વારાણસીમાં વડા પ્રધાન નરેન્દ્ર મોદી વિરુદ્ધ ચૂંટણી લડવામાં મને કોઈ વાંધો નથી એ પ્રકારના સંકેત આપ્યાનાં એક દિવસ બાદ કૉંગ્રેસનાં મહામંત્રી પ્રિયંકા ગાંધીએ વારાણસીની અવગણના કરવાના મામલે મોદી પર આકરા પ્રહાર કર્યા હતા.

માતા સોનિયા ગાંધીનાં મતદારક્ષેત્ર રાયબરેલીમાંથી પ્રિયંકા ગાંધીએ ચૂંટણી લડવી જોઈએ એ પ્રકારના પક્ષના કાર્યકર્તાએ કરેલા સૂચન અંગે પ્રતિક્રિયા આપતાં પ્રિયંકાએ કટાક્ષમાં કહ્યું હતું કે શું કામ હું વારાણસીથી ચૂંટણી ન લડું?

વર્ષ 2014માં મોદીને લોકસભામાં મોકલનાર વારાણસી મતદારક્ષેત્રની અવદશાને મામલે તેમને નિશાન બનાવી પ્રિયંકાએ આ શકયતાની અટકળોને ઈંધણ પૂરું પાડ્યું હતું, પરંતુ પત્રકારોએ આ મામલે જ્યારે પ્રિયંકાને સીધો સવાલ કર્યો હતો ત્યારે તેમણે કહ્યું હતું કે પક્ષ મને જ્યાંથી કહેશે ત્યાંથી હું ચૂંટણી લડીશ.

અયોધ્યામાં નુક્કડ સભામાં પ્રિયંકાએ ભાજપને ધનવાનતરફી અને ખેડૂતવિરોધ તેમ જ લશ્કરના હિતવિરોધી લેખાવ્યો હતો.

મોદી દેશવિદેશમાં ભ્રમણ કરતા રહે છે, પરંતુ છેલ્લાં પાંચ વર્ષમાં તેમણે તેમના મતદારક્ષેત્રના એકપણ ગામડાંની મુલાકાત ન લીધી હોવાનો પ્રિયંકાએ દાવો કર્યો હતો.

પ્રિયંકાએ દાવો કર્યો હતો કે ભાજપ સરકાર માત્ર અમીરોને જ મદદ કરે છે અને તેમને વધુ અમીર બનાવે છે. ભાજપ સરકાર પાસે ઉદ્યોગપતિઓ માટે રૂપિયા છે, પરંતુ ખેડૂતો અને ગરીબો માટે નથી, એમ પ્રિયંકાએ કહ્યું હતું.

પ્રિયંકાએ મોદી સરકાર પર લોકશાહી અને બંધારણીય સંસ્થાઓનો નાશ કરવાનો આરોપ મૂક્યો હતો.

આ વખતની ચૂંટણી દેશ અને બંધારણને બચાવવા માટેની છે, એમ પ્રિયંકાએ કહ્યું હતું.

ગુજરાતમાં શરદ પવારની NCP તમામ 26 બેઠકો પર ચૂંટણી લડશે, કોંગ્રેસને ફટકો

શરદ પવારની નેશનાલિસ્ટ કોંગ્રેસ પાર્ટી NCPએ ગુજરાતની તમામ 26 લોકસભા બેઠકો પર એકલા હાથે ચૂંટણી લડવાની જાહેરાત કરી દીધી છે. એનસીપીનું કોંગ્રેસ સાથે ગંઠબંધન કરવાની વાતો નિષ્કર્ષ વગર પડી ભાંગતા એનસીપી હવે ગુજરાતમાં એકલા હાથે ચૂંટણી લડશે. આ રાજકીયર સમીકરણ ઉપરાંત કોંગ્રેસ સાથે વાટાઘાટો ફળદાયી નહીં નિવડતા આદિવાસી બેલ્ટમાં મજબૂત પકડ ધરાવતી છોટુભાઇ વસાવાની પાર્ટી, BTPએ પણ ગઠબંધન કરવાનો ઈન્કાર કર્યો છે.

લોકસભા પહેલા ગુજરાતમાં કોંગ્રેસને બેવડો ફટકો પડવા જઈ રહ્યો છે. પાર્ટી બદલવાનો અને સમર્થન આપવાનો સિલસિલો ચાલી રહ્યો છે. ત્યારે કોંગ્રેસની કોઈ પક્ષ પાસેથી સમર્થન મેળવવાની આશાઓ પર પણ પાણી ફરી રહ્યું છે.

અમદાવાદમાં નેશનાલિસ્ટ કોંગ્રેસ પાર્ટીએ જાહેરાત કરતા કહ્યું કે, ‘અમે ગુજરાતમાં લોકસભાની તમામ બેઠકો પર ઉમેદવારો ઉતારીશું. જ્યાં સુધી કોંગ્રેસને સમર્થન આપવાની વાત છે તો ગુજરાતમાં અમે કોંગ્રેસ સાથે ગઠબંધન નહીં કરીએ.’

ભરૂચ, નર્મદા અને આસપાસના આદિવાસી પટ્ટામાં સારી પકડ ધરાવતી બીટીપીએ પણ એકલા હાથે ચૂંટણી લડવાનો નિર્ણય કર્યો છે. BTP વલસાડ, બારડોલી, વડોદરા અને નવસારી સહિતની 8 બેઠકો પર લડશે. BTPએ રાજ્યસભા અને સ્થાનિક ચૂંટણીમાં કોંગ્રેસના સમર્થન આપ્યું હતું, પણ હવે તેઓ લોકસભામાં કોંગ્રેસને સમર્થન નહીં આપે.

વડાપ્રધાન નરેન્દ્ર મોદીએ એન્ટિ-સેટેલાઇટ મિસાઇલના પરીક્ષણની જાહેરાત કરી તેમાં ચૂંટણી આચારસંહિતાનો ભંગ થયો છે કે નહીં તેની તપાસ કરવામાં આવશે. ચૂંટણી પંચે આ વિશે એક સમિતિની રચના કરી છે. લોકસભાની ચૂંટણીની જાહેરાત થઈ ગયા પછી અત્યારે આચારસંહિતા લાગુ છે જેમાં મતદાન પૂર્ણ ન થાય ત્યાં સુધી લોકરંજક જાહેરાતો કરવાની મનાઈ હોય છે.

ચૂંટણી પંચના પ્રવક્તાએ જણાવ્યું કે આચારસંહિતા લાગુ છે તે બાબત ધ્યાનમાં રાખીને પોલ પેનલે અધિકારીઓની એક સમિતિને આ બાબતની ચકાસણી કરવા માટે જણાવ્યું છે. વડાપ્રધાન નરેન્દ્ર મોદીએ બુધવારે જાહેરાત કરી હતી કે ભારતે એક જીવંત સેટેલાઇટને તોડી પાડીને એન્ટિ-સેટેલાઇટ મિસાઇલ ક્ષમતા પુરવાર કરી છે. આ પરીક્ષણ બાદ ભારત હવે સ્પેસ સુપરપાવરની એક્સક્લુઝિવ ક્લબમાં આવી ગયું છે અને આવી ક્ષમતા ધરાવતું ચોથું રાષ્ટ્ર બન્યું છે.

ભારતે 300 કિલોમીટરની ઊંચાઈ પર આવેલા સેટેલાઇટને મિસાઇલથી તોડી પાડ્યું હતું. વિરોધપક્ષોએ આ જાહેરાતને ચૂંટણી પર અસર પાડવાના પ્રયાસ તરીકે ગણાવ્યો છે અને આરોપ મૂક્યો છે કે વડાપ્રધાન દ્વારા ચૂંટણીની આચારસંહિતાનો ભંગ કરવામાં આવ્યો છે. તેમણે આ વિશે ચૂંટણી પંચને ફરિયાદ કરી છે.