અમેરિકાએ ભારત ખાતેના પ્રવાસના નિયંત્રણ હળવા કર્યા

અમેરિકાએ ભારત ખાતેના પ્રવાસના નિયંત્રણ હળવા કરીને ભારતને લેવલ-ટૂ એટલે કે સામાન્ય (મૉડરેટ) જોખમ ધરાવતા દેશોની યાદીમાં મૂક્યું છે. ભારતમાં કોવિડ-૧૯ના રોગચાળામાં ઘટાડો થતાં અમેરિકાએ ભારતને ‘સલામત’ ગણાતા લેવલ-ટૂમાં મૂક્યું છે.
અગાઉ, અમેરિકાએ ભારતમાંના કોવિડ-૧૯ના રોગચાળાની બીજી લહેરને ધ્યાનમાં રાખીને ચાલુ વર્ષની શરૂઆતમાં ભારતને લેવલ-ફૉરમાં મૂક્યું હતું.

અમેરિકાના રોગ-નિયંત્રણ કેન્દ્ર (સેન્ટર ફૉર ડિસીઝ ક્ધટ્રૉલ ઍન્ડ પ્રિવેન્શન)એ કોવિડ-૧૯ના રોગચાળાના સંબંધમાં ભારતના પ્રવાસ માટે લેવલ-ટૂ ટ્રાવેલ હેલ્થ નોટિસ બહાર પાડી હતી અને ભારતને ‘સામાન્ય’ જાખમ ધરાવતા દેશોની યાદીમાં સમાવ્યું છે.

આમ છતાં, અમેરિકાના વિદેશ મંત્રાલયે પૂર્વ લદાખ અને તેના પાટનગર લેહ સિવાયના જમ્મુ અને કાશ્મીરમાં ત્રાસવાદના જોખમને ધ્યાનમાં રાખીને પોતાના નાગરિકોને આ પ્રદેશમાં નહિ જવાની સલાહ આપી હતી.

દરમિયાન, અમેરિકાએ ભારત અને પાકિસ્તાનની સરહદના ૧૦ કિલોમીટરના વિસ્તારમાં નહિ જવાની પણ પોતાના નાગરિકોને સલાહ આપી હતી અને તેના માટે બન્ને દેશ વચ્ચે સશસ્ત્ર ઘર્ષણનું જોખમ હોવાનું કારણ આપ્યું હતું.