આજે ભારતીય ક્રિકેટરોની ન્યૂઝીલૅન્ડ સામે 3-3 મૅચ

આજે ભારતના કરોડો ક્રિકેટપ્રેમીઓ ન્યૂ ઝીલૅન્ડ સામેની અલગ-અલગ સ્તરની ત્રણ ક્રિકેટ મૅચના પરિણામોની રાહ જોશે. એક જ દિવસમાં કોઈ એક દેશની બીજા એક જ દેશની ત્રણ ભિન્ન સ્તરની ટીમ સામે ક્રિકેટ મૅચ રમાવાનો કદાચ આ પહેલો જ કિસ્સો છે.

મુખ્ય મૅચ આજે ભારતીય સમય મુજબ બપોરે ૧૨.૨૦ વાગ્યાથી ઑકલૅન્ડમાં વિરાટ કોહલીના સુકાનમાં ભારતીય ટીમનો કેન વિલિયમસનની ન્યૂ ઝીલૅન્ડ સાથે મુકાબલો થશે. આ ટી-ટ્વેન્ટી મૅચ છે અને એ લગભગ ૪.૦૦ વાગ્યે પૂરી થશે. પાંચ મૅચવાળી સિરીઝની એ પહેલી જ મૅચ છે.

સાઉથ આફ્રિકાના બ્લોમફોન્ટેનમાં વન-ડેનો અન્ડર-૧૯ વર્લ્ડ કપ ચાલી રહ્યો છે અને બ્લોમફોન્ટેન શહેરમાં આજે પ્રિયમ ગર્ગના સુકાનમાં ભારતની યુવા ટીમનો મુકાબલો જેસી ડાશ્કૉફની કૅપ્ટન્સીના ન્યૂ ઝીલૅન્ડની યુવા ટીમ સામે થશે. ભારતીય ટીમ બન્ને લીગ મૅચ જીતીને ક્વૉર્ટર ફાઇનલમાં પહોંચી ગઈ છે.

ન્યૂ ઝીલૅન્ડમાં ભારતથી ઇન્ડિયા ‘એ’ ટીમ બિનસત્તાવાર વન-ડે રમવા ગઈ છે અને આજે ક્રાઇસ્ટચર્ચમાં ઇન્ડિયા ‘એ’નો મુકાબલો ન્યૂ ઝીલૅન્ડ સાથે થશે. ઇન્ડિયા ‘એ’ના સુકાનીપદે શુબમન ગિલ અને ન્યૂ ઝીલૅન્ડ ‘એ’ ટીમના નેતૃત્વપદે ટૉમ બ્રુસ છે.