અંબાજીમાં બનશે દેશનો પ્રથમ કાચનો સ્કાય વૉક

અંબાજીના ગબ્બરમાં બનવા જઈ રહ્યો છે દેશનો પ્રથમ કાચનો સ્કાય વૉક.

ગુજરાતના પ્રસિદ્ધ યાત્રાધામ અંબાજીના ગબ્બરમાં દેશનો પ્રથમ કાચનો સ્કાય વૉક બનશે. યાત્રિકો હવે રોમાંચ અને સાહસિકતાથી ભરપૂર સ્કાય વૉકની મજા માણી શકશે. આગામી વાઈબ્રન્ટ સમિટમાં સ્કાય વૉક બનાવવા માટે MOU કરવામાં આવશે અને તે વહેલી તકે પૂર્ણ થાય તેવો પ્રયાસ કરવામાં આવશે. ગબ્બર પર્વત પર બનનારો આ પુલ ભારતનો પ્રથમ કાચનો પુલ હશે.

કાચના પુલ પર ચાલીને ગબ્બર પર્વતની એક બાજુએથી જઈ શકાશે. કાચના પુલ પરથી અરવલ્લીના પર્વતો અને ખીણને નિહાળી શકશે. પવિત્ર યાત્રાધામ વિકાસ બોર્ડના સચિવ કિરીટ અધર્વ્યુએ પ્રોજેક્ટ પર માહિતી આપતા કહ્યું કે, ઉષા બ્રેક કંપની સાથે સ્કાય વૉક બનાવવા માટે MOU કરવામાં આવશે. સ્કાય વૉકનું નિર્માણ થતા અંબાજી આવતા યાત્રિકોને વધુ એક નજરાણું મળી રહેશે. સ્ટેચ્યૂ ઑફ યુનિટી બાદ વધુ એક પર્યટન સ્થળ સ્કાય વૉકના રૂપમાં મળશે.