Slider Archives - Page 373 of 487 - CIA Live

ભાજપના ચૂંટણીઢંઢેરાની આકરી ટીકા કરતા કૉંગ્રેસે સોમવારે કહ્યું હતું કે શાસક પક્ષે વર્ષ 2014ના તેના ચૂંટણીઢંઢેરાને માત્ર કૉપી પૅસ્ટ કર્યો છે અને માત્ર તેની અગાઉની સમયમર્યાદામાં જ ફેરફાર કર્યો છે. કૉંગ્રેસના વરિષ્ઠ નેતા અહમદ પટેલે કહ્યું હતું કે ખરેખર તો ભાજપે ચૂંટણીઢંઢેરાને બદલે માફીનામું બહાર પાડવું જોઈતું હતું. શ્રેણીબદ્ધ ટ્વીટમાં પટેલે કહ્યું હતું કે કવર પૅજ પરથી જ ભાજપ અને કૉંગ્રેસના ચૂંટણીઢંઢેરા વચ્ચેનો તફાવત જોઈ-જાણી શકાય છે. અમારા ચૂંટણીઢંઢેરાના કવર પૅજ પર લોકોની ભીડ છે જ્યારે ભાજપના ચૂંટણીઢંઢેરાના કવર પૅજ પર એક જ વ્યક્તિનો ચહેરો છે. ભાજપે ચૂંટણીઢંઢેરાને બદલે માફીનામું બહાર પાડવું જોઈતું હતું, એમ તેમણે કહ્યું હતું. વર્ષ 2019ની લોકસભાની ચૂંટણી માટે ભાજપે બહાર પાડેલો ચૂંટણીઢંઢેરો 2014ના ચૂંટણીઢંઢેરાની માત્ર નકલ છે અને તેમાં માત્ર સમયમર્યાદામાં ફેરફાર કરીને 2019થી બદલીને 2022, 2032, 2047, 2097 કરી છે. સદનસીબે તેમણે સમયમર્યાદા બદલીને આવતી સદીની નથી કરી, એમ તેમણે તેમની માઈક્રોબ્લૉગિંગ સાઈટ પર લખ્યું હતું.

ચૂંટણીઢંઢેરો જાહેર કર્યા બાદ કોઈપણ પ્રશ્ર્નનો સામનો ન કરવા બદલ તેમ જ તેનો જવાબ ન આપવા બદલ પટેલે ભાજપના નેતાઓ પર પ્રહાર કર્યો હતો અને કૉંગ્રેસે ચૂંટણીઢંઢેરો જાહેર કર્યા બાદ રાહુલ ગાંધીએ પત્રકારો સાથે સીધી વાતચીત કરી હોવા સાથે તેની સરખામણી કરી હતી. અમે ચૂંટણીઢંઢેરો જાહેર કર્યા બાદ વિગતવાર પ્રશ્ર્નોત્તરીનું સત્ર યોજ્યું હતું અને ભાજપે ચૂંટણીઢંઢેરો જાહેર કર્યા બાદ તેના નેતાઓ એકપણ પ્રશ્ર્નનો જવાબ આપ્યા વિના સીધા ઘરભેગા થઈ ગયા હતા, એમ તેમણે કહ્યું હતું. પાંચ વર્ષના શાસનકાળમાં ભાજપે શું કર્યું તેનો કોઈ જવાબ નહોતો એમ જણાવતાં પટેલે કહ્યું હતું કે ભાજપ અને તેના નેતાઓનો આ ઘમંડ જ 23 મેએ તેમના પતનનું કારણ બનશે. કેન્દ્રમાં ફરીવાર સત્તાનું સુકાન સંભાળવાનું શમણું જોઈ રહેલા ભાજપે સોમવારે જાહેર કરેલા ચૂંટણીઢંઢેરામાં રામમંદિરના નિર્માણમાં ઝડપ, આતંકવાદને અંકુશમાં લેવા કડક કાર્યવાહી અને આવનારા ત્રણ વર્ષમાં ખેડૂતોની આવક બમણી કરવા સહિતનાં શ્રેણીબદ્ધ વચનો આપ્યાં છે.

પશ્ર્ચિમ બંગાળનાં મુખ્ય પ્રધાન મમતા બેનરજીએ એક રેલીમાં વડા પ્રધાન મોદી સામે વધુ આક્રમક શબ્દો વાપર્યા હતા. મમતા બેનરજીએ કહ્યું કે, ‘નૉટબંધીના નામમાં તેમણે જનતાના નાણાં લૂંટયા હતા અને હવે ચૂંટણી અગાઉ ચોકીદાર બનવાનો દેખાડો કરી રહ્યા છે. આ ચોકીદાર ‘લૂટેરા અન જૂઠા છે’ તેવો મમતા બેનરજીએ આક્ષેપ કર્યો હતો.

તેમણે કહ્યું કે, તેમના પાંચ વર્ષના શાસનકાળ દરમિયાન તેમણે સાડાચાર વર્ષ તો વિશ્ર્વમાં ભ્રમણ કર્યું છે, જયારે દેશમાં ખેડૂતો આપઘાત કરતા હતા ત્યારે તે શું કરતા હતા? નૉટબંધી પછી જયારે લોકો મરી રહ્યા હતા અને કરોડો લોકોએ નોકરી ગુમાવી હતી ત્યારે તે શું કરતા હતા? તેવો પ્રશ્ર્ન મમતા બેનરજીએ પૂછયો હતો.

તેમણે શ્રોતાઓને કહ્યું હતું કે, જો તમે તેમને (ભાજપ)ને મત આપશો તો તમારા પોતાના દેશમાં તમને નિર્વાસિત બનાવી દેશે. અમારા રાજયમાં અમે એનઆરસી (નેશનલ રજિસ્ટર ઑફ સિટીઝન્સ) અને સિટીઝનશિપ બીલ લાદવા નહીં દઈશું.’ તેમણે કહ્યું કે, ‘હવે જયારે ચૂંટણી નજીક આવી રહી છે ત્યારે તે (મોદી) બધાને ધમકી આપી રહ્યા છે અને આખો દિવસ જૂઠું બોલી રહ્યા છે. આ ચૂંટણીમાં પ્રજા તેમના મ્હોં પર પટ્ટી બાંધી દેશે જેથી જૂઠું બોલવાનું બંધ થઈ જશે. તેમને ન કેવળ ખુરશીથી (વડા પ્રધાનપદ) હટાવવા જોઈએ, પણ રાજકારણમાંથી પણ હટાવવા જોઈએ.પશ્ર્ચિમ બંગાળનાં મુખ્ય પ્રધાને કટાક્ષ કર્યો હતો કે, ‘શું તે મહાત્મા ગાંધી અને બી આર આંબેડકરથી પણ મોટા બની ગયા છે કે તેમની ફિલ્મ બની રહી છે અને તેમના નામની ટીવી ચેનલ શરૂ થઈ રહી છે?’

2014માં મોદીએ ચાના બંધ બગીચાઓ શરૂ કરવામાં આવશે તેવો વાયદો કર્યો હતો તેનો ઉલ્લેખ કરતા મમતા બેનરજીએ કહ્યું હતું કે, ‘શું તેમણે વાયદો નિભાવ્યો હતો? નહીં. અમે (ટીએમસી સરકારે) ચાના બગીના શરૂ કર્યાં છે.

વડા પ્રધાન નરેન્દ્ર મોદીએ સોમવારે અનેક સિનિયર નેતાની હાજરીમાં ભાજપનો ચૂંટણી ઢંઢેરો (સંકલ્પ પત્ર) બહાર પાડ્યો હતો. ચૂંટણીનો પ્રથમ તબક્કો 11 એપ્રિલથી શરૂ થનાર છે. તેના ત્રણ દિવસ પહેલા બહાર પાડેલા ઢંઢેરામાં 75 સંકલ્પને આવરી લેવાયા છે. જનતાની તમામ અપેક્ષાને પરિપૂર્ણ કરવાની ખાતરી અપાઈ છે.

45 પાનાના સંકલ્પ પત્રમાં ‘સંકલ્પિત ભારત અને સશક્ત ભારત’ની કલ્પના કરાઈ છે. આ પત્રના મુખ્ય સંકલ્પમાં રામમંદિર બાંધવામાં ઝડપી પગલાં, આતંકવાદીઓ સાથે સખત પગલાં, 2022 સુધીમાં ખેડૂતોની આવક બમણી કરવી, બંધારણની કલમ 370ને રદ કરવી. 2030 સુધીમાં ભારતને વિશ્ર્વનું ત્રીજું મોટું અર્થતંત્ર બનાવવું વિ. મુખ્ય પ્રશ્ર્નોને આવરી લેવાયા છે. બંધારણની કલમ 35 એ નાબૂદ કરવાનો સંકલ્પ પણ છે. જીએસટીને વધુ સરળ કરાશે. સુરક્ષા દળોને મજબૂત કરવા ડીફેન્સ સાધનોની ખરીદી ઝડપી બનાવાશે. આતંકવાદ સામે ઝીરો ટોલરન્સની નીતિ અપનાવાય છે. સુરક્ષા દળોને છૂટ આપવાનું ચાલુ રખાશે.

વડા પ્રધાન મોદીએ જણાવ્યું હતું કે રાષ્ટ્રવાદ અને સારો વહીવટ આપવો એ અમારો મંત્ર છે. 2047 સુધીમાં (આઝાદીના 100 વર્ષ બાદ) ભારતને વિકસિત દેશ બનાવવાનો લક્ષ્યાંક છે. 2022માં સ્વતંત્રતાના 75 વર્ષ પૂર્ણ થશે એટલે 75 સંકલ્પ ભાજપે કર્યા છે.

ભાજપનો ચૂંટણી ઢંઢેરો બહુલક્ષી અને બહુદિશા ધરાવતો છે. ભાજપના અધ્યક્ષ અમિત શાહે કહ્યું હતું કે જનતાને પારદર્શક, મજબૂત અને નિર્ણાયક સરકાર આપવા અમે પ્રતિબદ્ધ છીએ. પાંચ વર્ષમાં સરકારે કરેલા કાર્યોનો હિસાબ આપ્યો હતો. આતંકવાદ સામે કડક પગલાં લઈને દેશની સુરક્ષા મજબૂત કરાઈ છે. 2014થી 2019નો ગાળો સુવર્ણ ગણાશે. 2014ના ભારતનું અર્થતંત્ર 11માં સ્થાને હતું તે હાલ છઠ્ઠા સ્થાને છે. નાણા પ્રધાન અરુણ જેટલીએ કહ્યું હતું કે ભાજપનો સંકલ્પ પત્ર મજબૂત રાષ્ટ્રવાદી દૃષ્ટિકોણ સાથે તૈયાર કરાયો છે. આતંકવાદને નાબૂદ કરવા ભારતના પ્રયાસને વૈશ્ર્વિક માન્યતા મળી છે. જમ્મુ- કાશ્મીર વિશેષ દરજ્જો આપતી કલમ નાબૂદ કરવા પક્ષ પ્રતિબદ્ધ છે.

વિદેશ પ્રધાન સુષ્મા સ્વરાજે કહ્યું હતું કે અન્ય પક્ષો ઘોષણાપત્ર બહાર પાડે છે, પરંતુ ભાજપે સંકલ્પ પત્ર બહાર પાડ્યો છે. 2014માં પક્ષે જે ખાતરી આપી હતી તેના કરતા વધુ કામ પાંચ વર્ષમાં કર્યા છે. વડા પ્રધાન મોદીને પાંચ વર્ષમાં સાઉદી અરેબિયા સહિત પાંચ દેશના પ્રતિષ્ઠિત એવૉર્ડ મળ્યા છે. વિશ્ર્વમાં ભારતની ઈમેજ વધી છે. ઈસ્લામિક દેશોના ઓર્ગેનાઈઝેશનની બેઠકમાં ભારતને આમંત્ર મળતા પાકિસ્તાને બહિષ્કાર કર્યો હતો, પરંતુ 57માંથી 56 દેશો હાજર રહ્યા હતા. પક્ષના મેનીફેસ્ટો કમિટીના વડા રાજનાથસિંહે ચૂંટણી ઢંઢેરાને વિઝન ડોક્યુમેન્ટ ગણાવ્યું હતું. મોદી સરકાર રાષ્ટ્રવાદ અને આતંકવાદ સામે ઝીરો ટોલરન્સ માટે પ્રતિબદ્ધ છે.