LOKSABHA Election : 12 રાજ્યોની 171 સીટ પર મતદાન થવાનું હવે બાકી

લોકસભા ચૂંટણી 2019 માટે 12 રાજ્યોની 171 બેઠકો પર મતદાન થવાનું બાકી છે. મહારાષ્ટ્ર, કર્ણાટક, ગુજરાત અને આંધ્રપ્રદેશ એ મોટા રાજ્યો છે, જ્યાં લોકસભા ચૂંટણી માટેનું મતદાન થઈ ગયું છે. ચાર તબક્કાનું મતદાન પૂર્ણ થયું છે, જેમાં 17 રાજ્યોમાં 372 સીટ પર મતદાન પૂર્ણ થઈ ગયું છે.

દ્વિતીય ચરણમાં તમિલનાડુની 39 પૈકી 38 સીટ પર મતદાન થયું હતું, જ્યારે એક બેઠક પર ચૂંટણી પ્રક્રિયા રદ થઈ હતી, જે માટે 19 મેના રોજ અંતિમ તબક્કામાં મતદાન થશે.

હવે 171 સીટ પર મતદાન થવાનું બાકી છે. 6 મેના રોજ પાંચમા ચરણમાં વોટિંગ થશે,એ સાથે રાજસ્થાન અને જમ્મૂ-કાશ્મીરની તમામ બેઠકો પર મતદાન પૂર્ણ થઈ જશે. છઠ્ઠા ચરણમાં 12 મેના રોજ દિલ્હી અને હરિયાણાની તમામ સીટો પર વોટિંગ થશે.

પંજાબ અને હિમાચલ પ્રદેશની તમામ સીટો પર 19 મેના રોજ મતદાન થશે. આ સિવાય ઉત્તરપ્રદેશ, બિહાર અને પશ્ચિમ બંગાળ એવા રાજ્યો છે, જ્યાં તમામ ચરણોમાં મતદાન થઈ રહ્યું છે. આ રાજ્યોમાં 19 મેના રોજ વોટિંગ પૂર્ણ થશે. ઝારખંડ અને મધ્યપ્રદેશમાં ચોથા ચરણમાં મતદાન શરુ થયું હતું અને આ બંને રાજ્યોમાં 19 મેના રોજ સાતમા ચરણમાં મતદાન પૂર્ણ થશે. ત્રિપુરાની એક સીટ પર બીજા ચરણમાં મતદાન પ્રક્રિયા સ્થગિત કરાઈ હતી, એ સીટ પર પણ 19મેના રોજ મતદાન થશે.

દેશમાં 11 એપ્રિલથી પ્રથમ ચરણમાં આંધ્રપ્રદેશ, તેલંગાણા, ઉતરાખંડમાં પ્રથમ ચરણમાં તમામ સીટ પર લોકસભા ચૂંટણી યોજાઈ ગઈ હતી. ત્યારબાદ 19 એપ્રિલે બીજા ચરણ સુધીમાં કેરળ સહિતના રાજ્યોમાં ચૂંટણી યોજાઈ હતી. 23 એપ્રિલે ત્રીજા તબક્કામાં ગુજરાત, કર્ણાટક અને અસામની તમામ બેઠકો પર મતદાન થઈ ગયું હતું. ગોવાની બંને સીટો પર પણ ત્રીજા તબક્કામાં મતદાન થયું હતું. છતીસગઢમાં પ્રથમ, દ્વિતીય અને તૃતીય એમ ત્રણ ચરણમાં મતદાન થયું હતું. 29 એપ્રિલે ચોથા તબક્કા સુધીમાં મહારાષ્ટ્ર અને ઓરિસ્સાની તમામ સીટો પર મતદાન થઈ ગયું છે. આમ, ચાર તબક્કામાં 372 સીટો પર મતદાન થઈ ગયું છે.