી. આવા દર્દીઓ તેમના જીવનને તો જોખમમાં નાખી જ રહ્યા છે સાથે સાથે અજાણતા જ અન્ય લોકોમાં તેનું ઇન્ફેકશન ફેલાવી રહ્યા છે.

સરકારી સેન્ટર ખાતે સારવાર માટે આવવાનું બંધ કરી દેનાર દર્દીની શોધમાં હેલ્થ વર્કરને કામે લગાડવામાં આવ્યા બાદ મહારાષ્ટ્ર સ્ટેટ એઇડ્સ ક્ટ્રોંલ દ્વારા જમા કરવામાં આવેલા ડેટામાં આ અંગે ખુલાસો થયો છે. દર્દી ત્રણ મહિનાથી વધુ સમય સુધી સરકારી સેન્ટરમાં સારવાર માટે ન આવ્યો હોય તો તેણે સારવાર લેવાનું બંધ કર્યું હોવાનું માનવામાં આવે છે.

હવે મહારાષ્ટ્ર સ્ટેટ એઇડ્સ ક્ધટ્રોલ દ્વારા એ અંગે તપાસ કરવામાં આવશે કે સરકારી સેન્ટર ખાતેથી સારવાર લેવાનું બંધ કર્યા બાદ દર્દી ખાનગી ક્ષેત્રની દવા લઇ રહ્યો છે કે કેમ?. સારવાર લેવાનું બંધ કરનાર દર્દી અંગે માહિતી અપડેટ કરવાનું નેશનલ એઇડ્સ ક્ધટ્રોલ ઓર્ગેનાઇઝેશન દ્વારા સૂચન કરવામાં આવતા સ્ટેટ એઇડ્સ ક્ધટ્રોલે પ્રયત્ન શરૂ કર્યો છે.

August 14, 2018

રાજ્યમાં નશાબંધીના કડક અમલ માટે રાજ્યવ્યાપી ઝુંબેશ શરૂ કરવામાં આવશે. આ મામલે એટીએસ (એન્ટી ટેરરિસ્ટ સ્ક્વોડ)ના માર્ગદર્શન હેઠળ એસઓજી (સ્પેશિયલ ઑપરેશન ગ્રુપ) કાર્યવાહી કરશે. તાજેતરમાં ગુજરાતમાં નશાના પદાર્થના કેસમાં વધારો થયો છે જે ચિંતાનું કારણ છે. આ માટે કૉલેજ અને સ્કૂલ કેમ્પસને ડ્રગ્સ ફ્રી કરવા માટે ખાસ ઝુંબેશ શરૂ કરવામાં આવશે.

ગુજરાતને નશામુક્ત કરવા માટે ખાસ ઝુંબેશ શરૂ કરવામાં આવશે. તેમ જ નશાબંધીના ભંગ માટેની પ્રવૃત્તિઓ ચલાવતા લોકો સામે કડક કાર્યવાહી કરવામાં આવશે. આ માટે સ્કૂલ અને કૉલેજ કેમ્પસમાં ખાસ કાર્યક્રમ કરવામાં આવશે. સ્કૂલ-કૉલેજ કેમ્પસને નશામુક્ત કરવાની સાથે સાથે ચેઇન સ્નેચર્સ સામે કડક કાર્યવાહી કરવાની જાહેરાત કરવામાં આવી હતી.

નાર્કોટિક્સ કંટ્રોલ બ્યુરોના સત્તાવાર આંકડા પ્રમાણે વર્ષ ૨૦૧૩થી સતત ગુજરાતમાં ડ્રગ્સની રેડમાં વધારો થઇ રહ્યો છે. જેમાં વર્ષ ૨૦૧૩માં ૬, વર્ષ ૨૦૧૪માં ૭, વર્ષ ૨૦૧૫માં ૬, વર્ષ ૨૦૧૬માં ૯, વર્ષ ૨૦૧૭માં ૧૦ અને ચાલુ વર્ષના છ મહિનામાં જ ૬ રેડ થઇ ચૂકી છે. આ સમગ્ર આંકડા પરથી માલૂમ પડે છે કે, ડ્રગ્સ ગુજરાતના યુવાધનને કઇ રીતે બરબાદ કરી રહ્યું છે. રાજ્યના મુખ્ય શહેરોમાં ચાલુ કરવામાં આવેલી

ટ્રાફિક ડ્રાઇવ મામલે ગૃહપ્રધાન પ્રદીપસિંહ જાડેજાએ કહ્યું હતું કે, રાજ્યભરમાં આ ટ્રાફિક ઝુંબેશ ચાલુ જ રહેશે. આ માટે અમદાવાદ અને સુરત શહેરમાં એસઆરપીની વધારે કંપનીઓ ફાળવવામાં આવશે. ટ્રાફિક ડ્રાઇવ માટે પોલીસ કમિશનરો અને એસપીને સૂચનાઓ આપવામં આવી છે. સાથે જ તેમણે લોકોને પણ આ ઝુંબેશમાં સહકાર આપવાની અપીલ કરી હતી.

August 14, 2018

તમે ક્યાં જાઓ છો અે જાણવા ગૂગલ એટલું ઉત્સુક રહે છે કે તમે ના પાડો તો પણ તે તમારી ગતિવિધિઓ પર ચાંપતી નજર રાખે છે.

એસોસિયેટેડ પ્રેસ-એપી દ્વારા હાથ ધરવામાં આવેલી તપાસ દરમિયાન શોધી કાઢવામાં આવ્યું હતું કે તમારી ગુપ્તતાની જાળવણીની ખાતરી આપતી પ્રાઈવસી સૅટિંગનો તમે ઉપયોગ કર્યો હોય તો પણ તમે ક્યાં છો તેની માહિતીનો ઍન્ડ્રોઈડ અને આઈફોન પરની અનેક ગૂગલ સેવા સંગ્રહ કરે છે.

એપીની વિનંતીને પગલે પ્રિન્સટનસ્થિત કમ્પ્યુટર સાયન્સના સંશોધકોએ તપાસના આ તારણોને સમર્થન આપ્યું હતું.

તમે ક્યાં છો એ સ્થળની માહિતી માટે મોટાભાગે ગૂગલ પરવાનગી માગે છે. ગૂગલ મૅપ જેવી ઍપનો તમે ઉપયોગ કરો તો તે પણ તમે ક્યા સ્થળે છો તેની માહિતી એકઠી કરવા માટે પરવાનગી લેવાનું યાદ કરાવે છે. જો તમે ક્યા સ્થળે છો તેનું રૅકોર્ડિંગ કરવાની સહમતી દર્શાવો તો અને ભવિષ્યમાં તમે ક્યારેક એ અંગેની જાણકારી માગો તો ગુગલ મૅપ તમારી દૈનિક ગતિવિધિઓની હિસ્ટ્રી દર્શાવે છે.

તમારી મિનિટે મિનિટની ગતિવિધિઓનું માહિતી સંગ્રહી રાખવી તમારી અંગતતા સામે જોખમ ઊભું કરી શકે છે અને શંકાસ્પદ લોકોને શોધી કાડવા પોલીસ તેનો ઉપયોગ કરી શકે છે. જોકે ગૂગલનું કહેવું છે કે કોઇપણ સમયે તમે લૉકેશન હિસ્ટ્રીને ટર્નઑફ કરી શકો છો અને ત્યાર બાદ તમે ક્યા સ્થળે જાઓ છો તેની માહિતીનો સંગ્રહ નથી થતો.

August 13, 2018

Jayesh Brahmbhatt

Executive Editor CIA live. 98253 44944

વીર નર્મદ દક્ષિણ ગુજરાત યુનિવર્સિટીમાં જ્યારથી કુલપતિ પદે ડો.શિવેન્દ્ર ગુપ્તાની નિમણૂંક થઇ છે ત્યારથી ક્યારેય તેમનું નામ કોઇ રચનાત્મક કામગીરીમાં આવ્યું નથી બલ્કે વિવાદો ઉપસ્થિત કરવામાં તેમને આખા દેશમાં નંબર વન આપવો પડે તેવી કામગીરી એક પત્રકાર તરીકે નિહાળી છે. કોલેજોમાં 20-20 રાઉન્ડની પ્રવેશ પ્રક્રિયાઓ હાથ ધરવી પડે એવું વ્યવસ્થા તંત્ર કદાચ આખા વિશ્વમાં પણ નહીં બન્યું હોય. એવું સાભળ્યું હતું કે ડો.શિવેન્દ્ર ગુપ્તાની VNSGUના કુલપતિ પદે નિયુક્તિ RSSના નેતાના ઇશારે થઇ હતી. એ અંગે ભારે ઉહાપોહ પણ મચ્યો હતો.

RSS એક હિન્દુવાદી સંગઠન છે અને અનેક નેતાઓ ભૂતકાળમાં એન્ટી મુસ્લિમ સ્ટેટ્સમેન કરી ચૂક્યા છે. વીર નર્મદ દક્ષિણ ગુજરાત યુનિવર્સિટીમાં પણ માઇનોરિટી વિરોધી એજન્ડા અખત્યાર કરવામાં આવ્યો હોવાની અનૂભુતિ થઇ રહી છે. વાત છે એક કેપેબલ, ક્વોલિફાઇડ મુસ્લિમ અધ્યાપકની છે કે જેઓ ગુજરાતનું જ નહીં બલ્કે દેશનું ગૌરવ ગણાય છે, એ છે ડો.મુનિર જી. ટીમોલ.

વીર નર્મદ દક્ષિણ ગુજરાત યુનિવર્સિટીના મેથેમેટિક્સ ડિપાર્ટમેન્ટના સિનિયર મોસ્ટ અધ્યાપક છે. ડિપાર્ટમેન્ટ ઓફ મેથેમેટિક્સના હેડ ઓફ ધ ડિપાર્ટમેન્ટની ખાલી પડેલી જગ્યા પર ડો. મુનિર જી. ટીમોલને તા.15 જુન 2018ના રોજ ઇન્ચાર્જ બનાવવામાં આવ્યા હતા. મેથેમેટિક્સ ડિપાર્ટમેન્ટના હેડ ઓફ ધ ડિપાર્ટમેન્ટની જગ્યા માટે તેઓ કાયદાકીય રીતે તમામ પ્રકારની લાયકાત ધરાવે છે અને યુનિ.નો નિયમ છે કે સિન્ડીકેટ અધિકાર મંડળની બેઠક મળે એટલે ડિપાર્ટમેન્ટના સિનિયર મોસ્ટ અધ્યાપકને ફુલફ્લેજ ચાર્જ આપવાનો ઠરાવ કરવામાં આવે છે.

શું કહે છે યુનિવર્સિટીનો કાયદો

(1) The Statute 293, which is provided for appointment of HOD in a Department of our University, is as follows:

“There shall be a Head of the Department to be appointed by the Syndicate. The Syndicate shall appoint the senior most full time teacher not below the rank of a Reader from the staff of the Department to work as the Head of the Department. ….”

ફક્તને ફક્ત વીર નર્મદ દક્ષિણ ગુજરાત યુનિવર્સિટીના સિન્ડીકેટ અધિકાર મંડળ પાસે જ પાવર્સ છે કે કોઇપણ ડિપાર્ટમેન્ટના હેડ ઓફ ધ ડિપાર્ટમેન્ટ પદે સક્ષમ વ્યક્તિની નિમણૂંક નિયમાનુસાર કરી શકે. આ માટે યુનિ.માં સ્ટેચ્યુટરી પ્રોવિઝન પણ ઉપલબ્ધ છે.

ડો.મુનિર જી. ટીમોલને ઇન્ચાર્જ એચ.ઓ.ડી. મેથેમેટિક્સ ડિપાર્ટમેન્ટ પદે તા.15 જુન 2018ના રોજ નિમણૂંક આપવામાં આવી એ પછીની વહેલી તકે એટલે કે એ પછીની સિન્ડીકેટ અધિકાર મંડળની બેઠકમાં તેમને વિધિવત રીતે એચ.ઓ.ડી.નો ચાર્જ સોંપી દેવાનો ઠરાવ થવો જોઇતો હતો. પરંતુ, RSS સમર્થક કુલપતિ ડો. શિવેન્દ્ર ગુપ્તાના રાજમાં આ કામને ઇરાદાપૂર્વક વિલંબમાં નાંખવામાં આવી રહ્યું છે.

ડો. મુનિર જી. ટીમોલની હંગામી નિયુક્તિ થયા પછી સિન્ડીકેટ અધિકાર મંડળની બબ્બે સભાઓ યોજાઇ ગઇ. પહેલી મિટીંગ તા.25-06-2018 અને બીજી તા.15-07-2018ના રોજ મળી. પરંતુ, સૂત્રોના જણાવ્યા અનુસાર આ બન્ને બેઠકોના એજન્ડા પર એક સક્ષમ મુસ્લિમ અધ્યાપક ડો. મુનિર જી. ટીમોલની નિમણૂંકનું ઔપચારિક કામ નહીં મૂકવાના આદેશ કરવામાં આવ્યા. આવા આદેશ કોના ઇશારે થયા એ તપાસનો વિષય બન્યો છે પરંતુ, સૌથી મોટી ચર્ચાએ શરૂ થઇ છે કે RSS સમર્થક કુલપતિના રાજમાં માઇનોરિટી વર્ગના લોકો સાથે અન્યાય શરૂ થયો છે અને તેની નોંધ કોઇ લેતું નથી એટલે અન્યાયકર્તાઓને વધુ બળ મળી રહ્યું છે.

ડો.મુનિર જી. ટીમોલની નિમણૂંકના મુદ્દે કહેવાય છે કે ખુદ કુલપતિ ડો. ગુપ્તા યુનિ. કાર્યાલયને તેમની નિમણૂંકની દરખાસ્ત સિન્ડીકેટ અધિકારમંડળના એજન્ડા પર લાવવાથી અટકાવી રહ્યા છે. યુનિ.ના એક્સપર્ટ કહે છે કે આ સરાસર અન્યાયકર્તા છે ડો. મુનિર ટીમોલ ખરેખર તમામ પ્રકારની શૈક્ષણિક લાયકાત, અનુભવ સહિત તમામ બાબતો પર અપ ટુ ધ માર્ક મેરિટ ધરાવે છે આમ છતાં તેમને હળાહળ અન્યાય તો થઇ રહ્યો છે પરંતુ, તેઓ પોતે પણ અપમાનિત થઇ રહ્યાની અનૂભુતિ ધરાવી રહ્યા છે.

ડો.ટીમોલને નિમણૂંક નહીં આપી ને આટલા હકોથી વંચિત રાખ્યા

ડો. મુનિર જી. ટીમોલને 15 જુન 2018 પછી વહેલી તકે મેથેમેટિક્સ ડિપાર્ટમેન્ટના હેડ ઓફ ધ ડિપાર્ટમેન્ટની નિમણૂંક નહીં આપીને RSS સમર્થક કુલપતિ ડો.શિવેન્દ્ર ગુપ્તાએ ડો. મુનિર જી. ટીમોલને સેનેટ મેમ્બર, બોર્ડ ઓફ યુનિવર્સિટી ટીચીંગ જેવા અનેક પદોથી વંચિત રાખ્યા છે. હવે જ્યારે સિન્ડીકેટ અધિકાર મંડળની ચૂંટણી આવી રહી છે ત્યારે સેનેટ મેમ્બર તરીકે એક એક મત કિંમતી હોય છે ત્યારે તેમને કાયમી નિમણૂંક અપાશે કે હજુ પણ અન્યાય કરવાની નીતિ ચાલી રહેશે એ જોવું રહ્યું.

આગામી તા.24મી ઓગસ્ટના રોજ વીર નર્મદ દક્ષિણ ગુજરાત યુનિવર્સિટીનો પદવીદાન સમારોહ યોજાઇ રહ્યો છે. કુલાધિપતિ એવા રાજ્યપાલ શ્રી કોહલીના હસ્તે જ્યારે પદવીદાન સમારોહ યોજવાનો હોય ત્યારે સેનેટ મેમ્બર માટે આવા દિક્ષાંત સમારોહ જીવનભરનું સંભારણું બની રહેતા હોય છે. સેનેટ મેમ્બર માટે ગર્વની વાત હોય છે કે તેઓ સેનેટર તરીકે દિક્ષાંત સમારોહમાં ઉપસ્થિત રહે. ત્યારે ડો. મુનિર જી. ટીમોલને આ ગર્વથી પણ વંચિત રાખવામાં આવી રહ્યા છે.

August 13, 2018

મીરા રોડના શહીદ મેજર કૌસ્તુભ રાણેની પત્નીના નામે એક ઑડિયો-ક્લિપ વાઇરલ : શહીદના પરિવારને મદદ કરવાનું કહીને અમુક લોકો પૈસા જમા કરી રહ્યા હોવાથી પરિવાર દુખી

હજુ ગઇ તા.6 ઓગસ્ટ 2018ના રોજ શહીદ થયેલા મહારાષ્ટ્રના મેજર કૌસ્તુભ રાણેના નામે ઉઘરાણા શરૂ થઇ ગયા હતા. પ્રસ્તુત તસ્વીર તેમના પત્નીની છે, તેમનું કલ્પાંત હજુ શમ્યું નથી.

મેજર કૌસ્તુભના પરિવારજનો સ્મશાનભૂમિમાં અંતિમ વિદાય આપી રહ્યા છે, શહીદ મેજર કૌસ્તુભના નામે કેટલાક લોકોએ ઉઘરાણા શરૂ કરતા પરિવારજનો અત્યંત દુખી છે

ભારતમાં કોઇ કુદરતી આપત્તી આવે એટલે તરત જ તેની સહાયના નામે ફંડફાળાના ઉઘરાણા શરૂ કરી દેવાય છે પરંતુ, હવે તો ભારતમાતાની રક્ષા કાજે શહીદી વહોરી લેનાર શહીદોના નામે પણ ઉઘરાણા શરૂ થયા છે. એક ગંભીર કિસ્સો એ પણ પ્રકાશમાં આવ્યો છે કે હજુ અઠવાડીયા પહેલા જ તા. 6 ઓગસ્ટના રોજ ઉત્તર કાશ્મીરના બાંદીપોરા જિલ્લામાં ગુરેજ સેક્ટરમાં આતંકવાદીઓ સામેની કાર્યવાહી વખતે શહીદ થયેલા મૂળ મુંબઇના મીરા રોડના ૩૦ વર્ષીય મેજર કૌસ્તુભ પ્રકાશ રાણેના પત્નીના નામે ઓડીયો ક્લીપ વાઇરલ કરીને કેટલાક ઠગભગતોએ ઉઘરાણા શરૂ કરી દીધા છે.

શહીદ મેજર કૌસ્તુભ રાણેના પરિવારજનો માટે આ બાબત અત્યંત આઘાતજનક છે. શહીદ મેજરનાં પત્નીના નામે એક ઑડિયો સોશ્યલ મીડિયા પર ખૂબ જ વાઇરલ થઈ છે જેમાં તેઓ ભાવુક થઈને અનેક વાતો કરતાં હોવાનું સંભળાય છે, પરંતુ આ ઑડિયો મેજરનાં પત્નીનો ન હોવાનો તેમના પરિવારે સોશ્યલ મીડિયા પર સ્પષ્ટતા કરતો મેસેજ વાઇરલ કર્યો છે. શહીદ મેજરના પરિવારને મદદ કરવાના નામે પરિસ્થિતિનો ગેરફાયદો ઉઠાવીને અમુક લોકો પૈસા જમા કરતા હોવાની પણ વાત મેસેજમાં કરવામાં આવી છે. એથી પરિવારે લોકોને આહ્વાન પણ કર્યું છે કે આવું વર્તન કરીને પરિવારને દુખના સમયે ત્રાસ થાય એવું વર્તન ન કરો.

મેજરના સબંધીઓએ વાઇરલ થયેલા ઑડિયો વિશે મીરા રોડ પોલીસને પણ જાણ કરી છે. મીરા રોડ પોલીસે ગંભીરતાપૂર્વક તાત્કાલિક આ મેસેજ ફોરવર્ડ કરવો નહીં અને મેસેજ બનાવનાર સામે ઍક્શન લેવામાં આવશે એવી ચીમકી ઉચ્ચારી છે. ઉપરાંત મીરા રોડ પોલીસના સૂત્ર દ્વારા એવું પણ જાણવા મળ્યુ છે કે શહીદ મેજરના પરિવારના સંબંધી મિહિર હેદવકરે આ સંદર્ભે સમતાનગર પોલીસ-સ્ટેશનમાં ફરિયાદ કરતો પત્ર પણ આપ્યો છે, જેની કૉપી મીરા રોડ પોલીસને પણ આપવામાં આવી છે.

મેજર કૌસ્તુભ ગઇ તા.૬ ઑગસ્ટે શહીદ થયા હતા. આઠ આતંકવાદીઓ સાથે થયેલી મૂઠભેડમાં 2 આતંકવાદીઓને ઠાર કરીને ભારતીય સેનાના ૪ જવાનો શહીદ થયા હતા. મીરા રોડના રહેવાસી શહીદ કૌસ્તુભ રાણેની અંતિમયાત્રામાં અસંખ્ય લોકો જોડાયા હતા અને હજારો ભારતીયોએ ભાવુક થઇને સોશ્યલ મીડિયા પર શહીદ કૌસ્તુભ રાણેની અંતિમયાત્રાના વિવિધ ફોટો શૅર કરીને તેમને અદ્વિતીય અંજલી આપી હતી.

Newer Posts

Older Posts

Slider Archives - Page 460 of 488 - CIA Live

સ્વતંત્રતા પર્વની ઉજવણી સાથે BNI સુરત દ્વારા બાહુબલી ચેપ્ટરનું 3rd લોંચીંગ

સદગુરૂ શાસ્ત્રી પૂજ્ય હરિપ્રકાશદાસજી તથા શાસ્ત્રી પૂજ્ય જ્ઞાનપ્રકાશદાસજી દેવદર્શનાર્થે વડતાલ પધાર્યા

ટાટા મોટર્સના સાણંદ પ્લાન્ટએ સંપૂર્ણ ક્ષમતા સિદ્ધ કરી

ગાંધીના વિચારોની પરીક્ષામાં ગુંડો ગવળી પહેલા નંબરે પાસ

કોર્ટયાર્ડ મેરિયટને મળ્યું 5 Star સ્ટેટસ, સુરતની ત્રીજી ફાઇવસ્ટાર હોટેલ બની

મુંબઇમાં એઇડ્સના 25000 દર્દીઓ ગુમ થઇ ગયા

ગુજરાતની સ્કુલ-કોલેજોમાં ડ્રગ્સ વિરોધી ઝુંબેશ શરૂ થશે

ગૂગલ તમારી દરેક હિલચાલ પર નજર રાખે છે

VNSGUમાં RSS સમર્થક કુલપતિના રાજમાં એક કેપેબલ મુસ્લિમ અધ્યાપક બઢતીથી વંચિત

6 ઓગસ્ટે શહીદ થયેલા મુંબઇના મેજર કૌસ્તુભના નામે ઉઘરાણા, પરિવારજનો વ્યથિત