8/7 : કોવીડ-19 બ્રેક બાદ આજથી આંતરરાષ્ટ્રીય ક્રિકેટ ફરી શરૂ

લાંબી ઇંતેજારીનો છેવટે અંત આવી રહ્યો છે. આંતરરાષ્ટ્રીય ક્રિકેટનું લગભગ ત્રણ મહિના બાદ આજે પુનરાગમન થઈ રહ્યું છે. કોવિડ-૧૯ની મહામારીને લીધે માર્ચથી ક્રિકેટ સદંતર રમાવાની બંધ થઈ ગઈ હતી, પરંતુ આજે સાઉધમ્પટન ખાતે ઇંગ્લૅન્ડ અને વેસ્ટ ઇન્ડિઝ વચ્ચે ત્રણ મૅચવાળી સિરીઝની પહેલી ટેસ્ટ શરૂ થઈ રહી છે. બીજી અને ત્રીજી ટેસ્ટ મૅન્ચેસ્ટરમાં ઑલ્ડ ટ્રેફર્ડમાં રમાશે.

યજમાન ઇંગ્લૅન્ડની ટીમનું સુકાન કાર્યવાહક સુકાની બેન સ્ટૉક્સ સંભાળશે, જ્યારે જેસન હોલ્ડર વેસ્ટ ઇન્ડિઝનો કૅપ્ટન છે. આ સિરીઝ પર સમગ્ર ક્રિકેટવિશ્ર્વની નજર રહેશે, કારણકે કોરોના વાઇરસના ફેલાવાને લીધે પ્લેયરો નવા નિયંત્રણો મુજબ રમશે, રમતી વખતે તેઓ બૉલ પર થૂંક નહીં લગાડી શકે, સ્ટેડિયમમાં પ્રેક્ષકો નહીં હોય અને ખેલાડીઓ વચ્ચે સેલિબ્રેશન પણ ખૂબ મર્યાદિત રહેશે. કોઈ પ્લેયરો એકમેક સાથે હાથ નહીં મિલાવે, ભેટશે પણ નહીં અને એકમેક સાથે મુઠ્ઠી અથવા કોણી ટકરાવીને ખુશી વ્યક્ત કરશે.