રમત જગત Archives - Page 44 of 45 - CIA Live

વિશ્ર્વના સૌથી મોટા દેશ રશિયામાં આજે ૨૧મો ફિફા ફૂટબૉલ વર્લ્ડ કપ શરૂ થઈ રહ્યો છે જેમાં પ્રથમ મૅચ યજમાન રશિયા અને સાઉદી અરેબિયા વચ્ચે રમાશે. ભારતીય સમય મુજબ રાત્રે ૮.૩૦ વાગ્યે આ મુકાબલાનો આરંભ થશે.

ગ્રુપ ‘એ’ની આજની આ એકમાત્ર મૅચ પછી આવતી કાલથી દરરોજ ત્રણથી ચાર લીગ મૅચો રમાશે.

ભારત અને રશિયાના સમય વચ્ચે માત્ર અઢી કલાકનો તફાવત છે અને ભારતીય સમય મુજબ મોટા ભાગની મૅચો સાંજે ૫.૩૦ વાગ્યે, રાત્રે
૮.૩૦ વાગ્યે તથા રાત્રે ૧૧.૩૦ વાગ્યે શરૂ થશે. સામાન્ય રીતે ભારતીય ફૂટબૉલચાહકોએ મૅચો માણવા રાતના ઉજાગરાં કરવા પડતા હોય છે, પરંતુ આ વખતના વર્લ્ડ કપમાં તેમણે બહુ મોડી રાત સુધી નહીં જાગવું પડે.

રશિયા સહિત વિશ્ર્વભરમાં ફૂટબૉલ-ફીવર ફેલાઈ રહ્યો છે. રશિયામાં વિવિધ ટીમો સઘન પ્રૅક્ટિસ કરી રહી છે અને દેશ-વિદેશથી હજારોની સંખ્યામાં સૉકરપ્રેમીઓ આવી રહ્યા છે. ગયા વખતે ચૅમ્પિયન બનેલું જર્મની આ વખતે પણ ટ્રોફી જીતવા માટે ફેવરિટ છે.

બે નીચલા ક્રમની ટીમો વચ્ચે ફિફા વર્લ્ડ કપમાં ગુરુવારે સાઉદી અરેબિયા સામે રમાનારી આરંભિક મેચમાં આયોજક રાષ્ટ્ર રશિયાએ સારો દેખાવ નોંધાવવા માટે ભારે માનસિક દબાણ હેઠળ રમવાનું રહેશે.

પોતાની છેલ્લી આઠ મેચમાં એકેય વિજય ન નોંધાવી શકેલ સ્ટેનિસલેવ ચેર્ચસોવની ટીમ ફૂટબોલના વર્લ્ડ રેન્કિંગમાં છેક ૭૦મો ક્રમ ધરાવે છે અને તે અહીંના ૮૦,૦૦૦ દર્શકોની ક્ષમતા ધરાવતા લુઝહનિકી સ્ટેડિયમ ખાતે તેનાથી ત્રણ સ્થાન નીચેની સાઉદીની ટીમ સામે રમનાર છે.

ગયા અઠવાડિયે તુર્કી સામે ૧-૧થી ડ્રો નીવડેલી મેચ બાદ રાષ્ટ્રીય ટીમના ભૂતપૂર્વ ગોલકીપર ચેર્ચસોવ ઉપરાઉપરી સાત મેચમાં એક વિજય પ્રાપ્ત ન કરી શકનાર રશિયાના પ્રથમ મૅનેજર બન્યા હતા અને તેમાંથી ચાર મેચમાં તેમની ટીમનો પરાજય થયો હતો.

સ્પોર્ટ્સના આ મહાકાય કાર્યક્રમની તૈયારીમાં રશિયાએ ૧૩ અબજ ડૉલરથી વધુ ખર્ચયા છે અને પ્રમુખ વ્લાદિમિર પુટીને ટીમના સભ્યોને પોતાના શ્રેષ્ઠ પ્રયાસ કરવાની અરજ કરી હતી.

રશિયાની ટીમ તેના વિભાગમાં ઉરુગ્વે અને ઈજિપ્ત સામે પહેલા રાઉન્ડમાં પણ રમનાર છે.

“અમારી ટીમે દુર્ભાગ્યે તાજતેરના પરિણામમાં સારા પરિણામ મેળવ્યા નથી, એમ પુટીને કહેતા ઉમેયુર્ં હતું કે રશિયાામાં બધા ફૂટબોલ ચાહકો રાષ્ટ્રની ટીમ સ્વાભિમાની અને ગૌરવપૂર્વક છેવટ સુધી પોતાની લડાયક રમત દાખવે એમ ઈચ્છી રહ્યા છે.

રશિયાએ સ્વતંત્ર રાષ્ટ્ર તરીકે વર્લ્ડ કપમાં નોક-આઉટ તબક્કામાં ક્યારેય પ્રવેશ કર્યો નથી અને આ ઉનાળામાં તે પોતાનો દેખાવ સુધારવા પૂરો પ્રયત્ન કરશે.

ફક્ત દક્ષિણ આફ્રિકા આયોજક રાષ્ટ્ર તરીકે ૨૦૧૦ની સ્પર્ધામાં વિભાગીય તબક્કાની મેચોમાં હારી ગયું હતું, પણ પોતાના નબળા ફોર્મ તથા કેટલાક ખેલાડીને થયેલી ઈજાની સમસ્યાના કારણે રશિયાના ફૂટબોલમાં અવ્યવસ્થા ઊભી કરી છે.

સાઉદીની ટીમ ૨૦૦૬ પછી વર્લ્ડ કપમાં પહેલી વાર ભાગ લેનાર છે કે જે માટે રાષ્ટ્રના સ્પોર્ટસના અધિકારીઓએ ફહાડ અલ-મુવાલાડ સહિત પોતાના નવ ખેલાડી ઉચ્ચ સ્તરે રમવાનો અનુભવ કેળવવા સ્પેનમાં લોન પર રમવા મોકલ્યા હતા, પણ આ અખતરો સફળ બન્યો ન હતો. ફહાડના જાપાન સામે થયેલા ગોલથી સાઉદીની ટીમ વર્લ્ડ કપમાં રમવા માટે ગયા સપ્ટેમ્બરમાં ક્વોલિફાઈ થઈ હતી.

આતંકવાદીઓના એક જૂથે મેસી તેમ જ બ્રાઝિલના સુપરસ્ટાર નેયમારને મૃત્યુદંડ આપતાં પહેલાં તેમને નારંગી સૂટ પહેરાવીને ઊભા રાખ્યા હોય એવી વીડિયોટેપ સોશિયલ મીડિયા પર અપલોડ કરી છે

ઇસ્લામિક સ્ટેટ (આઇએસ)ના આતંકવાદીઓએ સિરિયા અને ઇરાકને મૃત:પ્રાય અવસ્થામાં નાખી દીધા પછી હવે તેમના તરફથી મોટો ખતરો રશિયામાં આગામી ૧૪મી જૂનથી આરંભ થનારા ફૂટબૉલ વર્લ્ડ કપ વખતે છે, એમ સલામતી નિષ્ણાતોએ ચેતવણી આપતાં જણાવ્યું છે.

વૉશિંગ્ટનના સેન્ટર ફૉર સ્ટ્રૅટેજિક ઍન્ડ ઇન્ટરનેશનલ સ્ટડીઝે કરેલા એક અંદાજ મુજબ રશિયા તેમ જ ભૂતપૂર્વ સોવિયેત સંઘના રાષ્ટ્રોમાંથી કુલ મળીને ૮,૫૦૦ જેટલા જેહાદીઓ ઇરાક-સિરિયામાં ગયા હતા અને આઇએસમાં જોડાઈ ગયા હતા. એમાંના ઘણા આતંકવાદીઓ રશિયામાં તેમ જ ચેચન્યા અને એશિયાના બીજા દેશોમાં પાછા આવ્યા છે. ઇરાક અને સિરિયાનો અમેરિકા, બ્રિટન, ફ્રાન્સ તેમ જ બીજા મિત્ર દેશો અને ખાસ કરીને રશિયા દ્વારા સફાયો કરવામાં આવ્યો એ પહેલાં જ આઇએસના કમાન્ડરોએ અનેક જેહાદીઓને રશિયા સહિતના અનેક રાષ્ટ્રોમાં પાછા ફરીને ત્યાં લાગ મળે ત્યારે હુમલા કરવાનો આદેશ આપી દીધો હતો. એ જોતાં, હવે દરેક આંતરરાષ્ટ્રીય સ્પર્ધાઓ પર આતંકવાદી હુમલાનો ભય તોળાય છે અને વર્લ્ડ કપ જેવી સર્વોત્તમ સ્પર્ધા એમાંથી કેવી રીતે બાકાત રહી શકે, એવું નિષ્ણાત સલામતી અધિકારીઓનું માનવું છે.

ગયા વર્ષે સોશિયલ મીડિયા પર આર્જેન્ટિનાના લેજન્ડરી પ્લેયર લિયોનેલ મેસીના ચહેરા પર લોહીના ડાઘ સાથેના ફોટાને વાઇરલ કરવાની હરકત કરવામાં આવી ત્યારથી જ ફીફા અને આયોજક દેશો એલર્ટ મોડ પર આવી ગયા હતા. આવી બીજી અનેક તસવીરો તેમ જ વીડિયો અપલોડ કરવાનું કામ આઇએસના ડબ્લ્યૂએએફએ (વફા) મીડિયા ફાઉન્ડેશન દ્વારા કરવામાં આવ્યું હતું.

૨૦૧૪ અને ૨૦૧૫ની સાલમાં આઇએસના ટેરરિસ્ટોએ પોતાના વિસ્તારોમાં અનેક લોકોને નારંગી કલરના સૂટ પહેરાવીને તેમને મોતને ઘાટ ઉતાર્યા હતા. અસ્સલ એવી જ રીતે એ આતંકવાદીઓના એક જૂથે મેસી તેમ જ બ્રાઝિલના સુપરસ્ટાર નેયમારને મૃત્યુદંડ આપતાં પહેલાં તેમને નારંગી સૂટ પહેરાવીને ઊભા રાખ્યા હોય એવી વીડિયોટેપ સોશિયલ મીડિયા પર અપલોડ કરી છે.

એટલું જ નહીં, ટેરરિસ્ટોએ મેસી-નેયમાર સહિતના કેટલાક મહારથીઓને જમીન પર સૂવડાવી, તેમના ગળા પાસે છરી રાખીને પોતે ઊભા હોય એવી તેમ જ બીજી વીડિયોમાં તેમને આગમાં ભડથું કરી દેવામાં આવ્યા હોય એવું વીડિયોમાં બતાવ્યું છે. આઇએસની પોસ્ટમાં આવું સ્લોગન પણ લખવામાં આવ્યું હતું, ‘જ્યાં સુધી મુસ્લિમ દેશોમાં અમારી સલામતી નહીં રહે ત્યાં સુધી તમે પણ સલામતી નહીં માણી શકો.’

ગયા મહિને વેસ્ટ પૉઇન્ટના કૉમ્બેટિંગ ટેરરિઝમ સેન્ટર (સીટીસી) દ્વારા પ્રગટ કરવામાં આવેલા બ્રાયન ગ્લીન વિલિયમ્સ અને રૉબર્ટ ટ્રોય સૉઝા નામના લેખકોના અહેવાલમાં ૧૪ જૂન-૧૫ જુલાઈ ૨૦૧૮ના ફિફા વર્લ્ડ કપ સામેના ખતરા વિશે લખવામાં આવ્યું હતું કે ‘છેલ્લાં થોડાં વર્ષો દરમિયાન આઇએસ સાથે સંકળાયેલા આતંકવાદીઓ દ્વારા રશિયામાં સંખ્યાબંધ સફળ હુમલા થયા છે અને અમુક ષડ્યંત્રોને નાકામિયાબ પણ બનાવવામાં આવ્યા છે. આના પરથી કહી શકાય કે આ ટેરર ગ્રુપ આગામી વર્લ્ડ કપ દરમિયાન રશિયામાં વધુ હુમલા કરવા સક્ષમ છે.’

અમેરિકી નિષ્ણાતોએ વધુમાં લખ્યું છે કે આ હુમલા ‘લોન વુલ્ફ’ (એકમાત્ર આતંકવાદી દ્વારા ટ્રક અથવા કારમાં બેસીને અથવા ટોળા પર સંખ્યાબંધ ગોળીઓ છોડીને કરાતો હુમલો)ના રૂપમાં હોઈ શકે. એટલું જ નહીં, સ્થાનિક વિસ્તારોના આઇએસ સાથે સંકળાયેલા જેહાદીઓ દ્વારા પણ હુમલા થઈ શકે એમ છે. આ હુમલાખોરોમાં તાજેતરમાં સિરિયા અથવા ઇરાકમાંથી પાછા આવેલા આતંકવાદીઓનો સમાવેશ હોઈ શકે.