વિટામિન ડીની ઊણપ હોવાથી ઈટલી અને સ્પેનમાં મૃત્યાંક વધુ હતો તેવું વૈજ્ઞાનિકોએ અહેવાલમાં જણાવ્યું છે. વિટામિન ડીના ઓછા સ્તર અને એકયુટ રેસ્પિટરેટરી ટ્રેકટ ઈન્ફેકશન (શ્ર્વસન તંત્રમાં ચેપ) વચ્ચે સંબંધ છે તેવું સંશોધનકારોએ દાવો કર્યો છે.

ઈટલી અને સ્પેનમાં મૃત્યાંક વધુ હતો અને યુરોપના મોટા ભાગના દેશોની સરખામણીમાં આ બંને દેશના લોકોમાં વિટામિન ડીનું પ્રમાણ ઓછું હોય છે. દક્ષિણ યુરોપમાં વૃદ્ધો તડકામાં જવાનું ટાળતા હોય છે. આથી વિટામિન ડીનું પ્રમાણ ઓછું હોય છે તેવું સંશોધનકારો કહે છે.

ઉત્તરી યુરોપના રહેવાસીઓમાં વિટામિન ડીનું પ્રમાણ વધુ હોય છે. તેઓ તડકામાં બહાર નીકળતા હોય છે તથા તેમના આહારમાં કોડલિવર ઓઈલનો સમાવેશ થતો હોય છે. તેઓ વિટામિન ડીના સપ્લીમેન્ટસ પણ લેતા હોય છે. હોસ્પિટલો, વૃદ્ધાશ્રમોમાં રહેતા લોકોમાંથી ૭૫ ટકામાં વિટામીન ડીની ઊણપ હોય છે તેવું લી સ્મિથ નામના સંશોધનકારે જણાવ્યું હતું. સ્કેન્ડિનેવિયાના રાષ્ટ્રોનો સૌથી ઓછો મૃત્યાંક નોંધાયો છે તેવું સંશોધનકારોએ કહ્યું હતું. 

કોરોના વાઇરસે સમગ્ર જગતમાં હાહાકાર મચાવ્યો છે અને ૨૦૦ જેટલા રાષ્ટ્રોમાં આ જીવલેણ વિષાણુએ માઝા મૂકી છે, પરંતુ વિશ્ર્વના અનેક દેશોની સરકારો પોતાને ત્યાંના લૉકડાઉનને ક્યારે અને કેવી રીતે હળવો કરી શકાય એના પર વિચાર કરવા લાગી છે.

કોવિડ-૧૯ મહામારીએ જાગતિક અર્થતંત્રને પાંગળુ કરી નાખ્યું છે અને આ અભૂતપૂર્વ પરિસ્થિતિમાં ઘણા દેશોમાં પ્રજાજનો દ્વારા નિયંત્રણોનો અંત લાવવાની હાકલ કરાઈ રહી છે.

વૈશ્ર્વિક સ્તરે એવા પુરાવા આપવામાં આવી રહ્યા છે કે સોશિયલ ડિસ્ટન્સિંગને કારણે આ મહામારીને મંદ પાડવામાં સફળતા મળી રહી છે. આશરે ૪.૫ અબજ લોકો (પૃથ્વી પર વસતા લોકોમાંથી લગભગ અડધા ભાગની માનવજાત)એ ઘણા દિવસોથી પોતાના ઘરમાં ભરાઈ રહેવું પડ્યું છે. જોકે, લૉકડાઉનને ધીમે-ધીમે ઉઠાવવા તરફી જે અભિગમ વિશ્ર્વભરમાં જોવા મળી રહ્યા છે એના પરથી કહી શકાય કે આવનારા દિવસોમાં કોવિડ-૧૯ સામેની લડતમાં નવો વળાંક જોવા મળશે. વિશ્ર્વભરમાં બેરોજગારી વધી રહી છે અને ઘણા લોકો નોકરી-ધંધા ગુમાવ્યા પછીના પહેલા ભાડાના પેમેન્ટની સમસ્યાનો સામનો કરી રહ્યા છે ત્યારે અનેક દેશોની સરકારો લૉકડાઉનમાં રાહત મૂકવા વિચારી રહી છે. ૧૩ દેશો કોવિડ-૧૯ની મહામારીની આર્થિક અસર ઘટે એ સંબંધમાં જાગતિક-સ્તરિય સહકાર માટેનો અનુરોધ કરી રહ્યા છે. આ ૧૩ દેશોમાં કૅનેડા, બ્રાઝિલ, ઇટલી, જર્મની, બ્રિટન, ફ્રાન્સ, ઇન્ડોનેશિયા, મેક્સિકો, મોરોક્કો, પેરુ, સાઉથ કોરિયા, સિંગાપોર અને તુર્કીનો સમાવેશ છે.

આ રાષ્ટ્રો જાહેર આરોગ્ય, પ્રવાસ, વેપાર, આર્થિક અને નાણાકીય પગલાના મુદ્દે એકમેક સાથે સંકલન જાળવવા કટિબદ્ધ છે.

અમેરિકાના ત્રણ સ્ટેટમાં આ અઠવાડિયે દેખાવકારો જાહેરમાં ભેગા થયા હતા અને લૉકડાઉન સંબંધિત નિયંત્રણો પાછા ખેંચી લેવાનો અનુરોધ સરકારને કર્યો હતો. સૌથી મોટા દેખાવો મિશિગન સ્ટેટમાં થયા હતા જેમાં ૩,૦૦૦ લોકો એકત્રિત થયા હતા. એમાંથી અમુક લોકો શસ્ત્ર સાથે આવ્યા હતા. અમેરિકામાં કોરોનાનો ચેપ લાગ્યો હોય એવા ૭,૦૦,૦૦૦ કરતાં પણ વધુ કેસ નોંધાયા છે અને ૩૭,૦૦૦થી વધુ લોકોના મૃત્યુ થયા છે.

યુરોપમાં અમુક ભાગોમાં કોવિડ-૧૯ની મહામારીની તીવ્રતા ઘટી રહી હોવાના સંકેતો મળતાં સ્વિટ્ઝરલૅન્ડ, ડેન્માર્ક અને ફિનલૅન્ડમાં આ અઠવાડિયે દુકાનો અને સ્કૂલો ફરી ખોલવામાં આવી હતી. જર્મનીના આરોગ્ય પ્રધાને કહ્યું હતું કે ‘દેશમાં કોરોનાનો ચેપ લાગવાનું પ્રમાણ ઘણું ઘટી ગયું છે.’ જર્મનીમાં કોરોનાને કારણે ૩,૪૦૦ લોકોના મૃત્યુ થયા છે, પરંતુ કોરોના બીજા રાઉન્ડમાં ન ત્રાટકે એની તકેદારી રાખીને અમુક નિયંત્રણો કેવી રીતે પાછા ખેંચી લેવા એનું ખૂબ નાજુક કામ જર્મન સરકાર હાથમાં લેવા જઈ રહી છે. જર્મનીમાં અમેરિકામાં કોરોનાનો ચેપ લાગ્યો હોય એવા ૧,૪૧,૦૦૦ કરતાં પણ વધુ કેસ નોંધાયા છે અને ૪,૩૫૦થી વધુ લોકોના મૃત્યુ થયા છે.

સોમવારે જર્મનીમાં અમુક પ્રકારની નાની દુકાનોને ફરી ખોલવામાં આવશે અને અમુક સ્તરના બાળકો ફરી સ્કૂલે જતા થઈ જશે.

ઇટલીમાં કોરોનાનો ચેપ લાગ્યો હોય એવા ૧,૭૨,૦૦૦ કરતાં પણ વધુ કેસ નોંધાયા છે અને ૨૨,૭૦૦થી વધુ લોકોના મૃત્યુ થયા છે. ઇટલીમાં અમુક ભાગો પણ લૉકડાઉનમાંથી બહાર આવી રહ્યા છે.

બીજી તરફ, જાપાન તેમ જ બ્રિટન અને મેક્સિકોમાં લૉકડાઉન લંબાવવામાં આવ્યું છે. ઘણા દેશોમાં કોરોનાની મહામારીથી અર્થતંત્રને ભારે નુકસાન થયું છે. ચીનમાં ઘણા દાયકાઓમાં પહેલી વાર જીડીપી (કુલ રાષ્ટ્રીય ઉત્પાદન)નો દર ઘટ્યો છે. 

ચીનમાં કોરોના વાઈરસ સૌપ્રથમવાર દેખાયા બાદ તેને વધુ ફેલાતો અટકાવવાની તેની ભૂમિકા ભજવવામાં નિષ્ફળ જવા બદલ અમેરિકાએ વર્લ્ડ હૅલ્થ ઑર્ગેનાઈઝેશનને દર વરસે અમેરિકા તરફથી આપવામાં આવતું ૫૦ કરોડ ડૉલરનું ભંડોળ અટકાવી દેવાની અમેરિકાના પ્રમુખ ડૉનલ્ડ ટ્રમ્પે જાહેરાત કરી છે. ગયા વર્ષના નવેમ્બરમાં ચીનના હુબેઈ પ્રાન્તના વુહાન શહેરમાં સૌપ્રથમવાર જીવલેણ કોરોના વાઈરસ દેખાયા બાદથી અત્યાર સુધીમાં કોરોનાને કારણે વિશ્ર્વરભરમાં ૧,૧૯,૦૦૦ કરતા પણ વધુ લોકોનાં મોત થયાં હોવાનું અહેવાલમાં જણાવવામાં આવ્યું છે.

આ વાઈરસે અમેરિકામાં અત્યાર સુધીમાં ૨૫,૦૦૦ કરતા પણ વધુ લોકોનો ભોગ લીધો છે, એમ જ્હૉન હૉપક્ધિસ યુનિવર્સિટીએ જણાવ્યું હતું.

કોરોના વાઈરસને વધુ ફેલાતો અટકાવવામાં વર્લ્ડ હૅલ્થ ઑર્ગેનાઈઝેશનની ભૂમિકામાં જોવા મળેલી અવ્યવસ્થાની સમીક્ષા હાથ ધરવામાં આવી છે ત્યારે હું વહીવટીતંત્રને વર્લ્ડ હૅલ્થ ઑર્ગેનાઈઝેશનને આપવામાં આવતું ભંડોળ રોકી દેવાની સૂચના આપું છું, એમ ટ્રમ્પે કહ્યું હતું. પત્રકારોને આપેલી મુલાકાતમાં ટ્રમ્પે કહ્યું હતું કે વર્લ્ડ હૅલ્થ ઑર્ગેનાઈઝેશનમાં શું ચાલી રહ્યું છે તે બધા જ જાણે છે. ટ્રમ્પ અને તેમના વરિષ્ઠ અધિકારીઓએ અગાઉ જીનિવાસ્થિત સંયુક્ત રાષ્ટ્રસંઘની વિશ્ર્વ આરોગ્ય સંસ્થા પર વિશ્ર્વના સૌથી મોટા ગણાતા અર્થતંત્રને સ્થગિત કરી દેનાર કોરોના વાઈરસને મામલે ચીનનો પક્ષ લેવાનો આક્ષેપ કર્યો હતો. ટ્રમ્પના નિવેદન અંગે પ્રતિક્રિયા આપતા સંયુક્ત રાષ્ટ્રસંઘના મહામંત્રી ઍન્ટોનિયો ગ્રટ્રૅસે કહ્યું હતું કે વર્લ્ડ હૅલ્થ ઑર્ગેનાઈઝેશનના સ્રોતો પર કાપ મૂકવાનો આ સમય નથી. આંતરરાષ્ટ્રીય સ્તરે ઊભા થયેલા આરોગ્યના જોખમ અંગે વિશ્ર્વના તમામ દેશોને સમયસર માહિતી આપવાનું કામ વર્લ્ડ હૅલ્થ ઑર્ગેનાઈઝેશનનું છે અને તે તેની આ જવાબદારી નિભાવવામાં નિષ્ફળ ગયું હોવાને કારણે કોરોના મહામારીના પરિણામ માટે પણ વિશ્ર્વ આરોગ્ય સંસ્થા જવાબદાર હોવાનો આક્ષેપ ટ્રમ્પે કર્યો હતો.

દુનિયામાં કોરોનાના દર્દીઓનો આંકડો 15 લાખને પાર, મૃતકોની સંખ્યા પણ 90 હજારને આંબી

દુનિયાભરમાં કોરોના વાયરસની મહામારીથી ગુરુવારે રાત સુધીમાં મૃતકોની સંખ્યા 90 હજારને પાર પહોંચી ગઈ છે. કુલ 90,938 મૃત્યુમાં અડધાથી વધુ પેશન્ટ માત્ર અમેરિકા, ઈટાલી અને સ્પેનના છે. આંતરરાષ્ટ્રીય ન્યૂઝ એજન્સીઓએ આંતરરાષ્ટ્રીય સમય અનુસાર સવારે ચાર વાગ્યા સુધીના દુનિયાભરના દેશોના આંકડાનો સરવાળો કરી કુલ મૃત્યુનો આંકડો જાહેર કર્યો છે.

ઈટાલીમાં અત્યારસુધી સૌથી વધુ 18,279 લોકોના મોત થયા છે. ત્યારબાદ સ્પેનમાં 15,238 લોકોએ કોરોનાને કારણે દમ તોડ્યો છે. દુનિયામાં સૌથી વધુ દર્દીઓ ધરાવતા અમેરિકામાં અત્યારસુધી 14,830 લોકો મોતને ભેટી ચૂક્યા છે. અમેરિકાનું ન્યૂયોર્ક કોરોનાથી સૌથી વધુ પ્રભાવિત શહેરોમાંનું એક છે. અહીં સતત ત્રીજા દિવસે કોરોનાને લીધે 799 લોકોના મોત થયા છે.

ફ્રાંસમાં પણ અત્યારસુધી 10,869 લોકોએ આ વાયરસને કારણે જીવ ગુમાવ્યો છે. દુનિયાભરમાં સત્તાવાર રીતે 15.34 લાખ લોકોને આ વાયરસનો ચેપ લાગ્યો હોવાનું કન્ફર્મ થયું છે. ભારતમાં પણ તેના 5,865 દર્દી નોંધાયા છે, જ્યારે દેશનો કુલ મૃત્યુઆંક 169 પર પહોંચ્યો છે. કોરોનાને રોકવા માટે દેશમાં 21 દિવસનું લોકડાઉન જાહેર કરાયું છે જે 14 એપ્રિલે પૂરું થઈ રહ્યું છે, પરંતુ તેને લંબાવવામાં આવે તેવી પૂરી શક્યતા છે.

કોરોના વાયરસની જ્યાં ઉત્પત્તિ થઈ હતી તેવા ચીનમાં તે સંપૂર્ણપણે કાબૂમાં આવી ચૂક્યો છે. કોરોનાના એપિસેન્ટર એવા વુહાનમાં બે મહિના બાદ લોકડાઉન ખોલી દેવામાં આવ્યું છે. સમગ્ર ચીન કોરોનાની અસરમાંથી બહાર આવીને ધમધમતું થઈ ગયું છે. જોકે, ચીનના જ પાડોશી દેશોમાં આ વાયરસ હજુય બેકાબૂ છે.

જાપાનના વડા પ્રધાન શિન્ઝો અબેએ કોરોના વાઇરસના રોગચાળાને નાથવા માટે ટોક્યો અને અન્ય છ સ્થળે એક મહિના લાંબી કટોકટી મંગળવારે જાહેર કરી હતી.

જાપાનના ટોક્યો ઉપરાંત ચીબા, કાનાગાવા, સાઇટામા, ઓસાકા, હ્યુઓગો અને ફુકુઓકામાં કટોકટી લદાઇ છે.

તેમણે જણાવ્યું હતું કે રોગચાળાને લીધે અનેક લોકો બીમાર થયા છે અને કેટલાકે જાન ગુમાવ્યા છે. દેશના અર્થતંત્ર પર પણ માઠી અસર થઇ છે. હું પરિસ્થિતિને ધ્યાનમાં રાખીને કટોકટી જાહેર કરું છું.

જાપાનની સરકારે પણ જનતાને લૉકડાઉન દરમિયાન ઘરમાં જ રહેવાની અને શારીરિક સંપર્ક ટાળવાની સલાહ આપી હતી. ટોક્યોમાંના ડૉક્ટરોએ રાજધાનીમાં પરિસ્થિતિ ગંભીર હોવાની અને દરદીઓ રાખવા માટે હૉસ્પિટલોમાં પૂરતી પથારીઓ નહિ હોવાની ચેતવણી આપી હતી.