બાંધકામ ઉદ્યોગને ઇન્ડસ્ટ્રીઝનો દરજ્જો જ મળે તો જ કલ્યાણ : ક્રેડાઇ ચેરમેન જસમત વિડીયા

હંગામી કેન્દ્રીય નાણાં મંત્રી પિયુષ ગોયેલએ આજે વચગાળાનું બજેટ જાહેર કરતા બાંધકામ ઉદ્યોગ (રિયલ એસ્ટેટ) સેક્ટરને વેગવંતુ બનાવવા માટે કરેલી જોગવાઇઓ પૈકી ત્રણ મુખ્ય જોગવાઇઓ કરી છે તેમાં નોશનલ રેટની મુક્તિ મર્યાદા એક વર્ષની જગ્યાએ બે વર્ષ,  એક મકાનની જગ્યાએ બે મકાનની ખરીદી પર કેપિટલ ગેઇન ટેક્સમાં મુક્તિ અને ભાડાની આવકની મુક્તિ મર્યાદા રૂ.1.8 લાખથી વધારીને રૂ.2.4 લાખ કરી છે.

આટલી જોગવાઇ કરવા છતાં સ્થાનિક બાંધકામ ઉદ્યોગને કોઇ ખાસ લાભ નહીં થાય તેવો મત વ્યક્ત કરતા સુરત ક્રેડાઇ ચેરમેન શ્રી જસમતભાઇ વિડીયાએ જણાવ્યું હતું કે અમારી વર્ષો જૂની માગણી છે કે બાંધકામ સેક્ટરને ઇન્ડસ્ટ્રીનો દરજ્જો આપવામાં આવે. આ દરજ્જો મળે પછી જ બાંધકામ ઉદ્યોગમાં નવું જોમ-જોશ આવે તેવી શક્યતા છે. એ સિવાય જસમતભાઇએ જણાવ્યું હતું કે જીએસટી દર જે હાલમાં બાંધકામ સેક્ટર પર 12 ટકા છે તેના કારણે પણ મકાનો, ફ્લેટ્સ, દુકાનો વેચાઇ રહ્યા નથી. જીએસટી સ્લેબ ઘટે તો બાંધકામ ઉદ્યોગમાં નવું જોમ આવે તેવી શક્યતા છે.

વધુમાં ઘરો વધુ સસ્તા થાય, લોકોને સારા મકાનો સસ્તા દરે મળે તે માટે ગ્રુપ ઓફ મિનિસ્ટર્સની એક કમિટી બનાવવામાં આવશે. આ કમિટી દ્વારા જુદા જુદા એરીયામાં પ્રવર્તમાન તકલીફો અંગે ભલામણો કરશે અને તેમાં સંભવ છે કે જીએસટી દર ઘટાડાની પણ જોગવાઇ થઇ શક્શે.