ઓડિસાના મુખ્ય પ્રધાન બીજેડીના નવીન પટનાયક સામે ભાજપે હિંજલીમાં રાજ્યના ઉપપ્રમુખ પિતાંબર આચાર્યને ઊભા રાખ્યા છે. પિતાંબર વિદ્યાર્થીકાળથી રાજકારણમાં છે, પરંતુ પ્રથમવાર ચૂંટણી લડી રહ્યા છે. ઓડિસા હાઈ કોર્ટના સિનિયર એડવોકેટ છે. ભાજપના પ્રવકતા પણ છે. આચાર્યને કટક લોકસભા બેઠક પરથી ચૂંટણી લડવાની ઈચ્છા હતી, પરંતુ આ બેઠક ઓડિસાના ડીજીપી પ્રકાશ મિશ્રાને અપાઈ છે તેથી વિધાનસભાની

બેઠકમાં નવીન પટનાયક સામે ચૂંટણી લડશે. હીંજલી બેઠકની ચૂંટણી 18 એપ્રિલે થશે. આ બેઠક પર નવીન પટનાયક ચાર મુદતથી ચૂંટાય છે.

સુરત શહેર જિલ્લાની 16 વિધાનસભા બેઠકોના એઆરઓને ઇવીએમ સમેતની મશીનરી સુપરત કરીને સ્ટ્રોંગ રૂમોમાં મૂકાશે

સુરતઃ સુરત સમેત ગુજરાતમાં મતદાનને એક મહિના જેટલો સમય બાકી છે આમ છતાં સુરત ચૂંટણી તંત્ર કોઇપણ તક કે જોખમ લીધા વગર મતદાન શાંતિપૂર્ણ રીતે સુપેરે પાર પડે તે માટે સતત પ્રયાસો હાથ ધરી રહ્યું છે. શહેરમાં વધુને વધુ મતદાન થાય અને લોકો મતાધિકારનો ઉપયોગ વિના વિધ્ને કરી શકે તે માટે આજે જિલ્લા ચૂંટણી તંત્રએ ઇલેક્ટ્રોનિક વોટિંગ મશીન્સનું રેન્ડમાઇઝેશન, પ્રાઇમરી ચેકિંગ કર્યું અને તે પણ રાજકીય પક્ષોના આગેવાનોની ઉપસ્થિતિમાં અને તેમને વિશ્વાસમાં લઇને હવે વિધાનસભા ક્ષેત્રમાં ઇલેક્ટ્રોનિક વોટિંગ મશીન્સ સમેતની વોટિંગ માટેની કીટ રવાના કરવામાં આવશે.

સુરત કલેક્ટરેટ ખાતે આજે રાજકીય પક્ષોના આગેવાનોની ઉપસ્થિતિમાં ચૂંટણી અધિકારીઓએ અંદાજે 5421 ઇલેક્ટ્રોનિક વોટિંગ મશીન્સ, વીવીપેટ યુનિટ સમેતના સાધનોનું રેન્ડમાઇઝેશન કર્યું હતું. આ એક ચૂંટણી પ્રક્રિયાનો ભાગ છે. કયું ઇવીએમ કયા વિસ્તારમાં જશે એ કશું નિયત ન હોય, દરેક બેલેટ યુનિટ, વીવીપેટ યુનિટ વગેરેનું પ્રાઇમરી ચેકિંગ કર્યા બાદ તેને રાજકીય પક્ષોના આગેવાનોની હાજરીમાં જુદા જુદા વોટિંગ એરિયા એટલે કે સુરત શહેર જિલ્લા મળીને કુલ 16 વિધાનસભા ક્ષેત્રના એ.આર.ઓ. (આસિસ્ટન્ટ રિટર્નિંગ ઓફિસર)ને સુપરત કરવાની વિધી હાથ ધરવામાં આવી હતી. આજે રેન્ડમાઇઝેશન પૂરું થતા તા.26મી માર્ટ એટલે કે આવતીકાલ મંગળવારથી એ જુદી જુદી વિધાનસભા બેઠકોના સ્ટ્રોંગ રમો તરફ રવાના કરવામાં આવશે.

હવે પછી ઇલેક્ટ્રોનિંગ વોટિંગ મશીન્સ વિધાનસભા એરીયા અનુસાર નિમાયેલા નાયબ ચૂંટણી અધિકારીઓના તાબા હેઠળ રહેશે. આજે તમામ પ્રક્રિયાને ચૂંટણી તંત્રએ પારદર્શી રીતે રાજકીય આગેવાનોને વિશ્વાસમાં લઇને પાર પાડી હતી. ક્યાંયે કોઇને અસંતોષ હોવાની કોઇ ફરીયાદ ન ઉપસ્થિત થતાં તંત્રએ હાશકારો અનુભવ્યો હતો.

દર્શના જરદોષે સાંસદ તરીકે મળતી ગ્રાન્ટમાંથી બાકડાં મૂકાવીને નિયમ ભંગ કર્યાની ફરીયાદ 

ચલિત વસ્તુઓ માટે એમ.પી.નું ફંડ વાપરી શકાય નહીં એવા નિયમ સાથે સંજય ઇઝાવાની ફરીયાદ કલેક્ટરે લીધી, હવે કેન્દ્ર સરકાર પાસેથી માર્ગદર્શન મેળવીને આગળ કાર્યવાહી કરાશે

વર્ષ ૨૦૧૪ થી ૨૦૧૯ દરમિયાન સુરતના સંસદ સભ્ય શ્રીમતી દર્શના જરદોશે પોતાના કાર્યકાલમાં સુરત મત વિસ્તારમાં વર્ષ ૨૦૧૬ -૨૦૧૭ માં આશરે ૪૨૦૦ જેટલા બેસવાના બાંકડા(બેન્ચ) અંદાજે ૧.૭૦ કરોડ ના ખર્ચે મુકાવ્યા હતા. મેમ્બર ઓફ પાર્લામેન્ટ લોકલ એરિયા ડેવલપમેન્ટ સ્કીમ  MPLADS ના માર્ગદર્શન મુજબ આખા વર્ષમાં કરવા લાયક વિકાસના કામોની યાદી જિલ્લા કલેક્ટર પાસે થી મંજૂર કરાવી જે તે ડીપાર્ટમેન્ટને કામ કરવા માટે સોંપી દેવામાં આવે છે. જેના માટે ડીપાર્ટમેન્ટ દ્વારા ટેન્ડર બાહર પાડી અલગ અલગ એજેન્સી પાસે કામ કરાવીને સાંસદ ફંડ (મેમ્બર ઓફ પાર્લામેન્ટ લોકલ એરિયા ડેવલપમેન્ટ સ્કીમ) માંથી પેમેન્ટ ચુકાવાતું હોય છે.

મેમ્બર ઓફ પાર્લામેન્ટ લોકલ એરિયા ડેવલપમેન્ટ સ્કીમના માર્ગદર્શન એક વાર વાંચવાની તસદી પણ સાંસદો લેતા નથી એવું લાગી રહ્યું છે. કારણ કે મેમ્બર ઓફ પાર્લામેન્ટ લોકલ એરિયા ડેવલપમેન્ટ સ્કીમ ના માર્ગદર્શન મુજબ કોઈ પણ મુવેબલ ( સ્થાન ફેર થઇ શકે તેવી ) વસ્તુઓ માટે મેમ્બર ઓફ પાર્લામેન્ટ લોકલ એરિયા ડેવલપમેન્ટ સ્કીમ ફંડનો ઉપયોગ કરી શકાય નહીં.

પણ સ્થાન ફેર થઇ શકે તેવી અમુક ચોક્કસ સાધનસામગ્રીમાં મેમ્બર ઓફ પાર્લામેન્ટ લોકલ એરિયા ડેવલપમેન્ટ સ્કીમ ફંડનો ઉપયોગ કરી શકાય છે, જેનો ઉલ્લેખ મેમ્બર ઓફ પાર્લામેન્ટ લોકલ એરિયા ડેવલપમેન્ટ સ્કીમ ના માર્ગદર્શનમાં અલગથી અનેક્ષર -૩ માં કરવામાં આવ્યો છે.જેમાં બાંકડા મેમ્બર ઓફ પાર્લામેન્ટ લોકલ એરિયા ડેવલપમેન્ટ સ્કીમ માર્ગદર્શનમાં ના હોવા છતાં ૪૨૦૦ થી વધારે બાંકડા એક જ વર્ષમાં મુકવામાં આવેલ છે. સાંસદને વિકાસ એટલે બેસવા માટે બાંકડા એવું જ માની લીધું હોય એમ લાગે છે. મેમ્બર ઓફ પાર્લામેન્ટ લોકલ એરિયા ડેવલપમેન્ટ સ્કીમના માર્ગદર્શન મુજબ ફંડનો ઉપયોગ કામ વગરના બાંકડામાં વાપરનાર આ સાંસદો સુરતનો શું વિકાસ કરશે.

આ ફક્ત સુરત મતવિસ્તારનું કિસ્સો નથી. આખા સાઉથ ગુજરાતમાં મેમ્બર ઓફ પાર્લામેન્ટ લોકલ એરિયા ડેવલપમેન્ટ સ્કીમ ફંડનો દુરુપયોગ કરી બાંકડા મુકવામાં આવ્યા છે. આ મુદ્દા પર સંજય ઇઝાવા એ કરેલ રાઇટ ટુ ઇન્ફર્મેશનની અરજીના જવાબ માં ચોંકાવનારી વિગતો બહાર આવી છે. મેમ્બર ઓફ પાર્લામેન્ટ લોકલ એરિયા ડેવલપમેન્ટ સ્કીમ ફંડના સુરત જિલ્લા મત વિસ્તારના સક્ષમ સત્તા શ્રી ધવલ પટેલ, કલેક્ટર શ્રી એ સુરત જિલ્લા ને લેખિત ફરિયાદ કરી છે.

સાથે સાથે મેમ્બર ઓફ પાર્લામેન્ટ લોકલ એરિયા ડેવલપમેન્ટ સ્કીમ ના લોક સભા કમીટી , કેગ અને લોકપાલ માં પણ આ વિષે ફરિયાદો દાખલ કરવા સંજય ઇઝાવા દ્વારા પ્રયાસો ચાલુ કરી દેવામાં આવ્યા છે.

આગામી લોકસભા ઇલેકશન બાદ દિલ્હીના તખ્તોતાજ પર કોની સરકાર આવી શકે છે એ ચારે તરફ ચર્ચાનો પ્રશ્ર્ન બની ચૂક્યો છે ત્યારે વિશ્લેષકોના અહેવાલ પ્રમાણે ઉત્તરપ્રદેશ તથા બિહાર દિલ્હી સરકારના પ્રશ્ર્ન સંદર્ભે મહત્ત્વનો રોલ ભજવી શકે છે. ૨૦૧૪માં ભાજપે બિહાર-યુપીની કુલ ૧૨૦ બેઠકોમાંથી ૯૩ બેઠકો મેળવી હતી જેમાં ઉત્તરપ્રદેશમાં ૭૧ અને બિહારમાં ૨૨ બેઠકો મેળવવામાં એનડીએ સરકાર સફળ થઈ હતી. પરંતુ હાલ સિનારિયો બદલાઈ ચૂક્યો છે. ઉત્તરપ્રદેશમાં સમાજવાદી પાર્ટી તથા બહુજન સમાજ પક્ષનું ગઠબંધન અને બિહારમાં રાષ્ટ્રીય જનતાદળનું ગઠબંધન ભાજપ માટે બંને રાજ્યોમાં દિલ્હી દૂર હોવાનું સાર્થક કરી શકે તેવી સંભાવના જોવામાં આવી રહી છે. પાછલા થોડા સમયમાં મીડિયાએ યુપી, નોર્થ-સાઉથ બિહારની મહત્ત્વની ૧૫ બેઠકોના નાગરિકોને મળી તેમના વિચારો જાણવાનો પ્રયલૃ કર્યો હતો. મીડિયાએ તમામ જ્ઞાતિ-ધર્મ તથા ખાસ યુવાવર્ગને ધ્યાનમાં રાખી તેમનો જૂકાવ જાણવાનો કોશિશ કરી હતી. જણાયેલી ત્રુટિ અંતર્ગત વિશ્લેષકોએ જણાવ્યું હતું કે ચૂંટણી માટે એપ્રિલ ૧૧થી મેના બીજા સપ્તાહ સુધીનો તબક્કાવાર સમય મતદાતાઓની વિચારસરણી બદલવા પર્યાપ્ત થઈ પડે છે. ઘણી બેઠકોના ઉમેદવાર હજી જાહેર કરવામાં આવ્યા નથી.

મતદાતાઓમાં પુરુષોનું પ્રમાણ વધુ જોવા મળ્યું છે. ઉપરાંત ગ્રાઉન્ડ રુટ પર મતદાતાઓનો મૂડ પારખવો પણ મુશ્કેલ જણાઈ રહ્યો હતો. બેઠક વ્યવસ્થા સંદર્ભે મતદારોનો મુડ-વળાંકજનક પરિણામો સર્જી શકે છે. હાલ પ્રવર્તતી પરિસ્થિતિ મુજબ વડાપ્રધાન નેરન્દ્ર મોદી અતિ પ્રખ્યાત નેતા છે જે યુવાનમતને વિશેષ આકર્ષી શકે છે. યુવાનોમાં મોદીની મક્કમતા, તેમની નિર્ણયશક્તિ પ્રિય છે. જોકે લોકોમાં તેમની રાજકીય કપટનીતિ પણ ચર્ચાનો વિષય રહ્યો છે. કેટલાકના મતે મોદી ગરીબોના નેતા છે તો કેટલાકને તેમન પ્રામાણિકતા અંગે સંદેહ છે. લોકોમાં મોદી સિવાય અન્ય વિકલ્પ નહીં હોવા અંગેની ચર્ચા વધુ સાંભળવા મળી હતી. બેરોજગારીના મુદ્દે ભાજપ તરફથી સ્પષ્ટતા કરવામાં આવી હતી કે તમામ પ્રશ્ર્નો માટે મોદી પર માછલા ધોઈ શકાય નહીં. લોકોમાં મોદીને વધુ સમય આપવાની નીતિ પણ સ્પષ્ટ જોવા મળી હતી. ૨૦૧૯ લોકસભાની ચૂંટણી મુખ્યત્વે નેશનલ લિડરશીપનો મુદ્દો બની ચૂકી છે, જે રીતે હવાનો વર્તારો જોવા મળી રહ્યો છે તે મુજબ ૨૩ મેના રોજ મોદી ફરી એક વાર મજબૂત નેતા તરીકે ઉભરી આવે તેવી શક્યતા જણાઈ રહી છે.

હિન્દુવાદીઓનો મોદીને વિશેષ ટેકો છે. યુપી તથા બિહારમાં સવર્ણો સરકાર સાથે છે. શિડ્યુઅલ કાસ્ટ અને શિડ્યુઅલ ટ્રાઇવ્સ કાયદા સમયે સર્જાયેલા વિખવાદ બાદ આર્થિક રીતે પછાત સમુદાયને ૧૦ ટકા આરક્ષણ આપવાના કેન્દ્ર સરકારના નિર્ણયે ઓબીસી, ઇબીસી તથા નોન યાદવ ઓબીસીને ભાજપ તરફી બનાવી દીધા છે. બિહારમાં પાસવાન તથા રવિદાસ સંપ્રદાય અને યુપીમાં ધોળી અને પાસી સમુદાયનો ભાજપને ટેકો છે. પરંતુ યુપીમાં બસપ અને સપાનું જોડાણ ભાજપ માટે જોખમ ઊભું કરી શકે છે. બંને પક્ષના જોડાણે મુસલમાન, યાદવ અને જાદવ સમુદાયનો વિશ્ર્વાસ સંપાદન કર્યો છે. ૨૦૧૪માં સ્વતંત્ર રીતે ચૂંટણી લડેલા બંને રાજકીય પક્ષોને ૨૦૧૯નું જોડાણ ફળદાયી – વધુ સારુ પરિણામ આપી શકે તેવી સંભાવનાઓ છે. ૨૦૧૪માં સપાને પાંચ બેઠકો મળી હતી જ્યારે બસપ એક પણ બેઠક મેળવવામાં નિષ્ફળ રહ્યું હતું. સર્વે મુજબ ૮૦ બેઠકો પૈકી ૪૭ બેઠકો પર મુસલમાન, યાદવ તથા દલિત મતોનું ૫૦ ટકાથી વધી પ્રભુત્વ છે. બસપ અને સપા જો મત મેળવવામાં સફળ થાય તો મોદીવેવની પછડાટ શક્ય થઈ શકે છે. જ્યારે સ્વતંત્ર રીતે ચૂંટણી લડવા પ્રતિબધ્ધ કોંગ્રેસ યુપીનું ચિત્ર બગાડી શકે છે.

ઉત્તરપ્રદેશનું ચિત્ર જોતા ભાજપ કરતા કોંગ્રેસની સીધી લડાઈ સપા-બસપ સાથે થવાની સંભાવના વિશેષ વ્યક્ત થઈ રહી છે. કોંગ્રેસ મુસ્લીમ મત સાથે ભાજપના સવર્ણના મત પણ તોડી શકે છે. પરંતુ બિહારમાં કોંગ્રેસની પીછેહઠ વધુ જણાઈ રહી છે. બિહારમાં રફેલ ડીલ અંગેના આક્ષેપો પણ રાહુલ ગાંધીને કોઈ પણ પક્ષનો ટેકો અપાવી શક્યા નથી. જનતા પણ કોંગ્રેસને નાપસંદ કરતી હોવાનું સર્વેમાં જણાયું છે. ઉપરાંત યુપી બિહારમાં પણ પુલવામા એટેક બાદ એનડીએ સરકારે કરેલી એરસ્ટ્રાઇક મહત્ત્વનો મુદ્દો બની ચૂકી છે. પાનના ગલ્લે, ચાની દુકાનો પર, શોપિંગ સેન્ટરમાં, યુનિવર્સિટી કેમ્પસમાં બાલાકોટની એરસ્ટ્રાઇક સાથે મોદીની મક્કમતાને મુલવવામાં આવી રહી છે. જેણે ભાજપ તરફના ઝૂકાવને વધુ ઘેરો કર્યો છે. ગ્રામવિકાસની યોજનાઓ, શૌચાલય, ગેસ કનેકશન, આવાસ યોજના, વીજળીની સગવડ જેવા મુદ્દા પણ ભાજપની મક્કમતામાં વધારો કરી રહ્યા છે.

ભાજપએ અત્યાર સુધીમાં લોકસભા બેઠક માટે છ યાદી બહાર પાડી છે જેમા ૨૯૭ ઉમેદવારોને ટિકિટ ફાળવાય છે જેમા વડા પ્રધાન મોદી વારાણસી બેઠક, પક્ષના રાષ્ટ્રીય અધ્યક્ષ અમીત શાહ ગાંધીનગર બેઠકથી ચૂંટણી લડશે.

પ્રથમ બે તબકકાની ચૂંટણીના લગભગ તમામ ઉમેદવાર ઘોષિત થઈ ગયા છે. પ્રથમ યાદીમાં ૧૮૪ ઉમેદવાર જાહેર કર્યાં હતા. શુક્રવારે ત્રણ યાદી, શનિવારે એક યાદી બહાર પાડી હતી.ગૃહપ્રધાન રાજનાથસિંહ લખનઊ, કાનૂન પ્રધાન રવિશંકર પ્રસાદ બિહારના પટના સાહેબ તથા પક્ષના સંબીત પાત્રા ઓડીસાના પુરીથી ચૂંટણી લડનાર છે. અન્ય અગ્રણી નેતાઓ જેમને ટિકિટ ફાળવાય છે તેમા નરેન્દ્રસિંહ તોમર, જયંત સિંહા, શ્રીપદ નાયક, અનુરાગ ઠાકુર, હંસરાજ આહીર, રાધા મોહનસિંહ, ગિરીરાજ સિંહનો સમાવેશ છે.

મોટી ઉંમર ધ્યાનમાં લઈને એલ. કે. અડવાણીને ટિકિટ અપાઈ નથી. શાહનવાઝ હુસેનની બેઠક જેડીયુને ફાળે જતાં તેમનું પત્તુ કપાયું હતું.

ભાજપએ બિહારમાં જેડીયુ, મહારાષ્ટ્રમાં શિવસેના, તમિળનાડુમાં અન્ના ડીએમકે, પંજાબમાં અકાલી દળ સાથે યુતિ કરેલી છે તે ઉપરાંત રામવિલાસની પાર્ટી, આઠવલેની પાર્ટી સાથે પણ યુતિ છે.

૧૧મી એપ્રિલથી શરૂ થનારી લોકસભાની ચૂંટણી માટે કૉંગ્રેસના ચૂંટણીઢંઢેરાને સોમવારે આખરી સ્વરૂપ આપવામા ંઆવશે. દિલ્હીમાંના અકબર રોડ પર કૉંગ્રેસના મુખ્યાલયમાં કૉંગ્રેસ વર્કિંગ કમિટી (સીડબલ્યૂસી)ની બેઠક મળશે, જેમાં વિવિધ મુદ્દાઓ પર ચર્ચા કરી ચૂંટણીઢંઢેરાને આખરી ઓપ આપવામાં આવશે. કૉંગ્રેસ પક્ષ દ્વારા કોઈ પણ વિષય પરનો અંતિમ નિર્ણય સીડબલ્યૂસીમાં લેવામાં આવતો હોય છે અને પક્ષ પ્રમુખ સીડબલ્યૂસીના અધ્યક્ષ હોય છે. પી. ચિદમ્બરમના વડપણ હેઠળ રચાયેલી ચૂંટણીઢંઢેરા સમિતિમાં અન્ય ૨૦ સભ્યો પણ છે. સમાજના વિવિધ વર્ગનો અભિપ્રાય લેવા અને તેમના સૂચનો આમેજ કરવા ઓનલાઇન પોર્ટલ પણ લોન્ચ કરવામાં આવ્યું છે. સોમવારે સીડબલ્યૂસીની બેઠકમાં ભૂતપૂર્વ વડા પ્રધાન મનમોહનસિંહ, સોનિયા ગાંધી, ભૂતપૂર્વ મુખ્ય પ્રધાન સિદ્ધરામૈયા, ઓમન ચાંડી, તરુણ ગોગોઈ, હરીશ રાવત, પ્રિયંકા ગાંધી, યુવા નેતાઓ સહિત મહત્ત્વના નેતાઓ બેઠકમાં હાજરી આપશે. રાહુલ ગાંધી બેઠકના અધ્યક્ષ રહેશે.