ગાંધીજીના હત્યારા નથુરામ ગોડસેને લગતા નિવેદનોને લઇને ભારતીય જનતા પક્ષ (ભાજપ) મુશ્કેલીમાં સપડાયો છે અને તેને પોતાના ત્રણ નેતા પાસે ખુલાસો માગવાની ફરજ પડી હતી.

દરમિયાન, કૉંગ્રેસે આ પ્રકરણમાં આક્રમક વલણ અપનાવ્યું છે અને વડા પ્રધાન નરેન્દ્ર મોદીની આ કિસ્સામાંની ચુપકીદી અંગે સવાલ ઉઠાવ્યો હતો.

ભોપાળમાંથી ચૂંટણી લડી રહેલા ભાજપનાં ઉમેદવાર સાધ્વી પ્રજ્ઞાસિંહ ઠાકુરે ગાંધીજીના હત્યારા નથુરામ ગોડસેને દેશભક્ત ગણાવતું નિવેદન કર્યું હતું, પરંતુ બાદમાં પક્ષના મોવડીમંડળ દ્વારા તેમના પર દબાણ લવાતા તેમણે પોતાનું આ નિવેદન પાછું ખેંચ્યું હતું અને માફી માગી હતી.

ભાજપના પ્રમુખ અમિત શાહે જણાવ્યું હતું કે અમારા પક્ષે ત્રણ નેતા – કેન્દ્રીય પ્રધાન અનંતકુમાર હેગડે, પ્રજ્ઞાસિંહ ઠાકુર અને કર્ણાટકના સાંસદ નલિનકુમાર કટીલના વિવાદાસ્પદ નિવેદનની ગંભીર નોંધ લઇને તેઓને દસ દિવસમાં ખુલાસો કરવાનો આદેશ આપ્યો છે.

વડા પ્રધાન નરેન્દ્ર મોદીએ પણ જણાવ્યું હતું કે હું ગોડસે અંગે વાંધાજનક નિવેદન કરનારા પ્રજ્ઞાસિંહ ઠાકુરને દિલથી માફ કરી નહિ શકું.

દરમિયાન, કૉંગ્રેસે આ મુદ્દે આક્રમક વલણ અપનાવતા જણાવ્યું હતું કે સાધ્વી પ્રજ્ઞાસિંહ ગોડસેને દેશભક્ત ગણાવતા હોય અને અમિત શાહના રોડશો વખતે ઇશ્ર્વરચંદ્ર વિદ્યાસાગરની પ્રતિમા તોડી પાડીને હિંસા ફેલાવાતી હોય એવા સંજોગમાં અમારા માટે દેશ માટે પ્રાર્થના કરવા સિવાય કંઇ બાકી નથી રહેતું.

ભાજપના સાંસદ નલિનકુમાર કટીલે જણાવ્યું હતું કે ગોડસેએ એકની હત્યા કરી હતી, કસાબે ૭૨ને માર્યા હતા અને રાજીવ ગાંધીએ ૧૭,૦૦૦ને માર્યા હતા. તમે (જનતા) જ નિર્ણય લો કે કોણ વધુ ક્રૂર ગણાય.

દેશમાં ૨૦૧૯ની સામાન્ય ચૂંટણીના પ્રચારનો શુક્રવારે અંત આવ્યો હતો. દેશમાં રવિવારે લોકસભાની ૫૯ બેઠક માટે મતદાન થવાનું છે.

વડા પ્રધાન નરેન્દ્ર મોદીએ ગુરુવારે જણાવ્યું હતું કે મારી સરકાર ઇશ્ર્વરચંદ્ર વિદ્યાસાગરની વિચારધારાને અનુસરે છે અને કોલકાતામાં તૃણમૂલ કૉંગ્રેસ (ટીએમસી)ના ગુંડાઓએ જે સ્થળે તેમનું પૂતળું તોડ્યું હતું ત્યાં પંચધાતુની ભવ્ય પ્રતિમાનું નિર્માણ કરીશું.

વડા પ્રધાને જણાવ્યું હતું કે હું હવે પછી ડમડમમાં જાહેરસભાને સંબોધવા જવાનો છું, પરંતુ પશ્ર્ચિમ બંગાળનાં મુખ્ય પ્રધાન મમતા બેનરજી મારા હેલિકૉપ્ટરને ત્યાં ઊતરવા દેશે કે નહિ એ ખબર નથી.

મોદીએ અહીં ચૂંટણીસભાને સંબોધતા જણાવ્યું હતું કે અમે ઘણાં સમયથી (મમતા)દીદીનું (ખરાબ) વલણ જોતા હતા, પરંતુ હવે દેશ જોઇ રહ્યો છે.

તેમણે જણાવ્યું હતું કે અમારી સરકાર ઇશ્ર્વરચંદ્ર વિદ્યાસાગરની વિચારધારાને સમર્પિત છે અને કોલકાતામાં તૃણમૂલ કૉંગ્રેસના ગુંડાઓએ જે સ્થળે તેમનું પૂતળું તોડ્યું છે ત્યાં અમે પંચધાતુની બનેલી તેમની પ્રતિમા બેસાડીશું.

વડા પ્રધાને જણાવ્યું હતું કે તૃણમૂલ કૉંગ્રેસના ગુંડાઓએ ભારતીય જનતા પક્ષ (ભાજપ)ના પ્રમુખ અમિત શાહના રોડશો વખતે ઇશ્ર્વરચંદ્ર વિદ્યાસાગરની પ્રતિમા તોડી હતી અને આ કૃત્ય કરનારા લોકોને કડક સજા થવી જોઇએ.

મોદીએ આક્ષેપ કર્યો હતો કે પશ્ર્ચિમ મિદનાપોર અને ઠાકુરનગરમાંની મારી અગાઉની ચૂંટણીસભાઓ વખતે તૃણમૂલ કૉંગ્રેસના કાર્યકરોએ અરાજકતા ફેલાવી હતી.

તેમણે જણાવ્યું હતું કે કૂચ બિહારમાં મારી જાહેરસભા માટે જ્યાં મંચ બંધાવાનો હતો ત્યાં મમતા બેનરજીએ પોતાના પક્ષ માટે મોટો મંચ બાંધી દીધો હતો.