Alert Archives - Page 484 of 512

August 15, 2018

ઓસ્ટ્રિયાની રાજધાની વિયેનાએ સૌથી વધુ ઉત્તમ રહેવાલાયક સ્થળ તરીકેનું બહુમાન પ્રાપ્ત કરી લીધું છે. વિયેનાએ આ મામલે ઓસ્ટ્રેલિયાના શહેર મેલબોર્નને પાછળ રાખી દીધું છે. આ જાણકારી ઈકોનોમિસ્ટ ઈન્ટેલિજન્સ યુનિટ રેકિંગ્સના સરવેમાં સામે આવી છે.

મેલબોર્ન અને ત્યાંના રહેવાસીઓ માટે આ આંચકાસમાન છે કેમકે છેલ્લા સાત વર્ષોથી આ રેંકિંગમાં મેલબોર્ન ટોચના સ્થાને રહેતું આવ્યું છે. જો કે, આ વખતે પણ મેલબોર્ને આ મામલે જોરદાર ટક્કર આપી હતી. ૧૪૦ શહેરો વચ્ચે થયેલા આ મુકાબલામાં વિયેનાને ૯૯.૧ અને મેલબોર્નને ૯૮.૪ પોઈન્ટ મળ્યા હતા.

વિયેનાના ઓછા ક્રાઈમ રેટના કારણે તેને આ સ્થાન પ્રાપ્ત કરવામાં મદદ મળી હતી કેમકે આ સરવેમાં સૌથી વધુ લક્ષ ક્રાઈમ રેટના આંકડાઓ પર આપવામાં આવે છે. જ્યારે આ બંને શહેરોએ હેલ્થકેર, એજ્યુકેશન અને ઈન્ફ્રાસ્ટ્રક્ચરમાં ટોચનું સ્થાન મેળવ્યું છે. બંનેની સ્થિતિ ગત વર્ષના મુકાબલે ઉત્તમ થઈ છે પણ વિયેનાએ તેમાં થોડો વધુ સુધારો કર્યો છે.

વિયેના, મેલબોર્ન ઉપરાંત ટોપ-૫માં જાપાનના શહેર ઓસાકા, કેનેડાના કેલગરી અને ઓસ્ટ્રેલિયાના સિડનીને સ્થાન મળ્યું છે. યાદીમાં લંડન ૪૮મા ક્રમે રહ્યું છે પરંતુ નવી દિલ્હી ટોપ-૫૦માં પણ સામેલ થઈ શક્યું નથી. જ્યારે ફ્રાન્સનું પેરિસ ૧૯મા સ્થાને તથા અમેરિકાનું ન્યૂયોર્ક ૫૭મા ક્રમે છે.

વિયેનાની વસતી ૨૧ લાખ જેટલી છે. આ શહેરમાં હરિયાળી ઉપરાંત શાનદાર તળાવો અને બીચ આવેલા છે. ત્યાં જાહેર પરિવહન પણ ખૂબ સસ્તું છે.

આ યાદીના જણાવ્યા પ્રમાણે, રહેવા માટે સૌથી અશાંત જગ્યાની વાત કરીએ તો તે દમાસ્ક છે. તેના પછી બાંગ્લાદેશનું ઢાકા અને નાઈજિરિયાનું લાગોસ છે. આ સરવેમાં ખતરનાક શહેરોમાં બગદાદ અને કાબુલ જેવા શહેરોને સામેલ કરાયા નથી.

ઉલ્લેખનીય છે કે છેલ્લા બે વર્ષથી યુરોપે અનેક આતંકવાદી હુમલા જોયા છે. મેલબોર્ન અને વિયેના બંનેને ઈન્ફ્રાસ્ટ્રક્ચરની કેટેગરીમાં એક સમાન રેટિંગ મળ્યા છે. જો કે વિયેનાને સંસ્કૃતિના મામલે સૌથી વધુ નંબર મળ્યા છે. આ યાદીમાં ઓસાકા, કલગેરી અને સિડની જેવા શહેરોને ટોપ-૫માં સ્થાન મળ્યું છે. જ્યારે લંડન આ યાદીમાં ૪૮મા ક્રમે રહ્યું છે.

વિયેના પ્રવાસીઓ માટે મનપસંદ સ્થળ છે. તે હરિયાળી, સુંદર તળાવો, લોકપ્રિય સમુદ્રી તટ અને વાઈનયાર્ડ માટે પ્રખ્યાત છે. જ્યાં પબ્લિક ટ્રાન્સપોર્ટ પણ સસ્તું છે. યુરોપમાં તે સૌથી સુરક્ષિત શહેરોમાંનું એક માનવામાં આવે છે.

August 15, 2018

એમ કરૂણાનિધિના અવસાનને કારણે ડીએમકેના સુકાનની વારસાઇ માટે તેમના પુત્રો વચ્ચેની લડાઇમાં સ્ટાલિન મેદાન મારી ગયા છે. પક્ષના મોટાભાગના હોદેદારોએ તેમને સમર્થન આપ્યું છે અને કહ્યું છે કે તેઓ ટૂંકમાં જ પક્ષની આગેવાની સંભાળશે.

કરૂણાનિધિના લાંબાસમયના સહયોગી અને પક્ષના પ્રિન્સીપાલ સેક્રેટરી દુરાઇમુરુગને જણાવ્યું હતું કે સ્ટાલિન પાસે પાર્ટીનું સુકાન સંભાળવાના તમામ કૌશલ્ય છે. સ્ટાલિનને થલાપતિ (કમાંડર) તરીકે સંબોધતાં સીનિયર લીડરે કહ્યું હતું કે ‘ડીયર થલાપતિ તમે ટૂંકમાં જ ડીએમકે પ્રમુખ બનવા જઇ રહ્યા છો, અમે તમારા આદેશોનું પાલન કરવા સજ્જ છીએ. અમારી આગેવાની લો.’

ઉલ્લેખનીય છે કે ટૂંકમાં ડીએમકેમાંથી હકાલપટ્ટી કરી દેવાયેલા કરૂણાનિધિના પુત્ર એમ કે અલાગિરીને દાવો ક્યો હતો કે તેમના પિતાના સાચા સમર્થકો તેમની સાથે છે. તેમના આ નિવેદન બાદ પક્ષમાં વારસાનો મુદો ઊભો થયો હતો.

August 15, 2018

કેરળમાં વરસાદ કહેર વરસાવી રહ્યો છે. કોચી એરપોર્ટ પર 18 ઓગસ્ટ બપોરે બે વાગ્યા સુધી બધી જ ફલાઇટોને રદ કરવામાં આવી હતી. હવામાને વિભાગે વાયનાડ, કોઝિકોડ, કન્નુર, કાસરગોઝ, મલપ્પુરમ, પલક્કઝ, ઈડુક્કી અને એર્નાકુલમમાં ગુરુવાર સુધી રેડ એલર્ટ જાહેર કર્યો છે.

કોચી એરપોર્ટ પર આજે પણ ભાર વરસાદે કારણે ફલાઇટોને રદ કરવાનો નિર્ણય લેવામાં આવ્યો છે. પહેલા બુધવાર બપોર સુધીની ફલાઇટોને રદ કરવામાં આવી હતી પરંતુ પરિસ્થિતીમાં સુધાર ન જણાતા 18 ઓગસ્ટ સુધીની ફલાઇટોને રદ કરવામાં આવી છે.

એરપોર્ટનાં અધિકારીએ જણાવ્યું કે, એરપોર્ટની અંદર અને આજુબાજુનાં વિસ્તારોમાં પાણી ભરાયા હોવાનાં કારણે એરપોર્ટને બંધ રાખવાનો નિર્ણય લેવામાં આવ્યો છે. તેમણે જણાવ્યું કે, વરસાદને કારણે બુધવાર સવારનાં વાગ્યાથી 18 ઓગસ્ય 2 વાગ્યા સુધી એરપોર્ટની ફલાઇટો રદ કરવામાં આવી છે.

August 15, 2018

પુણેમાં કોસમોસ બેન્કનું સર્વર હૅક કરી હેકર્સે માત્ર બે દિવસમાં રૂ. 94.42 કરોડની ઉચાપત કરતાં બેન્ક સત્તાવાળામાં ખળભળાટ મચી ગયો હતો. હેકર્સે બેન્કના હજારો ડેબિટ કાર્ડની માહિતી ચોરીને ગુનો આચર્યો હોઇ ભારતની બહાર 12,000 ટ્રાન્ઝેક્શન કરીને રૂપિયાની ઉચાપત કરવામાં આવી હતી. પુણેના ચતુર્શ્રૃંગી પોલીસ સ્ટેશનમાં આ પ્રકરણે નોંધાયેલી ફરિયાદને આધારે પોલીસે અજાણી વ્યક્તિ તથા હોંગકોંગની એએલએમ ટ્રેડિંગ લિમિટેડ સામે ગુનો દાખલ કરી તપાસ આદરી હોવાનું જાણવા મળ્યું હતું.

પોલીસના જણાવ્યા અનુસાર 11 ઓગસ્ટે બપોરે ત્રણ વાગ્યાથી 13 ઓગસ્ટ સવારે 11.30 વાગ્યા દરમિયાન આ ઉચાપત કરવામાં આવી હતી. પુણે સ્થિત ગણેશખિંડ રોડ પર કોસમોસ ટાવર ખાતે કોસમોસ બેન્કની મુખ્ય બ્રાન્ચ આવેલી હોઇ 11 ઓગસ્ટે બપોરે ત્રણથી રાતે 10 વાગ્યા દરમિયાન બેન્કનું સર્વર હૅક કરવામાં આવ્યું હતું.

અજાણી વ્યક્તિએ માલવૅઅર ઍટેક કરીને બેન્કના કેટલાક વિઝા તેમ જ રૂપે ડેબિટ કાર્ડધારકોની માહિતી ચોરીને કાડર્સ ક્લોન કર્યા હતા. તેના દ્વારા ભારતની બહાર અંદાજે 12,000 ટ્રાન્ઝેકશન કરીને રૂ. 78 કરોડ ટ્રાન્સફર કરવામાં આવ્યા હતા, જ્યારે ભારતમાં 2,849 ટ્રાન્ઝેકશન કરીને રૂ. 2.50 કરોડ ટ્રાન્સફર કરવામાં આવ્યા હતા. આમ કુલ 14,849 ટ્રાન્ઝેકશન કરવામાં આવ્યા હતા. વિઝા તેમ જ એનપીસીઆઇ (નેશનલ પેમેન્ટ કોર્પોરેશન ઓફ ઇન્ડિયા) દ્વારા પાઠવાયેલી ટ્રાન્ઝેકશન રિકવેસ્ટસ બેન્ક તરફથી તેમને અપ્રૂવ કરવામાં આવી હોવાનું બતાવી અજાણી વ્યક્તિએ તેના દ્વારા આ રકમ કાઢી લીધી હતી.

બીજી તરફ 13 ઓગસ્ટે સવારે 11.30 વાગ્યાને સુમારે અજાણી વ્યક્તિએ સ્વિફ્ટ ટ્રાન્ઝેકશન ઇનિશિયેટ કરીને હોંગકોંગની હેનસેંગ બેન્કના એ.એલ.એમ. ટ્રેડિંગ લિમિટેડના બેન્ક એકાઉન્ટમાં રૂ. 13.92 કરોડ ડિપોઝિટ કરાવ્યા બાદ કાઢી લીધા હતા. 11 ઓગસ્ટથી 13 ઓગસ્ટ દરમિયાન કેનેડા, હોંગકોંગ તેમ જ ભારતના 25 જેટલા એટીએમ ખાતે આ ટ્રાન્ઝેકશન કરવામાં આવ્યા હતા, એમ ફરિયાદમાં જણાવવામાં આવ્યું હતું.

હેકર્સ દ્વારા બેન્કની કૉર બેન્કિંગ સિસ્ટમ (સીબીએસ) હૅક કરાઇ નહોતી, પણ સ્વીચ સિસ્ટમ પર માલવેઅર એટેક થયો હતો. વિઝા-રૂપે ડેબિટ કાર્ડના પેમેન્ટ ગેટ-અવે માટે ઓપરેટિવ સિસ્ટમ છે સ્વીચ. બેન્કના એકેય કસ્ટમરના એકાઉન્ટને હાથ લગાવાયો નહોતો, પણ જે નુકસાન થયું એ બેન્કને થયું હતું. સુરક્ષાની દૃષ્ટિએ બેન્ક દ્વારા તેના સર્વર તેમ જ નેટબેંકિંગ સુવિધા બંધ કરવામાં આવ્યા હતા, એમ અધિકારીએ કહ્યું હતું.

August 15, 2018

સુરતઃ ડીપીએસએસએમયુએન એક અકલ્પનીય વારસો છે કે જે તેના 10માં સફળ વર્ષમાં આગળ વધી રહ્યો છે. આ ખુબ પ્રખ્યાત કાર્યક્રમ 10 અને 11 ઓગષ્ટ,2018ના રોજ દિલ્હી પબ્લિક સ્કૂલ ખાતે આયોજીત કરવામાં આવ્યો હતો. આ ભવ્ય સમારોહનું ઉદ્ઘાટન ડીપીએસ-એસએમયુએનના પૂર્વ સેક્રેટરિયેટ સભ્યોની ઉપસ્થિતિમાં કરવામાં આવ્યું હતું.આ કોન્ફરન્સને ડીપીએસ-એસએમયુએન 2018ના સેક્રેટરી જનરલ શિવી ખન્ના દ્વારા ખુલ્લી મુકવામાં આવી હતી.

એક્ઝેક્યુટિવ બોર્ડનો પરિચય અને ગૌરવવંતી ફ્લેગ માર્ચના માધ્યમથી રાષ્ટ્રીય ધ્વજ તથા દેશના ઇતિહાસના દર્શન કાર્યક્રમની મુખ્ય વિશેષતાઓ હતી. 11મી ઓગસ્ટે વૈશ્વિક સ્તર પર પ્રાસંગિક મુદ્દાઓ પર ચર્ચા કરનારા પ્રતિનિધિયો સાથે સમ્મેલનની શરૂઆત થઇ હતી.ચર્ચા અને કૂટનીતિના માધ્યમથી તેઓએ આજે વિશ્વ જેનો સામનો કરી રહ્યું છે તેવા કેટલાંક પડકારોનું સમાધાન મેળવ્યું. તમામ મ્યુનર્સના પ્રયત્નો અને તે જે સૌથી વધુ સક્ષમ હતા તેને વિદાય સમારંભ દરમિયાન સ્વીકારવામાં આવ્યા. ડીપીએસએસએમયુએનના પૂર્વ સેક્રેટરિયેટ સભ્યોએ વિવિધ કેટેગરીમાં વિજેતાઓને ટ્રોફી અને પ્રમાણપત્રો આપ્યા હતા.

ડેપ્યુટી સેક્રેટરી જનરલ 2018 વેદાંશ અગ્રવાલે કાર્યક્રમ દરમિયાન શીખેલા મૂલ્યોને ચોક્કસ પણે જીવનમાં ઉપયોગ કરવામાં આવશે અને દુનિયાને રહેલા માટેનું શ્રેષ્ઠ સ્થાન બનાવવામાં ઉપયોગ કરવામાં આવશે તેવી આશા અને સંદેશ સાથે કોન્ફરંશની પુર્ણાહુતિ કરી હતી.

-x-x-x-x-

August 15, 2018

સુરત,2018:બીએનઆઇસુરત દ્વારા આજરોજ સ્વતંત્રતા પર્વની ઉજવણી સાથે જ પોતાના બાહુબલી ચેપ્ટરનું 3rd લૌંચિંગ કરવામાં આવ્યું હતું. સમગ્ર કાર્યક્રમ સ્વતંત્રતા દિવસની થીમ પર યોજાયો હતો. BNI સુરતના બાહુબલી ચેપ્ટર ના પ્રેસિડેંટ રિઝવાન રાણાએ જણાવ્યુ હતું કે બાહુબલી ચેપ્ટરના સપોર્ટ ડાઇરેક્ટર મુકુલ ગોયલ અને BNI સુરતના સિનિયર ડાઇરેક્ટર અસ્ફાક કલકત્તાવાલા ખાસ ઉપસ્થિત રહ્યા હતા. આ ઉપરાંત કાર્યક્રમમાં મુલાકાતીઓ, આમંત્રિતો સાથે જ વિભિન્ન ક્ષેત્ર ના ઉદ્યોગ સાહસિકો જોડાયા હતા અને પોતાના બિજનેસ વિશે તેમજ નેટવર્કિંગ ના અનુભવો વિશે જણાવ્યુ હતું.

ઉલ્લેખનીય છે કે શહેરના અગ્રણી અને ખ્યાતનામ સીએ ગૌરવ વી. સંધવી અને ડો. નિધિ સંધવી બિઝનેસ નેટવર્કિંગ ઇન્ટરનેશનલ (બીએનઆઇ)સુરતના એક્ઝિક્યુટિવ ડિરેક્ટર છે અને હાલમાં 1,000થી પણ વધુ સભ્યો ધરાવે છે. બીએનઆઇ સુરતને 3સેન્ટેનિયલ ચેપ્ટર્સ અને વિશ્વભરમાં સૌથી વધુ ચેપ્ટર સાઇઝ ધરાવવાનું સન્માન મળેલું છે. 72દેશોમાં 900થી વધુ રિજનમાં બીએનઆઇ સુરતે વિશ્વમાં પ્રથમ ક્રમના રિજન હોવાનું પણ ગૌરવ પ્રાપ્ત કરેલું છે.

-x-x-x-x-

August 14, 2018

રૂપિયો સૌપ્રથમ વાર અમેરિકન ડોલર સામે 70ની નીચે સરક્યો છે. રૂપિયો ડોલર સામે સળંગ બીજા દિવસે તૂટ્યો છે. તા.13 ઓગસ્ટના રોજ ડોલર સામે રૂપિયો 69.93ની ઓલટાઈમ લો સપાટીને સ્પર્શ્યો હતો અને આજે મંગળવારે પ્રતિ ડોલર સામે રુપિયો 69.84 પૈસા પર ખૂલ્યા બાદ રૂ.70.085 પૈસાની અત્યાર સુધીની સૌથી નીચી સપાટીએ પર ગગડી ગયો હતો. ભારત માટે આ નુકસાનકારક હોવા સાથે શરમજનક અને અપમાનજનક સ્થિતિ જોવાય રહી છે. ભારત એવા દેશોની યાદીમાં આવી ગયો છે કે જેનું ચલણ સતત અવમૂલ્યન સહન કરી રહ્યું છે.

ટ્રેડ વોરની ઘટના શરૂ થઈ ત્યારથી ભારતનો રૂપિયો છેલ્લા ત્રણ મહિનામાં 3.2 ટકા ઘટ્યો છે. તેની સામે ચીનના યુઆનમાં 8.6 ટકાનો ઘટાડો જોવાયો છે. જ્યારે ડોલર ઇન્ડેક્સ આ ગાળામાં ચાર ટકા વધ્યો છે. ચીનનો યુઆન ડોલર સામે ઐતિહાસિક 6.95 તળિયાની નજીક સરકીને દોઢ વર્ષના નીચલા 6.89ના સ્તરે રહ્યો હતો.

ફોરેક્સ કામકાજમાં રૂપિયામાં તીવ્ર વેચવાલીનું દબાણ જોવા મળ્યું હતું જેને પગલે ઓપન માર્કેટમાં રિઝર્વ બેન્કે પણ રૂપિયાનું અવમૂલ્યન અટકાવવા પ્રયાસ કર્યો નહીં. સોમવારે મોડી સાંજે ડેરિવેટિવ માર્કેટમાં ડોલર સામે રૂપિયો 70ના લોએસ્ટ લેવેલે ગગડ્યો હતો. જેથી ખ્યાલ આવ્યો હતો કે હજુ સુધી ભારતીય ચલણમાં વેચવાલી અટકી નથી.

August 14, 2018

દિલ્હી પોલીસે ફેબ્રુઆરીમાં રાજ્યના ચીફ સેક્રેટરી અંશુ પ્રકાશ પર થયેલા કહેવાતા હુમલાની ચાર્જશીટ ગઈ કાલે કોર્ટમાં દાખલ કરી હતી. આ ચાર્જશીટમાં દિલ્હીના મુખ્ય પ્રધાન અરવિંદ કેજરીવાલ અને નાયબ મુખ્ય પ્રધાન મનીષ સિસોદિયા સહિત ૧૧ વિધાનસભ્યોનાં નામનો આરોપીઓની યાદીમાં સમાવેશ કરવામાં આવ્યો છે.

ઍડિશનલ ચીફ મેટ્રોપૉલિટન મૅજિસ્ટ્રેટ સમર વિશાલ સમક્ષ ફાઇનલ રિપોર્ટ રજૂ કરવામાં આવ્યો હતો. આ બાબતની સુનાવણી ૨૫ ઑગસ્ટે કરવામાં આવશે.

દિલ્હી પોલીસે ૧૮ મેએ સંબંધિત હુમલા બાબતે લગભગ ત્રણ કલાક માટે કેજરીવાલની પૂછપરછ કરી હતી. ૧૯ ફેબ્રુઆરીએ કેજરીવાલના સત્તાવાર નિવાસસ્થાન પર એક મીટિંગ દરમ્યાન પ્રકાશ પર હુમલો કરવામાં આવ્યો હતો. પોલીસે જણાવ્યું હતું કે હુમલાની ઘટના બની એ સમયે મુખ્ય પ્રધાન કેજરીવાલ હાજર હતા.

પોલીસે કેજરીવાલના ઘરે મીટિંગ માટે હાજર રહેલા તમામ ૧૧ વિધાનસભ્યોની પૂછપરછ કરી છે. આ સંદર્ભે પાર્ટીના બે વિધાનસભ્ય અમાનતુલ્લાહ ખાન અને પ્રકાશ જારવાલની ધરપકડ કરવામાં આવી છે.

ચીફ સેક્રેટરી પર કરવામાં આવેલા આ કહેવાતા હુમલાને પગલે દિલ્હી સરકાર અને એના અધિકારીઓ વચ્ચે શીતયુદ્ધ છેડાયું હતું.

August 14, 2018

ટાટા મોટર્સે ટિયાગો અને ટિગોર કારની સારી માંગના પગલે ગુજરાતના સાણંદ પ્લાન્ટ ખાતે 100 ટકા ક્ષમતા પર ઉત્પાદન નોંધાવ્યું છે અને કંપની આગામી સમયમાં તેની ક્ષમતામાં થોડો વધારો કરશે. કંપની ટિગોરના ઇલેક્ટ્રિક વ્હિકલનું ઉત્પાદન પણ સાણંદ પ્લાન્ટ ખાતે કરે છે અને કંપની 2020 સુધીમાં સાણંદ પ્લાન્ટને સેન્ટર ઓફ મેન્યુફેક્ચરિંગ એક્સેલન્સ બનાવવાનું લક્ષ્ય ધરાવે છે.

સાણંદ પ્લાન્ટ ખાતે અમારી શરૂઆત ધીમી રહી હતી પરંતુ ટિયાગો અને ટિગોરનું ઉત્પાદન અહીં શરૂ કરવામાં આવ્યા બાદ ઉત્પાદનમાં ઝડપી વૃદ્ધિ નોંધાઈ છે.

જાન્યુઆરી 2017માં આ પ્લાન્ટમાં કુલ 3 લાખ કાર ઉત્પાદનના સ્તરે પહોંચ્યા બાદ જાન્યુઆરી 2018માં અમે ચાર લાખ યુનિટનો આંક વટાવ્યો હતો અને હવે ઓક્ટોબર મહિનામાં જ આ પ્લાન્ટમાં બનેલી કારની સંખ્યા પાંચ લાખનો આંક વટાવી જશે.

હાલમાં પ્લાન્ટ 1.50 લાખ યુનિટની ક્ષમતા સાથે સંપૂર્ણ ક્ષમતા પર કાર્યરત છે અને અમે એફિશિયન્સી વધારીને ઉત્પાદન ક્ષમતા વધારી રહ્યા છીએ. હાલમાં દરરોજ 450 કારનું ઉત્પાદન થાય છે તે ચાલુ નાણાકીય વર્ષના અંત સુધીમાં ૫૦૦ કાર પર પહોંચવાની ધારણા છે. સાણંદ પ્લાન્ટ અમારા પેસેન્જર વાહનોના ઉત્પાદનમાં 60 ટકા યોગદાન આપે છે.

પેસેન્જર વ્હિકલ ઉદ્યોગની વૃદ્ધિની સરખામણીએ ટાટા મોટર્સ ઘણી ઝડપી વૃદ્ધિ નોંધાવી રહી છે અને તેથી ઉત્પાદનમાં વૃદ્ધિ થઈ રહી છે. સાણંદ પ્લાન્ટ ખાતે કંપની લગભગ 35 ટકા રિન્યુએબલ એનર્જીનો ઉપયોગ કરે છે અને તેના દ્વારા ખર્ચમાં ₹8 કરોડની બચત કરી છે.

ગુજરાતને ઓટોમોબાઇલ હબ બનાવવાનું શ્રેય ટાટા મોટર્સના નેનો પ્લાન્ટને આપવામાં આવે છે પરંતુ નેનો કાર અપેક્ષા જેટલી સફળતા મેળવી શકી નહોતી અને ટાટા મોટર્સના સાણંદ પ્લાન્ટ ખાતે નજીવું ઉત્પાદન થતું હતું. જોકે, ટિગોર અને ટિયાગોના લોન્ચ બાદ આ પ્લાન્ટ ધમધમતો થયો છે. ટાટા મોટર્સ અહીં એન્જિનનું ઉત્પાદન પણ કરે છે.

હાલમાં સાણંદ પ્લાન્ટમાં દર મહિને 8,000 જેટલી ટિયાગો અને 3,000 જેટલી ટિગોર કારનું ઉત્પાદન કરવામાં આવે છે. અમે એફિશિયન્સી વધારીને પ્લાન્ટની ઉત્પાદન ક્ષમતામાં વધારો કર્યો છે. ગયા વર્ષે અમે દર મહિને 6500 યુનિટનું ઉત્પાદન કર્યું હતું, પરંતુ હાલમાં દર મહિને 11,000 યુનિટ ઉત્પાદન કરી રહ્યા છીએ. આ ક્ષમતા ઓક્ટોબર સુધીમાં જ વધારીને દર મહિને 12,500 યુનિટની કરી દેવાશે.

August 14, 2018

અન્ડરવર્લ્ડ ડૉનમાંથી રાજકારણી બનેલો અરુણ ગવળી ગાંધી વિચારોની પરીક્ષામાં પહેલા નંબરે પાસ

મુંબઈની દગડી ચાલ પર એક સમયે ગુંડાગીરી કરીને જીવતો અરુણ ગવળી હાલ નાગપુરની જેલમાં સજા ભોગવી રહ્યો છે.
શિવસેનાના નગરસેવકની હત્યાના કેસમાં અરુણ ગવળી નાગપુરની સેન્ટ્રલ જેલમાં સજા ભોગવી રહ્યો છે.

દર વર્ષે નાગપુર જેલમાં સહયોગ ટ્રસ્ટ, સર્વોદય આશ્રમ અને મુંબઈ સર્વોદય મંડળ એમ ત્રણેય મળીને ગાંધી વિચારોની પરીક્ષાનું આયોજન કરે છે. પરીક્ષા સ્વૈચ્છિક હોય છે. જેલમાં એક મહિના પહેલાં ગાંધીના જીવન પરનાં અમુક પુસ્તકો આપવામાં આવે છે અને એના આધારે પરીક્ષા આપવાની હોય છે. અરુણ ગવળીને આ પરીક્ષા આપવાની ઇચ્છા થતાં તેણે પણ આ પરીક્ષા માટે નામ આપ્યું હતું.

અરુણ ગવળીને ગાંધી વિચારોના પેપરમાં કુલ ૮૦ માર્કમાંથી ૭૪ માર્ક મળ્યા છે. જેલમાં રહેલા હજારો કેદીમાંથી ૧૬૦ કેદીઓએ આ પરીક્ષા આપી હતી. એમાં અરુણ ગવળી પહેલા નંબરે પાસ થયો છે.

Newer Posts

Older Posts

Alert Archives - Page 484 of 512 - CIA Live

વિશ્વમાં વિયેના સૌથી ઉત્તમ રહેવાલાયક શહેર, સૌથી ખરાબ શહેર દમાસ્ક અને ઢાકા

DMK પક્ષનો વારસો કરુણાનિધીના પુત્ર સ્ટાલિન સંભાળશે

કોચી એરપોર્ટ પર 18 ઓગસ્ટ સુધી બંધ, બધી જ ફલાઇટો રદ

Cyber Crime, પુણેની બૅન્કમાં ₹ 94 કરોડની ડિજિટલ લૂંટ

DPS Surat ખાતે DPS-SMUN 2018-લીપ ટૂ લીડનું આયોજન કરવામાં આવ્યું

સ્વતંત્રતા પર્વની ઉજવણી સાથે BNI સુરત દ્વારા બાહુબલી ચેપ્ટરનું 3rd લોંચીંગ

ડોલર સામે રૂપિયો રૂ.70.08ના ઐતિહાસિક સ્તરે ગગડ્યો

કેજરીવાલની સરકારમાં કેજરીવાલ સામે જ આરોપનામું

ટાટા મોટર્સના સાણંદ પ્લાન્ટએ સંપૂર્ણ ક્ષમતા સિદ્ધ કરી

ગાંધીના વિચારોની પરીક્ષામાં ગુંડો ગવળી પહેલા નંબરે પાસ