સાળંગપુરમાં પ્રમુખસ્વામી મહારાજનું સંગેમરમરનું સ્મૃતિમંદિર બનશે

વિશ્વપ્રસિદ્ધ યાત્રાધામ સારંગપુરમાં બોચાસણવાસી અક્ષરપુરુષોત્તમ સ્વામિનારાયણ સંસ્થાના સ્વામિનારાયણ મંદિરના વિશાળ પરિસરમાં અક્ષરપુરુષોત્તમ મંદિર અને યજ્ઞપુરુષ સ્મૃતિમંદિરની વચ્ચે બ્રહ્મસ્વરૂપ પ્રમુખસ્વામી મહારાજનું સ્મૃતિમંદિર આકાર લેશે. સંસ્થાના વડા મહંતસ્વામી મહારાજે ગઈ કાલે સંતો અને હજારો હરિભક્તોની ઉપસ્થિતિમાં સ્મૃતિમંદિરની શિલાન્યાસવિધિ કરી હતી.

૨૦૧૬ની ૧૩ ઑગસ્ટે અંતર્ધાન થયા બાદ વંદનીય પ્રમુખસ્વામી મહારાજની ઇચ્છા મુજબ જ્યાં ભગવાન શ્રી સ્વામિનારાયણ અને ગુરુદેવ બ્રહ્મસ્વરૂપ શાસ્ત્રીજી મહારાજની દૃષ્ટિ પડે એ સ્થળે તેમના શ્રીવિગ્રહની અંતિમ વિધિ કરવામાં આવી હતી એ સ્થળે મહંતસ્વામીની પ્રેરણાથી સંગેમરમરનું સ્મૃતિમંદિર બનવા જઈ રહ્યું છે.

ગુરુહરિ પ્રમુખસ્વામી મહારાજના કલામંડિત મંદિરનો શિલાન્યાસ મહંતસ્વામી મહારાજે ગઈ કાલે સંતો અને હજારો ભાવિક ભક્તોની ઉપસ્થિતિમાં કર્યો હતો. તેમણે કળશસ્થાપના અને શિલાપૂજનવિધિ કરી હતી. વરિષ્ઠ સંતો દ્વારા મહાપૂજાની વિધિ થઈ હતી.