Blog - Page 703 of 709 - CIA Live

રાજપોરના શાપર નજીકની એક ફેક્ટરીના કમ્પાઉન્ડ નજીક પાંચ વ્યક્તિએ એક દલિત પુરુષની મારપીટ કરીને કરેલી હત્યાની ઘટનાને મામલે નેશનલ હ્યુમન રાઈટ્સ કમિશન-એનએચઆરસીએ ગુજરાત સરકારને નૉટિસ પાઠવી હતી.

કચરો વીણવાનું કામ કરતા ૩૫ વર્ષના મૂકેશ વાણિયા અને તેની પત્ની જયાબેન વાણિયા સાથે ૨૦મી મેએ નિર્દય રીતે મારપીટ કરવામાં આવી હોવાનું અધિકારીઓએ કહ્યું હતું.

મૂકેશ અને તેની પત્ની જયાબેન ભંગારની ચોરી કરવા આવ્યા હોવાની શંકાને પગલે ફેક્ટરીના માલિક સહિત પાંચ વ્યક્તિએ મૂકેશને ઢોેરમાર મારીને તેની હત્યા કરી હતી.

એનએચઆરસી દ્વારા મંગળવારે બહાર પાડવામાં આવેલા નિવેદનમાં જણાવ્યાનુસાર સમાચારપત્રના અહેવાલમાં આપવામાં આવેલી વિગતો સાચી હોય તો આ ઘટના અસરગ્રસ્તના માનવઅધિકારના ભંગનો ગંભીર મુદ્દો બને છે અને એ આધારે જ ગુજરાત સરકારના મુખ્ય સચિવને નૉટિસ પાઠવી ચાર અઠવાડિયાની અંદર ઘટના અંગે અહેવાલ રજૂ કરવા તેમ જ અસરગ્રસ્ત પરિવારને રાહત પહોંચાડવા લેવામાં આવેલાં પગલાંની જાણકારી આપતો અહેવાલ રજૂ કરવા જણાવ્યું હતું.

વાયરલ થયેલા વીડિયોમાં ઘટનાનો ભોગ બનેલા મૂકેશ વાણિયાને બે વ્યક્તિ લાકડીથી વારાફરતી ફટકારતી જોવા મળતી હતી તો એક વ્યક્તિએ મૂકેશની કમરમાં બાંધેલા દોરડા વડે તેને પકડી રાખી હોવાનું જોઈ શકાતું હતું.

એસસી/એસટી પ્રિવેન્શન ઑફ એટ્રોસિટી (પીઓએ) ઍક્ટ તેમ જ હત્યા, મહિલા પર હુમલો અને બળજબરીપૂર્વક ગોંધી રાખવા સંબંધિત આઈપીસીની કલમ અંતર્ગત રાદડિયા ઈન્ડસ્ટ્રીઝના માલિક સહિત પાંચે આરોપીની ધરપકડ કરવામાં આવી હોવાનું રાજ્યના ગૃહ ખાતાના પ્રધાન પ્રદીપસિંહ જાડેજાએ કહ્યું હતું.

ગુનેગારો વિરુદ્ધ સરકાર કડક પગલાં લઈ રહી છે એમ જણાવતાં તેમણે કહ્યું હતું કે જીઆઈડીસી વિસ્તારમાં આવેલી રાદડિયા ઈન્ડસ્ટ્રીઝ નજીકથી અસરગ્રસ્ત દંપતી કચરો વીણી રહ્યું હતું ત્યારે તેને પકડી લઈ આરોપીઓ દ્વારા ઢોરમાર મારવામાં આવ્યો હતો.

મૂકેશને સારવારાર્થે રાજકોટની સરકારી હૉસ્પિટલમાં લઈ જવામાં આવી રહ્યો હતો ત્યારે તેનું મૃત્યુ નીપજ્યું હતું, એમ શાપર-વેરાવળ પોલીસ સ્ટેશનના પોલીસ અધિકારીએ કહ્યું હતું. ઘટનાને મામલે પોલીસ તપાસ આરંભવામાં આવી હોવાનું તેમણે કહ્યું હતું.