Alert Archives - Page 459 of 512

October 5, 2018

કાયમી ધોરણે કપાયેલા વીજ જોડાણોની લેણી નીકળતી રકમ ભરપાઇ કરવાની રાજ્ય સરકારની માફી યોજના ૩૧ ડિસેમ્બર-ર૦૧૮ સુધી લંબાવવામાં આવી : ઊર્જામંત્રીશ્રી

૩૦ સપ્ટેમ્બર સુધીમાં ૧ લાખ ૩૬ હજાર ગ્રાહકોએ યોજનાનો લાભ મેળવ્યો
વીજ વિતરણ કંપનીઓને રૂ. પ૧.૮૮ કરોડની વસુલાત મળી
રાજ્યમાં ૩૯૬ માફી મેળાઓ યોજાયા

ઊર્જા મંત્રી શ્રી સૌરભભાઇ પટેલ અને રાજ્ય મંત્રી શ્રી પ્રદિપસિંહ જાડેજાએ મુખ્યમંત્રીશ્રીના આ નિર્ણયની ભૂમિકા આપતાં કહ્યું કે, રાજ્યમાં કાયમી ધોરણે કપાયેલાં વિવિધ કક્ષાના વીજજોડાણોમાં ઘર વપરાશના બી.પી.એલ. અને નોન બી.પી.એલ વીજગ્રાહકો તેમજ ખેતીવાડી વીજ ગ્રાહકોને વીજ બીલની રકમના પ૦ ટકા અને વ્યાજમાં સંપૂર્ણ માફી માટે એમ્નેસ્ટી સ્કીમ-ર૦૧૭ અગાઉ જાહેર કરવામાં આવી હતી. સરકારે આ ઉપરાંત બીનગ્રાહકો, વાણિજ્યિક, ઔદ્યોગિક અને વોટર વર્કસના વીજગ્રાહકો અને બીનગ્રાહકો તથા સ્ટ્રીટ લાઇટ અને જનરલ પરપઝ લાઇટ ટેરિફ ધરાવતા વીજગ્રાહકો માટે વ્યાજમાં સંપૂર્ણ માફીને પણ આ સ્કીમમાં આવરી લીધા હતા.

મંત્રીશ્રીઓએ જણાવ્યું કે, રાજ્યમાં આ યોજનાને મળી રહેલા વ્યાપક પ્રતિસાદને પરિણામે, મુખ્યમંત્રીશ્રીએ ગ્રાહક સંવેદનાસ્પર્શી અભિગમ સાથે આ યોજનાની મુદત વધુ ત્રણ માસ માટે એટલે કે ૧ ઓકટોબર-ર૦૧૮થી ૩૧ ડિસેમ્બર-ર૦૧૮ સુધી લંબાવવાનો નિર્ણય કર્યો છે. શ્રી સૌરભભાઇએ ઉમેર્યુ કે, રાજ્યની વીજ વિતરણ કંપનીઓના જુદા જુદા ગ્રાહકો પાસે વીજ બીલના નાણાં બાકી રહેવાના કારણે કે અન્ય કારણોસર જેમના વીજ જોડાણો તા.૩૧/૦૮/ર૦૧૭ સુધીમાં કાયમી ધોરણે બંધ થયેલ હોય તેવા ગ્રાહકો માટે મુખ્યમંત્રીશ્રીએ સંવેદનાસ્પર્શી અભિગમથી માફી યોજના ર૦૧૭ જાહેર કરી હતી.

તદઅનુસાર, ઘર વપરાશના વીજગ્રાહકો-બી.પી.એલ. અને નોન બી.પી.એલ બેય જો ૩ માસની અંદર મુદલ રકમ ભરી દે તો મુદલની રકમમાં પ૦ ટકા માફી સાથે સંપૂર્ણ વ્યાજ માફી આપવામાં આવે છે તે જ પ્રમાણે ખેતીવાડી ગ્રાહકોને પણ આ લાભ આપવામાં આવે છે.

અન્ય તમામ કક્ષાના વીજગ્રાહકો જો ૩ માસની અંદર મુદલની સંપૂર્ણ રકમ ભરે તો વ્યાજમાંથી પૂરેપૂરી માફી આપવામાં આવે છે.

આ યોજના હેઠળ અગાઉની તા.૩૧/૦૮/ર૦૧૭ સુધીમાં કાયમી ધોરણે રદ થયેલ વીજ જોડાણોના સ્થાને તા.૩૧/૦પ/ર૦૧૮ સુધીમાં કાયમી ધોરણે રદ થયેલા વીજ જોડાણો ધરાવતા વીજ ગ્રાહકોને લાભ અને યોજનાની મુદ્દત તા.ર૪/૦૭/ર૦૧૮ના રોજ પૂર્ણ થતી હતી તેને તા.૩૦/૦૯/ર૦૧૮ સુધી વધારવામાં આવી હતી.

તેમણે કહ્યું કે, ૩૦- સપ્ટેમ્બર-ર૦૧૮ સુધી આ યોજનાની મુદતમાં વધારો થવાને પરિણામે ૧ લાખ ૩૬ હજાર ર૯૪ ગ્રાહકોએ યોજનાનો લાભ મેળવ્યો છે. એટલું જ નહિ, વીજ વિતરણ કંપનીઓને રૂ. પ૧.૮૮ કરોડની રકમની વસુલાત પણ આ યોજના અન્વયે થઇ છે.

રાજ્યમાં અત્યાર સુધીમાં ૩૯૬ માફી મેળાઓ યોજીને વીજ બિલની રીકવરીનું પ્રમાણ વધારવા અને ડિફોલ્ટરોની સંખ્યા ઘટાડવામાં ઊર્જા વિભાગને સફળતા મળી છે, એમ પણ મંત્રીશ્રીઓએ ઉમેર્યું હતું.

October 4, 2018

3.26 વાગ્યે કેન્દ્ર સરકારે પેટ્રોલ ડિઝલના ભાવમાં રૂ.2.5 પ્રતિ લિટરે ઘટાડો કરવાની જાહેરાત કરી
3.52 વાગ્યે ગુજરાત સરકારે પેટ્રોલ ડિઝલમાં રૂ.2.5 (કેન્દ્ર સરકાર ઉપરાંત) ઘટાડો કરવાની જાહેરાત કરી
4.10 વાગ્યે મહારાષ્ટ્ર સરકારે પેટ્રોલ ડિઝલમાં રૂ.2.5 (કેન્દ્ર સરકાર ઉપરાંત) ઘટાડો કરવાની જાહેરાત કરી

પેટ્રોલ ડિઝલના ભાવોના મુદ્દે સમગ્ર દેશમાંથી મોદી સરકાર સામે ઉઠેલા અસંતોષને ઠારવા માટેના પ્રયાસોના ભાગરૂપે કેન્દ્ર સરકારે આજે શેરબજાર બંધ થવાની 4 મિનીટ પહેલા જ પેટ્રોલ અને ડિઝલના ભાવમાં તાત્કાલિક રીતે અમલ થાય એ રીતે રૂ.અઢીનો ઘટાડો કરવાની ઘોષણા કરી હતી. અરુણ જેટલીએ રાજ્ય સરકારોને પણ કહ્યું હતું કે તેઓ શક્ય એટલી રાહત સામાન્ય લોકો સુધી પહોંચાડે. કેન્દ્રના અઢી રૂપિયાના ઘટાડા બાદ જોવાનું એ રહે છે કે રાજ્ય સરકારો પૈકી કોણ વધુ ઘટાડો કરે છે. અરુણ જેટલીની જાહેરાતની ગણતરીની મિનીટોમાં જ ગુજરાત રાજ્યના મુખ્યમંત્રી વિજય રૂપાણીએ પણ રૂ2.5નો ઘટાડો પ્રતિ લિટરે પેટ્રોલ અને ડિઝલમાં કરવાની જાહેરાત કરી હતી. જેને પગલે ગુજરાતમાં પેટ્રોલ અને ડિઝલના પ્રતિ લિટરના ભાવમાં રૂ5નો તોતિંગ ઘટાડો થયો હતો. સાંજે 4 વાગ્યે આ જાહેરાત થઇ હતી. હવે જોવાનું એ રહે છે કે એ પછી કઇ કઇ રાજ્ય સરકારો ઘટાડો કરી રહી છે.

કેવી રીતે ભાવ ઘટાડો થશે
પ્રતિ લિટર રૂ. 1 કેન્દ્ર સરકાર ઘટાડ્યા
પ્રતિ લિટર રૂ. 1.5 ઓઇલ કંપનીઓ ઘટાડ્યા
પ્રતિ લિટર રૂ.2.5 રાજ્ય સરકારોએ ઘટાડ્યા

પેટ્રોલ ડિઝલના ભાવમાં ગુજરાતમાં રૂ.5નો જંગી ઘટાડાના સમાચાર એટલા વાઇરલ થયા છે કે ન પૂછો વાત. વ્હોટ્સ એપ ગ્રુપથી લઇને ફેસબુક, ઇન્સ્ટાગ્રામ પર વિજય રુપાણીની ટ્વીટના ફોટોઝ લોકોએ ખૂબ શેર કર્યા હતા.

Finance Minister Sh @arunjaitley Ji has announced Rs.2.5 cuts in petrol & diesel prices, reciprocating positively to FM’s announcement, the Govt Of Gujarat has also decided to reduce Rs.2.50 on both petrol & diesel. Thus petrol & diesel wd be Rs. 5 cheaper in the State of Gujarat

— Vijay Rupani (@vijayrupanibjp) October 4, 2018

(ગુજરાતના મુખ્યમંત્રી વિજય રૂપાણીએ કરેલી ટ્વીટ)

Maharashtra Government also decided to give additional relief of ₹2.5/litre on Petrol to give total benefit of ₹5/litre in the State of Maharashtra.

— Devendra Fadnavis (@Dev_Fadnavis) October 4, 2018

(મહારાષ્ટ્રના મુખ્યમંત્રી દેવેન્દ્ર ફડણવીસે ભાવ ઘટાડા અંગે કરેલી ટ્વીટ)

એ પૂર્વે આકાશને આંબી રહેલા પેટ્રોલ-ડીઝલના ભાવ વધારામાંથી લોકોને રાહત આપતા નાણાંમંત્રી અરુણ જેટલીએ ઈંધણના ભાવમાં 2.50નો તાત્કાલીક ધોરણે ઘટાડો કરવાની જાહેરાત કરી છે. જેટલીએ જણાવ્યું કે, ‘પેટ્રોલ અને ડીઝલના ભાવ અંગે મંત્રી સમુહની આંતરિક બેઠકમાં કેન્દ્રે એક્સાઈઝ ડ્યુટી રૂ.1.5 ઘટાડી છે. આ ઉપરાંત ઓઈલ માર્કેટિંગ કંપનીઓ પણ 1 રૂપિયાનો ઘટાડો કરશે.

કેન્દ્ર સરકાર આમ કુલ 2.5 રૂપિયા પ્રતિ લીટરની રાહત ગ્રાહકોને આપશે.’ જેટલીએ પ્રેસ કોન્ફરન્સને સંબોધતા આ વાત જણાવી હતી. તેમજ આ સાથે રાજ્યોને પણ સમાન દરે ઈંધણના ભાવમાં ઘટાડો કરવા અપીલ કરી હતી જેને પગલે ગ્રાહકોને 4-5 રૂપિયા સસ્તું ઈંધણ મળી શકે. નાણાં મંત્રીએ જણાવ્યું કે એક્સાઈઝ ડ્યુટી ઘટાડાતા આવકમાં રૂ. 10,500 કરોડનો ફટકો આ વર્ષે પડશે.

October 4, 2018

બેંક કૌભાંડોમાં જેમના પતિ તેમજ તેમની પોતાની સંડોવણીના થયેલા આક્ષેપો, ફરીયાદો, તપાસ વગેરેને પગલે ભારતની પ્રાઇવેટ સેક્ટર બેંક, આઇસીઆઇસીઆઇના ચીફ એક્ઝિક્યુટિવ ચંદા કોચરએ બેંકની કાર્યવાહીમાંથી તેમને મુક્ત કરવા અંગે, તેમજ નિયત સમયમર્યાદા કરતા વહેલા નિવૃત કરવાની કરેલી અરજીને ત્વરિત પ્રત્યાઘાત આપતા આઇ.સી.આઇ.સી.આઇ. બેંકની બોર્ડ મિટિંગમાં ચંદા કોચરના તાત્કાલિક અસરથી કામગીરી મુક્ત કરી દેવાયા છે. ચંદા કોચરની જગ્યાએ હવે આઇ.સી.આઇ.સી.આઇ. બેંકના નવા સી.ઇ.ઓ. તરીકે સંદીપ બક્ષીની નિમણૂંક કરવામાં આવી છે. સંદીપ બક્ષીની પાંચ વર્ષ માટે નિયુક્તિ કરવામાં આવી છે.

ચંદા કોચર અને તેમની સાથે નવા વરાયેલા સી.ઇ.ઓ. સંદીપ બક્ષી

ચંદા કોચર અને તેમના પતિ સામે અનેક ઇન્કવાયરીઓ ચાલી રહી છે. ચંદા કોચર આઇ.સી.આઇ.સી.આઇ. બેંકની અન્ય શાખાઓ અને કન્સર્ન પેઢીઓમાંથી પણ કાર્યમુક્ત થઇ જશે.

October 4, 2018

ક્રૂડ ઓઈલના ભાવમાં ભડકો થતા તેમજ રિઝર્વ બેન્ક ઓફ ઈન્ડિયા આગામી સમયમાં વ્યાજ દરમાં વધારો કરશે તેવી દહેશત પાછળ ડોલર સામે રૂપિયામાં સતત ડાઉનફોલ રહેતા સેન્સેક્સમાં આજે તા.4 ઓક્ટોબર 2018ના રોજ ગુરુવારે સવારે 750 પોઈન્ટનો કડાકો બોલી ગયા હતો. આમ બે દિવસમાં સેન્સેક્સમાં 1200 પોઈન્ટથી વધુનું નોંધપાત્ર ધોવાણ થયું હતું.

નવી સીરિઝમાં રોકાણકારોએ પોઝિશન લેવાનું ટાળ્યું હતું અને વૈશ્વિક પ્રતિકૂળતાને લીધે નફો બુક કરવાની માનસિકતા જોવા મળી રહી છે. પ્રાપ્ત અહેવાલો મુબજ આગામી સમયમાં રિઝર્વ બેન્ક વ્યાજ દરમાં વધારો કરશે તેવી ભીતિ પાછળ તા.3 ઓક્ટોબર 2018ને બુધવારે સેન્સેક્સમાં 36,000ની સપાટી તૂટી હતી. ૯ જુલાઈ બાદ સેન્સેક્સે આ સપાટી તોડી હતી. ત્યારબાદ સેન્સેક્સે આજરોજ તા.4 ઓક્ટોબર 2018ના રોજ ખૂલતામાંજ 35,500નું મહત્વનું સ્તરે તોડ્યું હતું. નિફ્ટી આંક પણ દોઢ ટકાથી વધુ તૂટીને 200 પોઈન્ટ ગગડીને 10,625ના સ્તરે ટ્રેડ થઈ રહ્યો હતો.

રૂપિયો ખુલતા બજારે ડોલર સામે 45 પૈસા ગગડીને 73.77ની ઐતિહાસિક નીચી સપાટીને સ્પર્શ્યો હતો. આંતરાષ્ટ્રીય બજારમાં ક્રૂડના ભાવ 85 ડોલર પ્રતિ બેરલને સ્પર્શતા શેરબજાર કડડભૂસ થયું હતું. ક્રૂડના ભાવ છેલ્લા ચાર વર્ષની ઊંચી સપાટીએ પહોંચ્યા હતા.

October 4, 2018

સૌથી વધુ માંગ મોંઘા અને ગોલ્ડ કલરના આઇફોન XS Max 256 જીબી મોડલની હતી એમ એક્ઝિક્યુટિવ્સે જણાવ્યું હતું. આ ફોનની કિંમત ₹1,24,900 છે. એપલે તા.28મી સપ્ટેમ્બર 2018ના રોજ ₹99,000 અને ₹1,44,900ની કિંમતના આઇફોન XS અને XS મેક્સ લોન્ચ કર્યા હતા જ્યારે ગયા વર્ષે આઇફોન X ₹89,000-₹1,02,000ની કિંમતમાં લોન્ચ કર્યા હતા.

ભારતીય માર્કેટમાં એપલના નવા આઇફોન XS અને XS મેક્સનું ઓછું વેચાણ થયું છે. એવા રિપોર્ટસ મળ્યા છે કે પ્રથમ વીકએન્ડના વેચાણ બાદ ભારતમાં સપ્લાય થયેલા જથ્થાનો 45 ટકા હિસ્સો વણવેચાયેલો પડ્યો છે અને આવું પહેલીવાર બન્યું છે. એક અધિકારીએ ભારતમાં હાલ મની ક્રાઇસીસનું કારણ પણ નવા આઇફોનના વેચાણ ઘટાડા માટે જણાવ્યું છે. કેટલાક એવું પણ માને છે કે શ્રાધ્ધપક્ષમાં ભારતીયો ખરીદી કરતા નથી એટલે પણ વેચાણ ઓછું થયું છે.

અગાઉનાં વર્ષોમાં એપલના ફોન જ્યારે પણ ભારતમાં વેચાણ માટે આવ્યા છે ત્યારે ખરીદદારોમાં તેની ભારે માંગ જોવા મળી છે. નવા આઇફોન ખરીદવા માટે ખરીદદારોની લાંબી લાઇનો જોવા મળી છે. એપલે લગભગ એક લાખ નવા આઇફોનની આયાત કરી છે અને વધુ ને વધુ સ્ટોર્સમાં તેને વેચાવા માટે મૂક્યા છે. વેચાણને વેગ આપવા માટે કંપનીએ નવી ટ્રેડ ચેનલમાં પણ પ્રવેશ કર્યો છે.

ગયા વર્ષે આઇફોન-8ને પણ નબળો પ્રતિસાદ મળ્યો હતો. ગયા વર્ષે આઇફોન Xના લોન્ચિંગના પ્રથમ ત્રણ દિવસની સરખામણીએ આઇફોન XS અને XS મેક્સનું વેચાણ 55-60 ટકા રહેવાની ધારણા હતી.

પ્રિ-બૂક કરાવનારા ઘણા ગ્રાહકોએ હજુ ખરીદી કરી નથી કારણ કે તેઓ શ્રાદ્ધના અપશુકનિયાળ સમયગાળામાં મળતા લાભનો ફાયદો લેવાની યોજના ધરાવે છે. પ્રથમ વીકએન્ડમાં નવા આઇફોન્સનું વેચાણ ગયા વર્ષના આઇફોન-8 કરતાં તો ચોક્કસપણે સારું રહ્યું છે પણ આઇફોન Xના વેચાણ કરતાં તો ઓછું છે. ઓક્ટોબરમાં નવરાત્રિ શરૂ થશે ત્યારે વેચાણ વધવાની અપેક્ષા છે.

October 4, 2018

દારુ પીવાના શોખીન લોકોને આંચકો લાગે એટલા ભાવની વ્હીસ્કીની એક બોટલના વેચાણના સમાચારે સમગ્ર વિશ્વમાં ભારે ચર્ચા જગાવી છે. એવા સમાચાર એટલા વાઇરલ થયા છે કે 1926માં એડિનબર્ગ (યુરોપ)માં બનેલી અને અત્યાર સુધી વ્યવસ્થિત રીતે સંગ્રહી રાખવામાં આવેલી વ્હીસ્કીની એક બોટલ જેનું નામ મેકલિન છે એની કિંમત ભારતીય ચલણ મુજબ રૂ.8.57 કરોડ થવા જાય છે. આશ્ચર્યની વાત એ છે કે આ લિમીટેડ એડિશનની વિશ્વનમાં સૌથી મોંઘીદાટ બોટલને ખરીદવા માટે પણ લોકો પડાપડી કરી રહ્યા છે.

૧૯૨૬માં એડિનબર્ગની મૅકૅલન ડિસ્ટિલરીમાં બનેલી આ ખાસ વ્હિસ્કીની બૉટલ એકદમ લિમિટેડ એડિશન હતી

whisky

સ્કૉટલૅન્ડના એડિનબર્ગ શહેરમાં જૂનાં અને અલભ્ય આલ્કોહૉલિક પીણાંના ઑક્શનમાં એક વ્હિસ્કીની બૉટલે કરોડો રૂપિયામાં વેચાઈને વર્લ્ડ રેકૉર્ડ બનાવ્યો હતો. ૧૯૨૬માં એડિનબર્ગની મૅકૅલન ડિસ્ટિલરીમાં બનેલી આ ખાસ વ્હિસ્કીની બૉટલ એકદમ લિમિટેડ એડિશન હતી. આ પ્રકારની વ્હિસ્કીની માત્ર ૧૨ જ બૉટલ બની હતી. એમાંથી એક બૉટલ બોન્હેમ્સ વ્હિસ્કી ઑક્શન કંપની દ્વારા ૮૬,૩૬,૨૫૦ હૉન્ગકૉન્ગ ડૉલર એટલે કે આશરે ૮.૫૭ કરોડ રૂપિયામાં વેચવામાં આવી હતી.

October 4, 2018

ભારત અને વેસ્ટ ઈન્ડિઝ વચ્ચે રાજકોટ ખંડેરી સ્ટેડિયમમાં પ્રથમ ટેસ્ટ મેચ સાથે ટેસ્ટ સીરિઝનો પ્રારંભ થયો છે. ભારતે ટોસ જીતીને પ્રથમ બેટિંગ કરવાનો નિર્ણય લીધો છે. 18 વર્ષીય પૂથ્વી શો પોતાની પહેલી ટેસ્ટ મેચ રમી રહ્યો છે. ટેસ્ટમાં ડેબ્યૂમાં સદી ફટકારનાર પૃથ્વી શો 15મો ભારતીય બેટ્સમેન બન્યો હતો. શોએ ઓપનિંગમાં શાનદાર બેટિંગ કરીને ડેબ્યૂમાં જ સદી ફટકારી છે. આ સાથે જ ડેબ્યૂમાં સદી ફટકારનાર યુવા બેટ્સમેન બનવા ઉપરાંત પૃથ્વીએ રેકોર્ડ રચ્યો છે.

ઉલ્લેખનીય છે કે, પૃથ્વી શોએ રાજકોટમાં જ રણજી કારકિર્દી આરંભી હતી. પોતાની પ્રથમ જ રણજી મેચમાં પૃથ્વી શોએ સદી ફટકારી હતી. મુંબઈમાં સ્કૂલ ક્રિકેટથી તે રનના ઢગલા કરતો આવ્યો છે. આ ઉપરાંત આ વર્ષે તેની આગેવાની હેઠળ ભારતીય અંડર-19 ટીમે જુનિયર વન-ડે ક્રિકેટ વર્લ્ડ કપ પણ જીત્યો હતો.

October 4, 2018

શારદીય નવરાત્રિમાં અનુષ્ઠાનનો પ્રારંભ કરતાં પૂર્વે ઘટ સ્થાપન, દીપસ્થાપન અને જ્વારારોપણ પણ કરવામાં આવતું હોય છે. એવું કહેવાય છે કે જે શ્રદ્ધાળુ નિયમપૂર્વક, સંયમપૂર્વક દેવી ઉપાસના કરે છે, તેને ઐશ્વર્ય, ઊર્જા અને આધ્યાત્મિક ઉન્નતિની પ્રાપ્તિ થાય છે.

(સુરતના અંબિકા નિકેતન મંદિર ખાતે તા.4 ઓક્ટોબર 2018ના રોજના માતાજીના દર્શન)

આ વર્ષે વિક્રમ સંવત-૨૦૭૪માં તા.૧૦ ઓક્ટોબરથી શારદીય નવરાત્રિનો પ્રારંભ થશે. એવું પણ કહેવાય છે કે પિતૃપક્ષની પૂર્ણાહુતિ થતાં દેવી પક્ષનો પ્રારંભ થાય છે. કેમ કે આસો મહિનાની પ્રતિપદાથી લઈને નવ દિવસ, દસમા દિવસે વિજયા દશમી અને શરદ પૂર્ણિમાએ પણ દેવીની ઉપાસના કરવામાં આવે છે. આ નવરાત્રિને આસો નવરાત્રિ કે શરદ ઋતુમાં આવતી હોવાથી શારદીય નવરાત્રિ તરીકે પણ ઓળખવામાં આવે છે. જેને શક્તિ-સંચય માટેનું પર્વ પણ કહેવામાં આવે છે.

નવરાત્રિ દરમિયાન માતાજીના નવ-નવ અલગ-અલગ સ્વરૂપોની ઉપાસના પણ કરવામાં આવતી હોય છે. પ્રથમ દિવસે શૈલપુત્રી, બીજા દિવસે બ્રહ્મચારિણી, ત્રીજા દિવસે ચંદ્રઘંટા દેવી, ચોથા દિવસે કૂષ્માંડા દેવી, પાંચમા દિવસે સ્કંદમાતા, છઠ્ઠા દિવસે કાત્યાયિની દેવી, સાતમા દિવસે કાલરાત્રિ, આઠમા દિવસે મહાગૌરી અને નવમા દિવસે સિદ્ધિદાત્રી દેવીની ઉપાસના કરવામાં આવે છે.

પ્રથમ દિવસે શૈલપુત્રી,
બીજા દિવસે બ્રહ્મચારિણી,
ત્રીજા દિવસે ચંદ્રઘંટા દેવી,
ચોથા દિવસે કૂષ્માંડા દેવી,
પાંચમા દિવસે સ્કંદમાતા,
છઠ્ઠા દિવસે કાત્યાયિની દેવી,
સાતમા દિવસે કાલરાત્રિ,
આઠમા દિવસે મહાગૌરી અને
નવમા દિવસે સિદ્ધિદાત્રી દેવી

બંગાળી પરિવારો દુર્ગા પૂજા પણ કરશે

આ નવરાત્રિ દરમિયાન ભક્તો શક્તિપીઠ અંબાજી, બહુચરાજી, પાવાગઢ, ચોટીલા, સુરતમાં અંબિકાનિકેતન, અડાજણમાં શક્તિ નિકેતન સહિતનાં દેવી સ્થાનોએ જઈને માતાજીની ઉપાસના કરે છે. સાથે જ ગુજરાત-સુરતમાં વસતા બંગાળી પરિવારો પણ દુર્ગા પૂજા મહોત્સવનું આયોજન કરતાં હોય છે. સાથોસાથ સાંસ્કૃતિક કાર્યક્રમોનું પણ આયોજન કરતાં હોય છે.

October 4, 2018

આપણા ગામ શહેરને સ્વચ્છ રાખતા સફાઈ કર્મચારીઓનું સન્માન કરવું
એ એક સરાહનીય પહેલ: મહેસૂલ મંત્રી
—————–
સ્વચ્છતાના સૈનિકોનું સન્માન કરવા બદલ ધન્યતા અનુભવતાં મહેસૂલ મંત્રી કૌશિકભાઇ પટેલ
—————-

મહેસૂલ મંત્રીશ્રી કૌશિકભાઇ પટેલની ઉપસ્થિતિમાં પાલનપુર જકાતનાકા સ્થિત વિદ્યાકુંજ શાળા દ્વારા સ્વચ્છતાના દૂતો એવા સુરતના મહિલા સફાઈ કર્મચારીઓનું સન્માન કરી ગાંધી જયંતિની અનોખી ઉજવણી કરી હતી. શાળા દ્વારા મહાત્મા ગાંધીજીને પ્રિય એવી સ્વચ્છતાનો પ્રેરક સંદેશ સમાજ સુધી પહોંચે એવા આશયથી મહિલા સફાઈ કર્મચારીઓ અને શાળામાં ફરજ બજાવતાં ચોથા વર્ગના કર્મચારીઓનું સન્માન કર્યું હતું, ઉપરાંત મહેસૂલ મંત્રીશ્રી અને શાળાના ટ્રસ્ટીઓએ તેમના માનમાં શાળામાં આયોજિત ભોજન સમારોહમાં સહભોજન લઇ આદર વ્યક્ત કર્યો હતો.

આ પ્રસંગે મંત્રી શ્રી કૌશિકભાઇ પટેલે વિદ્યાકુંજ શાળાની ઉમદા ભાવનાને બિરદાવતા જણાવ્યું જણાવ્યું કે, મહાત્મા ગાંધીજી સ્વચ્છતાના ચુસ્ત આગ્રહી હતા. ‘સ્વચ્છતા ત્યાં પ્રભુતા’ એ રાષ્ટ્રપિતા ગાંધીજીનો જીવનમંત્ર હતો. આપણા ગામ શહેરને સ્વચ્છ રાખતા સફાઈ કર્મચારીઓનું સન્માન કરવાનો વિચાર જાગવો એ એક સરાહનીય પગલું છે. સુરત મહાનગરપાલિકાના સફાઈ કામદારો કે જેઓ સાચા અર્થમાં સ્વચ્છતાના સૈનિકો છે તેમનું સન્માન કરવા બદલ તેમણે ધન્યતા અનુભવી હોવાનું તેમણે ઉમેર્યું હતું.

સમગ્ર દેશમાં ગાંધી ૧૫૦મી જન્મ જયંતિ ઉજવણીની શરૂઆત ગુજરાતે શરૂ કરી છે, ત્યારે આ અવસરે આપણે સ્વચ્છતાને સ્વભાવ બનાવી આપણા મહોલ્લા, ગામ અને શહેર સ્વચ્છ બનાવવામાં યોગદાન આપવાનો ઉપસ્થિત સૌને તેમણે અનુરોધ કર્યો હતો.
ઉલ્લેખનીય છે કે, લોકસેવા અને દેશસેવાની ભાવના વિદ્યાર્થીઓ અને વાલીઓમાં ખીલે એ માટે વિદ્યાકુંજ શાળાની પ્રેરણાથી ચક્ષુદાન માટે ૧૫૧ વાલીઓ, દેહદાન માટે ૨૧ વાલીઓ, ચક્ષુદાન માટે ૧૫૧ લોકો તેમજ વ્યસનમુક્તિ માટે ૧૩૨ વાલીઓ, મારી સોસાયટી સ્વચ્છ સોસાયટી ઝુંબેશ હેઠળ ૧૮૫ સોસાયટી સહિત શહેરીજનો સંકલ્પબદ્ધ બન્યા છે.

ગાંધી જયંતિના અવસરે શાળાના પ્રાંગણમાં સ્વચ્છતા, સામાજિક સમરસતા, ભૂલોનું પ્રાયશ્ચિત, ધાર્મિક એકતાના સંદેશ માટે તા. ૧ અને ૨ ઓકટોબરના રોજ ગાંધી જીવન પ્રદર્શનનું આયોજન કરવામાં આવ્યું હતું. જેને મંત્રી શ્રી કૌશિકભાઇ પટેલે રસપૂર્વક નિહાળ્યું હતું. ઉપરાંત ગાંધી જયંતિના દિને સવારે ૮:૦૦ વાગ્યાથી સતત ૨૪ કલાક રેંટીયો કાંતવામાં આવ્યો હતો. શાળા દ્વારા વિશેષમાં આ દિવસે પ્રાર્થના સભા, સ્વચ્છતા અભિયાન અન્વયે સફાઈ અને લોક જાગૃતિ રેલીનું આયોજન કરવામાં આવ્યું હતું.

આ પ્રસંગે ધારાસભ્યશ્રી પૂર્ણેશભાઈ મોદી, શાળાના મેનેજીંગ ટ્રસ્ટીશ્રી જયંતીભાઈ પટેલ, કેમ્પસ ડાયરેક્ટરશ્રી મહેશભાઈ પટેલ, ડે.મેયરશ્રી નિરવ શાહ, મહિલા સફાઈ કર્મચારીઓ, શાળાના સ્ટાફગણ અને વિદ્યાર્થીઓ ઉપસ્થિત રહ્યા હતા.

October 4, 2018

રાજ્ય મંત્રીમંડળ બેઠકમાં લેવાયેલ મહત્વનો નિર્ણય

બાળકીઓ પર થતા દુષ્કર્મ કરનાર તત્વોને ફાંસીની સજા અપાવવા રાજ્ય સરકાર કૃતનિશ્ચયી : ગૃહ રાજ્ય મંત્રીશ્રી

દુષ્કર્મ કેસોની તપાસ કરવા સ્પેશ્યલ સરકારી વકીલ નિમાશે: પોલીસ તપાસમાં ઝડપ લાવવા ખાસ ધ્યાન કેન્દ્રિત કરાશે
હાઇકોર્ટના પરામર્શમાં રહીને ફાસ્ટટ્રેક કોર્ટમાં રોજીંદા ધોરણે કેસ ચલાવી બે માસના સમયગાળામાં ચાર્જશીટ અને ટ્રાયલ પૂર્ણ કરવામાં આવશે
ભોગ બનનાર બાળકીઓને રૂા. ૪.૫૦ લાખ તથા મહિલાઓને રૂા. ૩.૦૦ લાખનું વળતર

ગૃહ રાજ્ય મંત્રીશ્રી પ્રદિપસિંહ જાડેજાએ જણાવ્યું છે કે, રાજ્યમાં બાળકીઓ – મહિલાઓ સાથે થતા દુષ્કર્મ પ્રત્યે રાજ્ય સરકાર અત્યંત સંવેદશીલ છે. આવા માનવતા વિહોણું કામ કરનાર વ્યક્તિઓ સામે કડક હાથે કામગીરી કરી ફાંસીની સજા અપાવવા રાજ્ય સરકાર કૃતનિશ્ચયી છે.

મંત્રીશ્રી જાડેજાએ ઉમેર્યું હતું કે, તા.3 ઓક્ટોબર 2018ના રોજ મુખ્યમંત્રી શ્રી વિજયભાઇ રૂપાણીના નેતૃત્વ હેઠળ મળેલી રાજ્ય મંત્રી મંડળની બેઠકમાં રાજ્યમાં બની રહેલ દુષ્કર્મની ઘટનાઓને રાજ્યની સંવેદનશીલ સરકારે અત્યંત દુઃખદ ગણી છે, અને આવા તત્વોને કડક સજા અપાવવા માટે મુખ્યમંત્રી શ્રી વિજયભાઇ રૂપાણીએ નામદાર હાઇકોર્ટને વિનંતી કરી છે કે આવા કેસો ફાસ્ટટ્રેક કોર્ટમાં ચાલે. આવા કેસોમાં મળવાપાત્ર ફાંસીની સજા માટે બે મહિનાના ગાળામાં ચાર્જશીટ તથા ટ્રાયલ પણ પૂર્ણ થાય અને રોજબરોજ કેસ ચલાવવામાં આવે તે માટે રાજ્ય સરકારે આ મહત્વનો નિર્ણય લીધો છે. કેન્દ્ર સરકાર દ્વારા પીનલ કોડ અને સી.આર.પી.સી.માં કરાયેલ નવા સુધારા મુજબ કામગીરી કરાશે.

તેમણે કહ્યું કે, આ તપાસ માટે ખાસ પેરવી ઓફીસરની નિમણૂંક પણ કરાશે. ભોગ બનનાર બાળકી ૧૨ વર્ષથી નીચેની હોય તો તેવા કેસમાં આરોપીને ફાંસીની સજા સુધીની જોગવાઇ કરવામાં આવશે.

મંત્રીશ્રી જાડેજાએ આ અંગે વધુ વિગતો આપતા કહ્યું કે, રાજ્યમાં જે ઘટનાઓ ઘટી છે તેની તપાસ મહિલા પોલીસ અધિકારીના નેતૃત્વ હેઠળ થઇ રહી છે, અને તેનું સુપરવિઝન મહિલા DCP અથવા DSP દ્વારા કરાશે. સાથે-સાથે ભોગ બનનાર બાળકીઓ જે ૧૪ વર્ષથી નીચેની ઉંમરની હોય તો તેને રૂા. ૪.૫૦ લાખનું વળતર રાજ્ય સરકાર દ્વારા આપવામાં આવશે.

મંત્રીશ્રીએ કહ્યું કે, સાંબરકાંઠા જિલ્લાના ગાંભોઇ ખાતે બનેલ બનાવમાં બાળકીની ઉંમર ૧૪ માસની છે, તેની તપાસ પણ મહિલા અધિકારી દ્વારા થઇ રહી છે અને આરોપીની ધરપકડ પણ કરી દેવાઇ છે. તેમજ, સુરત શહેરના ડીંડોલીમાં બનેલ બન્ને ઘટનાઓમાં બાળકીની ઉંમર ૫ વર્ષની છે. જેમાં ગુ.ર.નં. ૧૮૮ /૨૦૧૮ હેઠળ નોંધાયેલ ફરીયાદમાં જે બાળકી ઉપર દુષ્કર્મ થયું છે તેમાં તેના કૌટુબિક વ્યક્તિ દ્વારા દુષ્કર્મ કર્યું છે. તેની પણ ધરપકડ કરી દેવાઇ છે. તથા ગુ.ર.નં. ૧૮૭ /૨૦૧૮માં પણ બાળકી ઉપર દુષ્કર્મ કરનાર આરોપીની ધરપકડ થઇ ગયેલ છે. તેમજ, અઠવાલાઇન પોલીસ સ્ટેશનમાં ૧૨ વર્ષની બાળકી ઉપર દુષ્કર્મની ઘટના બની છે, તેમાં બાળકી જે વિસ્તારમાં રહેતી હતી તે વિસ્તારના આરોપી દ્વારા બાળકી ઉપર દુષ્કર્મ આચરવામાં આવ્યું હતું તેની પણ ધરપકડ કરી દેવાઇ છે.

અત્ર ઉલ્લેખનીય છે કે, ૧૮ વર્ષથી ઓછી વયના બાળકો દ્વારા જે દુષ્કર્મ કરાયું છે, તે માટે જુવેનાઇલ કોર્ટમાં કેસ ચલાવવામાં આવશે. અને તે મુજબ કાર્યવાહી કરવામાં આવશે.

Newer Posts

Older Posts

Alert Archives - Page 459 of 512 - CIA Live

વીજગ્રાહકોના વિશાળ હિતમાં મુખ્યમંત્રીનો સંવેદનશીલ નિર્ણય

ગુજરાત અને મહારાષ્ટ્રમાં પેટ્રોલ-ડિઝલમાં પ્રતિ લિટરે રૂ.5નો તોતિંગ ઘટાડો

ICICI Bankમાંથી ચંદા કોચર વિદાય, સંદીપ બક્ષી નવા CEO

Sensexમાં 800 પોઈન્ટનો કડાકો, રૂપિયો ડોલર સામે 73.77

આઇફોન Xs અને Xs Maxના વેચાણને નડ્યું શ્રાદ્ધ અને મંદીનું ગ્રહણ

વ્હિસ્કીની એક બોટલ 8.57 કરોડ રૂપિયામાં વેચાઇ

18 વર્ષીય પૃથ્વી શોએ ટેસ્ટડેબ્યૂમાં સેન્ચુરી ફટકારીને રચ્યો રેકોર્ડ

શક્તિ-સંચય માટેનું વિશિષ્ટ પર્વ શારદીય નવરાત્રિ 10 ઓક્ટોબરથી શરૂ થશે

સુરતની વિદ્યાકુંજ શાળાએ સ્વચ્છતાના દૂતોનું સન્માન કરી ગાંધી જયંતિની અનોખી ઉજવણી કરી

બાળકીઓ પર થતા દુષ્કર્મ કરનાર તત્વોને ફાંસીની સજા અપાવવા રાજ્ય સરકાર કૃતનિશ્ચયી