રાજકોટ જિલ્લા પંચાયતનું રાજકારણ ગરમાયું છે. ગઈકાલે શહેરમાં ભાજપ દ્વારા આયોજિત વિશ્વાસ સંમેલનમાં કોંગ્રેસ સાથે છેડો ફાડીને બાગી જૂથના 12 સભ્યોએ કેસરિયો પહેરતા કોંગ્રેસના ગઢમાં ગાબડું પડયું છે અને ભાજપના સદસ્યોનું સંખ્યા બળ 2માંથી વધીને 14 થઈ ગયું છે. પ્રમુખ-ઉપપ્રમુખ સામે અવિશ્વાસની દરખાસ્ત માટે ભાજપ પાસે ઓછામાં ઓછા 24 સભ્યો હોવા જરૂરી છે ત્યારે ખૂટતા 10 સભ્યોને ખેંચવા માટે શામ – દામ – દંડ – ભેદ તમામ પ્રકારની નીતિ અખત્યાર કરવામાં આવી રહી છે.

12 બાગી સભ્યો ભાજપમાં જોડાતા તેઓની વિરુદ્ધ પક્ષાંતરધારાનો ગાળિયો વધુ મજબૂત થઈ ચૂક્યો છે. ગઈકાલનાં સંમેલનમાં કેટલાક મહિલા સભ્યોને બદલે તેમના પતિઓએ કેસરિયો ખેસ પહેરતાં ક્યાંકને ક્યાંક પક્ષાંતરધારાની છટકબારી શોધવાની પણ વ્યૂહરચના તૈયાર કરવામાં આવી હોવાનું સૂત્રો જણાવે છે. બાગીજૂથ દ્વારા કોંગ્રેસમાં ભાંગફોડનો બીજો તખ્તો ઘડાઈ રહ્યો છે. બીજા રાઉન્ડમાં કોંગ્રેસના કેટલાક મોટા માથાઓ ભાજપમાં જોડાવાના છે જેના માટે મુખ્યમંત્રી વિજયભાઈ રૂપાણીના ઉપસ્થિતિમાં ખાસ સમારોહનું આયોજન પણ કરાઈ રહ્યું છે. બીજા રાઉન્ડમાં સાતેક સભ્યોનો સંપર્ક થઈ રહ્યો છે. જો એ સભ્યો કેસરિયો ધારણ કરશે તો જિલ્લા પંચાયતમાં બીજુ મોટું ભંગાણ પડશે. ગઈકાલે પૂર્વ પ્રમુખ નિલેશ વિરાણીએ જણાવ્યું હતું કે, કુલ 36 સભ્યોમાંથી ભાજપનું સંખ્યાબળ અત્યારે 14 થયું છે. નજીકના ભવિષ્યમાં તે 25 આસપાસ હશે.

દરમિયાન આ મુદ્દે પૂર્વ કારોબારી ચેરમેન અને જિલ્લા પંચાયતના સદસ્ય અર્જુનભાઈ ખાટરિયા જણાવે છે કે, પ્રમુખ – ઉપપ્રમુખ સામે અવિશ્વાસની દરખાસ્ત મૂકવા માટે 36 પૈકી ભાજપ પાસે ઓછામાં ઓછા 24 સભ્યો હોવા જરૂરી છે. આ ઉપરાંત હાલ ચૂંટણી આચારસંહિતના માહોલ છે ત્યારે ચૂંટણી પૂર્ણ ન થાય ત્યાં સુધી આવી કોઈ પણ દરખાસ્ત મૂકી શકાય નહીં. બાગી સભ્યો વિરુદ્ધ તમામ પુરાવા હવે નામોનિર્દેશ વિભાગને આપી દેવામાં આવ્યાં છે. આગામી તા.29ના રોજ અંતિમ નિર્ણય આવી જશે. ખાટરિયાએ વધુમાં જણાવ્યું હતું કે, પંચાયતધારા મુજબ એક વર્ષ તાલુકા પંચાયત, ગ્રામ પંચાયત કે જિલ્લા પંચાયત સરપંચ, તાલુકા પંચાયત કે જિલ્લા પંચાયતના પ્રમુખ સામે એક વર્ષ સુધી અવિશ્વાસની દરખાસ્ત ન મૂકી શકે. વર્તમાન પ્રમુખને હજુ એક વર્ષ પૂર્ણ થયું નથી.