ગુજરાતે સરપ્લસ વીજળી ૧૦ રાજ્યોને વેચી

વિધાનસભાના પ્રશ્ર્નોત્તરી કાળ દરમિયાન પૂછાયેલા એક પ્રશ્ર્નના જવાબમાં ઊર્જા પ્રધાને વિગતો આપતા જણાવ્યું હતું કે ગુજરાત વીજળીનું વિપૂલ ઉત્પાદન કરનારું રાજ્ય છે. વીજળીનો સંગ્રહ શકય ન હોવાને કારણે તેનું ઉત્પાદન માંગને આધિન હોય છે.

વીજળીની માગ અને પુરવઠામાં જુદા જુદા કારણોસર વધઘટ થતી રહે છે. વરસાદની મોસમ હોય, તહેવારો કે રજાના દિવસોમાં ઊદ્યોગો-કારખાનાઓ બંધ હોય કે તાપમાનની વધઘટ હોય અથવા વિન્ડ એનર્જી, સોલાર એનર્જીની વ્યાપક ઉપલબ્ધિ હોય તેવા સંજોગોમાં માગ-પુરવઠામાં બદલાવ આવતો રહે છે.

તેમણે વધુમાં જણાવ્યું હતું કે, જ્યારે વીજ માગ ઓછી હોય ત્યારે વીજ ઉત્પાદનની શ્રેષ્ઠત્તમ ઉપયોગિતા માટે અને પ્લાન્ટ બિનઉપયોગી ન રહે તેવા હેતુસર અન્ય રાજ્યોને વીજળી વેચવામાં આવે છે. એટલું જ નહીં, રાષ્ટ્રીય સંપત્તિ એવા વીજમથકોનો મહત્તમ ઉપયોગ થાય તેમ જ વીજ ખરીદીની પડતર કિંમત ઘટાડવા સારું ગુજરાતમાં કૃષિ ક્ષેત્ર સહિતની તમામ પ્રકારની વીજમાગને પૂર્ણ કર્યા બાદ વધારાની સરપ્લસ વીજળી દેશમાં તીવ્ર ખેંચ અનુભવતા જરૂરિયાતવાળા રાજ્યોને વેચવામાં આવે છે.

ઊર્જા પ્રધાને જે રાજ્યોને ગુજરાતે ર૦૧૯ના વર્ષમાં વીજળી વેચી છે તેની વિગતો આપતાં ઉમેર્યું હતું કે, આંધ્રપ્રદેશને પ.૪૦ મિલિયન યુનિટ વીજળી પ્રતિ યુનિટ ૪.૪૪ના દરે, છત્તીસગઢને ૦.પ૦ મિલિયન યુનિટ વીજળી પ્રતિ યુનિટ ૪.૪૦, તામિલનાડુ ૧.૬૦ મિલિયન યુનિટ વીજળી પ.૧૩ પ્રતિ યુનિટ, ઉત્તર પ્રદેશ ૯.૫૪ મિલિયન યુનિટ વીજળી ૪.૦૭ પ્રતિ યુનિટ, મહારાષ્ટ્ર ૦.પ૦ મિલિયન યુનિટ રૂ. ૪.૦૦ પ્રતિ યુનિટ તેમ જ પશ્ર્ચિમ બંગાળ ૮.પપ મિલિયન યુનિટ વીજળી દર યુનિટે ૩.૭૯ના ભાવે, બિહાર ૭.૧૩ મિલિયન યુનિટ વીજળી ૪.૭૧ પ્રતિ યુનિટના ભાવે, ઝારખંડ ૩.૩૦ મિલિયન યુનિટ વીજળી પ્રતિ યુનિટ ૩.૯૧ના ભાવે તેમ જ ઓરિસ્સા ૬.૦પ મિલિયન યુનિટ વીજળી યુનિટ દિઠ ૪.પ૧ના ભાવે અને મણીપુર ૦.૦૪ મિલિયન યુનિટ વીજળી રૂ. પ પ્રતિ યુનિટના ભાવે વેચવામાં આવી છે. આ ઉપરાંત ઈન્ડિયન એનર્જી એકસચેન્જને ૧૩૮.ર૧ મિલિયન યુનિટ વીજળી ૪.૧૧ પ્રતિ યુનિટના ભાવે ગુજરાત સરકારે વેચી છે.