ભાજપના કાર્યકારી પ્રમુખ તરીકે જેપી નાડ્ડાની નિમણૂક

ભાજપના કાર્યકારી પ્રમુખ તરીકે ભૂતપૂર્વ કેન્દ્રીય પ્રધાન જેપી નાડ્ડાની નિમણૂક કરવામાં આવી છે, જોકે, અમિત શાહ પક્ષના રાષ્ટ્રીય પ્રમુખ રહેશે.

આ નિર્ણય સોમવારે યોજાયેલી ભાજપની નિર્ણય લેતી સર્વોચ્ચ સંસ્થા સંસદીય બૉર્ડની બેઠકમાં લેવામાં આવ્યો હતો. આ નિર્ણયની જાહેરાત ભાજપના ભૂતપૂર્વ પ્રમુખ અને સંરક્ષણ પ્રધાન રાજનાથસિંહે બેઠક બાદ કરી હતી. આ બેઠકમાં વડા પ્રધાન નરેન્દ્ર મોદી અને ભાજપ પ્રમુખ અમિત શાહે પણ ભાગ લીધો હતો. એમણે જણાવ્યું હતું કે બૉર્ડે નાડ્ડાને કાર્યકારી પ્રમુખ તરીકે પસંદ કર્યા હતા અને તેઓ ભાજપની સભ્યપદની ઝૂંબેશ તથા સંસ્થાકીય ચૂંટણી પૂરી થાય ત્યાર સુધી આ પદ પર કાર્યરત રહેશે. રાજનાથે અનેક ટ્વિટ દ્વારા જણાવ્યું હતું કે અમિતજીની આગેવાનીમાં ભાજપે અનેક ચૂંટણીઓ જીતી છે. કેન્દ્રીય ગૃહ પ્રધાનનું પદ ગ્રહણ કર્યા બાદ એમણે અન્ય કોઇ નેતાને ભાજપ પ્રમુખનું પદ સોંપવાની વાત કહી હતી. ભાજપે પહેલી વખત આ રીતે કાર્યકારી પ્રમુખની નિમણૂક કરી હતી.