લોકસભાની ચૂંટણીમાં ડેડિયાપાડા વિધાનસભામાં સૌથી વધુ 85.01 ટકા મતદાન

ગુજરાતમાં લોકસભાની 26બેઠકો માટે ગત તા.23મી એપ્રિલે યોજાયેલ ચૂંટણીમાં 64.11 ટકા મતદાન થયું હતું. જેમાં સૌથી વધુ મતદાન વલસાડ લોકસભામાં 75.21 ટકા અને સૌથી ઓછું અમરેલી લોકસભામાં 55.75 ટકા મતદાન થયું છે.

લોકસભાના મતદાનની સાથે રાજ્યની 182 વિધાનસભામાં થયેલા મતદાનની ટકાવારીનું વિશ્ર્લેષણ કરવામાં આવે તો સૌથી વધુ ભરૂચ લોકસભાની ડેડિયાપાડા વિધાનસભામાં 85.01 ટકા મતદાન થયું હતુ. જ્યારે સૌથી ઓછું કચ્છ લોકસભા બેઠકમાં આવતી રાપર વિધાનસભામાં 47.37 ટકા મતદાન નોંધાયું હતું.

ગુજરાતમાં લોકસભાની ચૂંટણીના મતદાનનું વિધાનસભા બેઠકવાર એનાલિસિસ કરવામાં આવે તો રાજ્યની 35 વિધાનસભા બેઠક પર 70 ટકા કરતા વધુ મતદાન નોંધાયું હતું. જેમાં મોટાભાગની બેઠકો દક્ષિણ ગુજરાતની એટલે કે ભરૂચ, બારડોલી, સુરત, નવસારી અને વલસાડની વિધાનસભાની બેઠકો હતી.

જ્યારે શહેરી વિસ્તારો અમદાવાદ, રાજકોટ, વડોદરા, જામનગર લોકસભામાં આવતી વિધાનસભા બેઠકો પર મતદાન 55થી 65 ટકા સુધીનું નોંધાયું હતું. રાજ્યની ડેડિયાપાડા વિધાનસભામાં 80 ટકાથી વધુ મતદાન જોવા જઈએ તો વલસાડ લોકસભાની કપરાડા વિધાનસભામાં 83.16, વલસાડની જ ડાંગ બેઠક પર 81.23, બારડોલીની નિઝર બેઠક પર 82.91 અને ભરૂચની ઝઘડિયા બેઠક પર 80.09 ટકા મતદાન નોંધાયું હતું. આમ અમદાવાદ, રાજકોટ. અને જામનગર જિલ્લાઓની વિધાનસભા બેઠકોમાં મતદાન ઓછું નોંધાયું હતું. જ્યારે દક્ષિણ ગુજરાતની ઝગડીયા, ડાંગ, કપરાડા, ડેડિયાપાડા વિધાનસભા બેઠકોમાં મતદાન વધુ નોંધાયું હતું.