લોકસભાની ચૂંટણી મધ્ય પ્રદેશમાં મહિલા સહિત ત્રણ ચૂંટણી અધિકારીનાં મોત

મધ્ય પ્રદેશમાં મહિલા સહિત ચૂંટણીની ફરજ પર નિમાયેલા ત્રણ સરકારી અધિકારીનાં મોત થયા હોવાની માહિતી મળી હતી.

રાજ્યના મુખ્ય ચૂંટણી અધિકારી વી એલ કાન્તારાવે સોમવારે જણાવ્યા અનુસાર સુનંદા કોટકર (50)ની નિમણૂક છિંદવાડા લોકસભા બેઠક માટે સૌંસાર વિસ્તારમાં આવેલા લોઢીખેડા મતદાન મથક પર કરવામાં આવી હતી, પણ રવિવારે એમને અચાનક બેચેની જણાઇ હતી. અન્ય ચૂંટણી અધિકારીઓ સાથે મતદાન મથક પર પહોંચેલા સુનંદાને અચાનક હૃદયરોગનો હુમલો થયો હતો અને એમને સારવાર અપાય એ અગાઉ જ એમનું અવસાન થયું હતું.

અન્ય કિસ્સામાં સિધી જિલ્લામાં મતદાન મથક પર સુરક્ષા વ્યવસ્થા માટે તહેનાત સબ-ઇન્સ્પેક્ટરનું સોમવારે હૃદયરોગના હુમલાને લીધે અવસાન થયું હતું.

ત્રીજા કિસ્સામાં બાલાઘાટ લોકસભા બેઠક માટે સિઓની ખાતે તહેનાત ચૂંટણી અધિકારીનું રવિવારે સાંજે બ્રેઇન હેમરેજને લીધે અવસાન થયું હતું.

રાજ્યની છ લોકસભા બેઠક – સિધી, શાહડોલ, જબલપુર, મંડલા, બાલાઘાટ અને છિંડવાડા માટે અને છિંદવાડાની વિધાનસભાની બેઠકની ઉપ-ચૂંટણી માટે સોમવારે મતદાન કરવામાં આવ્યું હતું.