India : 27 ઓગસ્ટે 76000 પ્લસ નવા કોરોના કેસ

ભારતમાં છેલ્લા બે દિવસોમાં કોરોના વાયરસની મહામારીનું ભયાનક રૂપ જોવા મળી રહ્યું છે. સતત બીજા દિવસે કોવિડના 76 હજારથી વધારે કેસ મળી આવ્યા છે. બુધવારે જ્યાં 76,014 નવા કેસ નોંધાયા હતા, તો ગુરુવારે પણ 76,489 કેસ સામે આવ્યા, જે અત્યાર સુધી એક દિવસમાં નોંધાયેલા હાઈએસ્ટ કેસ છે. આટલું જ નહીં છેલ્લા 24 કલાકમાં વાયરસથી 1081 મોત થયા છે, જે એક દિવસમાં થયેલા મોતનો બીજો સૌથી મોટો આંકડો છે.

આ સાથે જ ઓગસ્ટમાં અત્યાર સુધી 16,86,162 કેસ નોંધાઈ ચૂક્યા છે. આ આંકડો લગભગ તમામ પાછલા મહિનાઓમાં સામે આવેલા કેસની સંખ્યા (16,94,918) બરાબર છે. મહિનામાં કોવિડ-19ના મોતનો આંકડો 25,000ને પાર કરી ગયો છે. જુલાઈમાં 19,122 મોત થયા હતા. છેલ્લા બે દિવસોમાં નવા કેસોમાં વધારાના કારણે મંગળવારથી લગભગ 35,000 સક્રિય કેસોમાં વૃદ્ધિ થઈ છે, જે હાલના દિવસોમાં સૌથી વધારે છે.

એક દિવસમાં ત્રીજો સૌથી મોટો આંકડો
દેશમાં હાલ 7.4 લાખથી વધારે કોરોનાના કેસ એક્ટિવ છે, જ્યારે રિકવરી 25.8 લાખ સુધી પહોંચી છે. દેશમાં નવા નોંધાયેલા કેસનો આંકડો દુનિયામાં એક દિવસમાં સામે આવેલા ત્રીજા સૌથી વધુ કેસ છે. જ્યારે પહેલા બંને નંબર માત્ર અમેરિકાના (25 જુલાઈએ 78,427 અને 17 જુલાઈએ 76,730) કેસનો છે. આ આંકડા ourworldindata.org અનુસાર છે.

ભારતમાં કોરોનાના કેસ 33.8 લાખથી વધારે થઈ ગયા છે, જ્યારે મોતનો આંકડો 61,621 છે. મહારાષ્ટ્રમાં ગુરુવારે સૌથી વધારે 14,718 નવા કેસ સામે આવ્યા છે. જોકે બુધવારે નોંધાયેલા 14,888થી તે ઓછા કહી શકાય. જ્યારે મૃતકોની સંખ્યા 355 રહી. આંધ્ર પ્રદેશમાં 10,000થી વધારે કેસ (10,621) નોંધાયા. જ્યારે કર્ણાટકમાં 9,386 નવા કેસ નોંધાયા. આ પહેલીવાર છે જ્યારે અહીં એક જ દિવસમાં 9000થી વધુ કેસ નોંધાયા હોય. ઉપરાંત રાજ્યમાં 141 મોત થયા.