લોકસભાની ચૂંટણીમાં વડા પ્રધાન નરેન્દ્ર મોદી અનપેક્ષિત વર્ગ તરફથી સ્પર્ધાનો સામનો કરી રહ્યા છે. વારાણસીમાં વડા પ્રધાન મોદીની સામે તમિળનાડુના 111 જેટલા સંતપ્ત ખેડૂતોએ ઉમેદવારી નોંધાવવાનો નિર્ણય લીધો છે.

નેશનલ ડેમોક્રેટિક અલાયન્સ (એનડીએ)ની સરકાર પ્રત્યે પોતાનો અસંતોષ વ્યક્ત કરવાનો આ ખેડૂતોનો ઉદ્દેશ છે. તેઓ જણાવે છે કે 2014ની ચૂંટણીમાં આપેલાં વચનો પાળવામાં એનડીએ સરકાર નિષ્ફળ નીવડી છે.

તિરૂચી જિલ્લાના તિરમપલયમ ગામનો 30 વર્ષીય ખેડૂત પ્રેમકુમાર જણાવે છે કે તેના અધિકારો અને આજીવિકા માટેની આ લડત છે. એક અંગ્રેજી વાણિજ્ય અખબારને ફોન પર પ્રેમકુમારે જણાવ્યું હતું કે હું વારાણસીમાંથી ઉમેદવારી નોંધાવીશ. વારાણસીમાં અમારા સાથી ખેડૂતોને અમે એવો સંદેશો પહોંચાડવા માગીએ છીએ કે પાણી તથા કૃષિ ઉત્પાદન માટે ‘બમણા’ ભાવ વિશે ખોટા વચન આપીને અમને કેવી રીતે છેતરવામાં આવ્યા છે. પ્રેમકુમારના છ સભ્ય માટે આવકનો એકમાત્ર સ્રોત ખેતીવાડી છે. પાંચ એકર જમીન પર તે ડાંગર અને શેરડી ઉગાળે છે પરંતુ છ લાખ રૂપિયાનું કરજ ચૂકવવા અસમર્થ છે. તેના મોટા ભાગના ખેડૂતબંધુઓ ડાંગર, શેરડી અને કેળાં ઉગાળે છે.

NDAના બિહારના 39 ઉમેદવારો જાહેર

શત્રુઘ્ન કોંગ્રેસમાં જોડાશે ?

2019 લોકસભા ચૂંટણીના એલાન પહેલાથી જ ચર્ચા’ ચાલી રહી કે બિહારમાં ભાજપ શત્રુઘ્ન સિન્હાને ટિકિટ આપશે નહી. શનિવારે પક્ષે ટિકિટનું એલાન કર્યું હતું. જેમાં આ અટકળ સાચી પડી હતી. પક્ષે શત્રુધ્ન સિન્હાથી દુરી બનાવી લીધી છે અને તેની જગ્યાએ પટના સાહિબની બેઠકથી કેન્દ્રીય મંત્રી રવિશંકર પ્રસાદને મેદાનમાં ઉતારવામાં આવ્યા છે. તેવામાં હવે શત્રુઘ્ન સિન્હા શું પગલું ભરે છે તે જોવાનું રહ્યું . તેમજ શત્રુઘ્ન કોંગ્રેસમાં જોડાશે તેવી પણ અટકળો શરૂ થઈ છે.શત્રુઘ્ન સિન્હા ભાજપની સતત નિંદા કરતા આવ્યા છે. ક્યારેક મંચ ઉપરથી તો ક્યારેક સોશિયલ મિડિયા ઉપર ભાજપની નીતિ અને વરિષ્ઠ નેતાઓ ઉપર શાબ્દિક પ્રહાર કરી ચૂક્યા છે. જેને લઈને શત્રુઘ્નને ભાજપ ટિકિટ નહી આપે તે નિશ્ચિત લાગતું હતું. તેમજ આગામી 24-25 માર્ચના શત્રુઘ્ન કોંગ્રેસમાં જોડાશે તેવા પણ અહેવાલ મળ્યા છે.

કેન્દ્રિય પ્રધાન કૃષ્ણારાજ અને ‘પછાત જાતિ રાષ્ટ્રીય પંચ’ના અધ્યક્ષ રામશંકર કથેરિયા સહિત છ વર્તમાન સાંસદોને પ્રથમ યાદીમાં ટિકિટ ન આપી ભાજપે આશ્ર્ચર્ય સર્જ્યું છે. ભાજપે વારાણસથી વડા પ્રધાન મોદીને, ગૃહપ્રધાન રાજનાથસિંહને લખનૌથી, સ્મૃતિ ઈરાનીને અમેઠીમાંથી ઉમેદવાર બનાવ્યા છે. ભાજપની જાહેર થયેલી પ્રથમ યાદીમાં કૃષ્ણારાજ (શાહજહાનપુર- એસસી), રામશંકર કથેરિયા (આગ્રા- એસસી), અંશુલ વર્મા (હરદોઈ-એસસી), બાબુલાલ ચૌધરી (ફતેપુર સિક્રી), અંજુ બાલા (મિસરિબ- એસસી) અને સત્યપાલ સિંહ (સંભલ) એમ છ સાંસદની ટિકિટ કાપી છે.યુપીના બાગપત, બિજનોર, ગૌતમબુદ્ધનગર, ગાઝિયાબાદ, કૈરાના, મેરઠ, મુઝફ્ફરનગર અને સહરાનપુરમાં 11મી એપ્રિલે પ્રથમ તબક્કાનું મતદાન હાથ ધરવામાં આવશે.

કાનપુરથી ભૂતપૂર્વ કેન્દ્રીય પ્રધાન મુરલી મનોહર જોશી, પિલીભીતથી કેન્દ્રીય પ્રધાન મેનકા ગાંધી, તેમના પુત્ર અને સુલ્તાનપુરના સાંસદ વરુણ ગાંધીને ટિકિટ મળશે કે નહીં તે બાબતમાં હજુ કંઈ માહિતી મળી નથી. આ બેઠકોના ઉમેદવારના નામ પ્રથમ યાદીમાં જાહેર કરવામાં આવ્યા ન હતા.

પ્રથમ યાદીમાં રાઘવ લખનપાલ (સરહાનપુર), સંજીવકુમાર બલિયાન (મુઝફફરપુર), કુંવર ભારતેન્દ્ર સિંહ (બીજનોર), રાજેન્દ્ર અગ્રવાલ (મેરઠ), કેન્દ્રિય પ્રધાન સત્યપાલસિંહ (બાગપત), કેન્દ્રીય પ્રધાન વી. કે. સિંહ (ગાઝિયાબાદ) અને કેન્દ્રીય પ્રધાન મહેશ શર્મા (ગૌતમ બુદ્ધનગર)ને ઉમેદવાર તરીકે જાહેર કરાયા હતા.

વિવાદાસ્પદ નિવેદનો માટે જાણીતા ઉન્નાવના સાંસદ સાક્ષી મહારાજને પણ ટિકિટ મળી છે. તાજેતરમાં ભાજપ નેતૃત્વને આડકતરી ચીમકી આપતા સાક્ષી મહારાજે કહ્યું હતું કે “જો મારી બાબતમાં કોઈ અન્ય નિર્ણય લેવામાં આવે તો ભાજપ માટે પરિણામ સારું નહીં રહેશે.

ઉમેદવારોની યાદી જાહેર થઈ તે પછી કેન્દ્રીય પ્રધાન સ્મૃતિ ઈરાનીએ સોશિયલ મીડિયા પર વડા પ્રધાન મોદી, અમિત શાહનો આભાર માન્યો હતો. તેમણે કહ્યું કે ‘બધા ઉમેદવારોને મારા અભિનંદન. દરેક મતવિસ્તારમાં કમળ ખીલે તેવા પ્રયત્ન કરી ફરી એકવાર મોદી સરકાર લાવીએ. મથુરાથી ટિકિટ મેળવનારા હેમા માલિનીએ કહ્યું કે, “મને ફરી ટિકિટ આપવા બદલ મોદીજી, અમિત શાહજી અને ચૂંટણી સમિતિના અન્ય સભ્યોનો હું આભાર માનું છું.2014ની ચૂંટણીમાં મોદીએ 5,81,002 મત મેળવી ‘આપ’ના નેતા અરવિંદ કેજરીવાલને 3,71,784 મતથી હરાવ્યા હતા. અમેઠીમાં રાહુલ ગાંધીએ સ્મૃતિ ઈરાનીને લગભગ એક લાખ મતથી હરાવ્યા હતા.

વડા પ્રધાન નરેન્દ્ર મોદીએ ભારતીય હવાઇદળ દ્વારા પાકિસ્તાનના બાલાકોટમાંની ત્રાસવાદી છાવણીઓ પર કરાયેલા હુમલા અંગે શંકા વ્યક્ત કરનારા હરીફ રાજકીય પક્ષોના નેતાઓની આકરી ટીકા કરતા શુક્રવારે જણાવ્યું હતું કે ભારતે કરેલા હવાઇ હુમલા અંગે શંકા વ્યક્ત કરનારા લોકો આપણા લશ્કરનું અપમાન કરી રહ્યા છે. મોદીએ કૉંગ્રેસની વિદેશમાંની બાબતો સંભાળતા સામ પિત્રોડાની ટીકા કરતા ટ્વીટ કર્યું હતું કે મુંબઈ પરના ત્રાસવાદી હુમલા બાદ ભારત હવાઇ હુમલા કરી શક્યું હોત, પરંતુ હવે આ રીતે જવાબ આપવાનો સમય આવી ગયો છે.

મોદીએ જણાવ્યું હતું કે કૉંગ્રેસ પક્ષ પોતાના શાસનકાળમાં ત્રાસવાદી પરિબળોને જડબાતોડ જવાબ આપવાની અનિચ્છા ધરાવતો હતો, પરંતુ હવે ‘નવું ભારત’ છે અને અમે ત્રાસવાદીઓ જે ભાષામાં સમજે છે એમાં જવાબ આપવામાં માનીએ છીએ.

જમ્મુ અને કાશ્મીરના પુલવામામાં કેન્દ્રીય અનામત પોલીસ દળના 40 જવાનને શહીદ કરનારો હુમલો ચૂંટણીમાં મત મેળવવા માટેનું ‘ષડ્યંત્ર’ ગણાવનારા સમાજવાદી પક્ષના નેતા રામ ગોપાલ યાદવની પણ મોદીએ આકરી ટીકા કરી હતી.

દરમિયાન, કેન્દ્રના પ્રધાન અરુણ જેટલીએ સામ પિત્રોડાની ભારતીય હવાઇદળના હુમલાને લગતી ટિપ્પણીને ‘કમનસીબ’ અને પાકિસ્તાન માટે ‘આશીર્વાદ’ સમાન ગણાવી હતી.

જેટલીએ જણાવ્યું હતું કે દુનિયામાં ભારત સિવાય કોઇપણ દેશ ત્રાસવાદીઓ અને દુશ્મનો પરની સર્જિકલ સ્ટ્રાઇકની ટીકા નથી કરતો.

સમાજવાદી પક્ષના વડા અખિલેશ યાદવે જણાવ્યું હતું કે દેશના સશસ્ત્ર દળોનાં બલિદાનની સામે ક્યારેય સવાલ ઉઠાવવો ન જોઇએ, પરંતુ કેન્દ્ર સરકારે પોતે જ ‘ભારતીય લશ્કર’ હોવાનો દેખાવ કરવો ન જોઇએ.

તેમણે જણાવ્યું હતું કે લોકશાહીમાં રાજકારણીઓને સવાલો કરવાનો જનતાનો મૂળભૂત અધિકાર છે.

ભારતીય જનતા પક્ષના પ્રમુખ અમિત શાહે જણાવ્યું હતું કે વિરોધ પક્ષોના નેતાઓના દિલ ત્રાસવાદીઓ માટે ધડકે છે, જ્યારે અમારું હૃદય ત્રિરંગા માટે ધબકે છે.