11મી એપ્રિલે ચૂંટણીના પ્રથમ તબક્કાનું મતદાન

11મી એપ્રિલે ગુરુવારે લોકસભાની પ્રથમ તબક્કાની 91 બેઠક માટેનો ચૂંટણીપ્રચાર મંગળવારે સાંજે બંધ થયો હતો. 18 રાજ્ય અને બે કેન્દ્રશાસિત પ્રદેશમાં 11મીએ મતદાન થવાનું છે. આંધ્ર પ્રદેશ સિક્કિમ અને ઓડિશામાં વિધાનસભાની બેઠકો માટે પણ ચૂંટણી કરવામાં આવશે. તેલંગણામાં પ્રથમ તબક્કામાં લોકસભાની 17 બેઠક માટે મતદાન કરવામાં આવશે. ઉત્તર પ્રદેશમાં લોકસભાની આઠ બેઠક, ઉત્તરાખંડમાં પાંચ બેઠક, ઓડિશામાં લોકસભાની ચાર અને વિધાનસભાની ર8 બેઠક માટે મતદાન થશે.

આસામમાં લોકસભાની પાંચ બેઠક માટે મતદાન થશે. મહારાષ્ટ્રની સાત, બિહારની ચાર, પશ્ર્ચિમ બંગાળની બે અને જમ્મુ-કાશ્મીરની બે બેઠક માટે મતદાન થશે.

મિઝોરમ, ત્રિપુરા, મણિપુર, છત્તીસગઢ, નાગાલેન્ડ, સિક્કિમ, આંદામાન અને નિકોબાર તથા લક્ષદ્વિપની પ્રત્યેકની એક બેઠક માટે 11મી એપ્રિલે મતદાન થશે. 91 બેઠક માટેના ચૂંટણીપ્રચારમાં હરીફ પક્ષોના નેતાઓના સામસામી આક્ષેપબાજી છવાયેલી રહી હતી. ભાજપ માટે વડા પ્રધાન નરેન્દ્ર મોદી અને પક્ષપ્રમુખ અમિત શાહે પ્રચારકમાન સંભાળી હતી. કૉંગ્રેસ તરફથી રાહુલ ગાંધીએ સભાઓ ગજવી હતી.

આંધ્ર પ્રદેશના મુખ્ય પ્રધાન અને ટીડીપીના વડા એન ચંદ્રાબાબુ નાયડુનો પ્રચાર વડા પ્રધાન નરેન્દ્ર મોદી, તેલંગણાના મુખ્ય પ્રધાન કે ચંદ્રશેખર રાવ અને વાયએસઆર કૉંગ્રેસના પ્રમુખ વાયએસ જગનરેડ્ડી એમ ત્રણ નેતા સામે કેન્દ્રિત થયો હતો. આંધ્ર પ્રદેશ માટે વિશેષ કેટેગરી, અમરાવતી રાજધાનીનું નિર્માણ પોલાવરમ જેવો જંગી પ્રોજેક્ટ વિગેરે મુદ્દાઓ પર વિવિધ હરીફ નેતાઓએ પોતાના વિચાર પ્રગટ કર્યાં હતા.