April 6, 2019

આઇપીએલમાં શુક્રવારે રમાયેલી કોલકત્તા અને બેંગ્લોર વચ્ચેની રોમાંચક મેચમાં આંદ્રે રસેલના વાવાઝોડા સામે બેંગ્લોર ફરી ધ્વસ્ત થઇ ગયું હતું અને કોલકત્તા ટીમે 5 વિકેટે જીત મેળવી હતી. આમ બેંગ્લોર ટીમની ટુર્નામેન્ટમાં સતત પાંચમી હાર થઇ હતી. રસેલે 13 બોલમાં 48 રનની તોફાની ઇનીંગ રમીને કોલકત્તાને હારમાંથી બહાર લાવીને ઐતિહાસીક જીત અપાવી હતી. રસેલે પોતાની ઇનીંગમાં 7 છગ્ગા અને 1 ચોગ્ગો ફટાકાર્યો હતો. સુકાની કોહલી અને ડિવિલિયર્સના આકર્ષક અર્ધશતકની મદદથી રોયલ ચેલેન્જર્સ બેંગ્લુરૂએ ચિન્ના સ્વામી સ્ટેડિયમમાં પોતાનું આક્રમક પ્રદર્શન કરતા કોલકાતા નાઇટરાઇડર્સને 3 વિકેટનાં નુકસાને 205 રનનો મોટો સ્કોર આપ્યો હતો. જો કે કોલકાતાનાં અંતે રમવા માટે આવેલ રસેલે રોયલ ચેલેન્જર્સ બેંગ્લુરુની જીતની આશા છીનવી લીધી હતી.

બેગ્લોરના સુકાની કોહલીએ 49 બોલમાં 9 ચોગ્ગા અને 2 છગ્ગાની મદદથી 84 રન બનાવ્યા હતા. તો ડિવિલિયર્સે 32 બોલમાં 5 ચોગ્ગા અને 4 છગ્ગાની મદદથી 63 રનની વિસ્ફોટક ઈનિંગ્સ રમી હતી. આ બંનેએ બીજી વિકેટ માટે મહત્વપૂર્ણ 108 રન જોડ્યા હતા. માર્ક્સ સ્ટોઈનિસે અંતિમ 13 બોલમાં 28 રન (નો.આ.) બનાવીને ટીમના સ્કોરને 200 પાર પહોંચાડ્યો હતો. ક્રિકેટના કોઈ પણ ફોર્મેટમાં પ્રથમ છ ઈનિંગ્સમાં 50ના સ્કોર સુધી પહોંચવામાં નિષ્ફળ રહેલો કોહલી આજે પ્રારંભથી જ ફૂલ ફોર્મમાં જોવા મળ્યો હતો. આજે તેના તમામ શોટ જોવાલાયક હતા. કોહલીએ પાર્થિવ પટેલ (24 બોલમાં 25 રન) સાથે પ્રથમ વિકેટ માટે 64 રનની ભાગીદારી નોંધાવી હતી. બેંગલુરુએ પહેલી 4 ઓવરમાં 41 રન બનાવી લીધા હતા.

વિરાટ કોહલીએ કોલકત્તા સામેની મેચમાં 17 રન પૂરા કરવાની સાથે જ ટી20માં 8000 રન બનાવી લીધા છે. આ સાથે જ તે ટી20માં 8000 રન પૂરા કરનારો તે ભારતનો બીજો અને દુનિયાનો ચોથો ખેલાડી બની ગયો છે.

April 6, 2019

લોકસભાની ચૂંટણીના ઝંઝાવાતી પ્રચારનો તબક્કો શરૂ થઇ ગયો છે, વડાપ્રધાન નરેન્દ્ર મોદી આગામી તા.10મીએ જૂનાગઢ અને પોરબંદર એમ બે સ્થળે જાહેરસભાને સંબોધશે, તો આવતી કાલથી અમિત શાહ પણ ગુજરાતમાં ચૂંટણી સભાના શ્રીગણેશ કરશે.

ભાજપ પ્રદેશ અધ્યક્ષ જીતુ વાઘાણીએ જણાવ્યું હતું કે,વડાપ્રધાનશ્રી નરેન્દ્રભાઇ મોદી 10મીએ જુનાગઢ અને પોરબંદર લોકસભા વિસ્તારમાં સભાઓ’ સંબોધશે જ્યારે બપોરે બારડોલી અને નવસારી લોકસભા’ બેઠકમાં પણ સભા યોજાશે. ભાજપના રાષ્ટ્રિય અધ્યક્ષ અને ગાંધીનગર લોકસભાના ઉમેદવાર અમિતભાઇ શાહ આજે સાંજે અમદાવાદ આવી પહોંચશે અને સાંજે જ ગુજરાતની તમામ 26 બેઠકો અંગે ચર્ચા વિચારણા કરી રણનીતિ ઘડશે.

આવતી કાલે 6ઠ્ઠી એપ્રિલથી ભાજપના સ્થાપના દિવસથી પોતાના મતવિસ્તારથી ગાંધીનગર લોકસભાથી લોકસંપર્ક શરૂ કરશે. તેઓ તેમના મત વિસ્તારમાં વેજલપુર અને સાબરમતિ વિસ્તારમાં રોડ શૉ કરશે. રાત્રે બોપલ વિસ્તારમાં બેઠકો કરશે. તેઓ 6,15,19 અને 21 એપ્રિલે રાજ્યમાં અલગ અલગ લોકસભા વિસ્તારની જગ્યાઓએ સભાઓને સંબોધશે. એવું પણ જાણવા મળે છે કે અમિત’ શાહના પ્રચાર માટે તેમની સાથે કેન્દ્રિય રક્ષા પ્રધાન’ નિર્મલા’ સિતારામન’ પ્રચારમાં જોડાશે. આવતીકાલે અમદાવાદમાં પ્રબુદ્ધ નાગરિકોનુ સંમેલન યોજવામાં આવ્યું છે જેને નિર્મલા સિતારામન પણ સંબોધન કરશે. તેઓ વડોદરા અને આણંદ લોકસભા વિસ્તારમાં પણ કાલે જશે.

શ્રી વાઘાણીએ જણાવ્યું હતું કે ભાજપની ડિજીટલ ડાન્સીંગ 13 જેટલી ટીમો તમામ લોકસભા વિસ્તારમાં જઇને પ્રચાર કરશે. ભાજપ સરકારની લોકકલ્યાણકારી યોજનાઓની જાણકારી આપશે.

April 6, 2019

આચારસંહિતા લાગુ થયા બાદ અત્યારસુધીમાં 1618 કરોડ રૂપિયાની રોકડ, દારૂ, ડ્રગ્સ અને અન્ય કિંમતી સામાન ઝડપાયો
નવી દિલ્હી, તા. 5 : ચૂંટણી પંચે લોકસભા ચૂંટણી 2019ના કાર્યક્રમની ઘોષણા અને આદર્શ આચાર સંહિતા લાગુ થયા બાદ અત્યાર સુધીમાં 1618 કરોડ રૂપિયાની સંદિગ્ધ રોકડ, શરાબ, ડ્રગ્સ અને અન્ય સામાન જપ્ત કર્યો છે. ચૂંટણી પંચના કહેવા પ્રમાણે 4 એપ્રિલ સુધીમાં જ આચાર સંહિતાના ઉલ્લંઘન મામલે 1618.78 કરોડ રૂપિયાનો સામાન જપ્ત કર્યો છે. જેમાંથી 399.50 કરોડ રૂપિયા તો માત્ર રોકડ છે. 2014ની લોકસભા ચૂંટણી દરમિયાન 303 કરોડ રૂપિયાની રોકડ અને સામગ્રી જપ્ત થઈ હતી.’ જ્યારે આ વખતે પહેલા તબક્કાના મતદાન પહેલા જ 2014નો રેકોર્ડ તુટી ગયો છે. ચૂંટણી પંચ તરફથી જારી કરવામાં આવેલી જાણકારી પ્રમાણે 4 એપ્રિલ સુધીમાં થયેલી કાર્યવાહી દરમિયાન 399.50 કરોડ રોકડ, 708.55 કરોડ રૂપિયાનું ડ્રગ્સ, 162.89 કરોડનો શરાબ, 318.49 રૂપિયાની મોંઘી ધાતુઓ અને 29.34 કરોડ રૂપિયાની અન્ય વસ્તુ સામેલ છે.

April 6, 2019

જૂનાગઢના 9 જેટલા ખાદ્યતેલોના વેપારીઓએ આચર્યું કરોડોનું કૌભાંડ: ગોંડલ બાદ બીજો બનાવ

જીએસટી વિભાગે નવા નાણાકિય વર્ષના આરંભ સાથે જ બોગસ બિલીંગ વડે છેતરપીંડી આચરનારા તત્વો સામે કાર્યવાહી આદરી છે. અગાઉ ગોંડલમાં ખાદ્યતેલોના વેપારના ખોટા બિલો વડે કૌભાંડ રચાયા પછી આજે જૂનાગઢના ખાદ્યતેલના કુલ નવ વેપારીઓને ઝપટમાં લઇને 227.80 કરોડના બોગસ બિલો બનાવવાના વ્યવહારોને પકડી પાડવામાં આવ્યા હતા. જૂનાગઢના આ વેપારીઓએ બોગસ ઇ વે બિલ બનાવીને માલ મોકલાતો હોવાનું બતાવ્યું હતુ.

જીએસટી વિભાગ પાસેથી પ્રાપ્ત થયેલી માહિતી પ્રમાણે સવારથી જ અધિકારીઓનો કાફલો જૂનાગઢના તેલિબિયાંના વેપારીઓ અને તેની સાથે સંકળાયેલા વેપારીઓને ત્યાં ત્રાટક્યો હતો. તપાસમાં ફક્ત ઇ વે બિલ જનરેટ કરતા હોવાનું સામે આવ્યું હતુ. પેઢીના જે માલિકો દર્શાવવામાં આવ્યા છે તેના પાન નંબરનો દુરુપયોગ કરીને જીએસટી નંબર પણ અન્ય વ્યક્તિઓ દ્વારા મેળવાયા હોવાની માહિતી વિભાગ દ્વારા આપવામાં આવી હતી.

જીએસટી વિભાગે કહ્યું હતુ કે, જૂનાગઢની નોબલ એન્ટરપ્રાઇઝ દ્વારા સૌથી વધુ 42.50 કરોડની રકમના બોગસ ઇ વેબિલ જનરેટ કરવામાં આવ્યા હતા. એ સિવાય રિલાયેબલ એન્ટરપ્રાઇઝના 42.36 કરોડ, વેદાંતના 34.50 કરોડ, પરિમલ એન્ટરપ્રાઇઝના 5.68 કરોડ, પેરેડાઇઝ એન્ટરપ્રાઇઝના 22.80 કરોડ, ક્લાસિક ટ્રેડર્સના 25.10 કરોડ, આલ્ફા ટ્રેડિંગના31.52 કરોડ, પૂજા ટ્રેડિંગના 7.59 કરોડ અને સમર્થ એન્ટરપ્રાઇઝના 15.76 કરોડના બોગસ ઇ વેબિલ જનરેટ કરવામાં આવ્યા હતા.

April 6, 2019

ગુજરાતમાં આકરા ઉનાળાની શરૂઆત વચ્ચે અને જિલ્લાઓમાં પીવાના પાણીને લઈને પોકારો શરૂ થઈ ગયા છે. ચાલુ વર્ષે ચોમાસા દરમિયાન અપૂરતા વરસાદને લઈને રાજ્યના અને ડેમો તળાઓ અને કૂવાઓના તળિયા દેખાઈ રહ્યા છે. લોકો ઉપરાંત પશુ-પક્ષીઓને પણ પાણી માટે અત્યારથી વલખાં મારવા પડે છે જેને લઈને અનેક અછતગ્રસ્ત જિલ્લાઓમાં હિજરત શરૂ થઈ ગઈ છે. આવી જ હાલત દક્ષિણ ગુજરાતના જિલ્લાઓની પણ સર્જાઈ છે.

હાલમાં સુરત જિલ્લાના જ ઉકાઈ ડેમની સપાટીમાં ઉત્તરોતર ઘટાડો નોંધાઇ રહ્યો છે. ઉકાઈ ડેમની કુલ સપાટી 345 ફૂટ ગણવામાં આવે છે એના પ્રમાણમાં ગત બુધવારે સવારે સપાટી 294.62 ફૂટ નોંધાઇ હતી. હાલમાં ડેમમાં એની કુલ ક્ષમતાનું માત્ર 23 ટકા પાણીનો જ સંગ્રહ છે. જેને લઈ જિલ્લા અને શહેરને પૂરા પાડતા પીવાના પાણીની આવનાર દિવસોમાં ઘેરા સંકેતો સાપડી રહ્યા છે. ગુજરાતમાં ચાલુ વર્ષે ચોમાસુ નબળું રહેતા રાજ્યના અનેક જિલ્લાઓમાં ઘેરા પાણીના સંકેતો ઊભા થયા છે. અનેક જિલ્લાના જળાશયો જેવા કે તળાવો, કૂવાઓ, વાવો, ડેમ અને બોરોના તળિયા નીચા જતા પીવાના પાણીની હાલમાં અનેક જિલ્લાઓમાં વિકટ પરિસ્થિતિ નિર્માણ થઈ રહી છે.

ઉત્તર ગુજરાત, મધ્ય ગુજરાત અને દક્ષિણના અનેક જિલ્લાઓમાં ઓછો વરસાદ થતાં ડેમ તળાવો અને કૂવામાં ચાલુ વર્ષે પાણીનો સંગ્રહ નહિવત નોંધાયો હતો ત્યારે દક્ષિણ ગુજરાતના સુરતના ઉકાઈ ડેમમાં ઉપરવાસમાં અને જિલ્લામાં થયેલા અપૂરતા વરસાદને લઈને પાણી ડેમમાં ઓછું સંગ્રહિત થયું હતું. તેમજ તાલુ વર્ષે ઉનાળાએ પણ આક્રમક રૂપ ધારણ કરતા જે સંગ્રહિત પાણી હતુ તે પણ બાષ્પીભવન થતાં હાલમાં સુરત જિલ્લાના જ ઉકાઈ ડેમની સપાટીમાં ઉત્તરોતર ઘટાડો નોંધાઈ રહ્યો છે. દરમિયાન ઉકાઈ ડેમની કુલ સપાટી 345 ફૂટ ગણવામાં આવે છે એના પ્રમાણમાં ગત બુધવારે સપાટી 294.62 ફૂટ નોંધાઇ હતી.

April 6, 2019

ભાજપના સિનિયર નેતા મુરલી મનોહર જોષી શુક્રવારે લાલકૃષ્ણ અડવાણીને તેમના નિવાસસ્થાને મળ્યા હતા. એક દિવસ પહેલાં અડવાણીએ કહ્યું હતું કે રાજકીય દૃષ્ટિએ સહમત નહીં થતાં હોય તેઓને ભાજપે ક્યારે પણ દુશ્મન કે રાષ્ટ્રવિરોધી ગણ્યા નથી. ભાજપના અગ્રણી નેતાઓ નરેન્દ્ર મોદી, અમિત શાહ સતત બાલાકોટ હવાઈ હુમલા બાદ વિપક્ષો પર રાષ્ટ્રવિરોધી હોવાનો આક્ષેપ કરી રહ્યા છે ત્યારે અડવાણીનું નિવેદન ઘણું મહત્ત્વ ધરાવે છે.

જોષી અને અડવાણી વચ્ચે શું ચર્ચા થઈ તે હજુ બહાર આવ્યું નથી. આ બંને નેતાને ટિકિટ મળી નથી. અડવાણીની ઉંમર 91 વર્ષ છે. તેઓ ગાંધીનગર બેઠકથી છ વાર ચૂંટાયા હતા. મુરલી મનોહર જોષી ભાજપના સ્થાપક સભ્ય પૈકી એક છે. તેમને ભાજપના મહામંત્રી રામલાલ થોડા દિવસ અગાઉ મળ્યા હતા અને પક્ષના નિર્ણયથી વાકેફ કર્યા હતા.

April 6, 2019

કૉંગ્રેસ પક્ષના રાષ્ટ્રીય અધ્યક્ષ રાહુલ ગાંધીએ સ્પષ્ટતા કરતા જણાવ્યું હતું કે ગરીબોને વર્ષે રૂ. 72,000 આપવાની સ્કીમનો અમલ કરવા માટે મિડલક્લાસ પર ટેકસનો બોજો નાખવામાં નહીં આવે. કૉંગ્રેસે પોતાના વચનનામામાં ગરીબીરેખા નીચે જીવતા લગભગ પાચ કરોડ પરિવાર માટે દર વર્ષે રૂ. 72,000 આપવાની જાહેરાત કરી છે. પુણે ખાતે તેમણે આ વિશે વિદ્યાર્થીઓ સાથે વાત કરતા જણાવ્યું હતું કે આ જાહેરનામું ઘણા લોકો સાથે વાતચીત કર્યા બાદ બનાવવામાં આવ્યું છે. ગાંધીએ જાહેર કરેલી ‘ન્યાય’ સ્કીમ વર્ષે રૂ. 3.26 લાખ કરોડનો બોજ દેશની તિજોરી પર નાખશે. ભાજપ સહિત નિષ્ણાતોએ આટલું મોટું ફંડ ક્યાંથી આવશે તે અંગે સવાલો ઊભા કર્યા હતા. આરજે મલિષ્કા અને અભિનેતા સુબોધ ભાવે દ્વારા સંચાલિત કરવામાં આવેલા આ કાર્યક્રમમાં રાહુલ ગાંધીએ રાજકારણ, તેના વ્યક્તિગત જીવન અને બહેન પ્રિયંકા સાથેના સંબંધો વિશે પૂછાયેલા સવાલોના જવાબ આપ્યા હતા. તેમણે મહિલાઓને સંસદમાં 33 ટકા અનામત આપવાની વાત પણ કરી હતી.

ગાંધીએ ડિમોનિટાઈઝેશનને ડિઝાસ્ટરસ આઈડિયા ગણાવ્યો હતો. આ નિર્ણયને લીધે અર્થવ્યવસ્થા પર ઘાતક અસર થઈ હોવાની ટીકા તેમણે કરી હતી. નીતી આયોગને બંધ કરવાના કૉંગ્રેસના વચન અંગે પૂછવામાં આવતા તેમણે જણાવ્યું હતું કે રાષ્ટ્રીય સ્તરે આપણને એવી સંસ્થા જોઈએ છે જે શું કરવું તે નક્કી કરે, પરંતુ તેનો અમલ તો રાજ્યસ્તરે થવો જોઈએ. બાલકોટમાં કરેલી ઍર સ્ટ્રાઈકનો શ્રેય કોણે લેવો જોઈએ તેમ પૂછવામાં આવતા તેમણે જણાવ્યું હતું કે વાયુસેનાએ આનો શ્રેય લેવો જોઈએ. આ મુદ્દાને રાજકારણ સાથે જોડવામાં આવ્યો તે વાતનો મને અફસોસ છે, પરંતુ વડા પ્રધાને આમ કર્યું અને એ તેમની પસંદ છે. અભિનેતા સુબોધ ભાવેએ ગાંધીને પૂછ્યું હતું કે જો હું તમારી બાયોપિક બનાવું તો હિરોઈન તરીકે કોને કામ આપવું જોઈએ, ત્યારે રાહુલે જણાવ્યું હતું કે દુર્ભાગ્યપુર્ણ રીતે હું મારા કામને પરણેલો છું. સોશિયલ મીડિયામાં તેમના પર થતા જૉક્સ વિશે તેમણે જણાવ્યું હતું કે જે લોકો વર્ચ્યુઅલ રિયાલિટીમાં જીવે છે, તેમને જીવવા દો, પરંતુ લોકો વાસ્તવિકતાને નકારી શકે નહીં.

April 6, 2019

વડા પ્રધાન નરેન્દ્ર મોદીએ શુક્રવારે જણાવ્યું હતું કે કૉંગ્રેસ અને ભ્રષ્ટાચાર ‘એકબીજાના અવિભાજ્ય ભાગ’ છે. ઑગસ્ટા વેસ્ટલેન્ડ હેલિકૉપ્ટર સોદાના કૌભાંડમાં પકડાયેલા વચેટિયા (દલાલ) ક્રિશ્ર્ચિયન મિશેલે કૉંગ્રેસનો ‘પ્રથમ પરિવાર’ આ ગેરરીતિમાં સંડોવાયો હોવાનો નિર્દેશ આપ્યો હતો.

મોદીએ દેહરાદૂનમાં જાહેરસભાને સંબોધતા જણાવ્યું હતું કે મિશેલે પૂછપરછ દરમિયાન બે નામ જાહેર કર્યા હતા. એક ‘એપી’ છે અને બીજું ‘એફએએમ’ છે. ‘એપી’ એટલે અહેમદ પટેલ અને ‘એફએએમ’ એટલે ‘ફેમિલી’ છે. તમે અહેમદ પટેલનું નામ સાંભળ્યું હશે? તેઓ ક્યા પરિવારની નજીક છે એ જાણો છોને? આ પરિવાર ‘ચોકીદાર’ના કડક પગલાંને સહન કરી નથી શકતો.

એન્ફૉર્સમેન્ટ ડિરેક્ટરેટે વચેટિયા ક્રિશ્ર્ચિયન મિશેલ સામે ગુરુવારે દિલ્હીની અદાલતમાં પૂરક તહોમતનામું નોંધાવ્યું હતું. એન્ફૉર્સમેન્ટ ડિરેક્ટરેટે જણાવ્યું હતું કે મિશેલે ‘એપી’ એટલે અહેમદ પટેલ હોવાનું કબૂલ કર્યું હતું. આમ છતાં, મિશેલે શુક્રવારે કરેલી અરજીમાં દાવો કર્યો હતો કે મેં આ સોદાના સંબંધમાં કોઇનું નામ નથી આપ્યું. દરમિયાન, કૉંગ્રેસે એન્ફૉર્સમેન્ટ ડિરેક્ટરેટ દ્વારા આ પ્રકરણમાં નોંધાવાયેલા પૂરક તહોમતનામાને ‘ચૂંટણી વખતનો સ્ટન્ટ’ ગણાવ્યો હતો.

અહેમદ પટેલે આ આક્ષેપને પાયાવિહોણો ગણાવીને જણાવ્યું હતું કે ચોકીદાર અને તેમના સાથીઓ ખોટી રીતે આક્ષેપ કરી રહ્યા છે. નૉટબંધી અને રાફેલના દલાલો હવે બચી નહિ શકે. જનતા તેઓને ચૂંટણીમાં પાઠ ભણાવશે.

April 6, 2019

યુપીએસસીએ શુક્રવારે જાહેર કરેલા સિવિલ સર્વિસીસની 2018ની અંતિમ પરીક્ષાના પરિણામમાં આઇઆઇટી બૉમ્બેનો બીટેકનો વિદ્યાર્થી કનિષ્ક કટારિયા પ્રથમ આવ્યો હતો. યુપીએસસીએ જણાવ્યું હતું કે કમિશને વિવિધ આઇએએસ, આઇપીએસ, આઇએફએસ વગેરે સેવા માટે કુલ 759 ઉમેદવાર (577 પુરુષ અને 182 મહિલા)ની ભલામણ કરી હતી. કટારિયા અનુસૂચિત જાતિનો છે અને ગણિતને વૈકલ્પિક વિષય રાખીને ક્વૉલિફાઇ થયો હતો. તે બી.ટેક (કમ્પ્યુટર સાયન્સ એન્ડ એન્જિનિયરિંગ)નો વિદ્યાર્થી છે.

ગુજરાતનું રિઝલ્ટ શું

UPSCની કમ્બાઈન્ડ સિવિલ સર્વિસિઝ એક્ઝામ (CCSE) 2018નું પરિણામ શુક્રવારે જાહેર થયું. ગુજરાતના 18 ઉમેદવારોએ UPSCની પરીક્ષા પાસ કરી છે અને એક પરીક્ષાર્થીએ ટોપ 100માં સ્થાન મેળવ્યું છે. 2018માં ગુજરાતમાંથી 131 ઉમેદવારોએ યુપીએસસીની પ્રીલિમનરી પરીક્ષા પાસ કરી જેમાંથી 43 ગુજરાતી ઉમેદવારોએ એ યુપીએસસી સિવીલ સર્વિસીઝ મેઈન્સ પરીક્ષા પાસ કરી છે. ફાઈનલ સિલેક્શન અને રેન્ક નક્કી કરવા માટે ઈન્ટરવ્યૂ લેવામાં આવ્યા હતા. ગુજરાતમાંથી એન્જિનયિરંગ સ્નાતક થયેલા કાર્તિક જીવાણીએ મિકેનિકલ એન્જિનિયરિંગ વિષય સાથે પરીક્ષા પાસ કરી અને યુપીએસસી ફાઇનલ્સમાં દેશભરમાં 94મો ક્રમાંક મેળવ્યો છે. કાર્તિક જીવાણી ગુજરાતમાં પ્રથમ છે.

583મો ક્રમ મેળવનાર અલ્પેશ પંચાલ ભારતીય રેલવેમાં મિકેનિકલ એન્જિનિયર તરીકે કામ કરે છે. ઘાટલોડિયાનો રહેવાસી અને સુથારના દીકરા અલ્પેશે નોકરી કરતાં કરતાં જ પરીક્ષાની તૈયારી કરી. અલ્પેશે કહ્યું, “IIT બોમ્બેમાંથી મેં મિકેનિકલ એન્જિયરિંગની ડિગ્રી મેળવી અને બાદમાં સિવિલ સર્વિસીઝની પરીક્ષા માટે તૈયારી શરૂ કરી. મને આશા છે કે હું IPS કે IRS કેડરમાં જોડાઉં.” બી. જે. મેડિકલ કોલેજમાંથી MBBSની ડિગ્રી મેળવનાર ડૉ. મનોજ ભરતે 622મો ઓલ ઈન્ડિયા રેન્ક (AIR) મેળવ્યો છે. ડૉ. મનોજે કહ્યું, ‘IPS કેડરમાં જોડાવાની આશા છે.’ શહેરના અન્ય એક ઉમેદવાર પિંકેશ પરમહંસે 685મો ઓલ ઈન્ડિયા રેન્ક મેળવ્યો.

પરિણામનું વિશ્લેષણ કરતાં જાણવા મળ્યું કે, 3 ઉમેદવારોએ પ્રથમ પ્રયાસમાં જ પરીક્ષા પાસ કરી, બીજા પ્રયાસમાં પાંચ ઉમેદવારો અને ત્રીજા પ્રયાસમાં બે ઉમેદવારો પાસ થયા. 6 સફળ પરીક્ષાર્થીઓ 20થી 25 વર્ષની વયના છે અને એક 30થી વધુની ઉંમરનો છે. સ્પીપા (સરદાર પટેલ ઈન્સ્ટીટ્યૂટ ઓફ પબ્લિક એડમિનિસ્ટ્રેશન)ના સૂત્રોના જણાવ્યા અનુસાર UPSCએ જાહેર કરેલી ખાલી જગ્યાની સંખ્યામાં ઘટાડો થયો છે તેમ છતાં ઈન્સ્ટીટ્યૂટનું પરિણામ ઊંચું આવ્યું છે. જાગૃતિ અને પરીક્ષાની ઉત્તમ તૈયારીના લીધે સારું પરિણામ પ્રાપ્ત થયું છે. 2017-18માં પાસ થનારા ઉમેદવારો 22 હતા. જ્યારે 2016-17માં આ આંકડો 19 હતો.”

Complete Results with name

https://upsc.gov.in/sites/default/files/FR-CSME-2018-Engl.pdf

April 5, 2019

દિલ્હી કેપિટલ્સ અને સનરાઇઝર્સ હૈદરાબાદ વચ્ચેની રોમાંચક મેચમાં હૈદરાબાદના મોહમ્મદ નબીએ વિજય છગ્ગો ફટકારીને ટીમને 5 વિકેટે જીતાડી હતી.

હૈદરાબાદે ટોસ જીતીને બોલિંગ લીધી
ઇન્ડિયન પ્રીમિયર લીગ 2019ની 16મી મેચમાં સનરાઇઝર્સ હૈદરાબાદના સુકાની ભુવનેશ્વર કુમારે દિલ્હીના ફિરોઝશાહ કોટલા સ્ટેડિયમ ખાતે ટોસ જીતીને બોલિંગ લીધી છે. હૈદરાબાદે પોતાની ટીમમાં કોઈ ફેરફાર કર્યો નથી. જયારે દિલ્હીની ટીમમાં 3 ફેરફાર છે. ઇશાંત શર્મા, અક્ષર પટેલ અને રાહુલ તેવટિયા આજે હનુમા વિહારી, હર્ષલ પટેલ અને આવેશ ખાનની જગ્યાએ રમી રહ્યા છે. દિલ્હી તરફથી આ મેચમાં સુકાની શ્રેયસ અય્યરને બાદ કરતા કોઇ ખાસ રમ્યું ન હતું. સુકાની શ્રેયસે 41 બોલમાં 3 ચોગ્ગા અને 1 છગ્ગાની મદદથી 43 રન કર્યા હતા. તો અક્ષર પટેલે થોડા આક્રમક શોટ લગાવ્યા હતા. તેણે 13 બોલમાં 1 ચોગ્ગા અને 2 છગ્ગાની મદદથી અણનમ 23 રન કર્યા હતા. આમ પુરી ટીમ 20 ઓવરમાં 8 વિકેટે 129 રન જ કરી શકી હતી. હૈદરાબાદ તરફથી ભુવનેશ્વર, મોહમ્મદ નબી અને સિદ્ધાર્થ કૌલે 2-2 વિકેટો ઝડપી હતી.

IPL 2019 : હૈદરાબાદે 5 વિકેટે દિલ્હી કેપિટલ્સને હરાવી ત્રીજી જીત મેળવી — હૈદરાબાદની 5 વિકેટે જીત (PC : Twitter)

આઇપીએલમાં ગુરૂવારે રમાયેલી દિલ્હી કેપિટલ્સ અને સનરાઇઝર્સ હૈદરાબાદ વચ્ચેની રોમાંચક મેચમાં હૈદરાબાદના મોહમ્મદ નબીએ વિજય છગ્ગો ફટકારીને ટીમને 5 વિકેટે જીતાડી હતી. હૈદરાબાદે ટુર્નામેન્ટમાં આ ત્રીજી જીત મેળવી હતી. હૈદરાબાદના વિકેટ કીપર ઓપનર જોની બેરસ્ટો ફરી શાનદાર ઇનીંગ રમી હતી અને ટીમને આક્રમક શરૂઆત કરાવતા 28 બોલમાં 48 રન ફટકાર્યા હતા. તે મેન ઓફ ધ મેચ બન્યો હતો. દિલ્હી માટે રાહુલ તેવટિયા, અક્ષર પટેલ, સંદીપ લામીછાને, કગીસૉ રબાડા અને ઇશાંત શર્માએ 1-1 વિકેટ ઝડપી હતી.

હૈદરાબાદેની શરૂઆત આક્રમક રહી
દિલ્હી કેપિટલ્સે આપેલા 130 રનના લક્ષ્યાંકનો પીછો કરતા સનરાઇઝર્સ હૈદરાબાદે આક્રમક શરૂઆત કરી હતી. ઓપનર જોની બેરસ્ટોએ 28 બોલમાં 9 ચોગ્ગા અને 1 છગ્ગાની મદદથી 48 રન કર્યા હતા. જોકે તે 2 રન માટે અડધી સદી ચુક્યો હતો. તેને બાદ કરતા ટીમમાં કોઇ ખેલાડી મોટી ઇનીંગ રમી શક્યું ન હતું. જોકે મોહમ્મદ નબીએ થોડી આક્રમક ઇનીંગ રમી હતી. તેણે 9 બોલમાં 2 ચોગ્ગા અને 1 વિજયી છગ્ગો ફટકારી અણનમ રહ્યો હતો.

2019ના આઇપીએલ પાવરપ્લેમાં સનરાઇઝર્સનું પ્રદર્શન:

54/0 vs KKR, કોલકાતા

69/0 vs RR, હૈદરાબાદ

59/0 vs RCB,હૈદરાબાદ

62/0 vs DC, દિલ્હી

આઇપીએલમાં ખેલાડીઓ જેમનો જીતનો રેકોર્ડ 100% છે:

7* – મોહમ્મદ નાબી (SRH, 2017-2019)

6 – પાલાની અમરનાથ (CSK, 2008)

Blog - Page 546 of 709 - CIA Live

IPL : વે.ઇ.નો રસેલ વર્લ્ડ બેસ્ટ ફિનીશર બની રહ્યો છે

મોદી-શાહ ગુજરાતમાં સભાઓ ગજવશે, 10મીએ મોદી ગુજરાતમાં

ચૂંટણી પંચે રૂ. 399 કરોડની જંગી રોકડ જપ્ત કરી

જૂનાગઢમાં 227 કરોડના બોગસ ઇ-વે બિલનું કૌભાંડ

ઉકાઈ ડેમની સપાટી ઘટીને 294.62 ફૂટ થઇ ગઇ

મુરલી મનોહર અડવાણીને મળ્યા

‘ન્યાય’ સ્કીમ માટે મિડલક્લાસ પર ટૅક્સનો બોજ નહીં: રાહુલ

કૉંગ્રેસનો ‘પ્રથમ પરિવાર’ ભ્રષ્ટાચારમાં ટોચ પર: મોદી

UPSC સિવિલ સર્વિસીસ ફાઇનલ પરીક્ષામાં 18 ગુજરાતીઓ પાસ થયા

ગુજરાતનું રિઝલ્ટ શું

Complete Results with name

https://upsc.gov.in/sites/default/files/FR-CSME-2018-Engl.pdf

SRH હૈદરાબાદે 5 વિકેટે દિલ્હી કેપિટલ્સને હરાવી ત્રીજી જીત મેળવી