ઓરી-રૂબેલા રસીકરણથી બાળકોને કોઈ આડઅસર થતી નથી

બાળકો-વાલીઓએ ખોટી અફવાઓ અને અપપ્રચારથી ગભરાવું નહીં

સોશિયલ મીડિયા પર ઓરી રૂબેલા રસીકરણની અફવાઓ પર ધ્યાન ન આપવું

સોશ્યલ મીડિયા પર ઓરી રૂબેલા રસીકરણની અફવાઓ પર ધ્યાન ન આપવું

રાજ્યભરમાં માત્ર બે દિવસમાં ૧૭ લાખથી વધુ બાળકોને રસીકરણમાં આવરી લેવાયા છે, જેમાં હજુ સુધી એક પણ બાળકને આડઅસર થઇ નથી

ખોટી અફવાઓથી ન દોરવાઈને બાળકોના સુરક્ષિત ભવિષ્ય માટે રસી મૂકાવવા જિલ્લા વહીવટીતંત્ર દ્વારા જાહેર જનતાને અનુરોધ

દેશભરમાં વર્ષ-૨૦૨૦ સુધીમાં ઓરી નિવારણ માટે ઓરી-રૂબેલા (એમ.આર.) અભિયાન હાથ ધરાયું છે. રાજ્યમાં ૧૬મી જુલાઇથી શરૂ થયેલા આ અભિયાન અંતર્ગત માત્ર બે દિવસમાં જ ૧૭ લાખથી વધુ બાળકોને સફળતાપૂર્વક રસી આપવામાં આવી છે. જે પૈકી એક પણ બાળકને મોટી ગંભીર આડ અસર થઇ નથી. જેથી સોશિયલ મીડિયા પર ફેલાતી ઓરી રૂબેલા રસીકરણની અફવાઓ પર ધ્યાન ન આપવું. બાળકો-વાલીઓએ અફવા અને અપપ્રચારથી ગેરમાર્ગે દોરાઇને ગભરાવાની કોઈ જરૂર નથી. આપના બાળકને અગાઉ રસી અપાવી હોય તો પણ પુન:રસી અપાવવામાં કોઇ જ વાંધો નથી. એમ.આર.ની રસી મૂકવાથી બાળકને નપુસંકતા આવે એવી તદ્દન પાયાવિહોણી અને ખોટી અફવા-માન્યતાને નજરઅંદાજ કરી બાળકોના સુરક્ષિત ભવિષ્ય માટે એમ.આર. રસી મૂકાવવા જિલ્લા વહીવટીતંત્ર દ્વારા જાહેર જનતાને અનુરોધ કરવામાં આવ્યો છે.

દર વરસે ભારતભરમાં અંદાજિત ૪૦,૦૦૦ થી ૫૦,૦૦૦ બાળકોનું મૃત્યુ ઓરીની બિમારીને કારણે થાય છે, જેમાં મોટા ભાગના બાળકોએ આ ઓરીની રસી લીધી ન હતી. રૂબેલા એટલે કે નુરબીબીનું વાઇરસ જો સગર્ભા માતાને લાગી જાય તો તેને ગર્ભપાત થવાની સંભાવના વધી જાય છે, વળી, ગર્ભસ્થ બાળક ખોડખાપણ અને મંદબુદ્ધિવાળું પણ જન્મી શકે છે. આ રોગને અટકાવવા તમામ બાળકોને રસી આપી દેશમાથી આ વાઇરસનો પગપેસારો અટકાવવો અને તેનો નિકાલ કરવો જરૂરી છે. વર્ષ ૧૯૯૮ માં Andrew Wakefield નામના ડોક્ટરનો દાવો હતો કે MMRની રસી લેવાથી ઓટીઝમ થઈ શકે છે. આ રિપોર્ટ “The Lancet” નામના જર્નલમાં છપાયેલો હતો. જેને વર્ષ ૨૦૧૦ માં બ્રિટીશ મેડિકલ જર્નલે આ રિપોર્ટ ને તદ્દન પાયવિહીન ગણાવ્યો હતો. જાણી જોઈને રિસર્ચના ખોટા રિપોર્ટ આપવા બદલ યુ.કે. મેડિકલ કાઉન્સિલે એન્ડ્ર્યુનું લાઇસેંસ રદ કરેલું. આ અભિયાન હેઠળ, પ્રથમ બે દિવસમાં સુરત ગ્રામ્યમાં ૭૫,૮૭૨ તથા સુરત મહાનગર પાલિકા વિસ્તારમાં ૬૨,૩૪૩ બાળકો ને એમ.આર.ની રસી આપવામાં આવી છે. જેમાં કોઈ પણ બાળક ને જરા પણ આડઅસર થઈ નથી.

સુરતની જે. બી. ડાયમંડ એન્ડ કાર્પ વિદ્યાસંકુલ, લસ્કાણામાં ૧૬ અને ૧૭ જુલાઈના રોજ ૧૧,૪૦૩ બાળકો એટલે કે ૧૦૦ ટકા બાળકોને સફળતાપૂર્વક રસી આપવામાં આવી હતી. રાજ્ય સરકારે આ પ્રકારે ઉત્સાહભેર રસીકરણ કરાવવા બદલ જિલ્લા વહીવટીતંત્રની કામગીરીને બિરદાવી છે. આ શાળાની જેમ જ અન્ય તમામ શાળાઓએ તથા વાલીઓએ પરસ્પર સહયોગથી તમામ બાળકોને એમ. આર. ની રસી અચૂક અપાવવી જોઇએ એવી વિનંતી જિલ્લા આરોગ્ય વિભાગ તરફથી કરવામાં આવી છે. જરૂર જણાયે નજીકના આરોગ્ય કેન્દ્રનો સંપર્ક કરવા જણાવાયું છે. રાજ્ય સરકાર દ્વારા એમ.એમ.આર. (મીઝલ્સ, મમ્સ, રૂબેલા) નહીં પણ એમ.આર. (મીઝલ્સ, રૂબેલા) રસીકરણ અભિયાન ચલાવવામાં આવી રહ્યું છે. આ અભિયાનમાં વપરાતી વેકસીન આપણા દેશમાં જ બનાવવામાં આવે છે. જે રસી સેન્ટ્રલ ડ્રગ્સ સ્ટાન્ડર્ડ કન્ટ્રોલ ઓર્ગેનાઇઝેશનના સુરક્ષાના તમામ માપદંડો પર ખરી ઉતરી છે. સમગ્ર વિશ્વમાં ૧૪૯ દેશોમાં આ રસી છેલ્લા ૪૦ વર્ષોથી આપવામાં આવે છે. આપણા દેશમાં પણ ખાનગી ડૉકટર્સ દ્વારા આ રસી ઘણા સમયથી અપાઇ રહી છે. જેથી આ રસી ખૂબ જ સુરક્ષિત છે તે પ્રમાણિત થાય છે. ઓરી રૂબેલા રસીકરણ અભિયાન દેશભરમાં કેન્દ્ર સરકારના આરોગ્ય અને પરિવાર કલ્યાણ વિભાગ, ડબલ્યુ.એચ.ઓ. તેમજ યુનિસેફ જેવા પાર્ટનરના માર્ગદર્શન હેઠળ ચાલી રહ્યું છે. જેમાં અત્યાર સુધીમાં ત્રણ તબક્કાઓ દરમિયાન ૨૦ રાજ્યોના ૯.૨ કરોડથી પણ વધારે બાળકોને સુરક્ષિત રસીકરણ કરાયું છે. આ સમગ્ર અભિયાન દરમ્યાન તાલીમબદ્ધ આરોગ્ય કાર્યકર દ્વારા જ ઓરી રૂબેલાના રસીનું ઇન્જેકશન આપવામાં આવશે. અત્રે ઉલ્લેખનીય છે કે, વિશ્વ આરોગ્ય સંસ્થા, યુનિસેફ, યુ.એન.ડી.પી. જેવી સંસ્થાઓનું પણ માર્ગદર્શન મળ્યું છે. બાળ રોગ નિષ્ણાંતની સંસ્થા એ.ઓ.પી. અને ઇન્ડિયન મેડિકલ એસોસિએશન દ્વારા પણ આ અભિયાનને સમર્થન અપાયું છે, સોશ્યલ મીડિયાપર જો કોઇ આ કેમ્પેઈન સંદર્ભે અપપ્રચાર થતો માલુમ પાડે તો જિલ્લા આરોગ્ય તંત્રને જાણ કરી અને લોકોને વાસ્તવિક બાબતથી અવગત કરવા પણ અનુરોધ કરાયો છે.