મુંબઇને વરસાદે પાણી-પાણી કરી દીધું, જનજીવનને ઘેરી અસર

છેલ્લા 24 કલાક દરમિયાન મુંબઇથી કોલાબામાં 38.2 અને સાંતાક્રુઝમાં 37 મીમી વરસાદ નોંધાયો છે. મુંબઇમાં હિંદમાતા, માહિમ સહિતના અનેક વિસ્તારોમાં શનિવારે સવારથી પડેલા મૂશળધાર વરસાદને પગલે ઘુટણસમાણા પાણીનો ભરાવો જાહેર માર્ગો પર થવા પામ્યો હતો. અંધેરી, દાદર, પરેલ, કફ પરેડ અને બોરીવલીમાં સૌથી વધુ વરસાદ પડ્યો હતો. સામાન્ય જનજીવનને આ વરસાદે ઘેરી અસર પહોંચાડી હતી. મુંબઇમાં ભારે વરસાદના કારણે 30 ફ્લાઇટ અને શહેરમાં લોકલ ટ્રેન નિર્ધારિત સમય કરતા 15 મિનિટ મોડી ચાલી રહી છે.

વીકએન્ડ મુંબઇગરાઓ માટે પાણીપાણી બની રહેશે એવી આગાહી વચ્ચે આજે શનિવારે વહેલી સવારથી મુંબઈમાં ભારે વરસાદ પડ્યો હતો. હવામાન ખાતે દ્વારા પહેલા વરસાદથી જ ભારે વરસાદની ચેતવણી આપવામાં આવી હતી. મુંબઈમાં 20 સેન્ટિમીટર સુધી ભારે વરસાદ પડી શકે છે. મુંબઈ અને તેના ઉપનગરીય શહેરોમાં ભારે વરસાદની શક્યતાને ધ્યાનમાં રાખીને એલર્ટ જાહેર કરવામાં આવ્યું છે અને ફોર્સને પણ તૈનાત કરવામાં આવી છે. મહારાષ્ટ્રના કિનારે આવેલા વિસ્તારો ઉપરાંત કેરળ અને લક્ષ્વદીપમાં પણ આગામી 24 કલાકમાં વાતાવરણ ભયાનક બનશે. ભારત હવામાન વિજ્ઞાન વિભાગ (આઇએમડી) દ્વારા રાજ્યના દક્ષિણ ભાગોમાં દક્ષિણ-પશ્ચિમ વરસાદ આવવાની જાહેરાત કરી હતી. તેની અસર ભારે વરસાદના રૂપમાં જોવા મળી શકે છે.