નોટિંગહામ ખાતે ઇંગ્લેન્ડ સામેની 3જી T20 મેચમાં ભારતને 125 રને શરમજનક હાર મળી. ઇંગ્લેન્ડે 201 રન કર્યા, જેમાં સોલ્ટના 70 અને કરનના 41 રન હતા. જવાબમાં ભારત માત્ર 76 રનમાં ઓલઆઉટ થયું. શ્રેયસ અય્યરની કેપ્ટનશીપમાં આ T20 ઇતિહાસમાં ભારતની સૌથી મોટી હાર છે, જેનાથી શ્રેણી જીતવાની આશા સમાપ્ત થઈ.
IND vs ENG 3rd T20I: ઇંગ્લેન્ડ સામેની ત્રીજી T20 ઇન્ટરનેશનલ મેચમાં ભારતીય ક્રિકેટ ટીમને આ ફોર્મેટની અત્યાર સુધીની સૌથી શરમજનક અને મોટી હારનો સામનો કરવો પડ્યો છે. નોટિંગહામના ટ્રેન્ટ બ્રિજ ખાતે રમાયેલી આ મેચમાં ઇંગ્લેન્ડે ભારતને 125 રને હરાવીને 5 મેચોની શ્રેણીમાં 2-0ની અજેય લીડ મેળવી લીધી છે. આ હાર સાથે શ્રેયસ અય્યરની કપ્તાની હેઠળની ભારતીય ટીમે શ્રેણી જીતવાની તક ગુમાવી દીધી છે, હવે ભારત માત્ર આ શ્રેણી ડ્રો કરાવી શકે તેમ છે.
ટોસ હારીને પ્રથમ બેટિંગ કરવા ઉતરેલી ઇંગ્લેન્ડની ટીમે ઓપનર ફિલ સોલ્ટની દમદાર 70 રનની (44 બોલ, 7 ચોગ્ગા, 3 છગ્ગા) ઇનિંગ અને કેપ્ટન જોસ બટલરના 36 રનની મદદથી ઝડપી શરૂઆત કરી હતી. અંતિમ ઓવરોમાં સેમ કરને 24 બોલમાં અણનમ 41 રન ફટકારીને ઇંગ્લેન્ડનો સ્કોર 7 વિકેટે 201 રન સુધી પહોંચાડ્યો હતો. ભારત તરફથી પ્રિન્સ યાદવ અને હર્ષિત રાણાએ 2-2 વિકેટ ઝડપી હતી.
202 રનના મોટા લક્ષ્યાંકનો પીછો કરવા ઉતરેલી ભારતીય ટીમ ઇંગ્લેન્ડના પેસ એટેક સામે માત્ર 11.4 ઓવરમાં જ 76 રનના સ્કોર પર ઓલઆઉટ થઈ ગઈ હતી. T20 ઈતિહાસમાં રનની દ્રષ્ટિએ ભારતની આ સૌથી મોટી હાર છે. આ પહેલા 2019માં ન્યૂઝીલેન્ડે ભારતને 80 રને હરાવ્યું હતું. આ ઉપરાંત, 76 રન એ ભારતનો T20માં બીજો સૌથી ઓછો સ્કોર છે (સૌથી ઓછો સ્કોર 2008માં 74 રન છે).
ભારતનો કોઈ પણ બેટ્સમેન 15 રનનો આંકડો પણ પાર કરી શક્યો નહોતો. ડેબ્યુટન્ટ વૈભવ સૂર્યવંશીએ 5 બોલમાં 2 છગ્ગા સાથે 13 રન અને ઇશાન કિશને 13 રન બનાવ્યા હતા. કેપ્ટન અય્યર માત્ર 5 રન બનાવી આઉટ થયો હતો. ઇંગ્લેન્ડ તરફથી જોશ ટંગે 4 વિકેટ અને જોફ્રા આર્ચરે 3 વિકેટ ઝડપી ભારતીય બેટિંગ લાઇનઅપની કમર તોડી નાખી હતી. આર્ચરને ‘પ્લેયર ઓફ ધ મેચ’ જાહેર કરાયો હતો. હવે શ્રેણીની આગામી મેચો 9 અને 11 જુલાઈએ રમાશે.
બ્રાઝિલના સ્ટાર ફૂટબોલર નેમારે આંતરરાષ્ટ્રીય ફૂટબોલમાંથી સંન્યાસની જાહેરાત કરી કરોડો ચાહકોને ચોંકાવ્યા છે. FIFA વર્લ્ડ કપ 2026 માં નોર્વે સામે બ્રાઝિલની 2-1થી હાર બાદ 34 વર્ષીય નેમારે ભાવુક થઈને નિવૃત્તિ લીધી. તેમણે ‘મેટલાઈફ સ્ટેડિયમ’માં પોતાની પ્રથમ અને અંતિમ મેચ રમી. 16 વર્ષના કરિયરમાં 129 મેચમાં 80 ગોલ સાથે તેઓ બ્રાઝિલના સફળતમ ગોલસ્કોરર બન્યા.
બ્રાઝિલના સ્ટાર અને વિશ્વના દિગ્ગજ ફૂટબોલર નેમારે આંતરરાષ્ટ્રીય ફૂટબોલમાંથી સંન્યાસની જાહેરાત કરીને કરોડો ચાહકોને આંચકો આપ્યો છે. ફિફા વર્લ્ડ કપ 2026 ના રાઉન્ડ ઓફ-16 મુકાબલામાં નોર્વે સામે બ્રાઝિલનો 2-1 થી પરાજય થયો હતો, જેની સાથે જ બ્રાઝિલનું વર્લ્ડ કપ જીતવાનું સપનું રોળાઈ ગયું હતું. આ શરમજનક હાર બાદ 34 વર્ષીય નેમારે ભારે હૈયે આંતરરાષ્ટ્રીય સ્તરેથી નિવૃત્તિની જાહેરાત કરી દીધી હતી. મેચ બાદ ભાવુક થયેલા નેમારે સ્પષ્ટ શબ્દોમાં કહ્યું હતું કે, “મેં મારી પૂરેપૂરી કોશિશ કરી. મારો પ્રવાસ જ્યાંથી શરૂ થયો હતો, આજે ત્યાં જ પૂરો થઈ ગયો છે. હવે બધું સમાપ્ત થઈ ગયું છે.”
નેમારના આ આખરી મુકાબલામાં એક અદભુત સંયોગ પણ જોવા મળ્યો હતો. તેમણે 9 ઓગસ્ટ 2010ના રોજ અમેરિકા સામે ‘મેટલાઈફ સ્ટેડિયમ’ ખાતે પોતાની પ્રથમ આંતરરાષ્ટ્રીય મેચ રમીને કરિયરની શરૂઆત કરી હતી. લગભગ 16 વર્ષ બાદ, બ્રાઝિલની જર્સીમાં તેમણે પોતાની છેલ્લી મેચ પણ આ જ સ્ટેડિયમમાં રમીને ફૂટબોલ જગતને અલવિદા કહ્યું હતું. પોતાની છેલ્લી મેચમાં નેમાર જમણા પગની પિંડલી (રાઈટ કાફ) ની ઈજાના કારણે શરૂઆતની પ્લેઈંગ 11માં સામેલ નહોતા. જોકે, તેઓ બેન્ચ પરથી મેદાનમાં આવ્યા હતા અને મેચની છેલ્લી મિનિટોમાં પેનલ્ટી દ્વારા શાનદાર ગોલ પણ કર્યો હતો, પરંતુ તે બ્રાઝિલને હારથી બચાવી શક્યો નહોતો.
છેલ્લા કેટલાક વર્ષોથી નેમારનું કરિયર સતત ઈજાઓથી પ્રભાવિત રહ્યું હતું, જેના કારણે તેઓ પોતાની જૂની લય ગુમાવી બેઠા હતા. આ આખા વર્લ્ડ કપ દરમિયાન પણ તેઓ ફિટનેસની સમસ્યાઓ સામે ઝઝૂમતા રહ્યા અને બ્રાઝિલની પાંચ મેચોમાંથી માત્ર બે જ મેચ રમી શક્યા હતા. ગ્રુપ સ્ટેજમાં સ્કોટલેન્ડ સામેની મેચમાં પણ તેઓ માત્ર 15 મિનિટ જ મેદાન પર વિતાવી શક્યા હતા. ઈજાઓએ તેમના પ્રદર્શનને ઘણું સીમિત કરી દીધું હતું.
આ આઘાતજનક વિદાય સાથે જ નેમારના 16 વર્ષ લાંબા ઈન્ટરનેશનલ કરિયરનો અંત આવ્યો છે. તેઓ બ્રાઝિલના ફૂટબોલ ઈતિહાસના સૌથી સફળ ગોલ સ્કોરર તરીકે નિવૃત્ત થયા છે. તેમણે દેશ માટે 129 ઇન્ટરનેશનલ મેચો રમીને રેકોર્ડબ્રેક 80 ગોલ નોંધાવ્યા છે અને ટીમને અનેક યાદગાર જીત અપાવી છે. નેમારની નિવૃત્તિ બાદ હવે બ્રાઝિલિયન ફૂટબોલ એક નવા યુગમાં પ્રવેશી રહ્યું છે, જ્યાં ટીમની કમાન નવી પેઢીના યુવા ખેલાડીઓના હાથમાં રહેશે.
આયર્લેન્ડ પ્રવાસે ગયેલી ભારતીય ટીમને બીજી T20 મેચમાં પણ કારમો પરાજય મળ્યો છે. ડબલિનમાં રમાયેલી આ મેચમાં આયર્લેન્ડે 154 રન બનાવ્યા હતા, જેમાં હેરી ટેક્ટરે 53 રન ફટકાર્યા હતા. પ્રિન્સ યાદવે 3 વિકેટ ઝડપી હતી. જવાબમાં ભારત 155 રનનો લક્ષ્યાંક હાંસલ કરી શક્યું નહીં અને સિરીઝ 0-2થી ગુમાવી દીધી. તિલક વર્માએ 55 રન બનાવ્યા, જ્યારે જય મૂન્દ્રા અને મેટ હોલાર્ડે 3-3 વિકેટ લીધી.
India Vs Ireland T20 Match : ભારતીય ક્રિકેટ ટીમ માટે આયર્લેન્ડનો પ્રવાસ એક ખરાબ સ્વપ્ન સમાન સાબિત થયો છે. પ્રથમ T20 મેચમાં 34 રનથી હાર્યા બાદ, બીજી મેચમાં પણ ભારતનો શરમજનક પરાજય થયો છે. જીતવા માટેના 155 રનના લક્ષ્યાંક સામે ભારતીય ટીમ 20 ઓવરમાં માત્ર 153 રન જ બનાવી શકી હતી. સતત બીજી કારમી હારના કારણે ટીમ ઈન્ડિયાએ આ T20 સિરીઝ પણ ગુમાવી દીધી છે, જે ભારતીય ક્રિકેટ માટે અત્યંત આઘાતજનક બાબત છે.
ટોસ જીતીને પહેલા બેટિંગ કરવા ઉતરેલી આયર્લેન્ડની ટીમે મજબૂત શરૂઆત કરી હતી. હેરી ટેક્ટરે 47 બોલમાં 5 ચોગ્ગા અને 1 છગ્ગાની મદદથી સૌથી વધુ 53 રન ફટકાર્યા હતા. બેન કેલિટ્ઝે 23 બોલમાં ઝડપી 37 રન બનાવ્યા, જેમાં 3 ચોગ્ગા અને 2 છગ્ગા સામેલ હતા. રોસ અદૈરે 7 બોલમાં 1 ચોગ્ગો અને 2 છગ્ગા મારી 16 રન જોડ્યા હતા. લોર્કન ટકરે 18 બોલમાં 2 ચોગ્ગા સાથે 15 રન અને જ્યોર્જ ડોકરેલે 14 બોલમાં 1 ચોગ્ગો અને 1 છગ્ગો ફટકારી 19 રન બનાવ્યા હતા. જ્યારે ટિમ ટેક્ટરે 6 બોલમાં 1 ચોગ્ગા સાથે 5 રન કર્યા હતા. લિયમ મેકકાર્થી 2 રન અને જય મૂન્દ્રા 1 રને અણનમ રહ્યા હતા, જેથી ટીમનો સ્કોર 20 ઓવરમાં 8 વિકેટે 154 રન સુધી પહોંચ્યો હતો.
ભારતીય બોલરોએ મેચમાં વાપસી કરાવવાનો પૂરો પ્રયાસ કર્યો હતો. જેમાં પ્રિન્સ યાદવ સૌથી સફળ બોલર રહ્યો, જેણે 4 ઓવરમાં માત્ર 22 રન આપીને 3 મહત્વપૂર્ણ વિકેટ ઝડપી હતી. શિવમ દુબેએ પણ સારી બોલિંગ કરી 3 ઓવરમાં 25 રન આપીને 2 વિકેટ લીધી હતી. અર્શદીપ સિંહે 4 ઓવરમાં 35 રન આપીને 2 સફળતા મેળવી હતી. હર્ષિત રાણાએ કરકસરયુક્ત બોલિંગ કરતા 3 ઓવરમાં 17 રન આપી 1 વિકેટ મેળવી હતી. જોકે, સૂર્યાંશ શેડગેએ 2 ઓવરમાં 25 રન અને અક્ષર પટેલે 4 ઓવરમાં 28 રન આપ્યા હતા, પરંતુ આ બંને બોલરોને કોઈ વિકેટ મળી શકી નહોતી.
155 રનના સ્કોરનો પીછો કરવા ઉતરેલી ભારતની બેટિંગ લાઇન-અપ પત્તાના મહેલની જેમ વિખેરાઈ ગઈ હતી. ઓપનર સંજુ સેમસન અને અભિષેક શર્મા ખાતું ખોલાવ્યા વિના જ પ્રથમ ઓવરમાં આઉટ થઈ ગયા હતા. ઈશાન કિશને 11 બોલમાં 1 ચોગ્ગા સાથે 12 રન અને શ્રેયસ અય્યરે 7 બોલમાં 2 ચોગ્ગા ફટકારી 10 રન બનાવ્યા હતા. મધ્યક્રમમાં તિલક વર્માએ એકલા હાથે લડત આપતા 46 બોલમાં 3 ચોગ્ગા અને 1 છગ્ગા સાથે 55 રનની ઇનિંગ રમી હતી, પરંતુ તેઓ ટીમને જીતાડી શક્યા નહીં. શિવમ દુબેએ 16 બોલમાં 2 ચોગ્ગા સાથે 20 રન અને અક્ષર પટેલે 18 બોલમાં 14 રન કર્યા હતા. સૂર્યાંશ શેડગે 1 રન ફટકાર્યો હતો.
આયર્લેન્ડના બોલરોએ ભારતના દિગ્ગજ બેટ્સમેનોને પિચ પર ટકવા દીધા નહોતા. જય મૂન્દ્રાએ ઘાતક બોલિંગનું પ્રદર્શન કરીને 4 ઓવરમાં 31 રન આપીને 3 મોટી વિકેટો ઝડપી હતી. તેને સાથ આપતા મેટ હોલાર્ડે 4 ઓવરમાં 26 રન આપીને 3 વિકેટ લીધી હતી. મેથ્યુ હમ્ફ્રીઝે પણ શાનદાર લાઈન-લેન્થ જાળવી 4 ઓવરમાં 28 રન આપી 1 વિકેટ મેળવી હતી. લિયમ મેકકાર્થીએ 4 ઓવરમાં 22 રન અને હેરી ટેક્ટરે 3 ઓવરમાં 22 રન આપ્યા હતા.
ફિફા વર્લ્ડ કપ 2026માં મોટો અપસેટ સર્જાયો છે. આફ્રિકાના પશ્ચિમ કિનારે આવેલા 5 લાખની વસ્તી ધરાવતા નાના દેશ કેપ વર્ડેએ ડેબ્યૂ કરતા જ નોકઆઉટ (રાઉન્ડ ઓફ 32) સ્ટેજમાં સ્થાન મેળવી ઇતિહાસ રચ્યો છે. સ્પેને ઉરુગ્વેને હરાવતા કેપ વર્ડેની ટિકિટ પાકી થઈ હતી. હવે તેનો સામનો ડિફેન્ડિંગ ચેમ્પિયન આર્જેન્ટિના સામે 3 જુલાઈએ મિયામી ગાર્ડન્સ ખાતે થશે.
Cape Verde Qualified for FIFA: ફિફા વર્લ્ડ કપ 2026માં એક મોટો ઉલટફેર જોવા મળ્યો છે. પ્રથમ વખત વર્લ્ડ કપ રમી રહેલા નાનકડા દેશ કેપ વર્ડેએ તા.27 જૂન 2026ને શનિવારે ઇતિહાસ રચી દીધો છે. માત્ર 5 લાખની વસ્તી ધરાવતો આ દેશ વર્લ્ડ કપના નોકઆઉટ (રાઉન્ડ ઓફ 32) સ્ટેજમાં પહોંચી ગયો છે. શનિવારે રમાયેલી મેચમાં સ્પેને ઉરુગ્વેને 1-0થી હરાવતાની સાથે જ કેપ વર્ડેનું રાઉન્ડ ઓફ 32નું ટિકિટ કન્ફર્મ થઈ ગયું છે, જ્યાં હવે તેનો સામનો ડિફેન્ડિંગ ચેમ્પિયન આર્જેન્ટિના સામે થશે. આ પહેલાં કેપ વર્ડેએ હ્યુસ્ટન ખાતે સાઉદી અરેબિયા સામે 0-0થી ડ્રો રમીને ગ્રુપ Hમાં કોઈ પણ ટીમને પોતાની સામે જીતવા દીધી નહોતી. આફ્રિકાના પશ્ચિમ કિનારે આવેલો આ આઇલેન્ડ નેશન ક્ષેત્રફળ અને વસ્તીની દ્રષ્ટિએ વર્લ્ડ કપના નોકઆઉટ રાઉન્ડમાં પહોંચનારો અત્યાર સુધીનો સૌથી નાનો દેશ બની ગયો છે. લીગ રાઉન્ડના અંતે કેપ વર્ડે ગ્રુપ Hમાં બીજા સ્થાને રહ્યું અને પોતાના ડેબ્યૂમાં જ નોકઆઉટમાં જગ્યા બનાવી લીધી. 56 વર્ષીય હેડ કોચ બુબિસ્ટાની આ ટીમે માત્ર 8 મહિના પહેલાં જ પ્રથમ વખત વર્લ્ડ કપ માટે ક્વોલિફાય કરીને બધાને ચોંકાવ્યા હતા. અજેય રહીને ગ્રુપ સ્ટેજ પાર કર્યું: ડિફેન્સ અને એટેકનો શાનદાર સમન્વય કેપ વર્ડેએ ટૂર્નામેન્ટમાં પોતાની સફરની શરૂઆત 2010ના વર્લ્ડ કપ વિજેતા સ્પેન સામે 0-0થી ડ્રો રમીને કરી હતી, જેનાથી સાબિત થયું કે તેમનું ડિફેન્સ ખૂબ મજબૂત છે.
બીજી મેચ: બે વખતની વર્લ્ડ ચેમ્પિયન ઉરુગ્વે સામે 2-2થી ડ્રો રમીને કેપ વર્ડેએ દર્શાવ્યું કે તેમનો એટેકિંગ લાઇન-અપ પણ શાનદાર છે. ત્રીજી મેચ: શુક્રવારે સાઉદી અરેબિયા સામે 0-0થી ડ્રો રમ્યા બાદ કેપ વર્ડે 3 પોઇન્ટ્સ સાથે ગ્રુપ Hમાં બીજા સ્થાને રહ્યું. તેઓ સ્પેનથી પાછળ પરંતુ દિગ્ગજ ઉરુગ્વે કરતાં 1 પોઇન્ટ આગળ રહ્યા. ઐતિહાસિક રેકોર્ડ: વર્ષ 2002માં સેનેગલના પ્રદર્શન બાદ કેપ વર્ડે વિશ્વનો એવો પ્રથમ દેશ બન્યો છે, જે પોતાના ડેબ્યૂ વર્લ્ડ કપમાં ગ્રુપ સ્ટેજ દરમિયાન એક પણ મેચ હાર્યા વગર નોકઆઉટમાં પહોંચ્યો હોય. ચાંદની ચોક કરતાં પણ ઓછી વસ્તી, મોટા દેશોને આપી માત કેપ વર્ડેની કુલ વસ્તી આશરે 5,25,000 છે, જે દિલ્હીના પ્રખ્યાત વિસ્તાર ચાંદની ચોકની વસ્તી કરતાં પણ ઓછી છે. વસ્તીની દ્રષ્ટિએ કુરાકાઓ અને આઇસલેન્ડ જેવા નાના દેશો પણ વર્લ્ડ કપ રમ્યા છે, પરંતુ તેઓ ગ્રુપ સ્ટેજથી આગળ વધી શક્યા નહોતા. કેપ વર્ડે આ તમામથી આગળ નીકળીને નવો રેકોર્ડ બનાવ્યો છે.
સાઉદી અરેબિયા સામેની નિર્ણાયક મેચમાં કેપ વર્ડેના 40 વર્ષીય અનુભવી ગોલકીપર વોઝિન્હા ગોલપોસ્ટ સામે દીવાલ બનીને ઉભા રહ્યા હતા. તેમણે મેચ દરમિયાન અદભુત સેવ કર્યા:
કેપ વર્ડેની ટીમ હવે 3 જુલાઈના રોજ મિયામી ગાર્ડન્સ ખાતે રમાનારા રાઉન્ડ ઓફ 32ના મુકાબલામાં વર્તમાન ચેમ્પિયન આર્જેન્ટિના સામે મેદાને ઉતરશે. આ નાનકડા દેશ માટે લિઓનલ મેસીની ટીમ સામે રમવું એ પોતે જ એક ઐતિહાસિક ક્ષણ હશે.
26/06/26 ડબ્લિનમાં રમાયેલી T20 મેચમાં આયર્લેન્ડે ભારતને 34 રને હરાવી પ્રથમવાર ઐતિહાસિક વિજય મેળવ્યો. આયર્લેન્ડે ટકરના 50 અને ડેલાનીના 49 રનથી 182 રન બનાવ્યા, જેની સામે હર્ષિત રાણાએ 3 વિકેટ ઝડપી. ભારતીય ટીમ અભિષેકના 49 રન છતાં 148 રનમાં ઓલઆઉટ થઈ, મેટ હોલાર્ડે 3 વિકેટ લીધી હતી.
IND vs IRE T20 Match Record : ડબ્લિનમાં રમાયેલી ટી-20 મેચમાં ભારતનો આયર્લેન્ડ સામે પહેલીવાર પરાજય થયો છે. આયર્લેન્ડે ટીમ ઈન્ડિયાને 34 રને હાર આપી શાનદાર જીત મેળવી છે. પહેલા બેટિંગ કરતાં આયર્લેન્ડે લોર્કન ટકરની અડધી સદી (50 રન) અને ગેરેથ ડેલાનીની આક્રમક ઇનિંગ (49 રન) ના સહારે 20 ઓવરમાં 9 વિકેટે 182 રન બનાવ્યા હતા, જેની સામે ભારત તરફથી હર્ષિત રાણાએ સૌથી વધુ 3 વિકેટ ઝડપી હતી. જવાબમાં ભારત તરફથી અભિષેક શર્માએ 49 રનની તોફાની ઇનિંગ રમી હોવા છતાં, મેટ હોલાર્ડની 3 વિકેટની ઘાતક બોલિંગ સામે ભારતની ટીમ 18.5 ઓવરમાં 148 રનમાં ઓલઆઉટ થઈ ગઈ હતી અને લક્ષ્ય સુધી પહોંચી શકી નહોતી.
આયર્લેન્ડ તરફથી કેપ્ટન લોર્કન ટકરે 36 બોલમાં 5 ફોર અને 2 સિક્સરની મદદથી 50 રનની અડધી સદી ફટકારી હતી. ગેરેથ ડેલાનીએ 32 બોલમાં 3 ફોર અને 3 સિક્સરની મદદથી 49 રનની આક્રમક ઇનિંગ રમી હતી. જ્યોર્જ ડોકરેલે 10 બોલમાં 2 ફોર અને 1 સિક્સર સાથે 19 રન બનાવ્યા હતા. ટિમ ટેક્ટરે 12 બોલમાં 2 ફોર અને 1 સિક્સરની મદદથી 17 રન નોંધાવ્યા હતા. બેન કેલિટ્ઝે 11 બોલમાં 2 સિક્સરની મદદથી 15 રન કર્યા હતા, જ્યારે રોસ અડેરે 7 બોલમાં 2 ફોર સાથે 12 રન બનાવ્યા હતા. લિયમ મેકકાર્થીએ 5 બોલમાં 1 ફોર સાથે 7 રન નોંધાવ્યા હતા.
ભારત તરફથી હર્ષિત રાણાએ સૌથી વધુ 3 વિકેટ ઝડપી હતી. તેણે 4 ઓવરમાં 24 રન આપીને 3 વિકેટ લીધી હતી. અર્શદીપ સિંહે 4 ઓવરમાં 28 રન આપી 2 વિકેટ ઝડપી હતી. અક્ષર પટેલે 4 ઓવરમાં 33 રન આપીને 2 વિકેટ મેળવી હતી, જ્યારે શિવમ દુબેએ 3 ઓવરમાં 18 રન આપી 1 વિકેટ લીધી હતી. પ્રસિદ્ધ કૃષ્ણાએ 4 ઓવરમાં 57 રન આપ્યા છતાં તેને કોઈ વિકેટ મળી નહોતી. વોશિંગ્ટન સુંદરને 1 ઓવરમાં 19 રન પડ્યા હતા અને તે પણ વિકેટ મેળવી શક્યો નહોતો.
ભારત તરફથી અભિષેક શર્માએ સૌથી વધુ 49 રન બનાવ્યા હતા. તેણે માત્ર 20 બોલમાં 7 ફોર અને 2 સિક્સરની મદદથી આક્રમક ઇનિંગ રમી હતી. શિવમ દુબેએ 14 બોલમાં 1 ફોર અને 2 સિક્સરની મદદથી 25 રન નોંધાવ્યા હતા. તિલક વર્માએ 21 બોલમાં 3 ફોર સાથે 19 રન બનાવ્યા હતા. અક્ષર પટેલે 16 બોલમાં 1 ફોર સાથે 15 રન કર્યા હતા. વોશિંગ્ટન સુંદર 12 બોલમાં 9 રન, હર્ષિત રાણા 9 બોલમાં 1 સિક્સર સાથે 8 રન અને સંજુ સેમસને 4 બોલમાં 1 ફોર સાથે 5 રન બનાવ્યા હતા. અર્શદીપ સિંહ 2 અને પ્રસિદ્ધ કૃષ્ણા 1 રન સાથે અણનમ રહ્યા હતા.
આયર્લેન્ડ તરફથી મેટ હોલાર્ડ સૌથી સફળ બોલર રહ્યો હતો. તેણે 4 ઓવરમાં 28 રન આપીને 3 વિકેટ ઝડપી હતી. મેથ્યૂ હમ્ફ્રીઝે 3.3 ઓવરમાં 38 રન આપી 2 વિકેટ લીધી હતી, જ્યારે જય મૂન્દ્રાએ 4 ઓવરમાં 25 રન આપી 2 વિકેટ મેળવી હતી. લિયમ મેકકાર્થીએ 3 ઓવરમાં 29 રન આપી 1 વિકેટ ઝડપી હતી. ગેરેથ ડેલાનીએ 1 ઓવરમાં માત્ર 3 રન આપી 1 વિકેટ લીધી હતી. હેરી ટેક્ટરે 3 ઓવરમાં 22 રન આપ્યા હતા, પરંતુ તેને કોઈ વિકેટ મળી નહોતી.
અમદાવાદના નરેન્દ્ર મોદી સ્ટેડિયમમાં રમાયેલી IPL 2026ની ફાઈનલ મેચમાં રોયલ ચેલેન્જર્સ બેંગ્લોરે પ્રભાવશાળી દેખાવ કરતાં ગુજરાત ટાઈટન્સને 5 વિકેટે હરાવ્યું, આ સાથે જ RCBએ વર્ષ 2025 બાદ 2026માં પણ IPL ટાઈટલ પોતાને નામ કર્યું, મહત્વનું છે કે ટોસ જીતીને પ્રથમ બોલિંગ કરતાં રોયલ ચેલેન્જર્સ બેંગ્લોરે ગુજરાત ટાઈટન્સને 155 રન પર રોકી દીધું હતું, જે બાદ RCBએ 156 રનનો ટાર્ગેટ આસાનીથી ચેઝ કરી લીધો અને બીજી વાર IPL ચેમ્પિયન બનવાનું ગૌરવ મેળવ્યું.
વર્ષ 2025માં ટાઇટલ જીત્યા બાદ 2025માં પણ એજ અમદાવાદના મેદાનમાં ટ્રોફી પોતાના નામે કરીને રોયલ ચેલેન્જર્સ બેંગલુરુએ સતત બે વાર ચેમ્પિયન બનવાનો અદભુત રેકોર્ડ સ્થાપ્યો. આ ઐતિહાસિક સિદ્ધિ મેળવીને RCB હવે ચેન્નાઈ સુપર કિંગ્સ અને મુંબઈ ઈન્ડિયન્સ જેવી દિગ્ગજ ટીમોની ખાસ ક્લબમાં સામેલ થઈ ગઈ, જેમણે અગાઉ 2010-11 અને 2019-20માં બેક-ટુ-બેક ટાઇટલ જીતવાનો રેકોર્ડ બનાવ્યો હતો.
IPL 2026 ફાઈનલ મેચ અપડેટ્સ
વિરાટ કોહલી (Virat Kohli): તેઓ ફાઈનલ મેચમાં ‘પ્લેયર ઓફ ધ મેચ’ (Player of the Match) બન્યા.
કાગીસો રબાડા (Kagiso Rabada): સીઝનમાં સૌથી વધુ 29 વિકેટ ઝડપવા બદલ તેને ‘પર્પલ કેપ’ (Purple Cap) મળી છે.
પંજાબ કિંગ્સ (Punjab Kings): આ ટીમને ‘ફેરપ્લે એવોર્ડ’ (Fairplay Award) મળ્યો છે.
મનીષ પાંડે (Manish Pandey): બેકવર્ડ પોઇન્ટ પર ટિમ ડેવિડનો શાનદાર કેચ પકડવા બદલ તેને ‘કેચ ઓફ ધ સીઝન’ (Catch of the Season) નો એવોર્ડ મળ્યો છે.
મોહમ્મદ સિરાજ (Mohammed Siraj): આ સીઝનમાં સૌથી વધુ 172 ડોટ બોલ ફેંકવા બદલ તેને ખાસ એવોર્ડ મળ્યો છે.
સાઈ સુદર્શન (Sai Sudharsan): આ સીઝનમાં સૌથી વધુ 75 ચોગ્ગા (fours) મારવા બદલ તેને એવોર્ડ મળ્યો છે.
વૈભવ સૂર્યવંશી (Vaibhav Sooryavanshi)ની સિદ્ધિઓ
-તે આખી સીઝનનો ‘મોસ્ટ વેલ્યુએબલ પ્લેયર’ (MVP) બન્યો છે. -તેને સીઝનમાં સૌથી વધુ 776 રન બનાવવા બદલ ‘ઓરેન્જ કેપ’ (Orange Cap) મળી છે. -તેને ‘ઇમર્જિંગ પ્લેયર ઓફ ધ સીઝન’, ‘સુપર સ્ટ્રાઇકર ઓફ ધ સીઝન’ (સ્ટ્રાઇક રેટ: 237.3) અને સૌથી વધુ 72 સિક્સર મારવા બદલ ‘સુપર સિક્સિસ ઓફ ધ સીઝન’ ના એવોર્ડ પણ મળ્યા છે.
સતત IPL ટાઇટલ જીતનાર ટીમો
CSK – 2010 અને 2011
MI – 2019 અને 2020
RCB – 2025 અને 2026
એકથી વધુ વખત IPL ટાઇટલ જીતનાર
5 – MI
5 – CSK
3 – KKR
2 – RCB
એક જ મેદાન પર બે IPL ફાઇનલ જીતનાર
MI – કોલકાતા (2013, 2015)
MI – હૈદરાબાદ (2017, 2019)
KKR – ચેન્નઈ (2012, 2024)
RCB – અમદાવાદ (2025, 2026)
2011માં વર્તમાન પ્લેઓફ ફોર્મેટની શરૂઆત થઈ ત્યારથી અત્યાર સુધીની 16 IPL ફાઇનલમાંથી 13 વખત Qualifier 1ની વિજેતા ટીમ ફાઇનલ જીતી છે, જેમાં છેલ્લી સતત 9 ફાઇનલનો પણ સમાવેશ થાય છે.
IPL 2026 ટૂંકમાં…..
ક સીઝનમાં સૌથી વધુ રન: 27450
એક સીઝનમાં સૌથી વધુ રન/વિકેટ (એવરેજ): 31.26
એક સીઝનમાં સૌથી ઊંચો RPO (રન રેટ): 9.88
એક સીઝનમાં સૌથી વધુ ચોગ્ગા: 2332
એક સીઝનમાં સૌથી વધુ છગ્ગા: 1426
સૌથી વધુ વ્યક્તિગત સદી: 15
200-પ્લસના સૌથી વધુ ટોટલ: 65
200-પ્લસના સૌથી વધુ સફળ ચેઝ: 17
CSK, MI બાદ RCBનું ખાસ યાદીમાં સ્થાન
રોયલ ચેલેન્જર્સ બેંગલુરુએ IPL 2026નો ખિતાબ જીતી લીધો છે. RCB સતત બીજી વખત ચેમ્પિયન બન્યું છે. ફાઇનલ મેચમાં આરસીબીએ ગુજરાત ટાઇટન્સને 5 વિકેટે કચડી નાખ્યું. ગુજરાતની ટીમે પ્રથમ બેટિંગ કરતા 155 રન બનાવ્યા હતા, જેના જવાબમાં RCBએ 18મી ઓવરમાં જ લક્ષ્ય હાંસલ કરીને ઇતિહાસ રચી દીધો. વિરાટ કોહલીએ અણનમ 75 રનની ઇનિંગ રમી હતી.
IPLના ઇતિહાસમાં RCB એવી માત્ર ત્રીજી ટીમ બની ગઈ છે, જેણે સતત 2 સીઝન આઈપીએલની ટ્રોફી જીતી હોય. ચેન્નાઈ સુપર કિંગ્સે 2010-2011 અને ત્યારબાદ મુંબઈ ઈન્ડિયન્સે 2019-2020માં સતત 2 વખત ચેમ્પિયન બનવાનું ગૌરવ મેળવ્યું હતું. હવે બેંગલુરુએ 2025 પછી 2026નો ખિતાબ પણ જીતીને આ ખાસ યાદીમાં પોતાનું સ્થાન બનાવી લીધું છે.
પાંચમી વિકેટ: 14મી ઓવરના છેલ્લા બોલ પર 132 રનના સ્કોર પર RCBની પાંચમી વિકેટ પડી. અરશદ ખાને ટીમ ડેવિડ 17 બોલમાં 24 રન બનાવીને આઉટ કર્યો
કોહલીની શાનદાર ફિફ્ટી: વિરાટ કોહલીએ ફાઈનલમાં વિરાટ ઈનિંગ રમતા 25 બોલમાં 52 રન ફટકાર્યા, આ સાથે વિરાટે આઈપીએલ ઈતિહાસના પોતાના રેકોર્ડમાં સૌથી ઝડપી પચાસ રન કર્યા, આ પહેલા 26 બોલમાં ફિફ્ટીનો રેકોર્ડ હતો.
ત્રીજી અને ચોથી વિકેટ: રાશિદ ખાને પોતાની પહેલી જ ઓવરમાં બે વિકેટ ઝડપી, પહેલા રજત પાટીદારને 15 રને બાદમાં કૃણાલ પંડયાને 1 રને આઉટ કર્યો
બીજી વિકેટ: છઠ્ઠી ઓવરમાં સિરાજ પછી કગિસો રબાડાએ RCBને બીજો ઝટકો આપ્યો. દેવદત્ત પડિક્કલ ચાર બોલમાં એક રન બનાવીને આઉટ થયો. આ સાથે જ હવે પર્પલ કેપ રબાડાના નામે થઈ ગઈ છે. આ તેની 29મી વિકેટ હતી. પાવર પ્લેમાં 6 ઓવર પછી RCBનો સ્કોર 2 વિકેટે 70 રન છે.
RCB તરફથી ઓપનિંગમાં ઉતરેલા કોહલીએ વેંકટેશ ઐયરે તરખાટ મચાવ્યો, કાગિસો રબાડાની પહેલી જ ઓવર ખૂબ મોંઘી સાબિત થઈ. વેંકટેશ અય્યરે તેમની ઓવરમાં 18 રન ફટકાર્યા. 3 ચોગ્ગા અને એક છગ્ગો લગાવ્યો. તે ખેલાડી ઈજાગ્રસ્ત છે, તેમ છતાં તે ચોગ્ગા-છગ્ગામાં જ વાત કરી રહ્યો છે, બીજી તરફ રબાડાની બીજી ઓવરમાં કોહલીએ ચાર બોલમાં 4,4,6,4 રન ફટકારી ઓવરમાં 19 રન લીધા.
ગુજરાતના 20 ઓવરમાં 155 રન
ફાઈનલમાં ગુજરાત ટાઈટન્સના બેટરો કોઈ કાઠું કાઢી શક્યા નહીં, હોમ ગ્રાઉન્ડ મોદી સ્ટેડિયમમાં ગુજરાતની ટીમ માત્ર 20 ઓવરમાં 155 રન જ બનાવી શકી, સુંદરે 37 બોલમાં અણનમ 50 રન બનાવ્યા, જ્યારે ગિલ 10 રન, સાઈ 12 રન તો બટલરે માત્ર 19 રન બનાવ્યા, RCB માટે રાસીખ સલામ ડારે ત્રણ વિકેટ તો ભુવનેશ્વર કુમાર અને હેઝલવૂડે બે-બે વિકેટ ચટકાવી.
સાતમી અને આઠમી વિકેટ: હોલ્ડર અને રાશિદ ખાન 7-7 રન બનાવીને થયા આઉટ, ગુજરાતનો સ્કોર 150ને પાર
છઠ્ઠી વિકેટ: 17મી ઓવરમાં 115 રનના સ્કોર પર ગુજરાત ટાઇટન્સની છઠ્ઠી વિકેટ પડી. રાહુલ તેવતિયા પાંચ બોલમાં સાત રન બનાવીને આઉટ થયો. રાસિખ સલામ ડાર આઉટ કર્યો.
પાંચમી વિકેટ: 15મી ઓવરમાં 99 રનના કુલ સ્કોર પર ગુજરાત ટાઇટન્સની પાંચમી વિકેટ પડી. અરશદ ખાન 6 બોલમાં 15 રન બનાવીને આઉટ થયો. જોશ હેઝલવુડે આઉટ કર્યો.
ચોથી વિકેટ: મોટા મેચના પ્લેયર કૃણાલ પંડ્યાએ ક્રીઝ છોડીને આગળ વધી રહેલા જોસ બટલરને પારખી જઈને ફાસ્ટ વાઈડ યોર્કર ફેંક્યો હતો, જેમાં બટલર થાપ ખાઈ ગયો અને જીતેશ શર્માએ તેને સ્ટમ્પ આઉટ કર્યો હતો. GT માટે સેટ થઈ ચૂકેલા બટલરની 19 રને વિકેટ ઝડપીને કૃણાલે મેચનો સૌથી મોટો ટર્નિંગ પોઈન્ટ અપાવ્યો.
રાઉન્ડ 1, બેંગલુરુ, 24મી એપ્રિલ: સાઈ સુદર્શનની શાનદાર સદી પર વિરાટ કોહલી અને દેવદત્ત પડિક્કલની તોફાની અડધી સદીઓ ભારે પડી હતી, જેના કારણે RCBએ GTના 205 રનના ટાર્ગેટને આસાનીથી ચેઝ કરી લીધો હતો.
રાઉન્ડ 2, અમદાવાદ, 30મી એપ્રિલ: બે વિકેટ અને ત્રણ કેચ સાથે જેસન હોલ્ડર મેદાન પર બધી જ જગ્યાએ છવાયેલો જોવા મળ્યો હતો. GTએ RCBને માત્ર 155 રનમાં ઓલઆઉટ કરી દીધું હતું અને ત્યારબાદ 16 ઓવર કરતાં પણ ઓછા સમયમાં આ ટાર્ગેટ ચેઝ કરી લીધો હતો.
રાઉન્ડ 3 (ક્વોલિફાયર 1), ધર્મશાલા, 26મી મે: રજત પાટીદારની શાનદાર અણનમ 93 રનની ઇનિંગના દમ પર RCBએ IPL પ્લેઓફ મેચનો અત્યાર સુધીનો સૌથી મોટો સ્કોર (254 રન) બનાવ્યો હતો. ત્યારબાદ પાવરપ્લેમાં જ GTની ટોપ-થ્રી વિકેટો ઝડપીને RCBએ 92 રનથી શાનદાર જીત નોંધાવી હતી.
Before Match
રોયલ ચેલેન્જર્સ બેંગલુરુ અને ગુજરાત ટાઇટન્સ વચ્ચે હેડ ટુ હેડ (આમને-સામને) મુકાબલામાં કેપ્ટન રજત પાટીદારની ટીમ 5-4ની લીડ ધરાવે છે. અમદાવાદના નરેન્દ્ર મોદી સ્ટેડિયમમાં આ આંકડો 1-1ની બરાબરી પર છે. આ સીઝનમાં ગુજરાતે આ જ મેદાન પર RCBને હરાવ્યું હતું. પોતાના ઘરઆંગણે ગુજરાતનો રેકોર્ડ શાનદાર રહ્યો છે. IPL 2026માં અહીં ગુજરાત ટાઇટન્સે સાતમાંથી પાંચ મેચ જીતી છે.
Before Match
RCB અને ગુજરાત વચ્ચે એક હાઈ-સ્કોરિંગ અને રોમાંચક મેચ જોવા મળી શકે છે. ટોસ જીતનારી ટીમ પહેલા બેટિંગ કરવાનો નિર્ણય લઈ શકે છે. બંને ટીમના ખેલાડીઓ સારા ફોર્મમાં છે પરંતુ તો પણ રોયલ ચેલેન્જર્સ બેંગલુરુ મજબૂત ટીમ દેખાઈ રહી છે, પરંતુ આ મેદાન પર રમાયેલી છેલ્લી મેચમાં તેમને ગુજરાત સામે હારનો સામનો કરવો પડ્યો હતો. આ મેચ મિક્સ સોઈલ (મિશ્રિત માટી)ની પિચ પર રમાવાની છે. પિચ પર સારો બાઉન્સ રહેશે, તેથી ફાસ્ટ બોલરો પ્રભુત્વ મેળવી શકે છે.
આ ફાઇનલ અમદાવાદની #6 પીચ પર રમાશે. આ પીચ પર સરેરાશ સ્કોર 199 રહ્યો છે. ખાસ વાત એ છે કે આ સીઝનમાં આ પીચ પર રમાયેલી બંને મેચમાં ચેઝ કરનારી ટીમો વિજેતા બની છે. જોકે, બેટિંગ ફર્સ્ટ કરનાર ટીમોનો એકંદરે રેકોર્ડ અહીં મજબૂત રહ્યો છે. મે મહિનામાં આ પીચનો ઉપયોગ ન થયો હોવાથી ઝડપી બોલરો માટે મદદરૂપ સાબિત થઈ શકે છે.
RCB અને GT બંને સીઝનની શ્રેષ્ઠ એટેક ધરાવતી ટીમો છે. પાવરપ્લેમાં બંને ટીમોએ 33-33 વિકેટ ઝડપી છે. બેટરો પણ હવે સ્થિર ઊભા રહેવાને બદલે ક્રિઝ પર સતત ફૂટવર્ક કરી રહ્યા છે.
ટોસ અને બાઉન્ડ્રીનું ગણિત
ફાઈનલના ઈતિહાસમાં 10 વખત પહેલા બેટિંગ કરનાર અને 8 વખત ચેઝ કરનાર ટીમ જીતી છે. તેનો અર્થ એ કે કોઈ પણ એક પક્ષી વ્યૂહનીતિ પર નિર્ભર રહેવું જોખમી છે. બંને ટીમોએ પહેલા બેટિંગ કે બોલિંગ, બંનેમાં પરિસ્થિતિ મુજબ એક્ઝિક્યુશન કરવું પડશે. આંકડા મુજબ, ચેમ્પિયન ટીમો તેમના 59.6% રન બાઉન્ડ્રી (ચોગ્ગા-છગ્ગા) દ્વારા મેળવે છે. સરેરાશ 184 રનનો સ્કોર હવે ‘પાર’ (Par) સ્કોર ગણાય છે. જે ટીમ વધુ બાઉન્ડ્રી ફટકારે છે, તે દબાણ વગર સ્કોરબોર્ડ પર પ્રેશર જાળવી રાખે છે.
31 મે (રવિવાર) ના રોજ રોયલ ચેલેન્જર્સ બેંગલુરુ (RCB) અને ગુજરાત ટાઇટન્સ (GT) વચ્ચે અમદાવાદના નરેન્દ્ર મોદી સ્ટેડિયમમાં IPL (ઇન્ડિયન પ્રીમિયર લીગ) 2026ની ફાઇનલ મેચ રમાવાની છે.
આખી સીઝનમાં શાનદાર પ્રદર્શન કરનારી આ બંને ટીમો હવે ટ્રોફી જીતવાથી માત્ર એક ડગલું દૂર છે. આરસીબી (RCB) એ ક્વોલિફાયર-1 મેચમાં ગુજરાત ટાઇટન્સને હરાવીને સીધા જ ફાઇનલમાં જગ્યા બનાવી લીધી હતી. તે મેચમાં આરસીબીના કેપ્ટન રજત પાટીદારે ધમાકેદાર બેટિંગ કરતા માત્ર 33 બોલમાં 93 રન બનાવ્યા હતા. બીજી તરફ, ગુજરાત ટાઇટન્સે ક્વોલિફાયર-2 મેચમાં રાજસ્થાન રોયલ્સને હરાવીને ફાઇનલમાં પોતાની જગ્યા પાકી કરી છે.
શુભમન ગિલે રાજસ્થાન રોયલ્સ સામેની મેચમાં શાનદાર સદી ફટકારી હતી. ગિલની આ ઇનિંગ્સમાં 15 ચોગ્ગા અને 3 છગ્ગા સામેલ હતા. આરસીબી (RCB) એ 5મી વખત IPL ફાઇનલમાં પોતાની જગ્યા બનાવી છે, જ્યારે ગુજરાત ટાઇટન્સ IPLમાં ત્રીજી વખત ફાઇનલ રમશે. રજત પાટીદારની કેપ્ટનશીપમાં જ આરસીબીએ 2025માં પોતાની પહેલી IPL ટ્રોફી જીતી હતી. બીજી તરફ, 2022માં ગુજરાત ટાઇટન્સે પોતાની પહેલી જ IPL સીઝનમાં ટ્રોફી પોતાના નામે કરી લીધી હતી.
અમદાવાદના નરેન્દ્ર મોદી સ્ટેડિયમમાં ગુજરાત ટાઇટન્સનો રેકોર્ડ ખૂબ જ શાનદાર છે. આ IPL સીઝનમાં ગુજરાતે પોતાના હોમ ગ્રાઉન્ડ (ઘર આંગણે) પર રમેલી 7માંથી 5 મેચ જીતી છે. આવામાં આરસીબી માટે ફાઇનલનો પડકાર બિલકુલ સરળ નહીં હોય.
વિરાટ કોહલી માટે આ IPL સીઝન પણ દમદાર રહી છે. આ IPL સીઝનમાં વિરાટે 15 મેચમાં 164.38ના સ્ટ્રાઇક રેટથી 600 રન બનાવ્યા છે, જેમાં એક સદી પણ સામેલ છે. બીજી તરફ આરસીબી (RCB) ની બોલિંગની વાત કરીએ તો, ભુવનેશ્વર કુમારે આ સીઝનમાં શાનદાર પ્રદર્શન કર્યું છે. ભુવનેશ્વર કુમારે આ IPL સીઝનની 15 મેચોમાં 26 વિકેટ ઝડપી છે.
ગુજરાત ટાઇટન્સના બંને ઓપનિંગ બેટ્સમેન ખૂબ જ સારા ફોર્મમાં છે. શુભમન ગિલે આ IPL સીઝનની 15 મેચોમાં 163.71ના સ્ટ્રાઇક રેટથી 722 રન બનાવ્યા છે, જ્યારે સાઇ સુદર્શને આ IPL સીઝનની 16 મેચોમાં 159.55ના સ્ટ્રાઇક રેટથી 710 રન કર્યા છે. ગુજરાતની બોલિંગની વાત કરીએ તો, કગિસો રબાડાએ 16 મેચમાં 28 વિકેટ લીધી છે અને તે પર્પલ કેપની રેસમાં સૌથી આગળ છે. આ IPL સીઝનમાં બંને ટીમો 2 વખત સામસામે ટકરાઈ હતી અને બંને વખત આરસીબીએ જ બાજી મારી હતી.
આઈપીએલ-2026માં આજથી રૉયલ ચેલેન્જર્સ બેંગલુરુ અને ગુજરાત ટાઈટન્સ વચ્ચે રમાયેલી પ્લેઓફની મેચમાં ગુજરાતની ટીમનો શરમજનક પરાજય થયો છે. બેંગલુરુની ટીમે 20 ઓવરમાં 5 વિકેટે 254 રન નોંધાવી ગુજરાતને જીતવા માટે 255 રનનો ટાર્ગેટ આપ્યો હતો, જોકે ગુજરાતની ટીમ માત્ર 162 રનમાં ઓલઆઉટ થઈ ગઈ છે. આજની મેચમાં બેંગલુરુના કેપ્ટન રજત પાટીદારે વિસ્ફોટ બેટિંગ કરીને ટીમને મજબૂત સ્કોર સુધી પહોંચાડ્યું હતું, તો જેકોબ ડફ્ફી સહિતના બોલરોએ પણ મહત્ત્વનું યોગદાન આપ્યું છે.
બેંગલુરુ તરફથી કેપ્ટન રજત પાટીદારે વિસ્ફોટક બેટિંગ કરીને માત્ર 33 બોલમાં 5 ચોગ્ગા અને 9 છગ્ગાની મદદથી અણનમ 93 રનની તોફાની ઈનિંગ રમી હતી. ઓપનર વેંકટેશ અય્યરે આક્રમક શરૂઆત કરતા 7 બોલમાં 3 ચોગ્ગા અને 1 છગ્ગા સાથે 19 રન ફટકાર્યા હતા, જ્યારે વિરાટ કોહલીએ 25 બોલનો સામનો કરીને 5 ચોગ્ગા અને 1 છગ્ગાની મદદથી 43 રનનું મહત્વનું યોગદાન આપ્યું હતું. મિડલ ઓર્ડરમાં દેવદત્ત પડિક્કલે 19 બોલમાં 5 ચોગ્ગા સાથે 30 રન બનાવ્યા હતા. ત્યારબાદ ક્રુણાલ પંડ્યાએ પણ શાનદાર બેટિંગ કરતા 28 બોલમાં 5 ચોગ્ગા અને 2 છગ્ગા ફટકારીને 43 રન જોડ્યા હતા. નીચલા ક્રમે ટિમ ડેવિડ 5 બોલમાં 4 રન બનાવી આઉટ થયો હતો, જ્યારે જીતેશ શર્માએ અંતમાં ઝડપી બેટિંગ કરતા માત્ર 5 બોલમાં 1 ચોગ્ગા અને 1 છગ્ગા સાથે અણનમ 15 રન ઝૂડી કાઢ્યા હતા.
ગુજરાત તરફથી તરફથી જેસન હોલ્ડરે 4 ઓવરમાં 39 રન આપીને 2 વિકેટો, જ્યારે કગિસો રબાડાએ 4 ઓવરમાં 54 રન આપી 2 વિકેટ મેળવી હતી. ફાસ્ટ બોલર પ્રસિદ્ધ ક્રિષ્નાએ 4 ઓવરમાં 53 રન આપીને 1 વિકેટ ઝડપી હતી. જ્યારે મોહમ્મદ સિરાજે 3 ઓવરમાં 46 રન, રાશિદ ખાને 3 ઓવરમાં 29 રન, કુલવંત ખેજરોલિયાએ 2 ઓવરના 31 રન આપ્યા, પરંતુ એકપણ વિકેટ લઈ શક્યા નથી.
ગુજરાત તરફથી જોસ બટલરે સૌથી વધુ આક્રમક બેટિંગ કરતા માત્ર 11 બોલમાં 4 ચોગ્ગા અને 2 છગ્ગાની મદદથી 29 રન ફટકાર્યા હતા. ઓપનર સાઈ સુદર્શને 9 બોલમાં 3 ચોગ્ગા સાથે 14 રન, કેપ્ટન શુભમન ગિલે 7 બોલમાં માત્ર 2 રન, નિશાંત સિંધુ 3 બોલમાં 1 ચોગ્ગા સાથે 5 રન, વોશિંગ્ટન સુંદરે 8 બોલમાં 1 ચોગ્ગા સાથે 8 રન, જેસન હોલ્ડરે શૂન્ય રને, રાશિદ ખાને 9 બોલમાં 1 છગ્ગાની મદદથી 8 રન અને કગિસો રબાડાએ 5 બોલમાં 2 ચોગ્ગા સાથે 9 રન નોંધાવ્યા હતા.
બેંગલુરુ તરફથી જેકબ ડફી સૌથી સફળ બોલર રહ્યો હતો, જેણે ગુજરાત ટાઈટન્સના 3 બેટરોને આઉટ કરીને સૌથી વધુ 3 વિકેટો ઝડપી હતી. યુવા બોલર રસિક સલામે પણ શાનદાર પ્રદર્શન કરતા 2 મહત્વની સફળતા મેળવી હતી. આ સિવાય અનુભવી ફાસ્ટ બોલર ભુવનેશ્વર કુમારે પણ 2 વિકેટ ખેરવી છે. જ્યારે જોશ હેઝલવુડ અને ઓલરાઉન્ડર ક્રુણાલ પંડ્યાએ 1-1 વિકેટ ઝડપી હતી.
26/05/26 આજની ક્વોલિફાયર-1માં બેંગલુરુએ ઈતિહાસ રચી દીધો છે. RCBએ 20 ઓવરમાં 5 વિકેટે 254 રન બનાવી દીધા, જે IPLના ઈતિહાસમાં પ્લેઓફમાં સૌથી મોટો સ્કોર છે.
254/5 – RCB vs GT (ધર્મશાલા, 2026) 233/3 – GT vs MI (અમદાવાદ, 2023) 228/5 – MI vs GT (ન્યુ ચંદીગઢ, 2025) 226/6 – PBKS vs CSK (વાનખેડે, 2014) 222/5 – CSK vs DC (ચેન્નઈ, 2012) કોહલીએ તોડ્યો વિરાટનો રેકોર્ડ
ઈન્ડિયન પ્રીમિયર લીગ (IPL)માં રોયલ ચેલેન્જર્સ બેંગલુરુના સ્ટાર બેટર વિરાટ કોહલીએ વધુ એક મોટો આંકડો પાર કરીને નવો ઈતિહાસ રચી દીધો છે. આઈપીએલના ઈતિહાસમાં સૌથી વધુ મેચ રમનારા ખેલાડીઓની યાદીમાં વિરાટ કોહલી 282 મેચો સાથે હવે ટોચના સ્થાને પહોંચી ગયો છે, જેમાં તેણે વર્ષ 2008 થી 2026 દરમિયાન 40.09 ની શાનદાર એવરેજથી રેકોર્ડબ્રેક 9261 રન ફટકાર્યા છે અને તેના નામે 9 સદી પણ નોંધાયેલી છે. કોહલીએ મુંબઈ ઇન્ડિયન્સના પૂર્વ કેપ્ટન રોહિત શર્માને પાછળ છોડી દીધો છે, જે 281 મેચોમાં 7329 રન સાથે આ યાદીમાં બીજા ક્રમે છે. આ યાદીમાં ચેન્નાઈ સુપર કિંગ્સના પૂર્વ દિગ્ગજ કેપ્ટન એમ.એસ. ધોની 278 મેચ અને 5439 રન સાથે ત્રીજા સ્થાને છે, જેમની આઈપીએલ સફર વર્ષ 2025 સુધી રહી હતી. જ્યારે સ્ટાર ઓલરાઉન્ડર રવિન્દ્ર જાડેજા 266 મેચોમાં 3469 રન અને 178 વિકેટ સાથે ચોથા સ્થાને અને વર્ષ 2024 સુધી આઈપીએલ રમનારો દિનેશ કાર્તિક 257 મેચમાં 4842 રન સાથે પાંચમા સ્થાને છે.
IPL-2026ની ક્વોલિફાયર-1માં આજે રોયલ ચેલેન્જર્સ બેંગલુરુ (RCB) સામે ગુજરાત ટાઈટન્સ (GT)ની હાર થયા બાદ હવે ગુજરાતની ટીમે ફાઈનલમાં પહોંચવા માટે વધુ એક મેચ રમવી પડશે. આઈપીએલના નિયમ મુજબ, ક્વોલિફાયર-1 હારેલી ગુજરાતની ટીમે હવે 29 મેના રોજ ક્વોલિફાયર-2 મેચ રમવી પડશે.
ક્વોલિફાયર-1 પછી 27 મેએ એલિમિનેટર મેચ રમાવાની છે, જેમાં સનરાઈઝર્સ હૈદરાબાદ અને રાજસ્થાન રોયલ્સ વચ્ચે મુકાબલો થશે. આમાંથી જે ટીમ હારશે તે બહાર ફેંકાઈ જશે અને જે જીતશે તેને ક્વોલિફાયર-2માં રમવાની તક મળશે. એટલે કે તે ટીમ ગુજરાત ટાઈટન્સ સામે રમશે.
31 મેએ ફાઈનલ મેચ
ક્વોલિફાયર-1 મેચ જીતનારી રોયલ ચેલેન્જર્સ બેંગલુરુ ફાઈનલમાં પહોંચી ગઈ છે. આ મેચ 31 મેના રોજ અમદાવાદના નરેન્દ્ર મોદી સ્ટેડિયમમાં રમાવાની છે.
IPL 2026 Playoff, PBKS vs RCB : ડિફેન્ડિંગ ચેમ્પિયન રોયલ ચેલેન્જર્સ બેંગલુરુ (RCB) આઈપીએલ 2026ના પ્લેઑફમાં જગ્યા બનાવનારી પ્રથમ ટીમ બની ગઈ છે. રવિવારે ધર્મશાલામાં રમાયેલા રોમાંચક મુકાબલામાં આરસીબીએ પંજાબ કિંગ્સને 23 રનથી હરાવીને ટોપ-4 માં પોતાનું સ્થાન પાકું કરી લીધું છે. આઈપીએલ 2026માં અત્યાર સુધી 13માંથી 9 મેચ જીત્યા બાદ બેંગલુરુએ પ્લેઑફની ટિકિટ મેળવી લીધી છે. ગ્રુપ સ્ટેજમાં બેંગલુરુની છેલ્લી મેચ સનરાઈઝર્સ હૈદરાબાદ સામે રમાશે.
બીજી તરફ, સતત 6 હાર બાદ પંજાબ કિંગ્સની મુશ્કેલીઓ વધી ગઈ છે. પંજાબ કિંગ્સ તેની છેલ્લી મેચ જીતીને પણ ગ્રુપ સ્ટેજમાં માત્ર 15 પોઈન્ટ સુધી જ પહોંચી શકશે. પંજાબ કિંગ્સની આ હારથી ભલે કેપ્ટન શ્રેયસ અય્યરની ચિંતા વધી હોય, પરંતુ આ પરિણામથી બીજી બે ટીમોને જબરદસ્ત ફાયદો થયો છે.
બેંગલુરુ સામે પંજાબની હાર થતાં ચેન્નાઈ સુપર કિંગ્સ (CSK) અને રાજસ્થાન રોયલ્સ (RR) માટે પ્લેઑફમાં પહોંચવાની તક વધી ગઈ છે. આ પરિણામથી ખાસ કરીને ચેન્નાઈને મોટો ફાયદો થયો છે. ચેન્નાઈના ખાતામાં હાલમાં 12 પોઈન્ટ છે અને તેની બાકી બચેલી બંને મેચ જીતીને તે 16 પોઈન્ટ સુધી પહોંચી શકે છે. પંજાબ છેલ્લી મેચ જીતીને પણ મહત્તમ 15 પોઈન્ટ સુધી જ પહોંચી શકતી હોવાથી હવે ટોપ-4ની રેસમાં પંજાબ પાછળ ધકેલાઈ ગયું છે અને ચેન્નાઈ સુપર કિંગ્સને નવી લાઈફ લાઈન મળી ગઈ છે.
પ્લેઑફની રેસમાં અત્યાર સુધીના સમિકરણ મુજબ, મુંબઈ ઈન્ડિયન્સ અને લખનૌ સુપર જાયન્ટ્સ સત્તાવાર રીતે બહાર થઈ ગઈ છે. દિલ્હી કેપિટલ્સ અને કોલકાતા નાઈટ રાઈડર્સની આશા હજુ જીવંત છે, પરંતુ તેમને આગળ વધવા માટે કોઈ ચમત્કારની જરૂર છે. આવી સ્થિતિમાં પ્લેઑફની બાકી બચેલી 3 સીટો માટે હવે સનરાઈઝર્સ હૈદરાબાદ, ગુજરાત ટાઈટન્સ, રાજસ્થાન રોયલ્સ, પંજાબ કિંગ્સ અને ચેન્નાઈ સુપર કિંગ્સ એમ 5 ટીમો વચ્ચે કાંટાની ટક્કર છે. હાલના તબક્કે બેંગલુરુ સાથે સનરાઈઝર્સ હૈદરાબાદ, ગુજરાત ટાઈટન્સ અને રાજસ્થાન રોયલ્સ પ્લેઑફની રેસમાં આગળ ચાલી રહ્યા છે. આઈપીએલ 2026માં આગામી બે-ત્રણ દિવસ ખૂબ જ રોમાંચક રહેશે અને દરેક મેચના પરિણામ સાથે પ્લેઑફનું સમીકરણ સતત બદલાતું જોવા મળશે.
આઈપીએલ 2026નો 35મો મુકાબલો શનિવારે દિલ્હી કેપિટલ્સ અને પંજાબ કિંગ્સ વચ્ચે રમાયો હતો. આ મુકાબલામાં પંજાબની ટીમે ઈતિહાસ રચતા આઈપીએલ ઈતિહાસનો સૌથી મોટો રન ચેઝ કર્યો હતો. દિલ્હીએ પહેલા બેટિંગ કરતા કેએલ રાહુલની સદીના દમ પર 264 રન બનાવ્યા હતા. પરંતુ પંજાબે આ મેચ એક ઓવર બાકી હતી ત્યારે જ જીતી લીધી હતી. આ મુકાબલો નવી દિલ્હીના અરુણ જેટલી સ્ટેડિયમમાં રમાયો હતો, જ્યાં ટોસ જીતીને દિલ્હીની ટીમે પહેલા બેટિંગ કરવાનો નિર્ણય લીધો હતો. કેએલ રાહુલની તોફાની 152 રનની ઈનિંગના દમ પર દિલ્હીએ 264 રન બનાવ્યા હતા, પરંતુ પંજાબે તેને પણ ચેઝ કરી લીધો હતો.
265 રનના લક્ષ્યનો પીછો કરવા ઉતરેલી પંજાબની શરૂઆત ખૂબ જ શાનદાર રહી હતી. પ્રિયાંશ આર્ય અને પ્રભસિમરન સિંહે તાબડતોડ બેટિંગ કરી હતી. 7મી ઓવરમાં જ્યારે પ્રિયાંશની વિકેટ પડી ત્યારે પંજાબનો સ્કોર 126 રન થઈ ગયો હતો. પ્રિયાંશએ 17 બોલમાં 43 રન બનાવ્યા હતા. બીજી તરફ પ્રભસિમરનનું તોફાન ચાલુ રહ્યું હતું. ત્યારબાદ 8મી ઓવરમાં પ્રભસિમરન સિંહ પોતાની વિકેટ ગુમાવી બેઠા હતા. પ્રભસિમરન સિંહના બેટથી 26 બોલમાં 76 રન આવ્યા હતા. પોતાની ઈનિંગમાં પ્રભસિમરન સિંહે 9 ચોગ્ગા અને 5 છગ્ગા ફટકાર્યા હતા.
ત્યારબાદ નેહાલ વઢેરા અને શ્રેયસ અય્યર વચ્ચે 56 રનની સારી ભાગીદારી થઈ હતી. પરંતુ 15મી ઓવરમાં નેહાલ પોતાની વિકેટ ગુમાવી બેઠા હતા, તેમણે 15 બોલમાં 25 રન બનાવ્યા હતા. ત્યારબાદ શ્રેયસ અય્યરે મોરચો સંભાળ્યો અને 36 બોલમાં અણનમ 71 રનની ઈનિંગ રમી હતી. પોતાની ઈનિંગમાં અય્યરે 7 છગ્ગા અને 3 ચોગ્ગા લગાવ્યા હતા. જેના દમ પર પંજાબે આ મેચ 7 બોલ બાકી હતા ત્યારે જ જીતી લીધી હતી. પંજાબ આ ટુર્નામેન્ટમાં અજેય રહી છે અને પોઈન્ટ ટેબલમાં ટોપ પર છે.
દિલ્હીની બેટિંગમાં કેએલ રાહુલનું તોફાન
પહેલા બેટિંગ કરવા ઉતરેલી દિલ્હી માટે ઈનિંગની શરૂઆત કેએલ રાહુલ અને પથુમ નિસાંકાએ કરી હતી. પરંતુ આ મેચમાં પણ નિસાંકા ફ્લોપ રહ્યો અને માત્ર 11 રન બનાવીને આઉટ થઈ ગયો હતો. જોકે, ત્યારબાદ કેએલ રાહુલ અને નીતીશ રાણાએ તોફાની બેટિંગ કરી હતી. બંનેએ છગ્ગા-ચોગ્ગાનો વરસાદ કર્યો હતો. કેએલ રાહુલે 15મી ઓવરમાં માત્ર 47 બોલમાં સદી ફટકારી હતી.
નીતીશ રાણા અને કેએલ રાહુલ વચ્ચે 95 બોલમાં 220 રનની ભાગીદારી થઈ હતી. રાણાએ 44 બોલમાં 91 રન બનાવ્યા હતા. પોતાની ઈનિંગમાં નીતીશ રાણાએ 11 ચોગ્ગા અને 4 છગ્ગા ફટકાર્યા હતા. પરંતુ કેએલ રાહુલ એક છેડે ટકી રહ્યો હતો. કેએલ રાહુલે 67 બોલમાં અણનમ 152 રનની ઈનિંગ રમી હતી, જેના દમ પર દિલ્હીએ 20 ઓવરમાં 2 વિકેટ ગુમાવીને 264 રન બનાવ્યા હતા. પોતાની ઈનિંગમાં કેએલ રાહુલે 16 ચોગ્ગા અને 9 છગ્ગા ઝીંક્યા હતા.
આઈપીએલ-2026માં આજે દિલ્હી કેપિટલ્સ અને પંજાબ કિંગ્સ વચ્ચે રમાયેલી મેચમાં ઈતિહાસ રચાવાની સાથે અનેક રેકોર્ડ સર્જાયા છે. દિલ્હીએ 20 ઓવરમાં બે વિકેટે 264 રન નોંધાવ્યા હતા, જે આ આઈપીએલ સિઝનનો સૌથી મોટો સ્કોર હતો, ત્યારે પંજાબે આ સ્કોર ચેજ કરીને રેકોર્ડ નોંધાવ્યો છે. પંજાબે 18.5 ઓવરમાં પાંચ વિકેટે 265 રન કરીને ભવ્ય વિજય મેળવ્યો છે. સૌથી મહત્ત્વની વાત એ છે કે, દિલ્હી કેપિટલ્સનો પોતાનો આઈપીએલના ઈતિહાસમાં સૌથી મોટો સ્કોર હતો.
એક 90 વર્ષ પરંપરા કે જે અપ્રતિમ છે નિષ્પક્ષ નિષ્પક્ષ દરરોજ, વહેલી તકે, એક ગતિશીલ સંપાદકીય ટીમ અને ડિસ્ટ્રીબ્યુટર અને બિઝનેસ એસોસિએટ્સનું એક શક્તિશાળી નેટવર્ક, દરરોજ નવ દાયકા જૂની પરંપરા આપે છે. એવી પરંપરા કે જે વિચારો, માહિતી અને સીધા પત્રકારત્વના એક વિશિષ્ટ સંશ્લેષણ છે. દરેક વાર્તામાં અપ્રતિમ અધિકૃતતા અને તટસ્થતાનો સમાવેશ થાય છે, વાચકોને સૌથી વધુ જાણકાર અને વિશ્લેષણાત્મક સમાચાર કવરેજ સાથે સમર્થન આપવું.
