રશિયાના રાષ્ટ્રપતિ વ્લાદિમીર પુતિન BRICS Summit 2026માં ભાગ લેવા માટે ભારત પહોંચ્યા છે. પુતિન શુક્રવારે દિલ્હીના પાલમ એરફોર્સ સ્ટેશન પહોંચ્યા હતા. ભારત પહોંચવા પર વિદેશ રાજ્યમંત્રી કીર્તિક વર્ધન સિંહે તેમનું સ્વાગત કર્યું. તેઓ BRICS Summitમાં ભાગ લેવાની સાથે પ્રધાનમંત્રી નરેન્દ્ર મોદીની સાથે મુલાકાત કરશે. બન્ને નેતાઓ વચ્ચે દ્વિપક્ષીય મુદ્દા પર વાતચીત થશે. છેલ્લા 9 મહિનામાં પુતીનનો આ બીજો ભારત પ્રવાસ છે. આની પહેલા તેઓ 5 ડિસેમ્બર 2025ના રોજ ભારત આવ્યા હતા.
પુતિનના દિલ્હી પહોંચતા પહેલા જ સુરક્ષા એજન્સીઓએ તૈયારીઓ પૂર્ણ કરી લીધી હતી. એરપોર્ટથી હોટેલ અને ત્યારબાદ ભારત મંડપમ જવાના તેમના રસ્તાઓ પર ખાસ નજર રાખવામાં આવી રહી છે.
પુતિનના રોકાવાની શક્યતા હોય તેવી હોટેલમાં સુરક્ષાની ખાસ વ્યવસ્થા કરવામાં આવી છે. હોટેલ અને તેની આસપાસ અનેક સ્તરો પર સુરક્ષાકર્મીઓને તૈનાત કરવામાં આવ્યા છે. રશિયન સુરક્ષા ટીમ પણ અગાઉથી જ દિલ્હી પહોંચી ચૂકી છે. આ ટીમે હોટેલ અને આસપાસના વિસ્તારની સુરક્ષા વ્યવસ્થાનું નિરીક્ષણ કર્યું છે.
અમદાવાદ શહેરના સરદાર વલ્લભભાઈ પટેલ ઇન્ટરનેશનલ એરપોર્ટ પર 7/9/26 મોડી રાતથી વહેલી સવાર સુધી હાઈ વૉલ્ટેજ ડ્રામા સર્જાયો હતો, જેમાં વિદેશથી આવેલા પેસેન્જરને દાણચોરીની કથિત મદદગારી કરવા બદલ બે કસ્ટમના સુપરિટેન્ડન્ટ અને બે ઇન્સ્પેક્ટરને સસ્પેન્ડ કરી દેવામાં આવતા સમગ્ર કસ્ટમ વિભાગમાં ફફડાટ અને ચર્ચા જામી હતી.
અમદાવાદના એરપોર્ટ ઉપર છેલ્લા ત્રણ વર્ષથી ગાંજાની હેરાફેરી ફોરેન કરન્સી અને સોનાના દાગીનાની દાણચોરી વધી ગઈ હતી અને કસ્ટમ વિભાગે પેસેન્જરોને પકડી ગુના પણ દાખલ કરીને ધરપકડ કરી હોવાના કિસ્સા પણ નોંધાયા હાત. તેમ છતાં ઉચ્ચકક્ષાએ કસ્ટમના અધિકારીઓને શંકા હતી કે એરપોર્ટ ઉપર કેટલાક અધિકારીઓ કસ્ટમ વિભાગના નિયમોનું પાલન કરતા નથી. જેના આધારે કેટલાક પુરાવા કસ્ટમને મળ્યા હતા. ત્યારબાદ એરપોર્ટ કસ્ટમ્સના બે સુપરિટેન્ડન્ટ કુલદીપ પાલિવાલ અને વિનય અરોરા તેમજ બે કસ્ટમ ઇન્સ્પેક્ટર ભરત મલ મીના અને કૌશલ કિશોરને સસ્પેન્ડ કરી દેવામાં આવ્યા હોવાની માહિતી સૂત્રોએ આપી હતી.
એરપોર્ટ ઉપર જે હાઇવોલ્ટેજ ડ્રામા થયો તેના સીસીટીવી ફૂટેજ દ્વારા પણ આખી હકીકત જાણી શકાય છે. અમદાવાદ કસ્ટમના ટોચના સૂત્રોનો સંપર્ક કરવામાં આવતા તેમણે અધિકારીઓ સામે સસ્પેન્શનના પગલાં લીધા હોવાનું જણાવીને વધુ માહિતી આપવાનો ઇનકાર કર્યો હતો અને કસ્ટમના અધિકારીઓએ ફરજ દરમિયાન બોડીવોર્ન કેમેરા લગાવ્યા ન હતા તેવું કારણ બતાવ્યું હતું, પરંતુ બોડી વોર્ન કેમેરા નહીં લગાવવાથી અધિકારીઓને સસ્પેન્ડ કરી દેવામાં આવે તેવી વાત ગળે ઉતરે તેમ નથી. કસ્ટમના અધિકારીઓનું ચોક્કસપણે માનવું છે કે કેટલાક અધિકારીઓ દાણચોરી કરવામાં પેસેન્જરની મદદગારી કરી રહ્યા હતા.
હવે નજીકના દિવસોમાં વધુ કસ્ટમના અધિકારીઓ સામે કાર્યવાહી કરવામાં આવે તેમ પણ સૂત્રોએ જણાવ્યું હતું. અગાઉ પણ એક પેસેન્જર દાણચોરીનું સોનું લઈને બહાર નીકળી ગયો હતો અને એરપોર્ટ સર્કલ પાસે બે પોલીસ કોન્સ્ટેબલ દ્વારા તેનું અપહરણ કરીને લૂંટ ચલાવી હતી. આ પ્રકરણમાં પણ કસ્ટમના અધિકારીઓની મદદ વગર આ પ્રકારે ગોલ્ડ બહાર નીકળવું અશક્ય હોવાનું કસ્ટમ વિભાગ માની રહ્યું છે.
ચાલુ વર્ષની ટર્મના તમામ હોદ્દેદારોને આગામી વર્ષ માટે પણ જવાબદારી સોંપવાનો કારોબારી મિટીંગમાં નિર્ણય
ગુજરાતના હીરા ઉદ્યોગપતિઓના સૌથી મોટા સંગઠન સુરત ડાયમંડ એસોસીએશનની કારોબારી મિટીંગ તા. 7 સપ્ટેમ્બર, 2026ના રોજ યોજાઇ હતી. મિટીંગમાં એસોસીએશનના વર્ષ 2026-27 માટે નવા હોદ્દેદારોની વરણી અંગે મહત્વપૂર્ણ નિર્ણય લેવામાં આવ્યો હતો. ચાલુ વર્ષની ટર્મમાં ફરજ બજાવી રહેલા તમામ હોદ્દેદારોને આગામી ટર્મ માટે પણ રિપીટ કરવાનો નિર્ણય સર્વાનુમતે લેવામાં આવ્યો હતો.
એસોસીએશન દ્વારા જાહેર કરાયેલી વિગતો મુજબ વર્ષ 2026-27 માટે પણ હાલના હોદ્દેદારો જ પોતાની જવાબદારી સંભાળશે. આ નિર્ણયથી એસોસીએશનની વર્તમાન ટીમ પર કારોબારી સભ્યો દ્વારા ફરી એકવાર વિશ્વાસ વ્યક્ત કરવામાં આવ્યો છે.
વર્ષ 2026-27 માટેની હોદ્દેદારોની વરણીમાં પ્રમુખ તરીકે શ્રી જગદીશભાઇ પી. ખુંટ, ઉપપ્રમુખ તરીકે શ્રી જયેશભાઇ એમ. પટેલ, મંત્રી તરીકે ધીરુભાઇ પી. સવાણી, સહમંત્રી તરીકે શ્રીકિર્તીકુમાર એલ. શાહ તથા ખજાનચી તરીકે શાંતિલાલ વી. ધાનાણીની જવાબદારી યથાવત્ રાખવામાં આવી હોવાનું એસોસીએશનની અખબારી યાદીમાં જણાવાયું છે.
એસોસીએશનની કારોબારી મિટીંગમાં સર્વાનુમતે લેવાયેલા આ નિર્ણયને પગલે આગામી વર્ષ દરમિયાન પણ સંગઠનની કામગીરી અને હીરા ઉદ્યોગ સાથે સંકળાયેલા વિવિધ પ્રશ્નો અંગે હાલની ટીમ જ આગેવાની કરશે. હોદ્દેદારોની પુનઃવરણી અંગેનો નિર્ણય એસોસીએશનની સતત કામગીરી અને વર્તમાન ટીમના અનુભવને ધ્યાનમાં રાખીને લેવાયો હોવાનું મિટીંગની વિગતો પરથી સ્પષ્ટ થાય છે.
સુરતના હીરા ઉદ્યોગ પર પ્રભુત્વ ધરાવતા કુત્રિમ હીરાના ઉત્પાદકો, વેપારીઓ અને દલાલોની ઉપસ્થિતિમાં
મંદીનો માહોલ નથી છતાં પોલિશ્ડ લેબગ્રોનના ભાવ વધતા નથી, બીજી તરફ લેબગ્રોન રફ ડાયમંડના ભાવ સતત વધી રહ્યા છે
તા.7, આજે સોમવારે સાંજે કતારગામ, આંબાતલાવડી સ્થિત પાટીદાર વાડી ખાતે યોજાયેલા લેબગ્રોન ડાયમંડ એસોસીએશનના છઠ્ઠા સ્નેહ મિલન સમારોહમાં સુરતમાં લેબગ્રોન ડાયમંડ ઉદ્યોગની ઇકો સિસ્ટમ સાથે સંકળાયેલા મોટા ભાગના ઉત્પાદકો, કટ એન્ડ પોલિશ્ડ કરતા કારખાનેદારો, વેપારીઓ અને દલાલોની ઉપસ્થિતિ વચ્ચે પોલિશ્ડ (તૈયાર) લેબગ્રોન ડાયમંડના ભાવમાં 20 ટકાનો વધારો કરવાનો સામૂહિક અને સર્વસંમત નિર્ણય લેવામાં આવ્યો છે. આવતીકાલ તા.8મી સપ્ટેમ્બરથી અમલમાં આવે એ રીતે પોલિશ્ડ લેબગ્રોન ખરીદનારા વેપારીઓ, ઝવેરાત ઉત્પાદકોને પોલિશ્ડ લેબગ્રોન ડાયમંડના ભાવ વધારા અંગે વિધિવત રીતે જાણ કરવામાં આવશે.
લેબગ્રોન ડાયમંડ એસોસીએશનના સ્નેહ મિલન કમ જાહેર મિટીંગમાં લેવાયેલા નિર્ણયની માહિતી આપતા એસોસીએશનના પ્રમુખ બાબુભાઇ વાગાણી, ઉપપ્રમુખ હરેશ નારોલા સહિતના આગેવાનોએ જણાવ્યું હતું કે એક તરફ રફ લેબગ્રોન ડાયમંડના ભાવ સતત વધી રહ્યા છે અને ચીનથી આયાત થતાં રફ ડાયમંડમાં તો છાશવારે વધારો થાય છે. બીજી તરફ પોલિશ્ડ લેબગ્રોન ડાયમંડના ભાવ વધતા નથી. આગેવાનોએ ત્યાં સુધી કહ્યું કે એવું પણ નથી કે બજારમાં લેબગ્રોનની ડિમાંડ નથી કે મંદીનો માહોલ છે. કોઇપણ પ્રકારની પ્રતિકૂળ સ્થિતિ ન હોવા છતાં પોલિશ્ડ લેબગ્રોન ડાયમંડના ભાવ વધતા નથી, તેની પાછળ રહેલા કારણોની આ મિટીંગમાં ચર્ચા કરવામાં આવી હતી અને સર્વાનુમતે એવો સામૂહિક નિર્ણય લેવામાં આવ્યો છે કે પોલિશ્ડ લેબગ્રોન ડાયમંડના ભાવમાં 20 ટકા સુધીનો વધારો કરવો. જે તે કેરેટ, ક્લેરિટી, પ્યોરિટી, કલર વગેરે જોઇને પોલિશ્ડ લેબગ્રોન ડાયમંડના ભાવમાં સરવાળે 20 ટકાનો વધારો કરવો.
લેબગ્રોન ડાયમંડ સાથે સંકળાયેલા તમામ લોકોને સંગઠન દ્વારા લેવામાં આવેલા આ નિર્ણયની તાકીદે જાણ કરવી. લેબગ્રોન ડાયમંડ એસોસીએશને હીરાની દલાલી કરતા વ્યવસાયિકોને પણ અપીલ કરી હતી કે જ્યારે પણ તેઓ ગ્રાહકને પોલિશ્ડ લેબગ્રોન બતાવવા જ્યાર ત્યારે ભાવમાં કોઇપણ પ્રકારની બાંધછોડ કરવી નહીં અને બજારભાવ કરતા 20 ટકા ભાવ વધારીને જ કિંમત કહેવી.
અન્ય મહત્વના નિર્ણય અંગે લેબગ્રોન ડાયમંડ એસોસીએશનના પ્રમુખ બાબુભાઇ વાઘાણી અને હરેશ નારોલાએ જણાવ્યું કે હાલમાં જે 7 ટકા વટાવનો ધારો ચાલી આવે છે તે પણ વેચનારાઓ માટે નુકસાની સમાન છે. 7 ટકા વટાવને બદલે હવેથી માત્ર 4 ટકા વટાવ કાપવાનો ધારો તાત્કાલિક અસરથી અમલી બનાવવા માટે મિટિંગમાં નિર્ણય લેવામાં આવ્યો છે.
લેબગ્રોન ડાયમંડ ઉદ્યોગ સાથે સંકળાયેલા અનેક આગેવાનો સર્વ બાબુભાઇ વાઘાણી, પ્રમુખ, લેબગ્રોન ડાયમંડ એસોસીએશન, હરેશ નારોલા, ઉપપ્રમુખ લેબગ્રોન ડાયમંડ એસોસીએશન, જયેશ લાઠીયા, અજય દરેડ, પિયુષ સુદાણી, મુકેશભાઇ પટેલ (ગ્રીન લેબ), કેશુભાઇ ગોટી, ચિરાગ શાહ સહિતના આગેવાનોએ વર્તમાન પરિસ્થિતિમાં લેબગ્રોન ડાયમંડ ઉદ્યોગને ટકાવી રાખવા સંતુલન જાળવી રાખવા માટે શું કરવું એ અંગે જુદા જુદા વિષયો પર ઉપયોગી માર્ગદર્શન પૂરું પાડ્યું હતું.
ટેક્સટાઇલ ઉદ્યોગ માટે વધુ એક મહત્વની જવાબદારી: હિમાંશુ એચ. બોડાવાલાની ફિયાસ્વી મુંબઈના ચેરમેન તરીકે સર્વાનુમતે વરણી
સુરતના અગ્રણી ટેક્સટાઇલ ઉદ્યોગપતિ અને સધર્ન ગુજરાત ચેમ્બર ઓફ કોમર્સના માજી પ્રમુખ હિમાંશુ બોડાવાલાને ફેડરેશન ઓફ ઇન્ડિયન આર્ટ સિલ્ક વિવિંગ ઇન્ડસ્ટ્રી (ફિયાસ્વી)ના વર્ષ 2026-27 માટે ચેરમેનની જવાબદારી
સુરતના ટેક્સટાઇલ ઉદ્યોગના અગ્રણી ઉદ્યોગપતિ અને સધર્ન ગુજરાત ચેમ્બર ઓફ કોમર્સ એન્ડ ઇન્ડસ્ટ્રી (SGCCI)ના માજી પ્રમુખ હિમાંશુ એચ. બોડાવાલાની ફેડરેશન ઓફ ઇન્ડિયન આર્ટ સિલ્ક વિવિંગ ઇન્ડસ્ટ્રી (FIASVI)ના ચેરમેન તરીકે વર્ષ 2026-27 માટે સર્વાનુમતે વરણી કરવામાં આવી છે. આ નિમણૂકને સમગ્ર ટેક્સટાઇલ ઉદ્યોગ માટે મહત્વપૂર્ણ જવાબદારી તરીકે જોવામાં આવી રહી છે.
ફિયાસ્વી, મુંબઈની 02 સપ્ટેમ્બર, 2026ના રોજ મુંબઈ ખાતે યોજાયેલી 49મી વાર્ષિક સામાન્ય સભામાં આ વરણી કરવામાં આવી હતી. ધ સિન્થેટિક એન્ડ આર્ટ સિલ્ક મિલ્સ રિસર્ચ એસોસિએશન (SASMIRA)ના બોર્ડરૂમ ખાતે યોજાયેલી આ સામાન્ય સભામાં મિહિર મહેતા પ્રમુખ, હિમાંશુ એચ. બોડાવાલા ચેરમેન અને અમિતાબેન યવલે વાઇસ ચેરમેન તરીકે વર્ષ 2026-27 માટે સર્વાનુમતે વરણી કરવામાં આવી હતી.
લાંબા સમયથી ટેક્સટાઇલ ઉદ્યોગ સાથે સક્રિય જોડાણ
હિમાંશુ એચ. બોડાવાલા લાંબા સમયથી ટેક્સટાઇલ ઉદ્યોગ સાથે સક્રિય રીતે સંકળાયેલા છે. તેઓ અગાઉ ફિયાસ્વીના વાઇસ ચેરમેન તરીકે પણ જવાબદારી નિભાવી ચૂક્યા છે. આ ઉપરાંત તેઓ ધ સધર્ન ગુજરાત ચેમ્બર ઓફ કોમર્સ એન્ડ ઇન્ડસ્ટ્રીના ભૂતપૂર્વ પ્રમુખ રહી ચૂક્યા છે અને હાલમાં ધી સુરત આર્ટ સિલ્ક ક્લોથ મેન્યુફેક્ચરર્સ એસોસિએશન (SASM)ના વાઇસ ચેરમેન તરીકે સેવા આપી રહ્યા છે.
સુરતના ટેક્સટાઇલ ઉદ્યોગમાં લાંબા સમયથી સક્રિય રહેલા બોડાવાલાનું ઉદ્યોગ સાથેનું જોડાણ માત્ર વ્યવસાય પૂરતું મર્યાદિત નથી રહ્યું. ઉદ્યોગની વિવિધ સંસ્થાઓમાં જવાબદારી સંભાળીને તેમણે સંગઠનાત્મક સ્તરે પણ મહત્વની ભૂમિકા ભજવી છે. તેમના આ અનુભવને ધ્યાનમાં લેતા ફિયાસ્વીના ચેરમેન તરીકેની નવી જવાબદારી ટેક્સટાઇલ ઉદ્યોગના વિવિધ પ્રશ્નો અને પડકારોને રાષ્ટ્રીય સ્તરે રજૂ કરવામાં ઉપયોગી બની શકે છે.
હિમાંશુ એચ. બોડાવાલાની ફિયાસ્વીના ચેરમેન તરીકે સર્વાનુમતે વરણી બદલ સમગ્ર ટેક્સટાઇલ ઉદ્યોગ તરફથી તેમને હાર્દિક અભિનંદન અને શુભેચ્છાઓ પાઠવવામાં આવી છે.
સુરતના ટેક્સટાઇલ ઉદ્યોગમાં આગવું સ્થાન ધરાવતા બોડાવાલાને હવે આર્ટ સિલ્ક વિવિંગ ઇન્ડસ્ટ્રીની રાષ્ટ્રીય સ્તરની સંસ્થા FIASVIનું નેતૃત્વ કરવાની તક મળી છે. તેમની નવી જવાબદારી સુરતના ટેક્સટાઇલ ઉદ્યોગ માટે પણ ગૌરવની બાબત બની છે.
આજે બુધવાર, તા.2 સપ્ટેમ્બર 2026ના રોજ, FOSTA બોર્ડરૂમ ખાતે શહેરની વિવિધ ટેક્સટાઇલ માર્કેટના કાપડ વેપારીઓની મિટીંગ મળી હતી. આ મિટીંગની મુખ્ય કાર્યસૂચિ પ્રોસેસર્સ એસોસિએશન દ્વારા પ્રસ્તાવિત દર વધારા પર ચર્ચા વિચારણા કરીને વ્યાપારીક હિત જળવાય તેવી કાર્યવાહી કરવા અંગે નિર્ણય લેવાનો હતો.
મીટિંગ દરમિયાન, વેપારીઓએ પોતાના મંતવ્યો વ્યક્ત કરતા જણાવ્યું હતું કે પ્રોસેસર્સ એસોસિએશન દ્વારા લેવાયેલો નિર્ણય વ્યાજબી નથી. વેપારીઓનો આગ્રહ હતો કે આ પ્રકારનો નીતિ વિષયક નિર્ણય લેતા પહેલા, પ્રોસેસર્સ એસોસિએશને FOSTA અને વેપારીઓ સાથે પરામર્શ કરવો જોઇતો હતો. ટેક્સટાઇલ વેપારીઓ પણ ઇન્ડસ્ટ્રીઝના એક મહત્વના સ્ટેક હોલ્ડર છે અને તેમની પરિસ્થિતિઓને સમજી યોગ્ય નિષ્કર્ષ પર પહોંચી શકાયું હોત. પણ કમનસીબે વેપારીઓને વિશ્વાસમાં લીધા વગર નિર્ણય લેવાયો છે જે દુખદ છે.
ટેક્સટાઇલ વેપારીઓએ વધુમાં ટિપ્પણી કરી હતી કે યોગ્ય પરામર્શ અને સર્વસંમતિ વિના દર વધારો એક સરમુખત્યારશાહી વલણ દર્શાવે છે, જે વ્યવસાયિક હિત માટે હાનિકારક છે.
મીટિંગમાં હાજર વેપારીઓએ FOSTAને આ બાબતે પ્રોસેસર્સ એસોસિએશન સાથે વાતચીત કરવા વિનંતી કરી. તેમણે વિનંતી કરી હતી કે 7 સપ્ટેમ્બરના રોજ નિર્ધારિત પ્રસ્તાવિત દર વધારાને હાલ પૂરતો મુલતવી રાખવામાં આવે, જેથી સર્વસંમતિના આધારે નિર્ણય લેવા માટે તમામ હિસ્સેદારો વચ્ચે યોગ્ય ચર્ચા થઈ શકે.
FOSTA એ પ્રોસેસર્સ એસોસિએશનને પણ પત્ર લખ્યો હતો, જેમાં ભાર મૂક્યો હતો કે આવા નિર્ણયો બંને ક્ષેત્રો વચ્ચે સતત પરસ્પર સંકલન સુનિશ્ચિત કરવા માટે સંગઠન સાથે પરામર્શ કરીને લેવા જોઈએ.
વૈશ્વિક બજારમાં વ્યાજદરો, ડોલર અને ક્રૂડ ઓઈલના ભાવમાં થયેલા ફેરફારોને કારણે સોના અને ચાંદીના ભાવમાં મોટો ઘટાડો જોવા મળ્યો છે. વાયદા બજારમાં વેચવાલીના ભારે દબાણ વચ્ચે સોના-ચાંદીના ભાવમાં કડાકો બોલાતા રોકાણકારોમાં ધ્રાસકો પડ્યો છે. છેલ્લા એક અઠવાડિયામાં જ બંને કિંમતી ધાતુઓમાં 6% થી વધુનો મોટો ઘટાડો નોંધાયો છે.
સોનાનો અગાઉનો બંધ ભાવ (Prev. Close) 151729.00 હતો. આજે સોનું 150033.00 ના ભાવ પર ઓપન થયું હતું અને ટ્રેડિંગ દરમિયાન 149665.00 ની નીચલી સપાટી સુધી પહોંચી ગયું હતું. દિવસ દરમિયાન સોનામાં ₹2,000 થી વધુનો ઘટાડો જોવા મળ્યો હતો.
ચાંદી (Silver December Future): ચાંદીનો અગાઉનો બંધ ભાવ (Prev. Close) 235441.00 હતો. આજે ચાંદી 232536.00 ની નીચી સપાટી પર ઓપન થઈ હતી અને ઘટાડો વધીને 231914.00 ના લેવલ સુધી પહોંચ્યો હતો. ચાંદીના ભાવમાં ₹3,500 થી વધુનો કડાકો નોંધાયો હતો.
સોના-ચાંદીના ભાવ ઘટવાના મુખ્ય કારણો
યુએસ બોન્ડ યીલ્ડ અને ડોલર ઇન્ડેક્સમાં ઉછાળો: અમેરિકી ડોલર ઇન્ડેક્સ 99 ની ઉપર પહોંચી ગયો છે અને 10-વર્ષની યુએસ બોન્ડ યીલ્ડ 4.80% ને વટાવી ગઈ છે. સોનું અને ચાંદી નોન-યીલ્ડીંગ એસેટ હોવાથી, બોન્ડ યીલ્ડ વધતાં રોકાણકારો કિંમતી ધાતુઓમાંથી નાણાં ખેંચી રહ્યા છે.
ક્રૂડ ઓઈલના વધતા ભાવ અને ફુગાવાની ચિંતા: પશ્ચિમ એશિયામાં વધી રહેલા તણાવને કારણે ક્રૂડ ઓઈલના ભાવ (WTI Crude) $96 પ્રતિ બેરલને વટાવી ગયા છે. ક્રૂડ મોંઘું થવાથી વૈશ્વિક સ્તરે ફુગાવો (મોંઘવારી) વધવાની ભીતિ સર્જાઈ છે.
વ્યાજદરમાં કપાત વિલંબિત થવાની આશંકા: સતત વધી રહેલા ફુગાવાના કારણે યુએસ ફેડરલ રિઝર્વ અને અન્ય મધ્યસ્થ બેંકો વ્યાજદરમાં ઝડપી ઘટાડો નહીં કરે તેવી શક્યતા પ્રબળ બની છે. લાંબા સમય સુધી વ્યાજદર ઊંચા રહેવાની ધારણાથી સોના-ચાંદી પર દબાણ વધ્યું છે.
સેફ-હેવન માગ પર મજબૂત ડોલર ભારે પડ્યો: સામાન્ય રીતે ભૌગોલિક તણાવ સમયે સોનામાં સુરક્ષિત રોકાણ (Safe-Haven Demand) વધતું હોય છે, પરંતુ અત્યારે મજબૂત ડોલર અને બોન્ડ યીલ્ડનો પ્રભાવ એટલો વધારે છે કે સેફ-હેવન ખરીદી પણ ભાવને તૂટતા રોકી શકી નથી.
વડા પ્રધાન નરેન્દ્ર મોદી 8 સપ્ટેમ્બરના રોજ ગુજરાતની મુલાકાતે આવવાના છે, જેમાં વડોદરા અને નવસારીમાં કાર્યક્રમોનું આયોજન કરવામાં આવ્યું છે.મળતી માહિતી અનુસાર પીએમ મોદી 8 સપ્ટેમ્બરના રોજ બપોરે 12 વાગ્યે વડોદરા એરપોર્ટ પર પહોંચશે. ત્યાંથી તેઓ વડોદરા યુનિવર્સિટી ગ્રાઉન્ડ જશે, જ્યાં તેમના દ્વારા વિવિધ વિકાસ કાર્યોનું ઉદ્ઘાટન અને લોકાર્પણ થવાનું છે. તેઓ સ્થળ પર એક જાહેર સભાને પણ સંબોધિત કરશે.
વડોદરામાં પોતાના કાર્યક્રમો પૂર્ણ કર્યા પછી, પીએમ મોદી બપોરે 3 વાગ્યે હેલિકોપ્ટર દ્વારા નવસારી જવાના છે. નવસારીમાં, તેઓ જિલ્લા ભાજપની નવી ઓફિસ, નમો કમલમનું ઉદ્ઘાટન કરશે. તેઓ સાંજે 4 વાગ્યા પછી નવસારી હેલિપેડથી સુરત જવા રવાના થશે અને પછી સુરતથી મુંબઈ જવા રવાના થશે. જોકે તેમના કાર્યક્રમોની સત્તાવાર યાદી હવે જાહેર કરવામાં આવશે.
કેન્દ્રીય પ્રધાન અને નવસારી લોકસભા સાંસદ સીઆર પાટીલે શનિવારે પ્રધાનો, પક્ષ સંગઠનના પદાધિકારીઓ અને અધિકારીઓ સાથે પીએમ મોદીની મુલાકાતની તૈયારીઓ અને વ્યવસ્થાઓની સમીક્ષા કરવા માટે બેઠક યોજી હતી.
દરમિયાન, ગુજરાતના નાયબ મુખ્ય પ્રધાન હર્ષ સંઘવી પણ શનિવારે સાંજે વડા પ્રધાનની મુલાકાતની તૈયારીઓની સમીક્ષા કરવા માટે વડોદરા પહોંચ્યા હતા. સંઘવીએ કાર્યક્રમ સ્થળની મુલાકાત લીધી હતી અને સર્કિટ હાઉસ ખાતે વડોદરાના સાંસદ, શહેર ભાજપ પ્રમુખ, ધારાસભ્યો અને વરિષ્ઠ સરકારી અધિકારીઓ સાથે બેઠક યોજી હતી.
પીએમ મોદી 4 જુલાઈએ ગુજરાત આવ્યા હતા. જ્યારે તેમણે સાણંદમાં સીજી સેમી આઉટસોર્સ્ડ સેમિકન્ડક્ટર એસેમ્બલી અને ટેસ્ટ સુવિધાનું ઉદ્ઘાટન કર્યું હતું.
ભારતમાં સ્માર્ટફોન મેન્યુફેક્ચરિંગની કહાની છેલ્લા એક દાયકામાં ઝડપથી બદલાઈ છે. આજે દેશમાં ઉપયોગમાં લેવાતા 99.2 ટકા મોબાઇલ ફોન ભારતમાં જ તૈયાર થઈ રહ્યા છે. એટલું જ નહીં, 2025માં સ્માર્ટફોનમાં ભારતની સૌથી મોટી એક્સપોર્ટ કેટેગરી દેશ બની ગયો હતો.આ ચોક્કસથી એક મોટી સફળતા છે પણ આ પાછળ એક માઈનસ પોઈન્ટ પણ છે. ભારત સ્માર્ટફોનના અલગ અલગ પાર્ટ્સ તૈયાર કરી રહ્યો છે પણ પોતાનો કોઈ સ્માર્ટ હજુ સુધી માર્કેટમાં મૂક્યો નથી. હજુ સુધી કોઈ સ્માર્ટફોન બ્રાંડ બની નથી જે ગ્લોબલ લેવલ પર વીવો, સેમસંગ જેવી કંપનીઓને હંફાવી શકે. આ દિશામાં ભારત સરકાર એક મોટું પગલું લઈ રહી છે. ભારતે મોબાઇલ મેન્યુફેક્ચરિંગ માટે મોટું ઇન્ફ્રાસ્ટ્રક્ચર ઊભું કર્યું છે, પરંતુ અહીં એક મોટો પડકાર હજુ પણ યથાવત છે.
સરકારે તાજેતરમાં ₹62,500 કરોડની મોબાઇલ ફોન મેન્યુફેક્ચરિંગ સ્કીમની જાહેરાત કરી છે. આ યોજનાનો ઉદ્દેશ માત્ર ભારતમાં વિદેશી કંપનીઓ માટે ફોન એસેમ્બલ કરવાનો નથી.સરકાર ઈચ્છે છે કે, ભારતીય કંપનીઓ ભારતમાં જ સ્માર્ટફોન ડિઝાઇન કરે, પોતાના પેટન્ટ વિકસાવે, ટેક્નોલોજી પર કામ કરે અને પોતાનો બ્રાન્ડ ઊભી કરે. અર્થાત્, હવે લક્ષ્ય માત્ર ‘Made in India’ નહીં, પરંતુ ‘Designed in India’ અને ‘Branded in India’ તરફ આગળ વધવાનું છે. ઇલેક્ટ્રોનિક્સ મંત્રી અશ્વિની વૈષ્ણવના મતે, વર્ષ 2027ના મધ્ય સુધીમાં ભારતને પોતાનો પહેલો મજબૂત સ્વદેશી સ્માર્ટફોન બ્રાન્ડ મળી શકે છે. આ યોજના હેઠળ પાત્ર ભારતીય બ્રાન્ડ્સને યોગ્ય વેચાણ પર 5 ટકા ઇન્સેન્ટિવ આપવામાં આવશે. આ ઉપરાંત, કંપની પોતાનું ઇન-હાઉસ ડિઝાઇન હબ વિકસાવે તો તેને વધારાનો 3 ટકા લાભ મળી શકે છે.
સરકાર ખાસ કરીને એવી કંપનીઓને પ્રોત્સાહન આપવા માંગે છે, જેમાં ઓછામાં ઓછો 51 ટકા માલિકીભાગ ભારતીયોનો હોય. આજે જ્યાં Xiaomi, Vivo, Oppo અને Samsung જેવા બ્રાન્ડ્સનું સ્માર્ટફોન માર્કેટમાં મોટું વર્ચસ્વ છે, ત્યાં લગભગ એક દાયકા પહેલાં સ્થિતિ અલગ હતી. Micromax, Lava અને Intex જેવી ભારતીય કંપનીઓ ભારતીય બજારમાં મજબૂત હાજરી ધરાવતી હતી. 2015ની આસપાસ ભારતીય બ્રાન્ડ્સની સંયુક્ત બજાર ભાગીદારી લગભગ 35 ટકા સુધી પહોંચી હતી. Micromax તો તે સમયે Samsungને સીધી ટક્કર આપતી ભારતીય બ્રાન્ડ માનવામાં આવતી હતી.પરંતુ ત્યારબાદ Xiaomi, Vivo અને Oppo જેવી ચીનની કંપનીઓએ ભારતીય સ્માર્ટફોનના માર્કેટનું ગણિત જ બદલી નાખ્યું. એક જ ફોનમાં તમામ પ્રકારના ફીચર, ફીચર ન મળે તો એને સપોર્ટિંગ વસ્તુ આપીને મોનોપોલી તોડી નાંખી.
મજબૂત સપ્લાય ચેઇન, આક્રમક કિંમતો અને વધુ સારા સ્પેસિફિકેશન્સ સાથે ભારતીય ગ્રાહકોને આકર્ષ્યા. ઓછા બજેટમાં તમામ પ્રકારની સુવિધા, સારો કેમેરો અને સ્પેસના ફીચરના પરિણામે ભારતીય કંપનીઓ ધીમે ધીમે સ્પર્ધામાં પાછળ પડવા લાગી. આ સિવાય વધુ સ્મુથ એવેલેબિલિટી મળતા ગ્રાહકોને આ પસંદ પડ્યું અને ભારતીય ફોનની માર્કેટ પડી ગઈ. માત્ર હાર્ડવેર જ નહીં, પરંતુ રીસર્ચ એન્ડ ડેવલપમેન્ટ, સોફ્ટવેર અને નિયમિત અપડેટ્સ જેવા ક્ષેત્રોમાં પણ ભારતીય બ્રાન્ડ્સ પાછળ રહી ગઈ. પરિણામે 2020ની શરૂઆત સુધીમાં ભારતીય સ્માર્ટફોન બ્રાન્ડ્સની બજાર ભાગીદારી 1 ટકાથી પણ ઓછી રહી ગઈ હતી. તે સમયે ભારતીય કંપનીઓ પાસે મોટા પાયે મેન્યુફેક્ચરિંગ ક્ષમતા પણ ન હોતી. પરંતુ હવે પરિસ્થિતિ નોંધપાત્ર રીતે બદલાઈ ગઈ છે. ભારતમાં મેન્યુફેક્ચરિંગ ઇકોસિસ્ટમ વિકસ્યું છે અને વૈશ્વિક કંપનીઓ માટે મોટા પ્રમાણમાં ઇલેક્ટ્રોનિક્સનું ઉત્પાદન કરવાની ક્ષમતા ઊભી થઈ છે.
નવી સરકારી નીતિનો સૌથી મોટો ફાયદો ભારતીય સ્માર્ટફોન બ્રાન્ડ Lavaને મળી શકે છે. ઘણા પડકારો છતાં Lava ભારતીય બજારમાં ટકી રહ્યું છે અને છેલ્લા કેટલાક સમયથી બજેટ સેગમેન્ટમાં ફરી પોતાની સ્થિતિ મજબૂત કરવાનો પ્રયાસ કરી રહ્યું છે. એક રિપોર્ટ અનુસાર, સ્માર્ટફોન માર્કેટમાં Lavaની ભાગીદારી લગભગ 2 ટકા સુધી પહોંચી છે અને તેમાં વાર્ષિક 40થી 50 ટકાની ઝડપે વૃદ્ધિ થઈ રહી છે. Lava હવે માત્ર ફોન એસેમ્બલ કરવા પૂરતું સીમિત રહેવા માંગતું નથી. કંપની ડિસ્પ્લે અને કેમેરા મોડ્યુલ જેવા મહત્વના ઘટકોમાં લગભગ ₹1,100 કરોડનું રોકાણ કરવાની તૈયારી કરી રહી છે. જો આ રોકાણ સફળ થાય, તો કંપનીને સ્માર્ટફોનના મહત્વના ઘટકો પર વધુ નિયંત્રણ મેળવવામાં મદદ મળી શકે છે.
રસપ્રદ વાત એ છે કે Micromaxની મેન્યુફેક્ચરિંગ યુનિટ પણ ફરીથી પ્રોડક્શન શરૂ કરવાની તૈયારીમાં હોવાનું સામે આવ્યું છે. જોકે ભારતમાં ફોન બનાવવો હવે શક્ય બન્યું છે, પરંતુ વૈશ્વિક સ્તરનો બ્રાન્ડ બનાવવો હજુ પણ મોટો પડકાર છે. Samsung અને Xiaomi જેવી કંપનીઓ પાસે વર્ષોના સોફ્ટવેર અનુભવ, કેમેરા ટેક્નોલોજી, R&D અને વૈશ્વિક સર્વિસ નેટવર્કની તાકાત છે.પણ ગ્રાહકોનો ભરોસો જીતવો એ મોટો પડકાર છે. ભારતીય બ્રાન્ડ્સે માત્ર સારો ફોન બનાવવાનો નથી, પરંતુ ગ્રાહકોનો વિશ્વાસ જીતીને તેમને સ્થાપિત બ્રાન્ડ્સમાંથી પોતાના તરફ વાળવાના છે. સ્માર્ટફોન માર્કેટમાં નવા ખરીદદારોની સંખ્યા હવે અગાઉની જેમ ઝડપથી વધી રહી નથી. એટલે ભારતીય બ્રાન્ડ્સ માટે વૃદ્ધિ મેળવવા માટે માત્ર નવા ગ્રાહકો પર આધાર રાખવો મુશ્કેલ રહેશે.
નેપાળમાં અચાનક આવેલી ભયાનક પૂરની હોનારતે હાહાકાર મચાવી દીધો. આ કુદરતી હોનારતમાં અત્યાર સુધીમાં 626 લોકોના કરૂણ મોત નીપજ્યા છે, જ્યારે આશરે 2,500થી વધુ લોકો હજુ ગુમ હોવાના અહેવાલ છે. પૂરના તીવ્ર પ્રવાહ અને કાદવ-કીચડ અને કાટમાળના કારણે કૌશિકી અને ભોટેકોશી નદી કિનારાની અસંખ્ય વસાહતો, રસ્તાઓ, પુલ અને હાઇડ્રોપાવર પ્રોજેક્ટ્સ જમીનદોસ્ત થઈ ગયા છે.
આ દુર્ઘટનામાં મોટા પ્રમાણમાં ભારતીય નાગરિકો પણ ફસાયેલા છે. ભારતના વિદેશ મંત્રાલયની અપડેટ મુજબ, 320 ભારતીયો અને ભારતીય મૂળના 100 લોકો સાથે હજુ સુધી કોઈ સંપર્ક થઈ શક્યો નથી. જેમાં 100 જેટલા ભારતીયો ત્રિશૂલી હાઇડ્રોપાવર પ્રોજેક્ટ સાઇટ પર અટવાયેલા હોવાની આશંકા છે. જોકે, રાહતની વાત એ છે કે તિબેટમાં આશરે 400 ભારતીયો સુરક્ષિત છે અને તેમની સાથે સંપર્ક થઈ ચૂક્યો છે.
પ્રાથમિક તપાસ મુજબ, આ ભયાનક આફતની શરૂઆત ઊંચા પર્વતીય વિસ્તારમાં ગ્લેશિયર તૂટવાથી થઈ હતી. ગ્લેશિયરનો મોટો હિસ્સો બરફ અને પથ્થરો સાથે લેંડે નદીમાં ખાબક્યો હતો. આ કુદરતી અવરોધ અચાનક તૂટતાં ભોટેકોશી અને ત્રિશૂલી નદીઓમાં વિનાશક પૂરની લહેર આવી હતી.
પહેલી તબાહી બાદ હવે નદીના ઉપરી હિસ્સામાં કાટમાળ જમા થવાને કારણે સર્જાયેલું કૃત્રિમ સરોવરે નવી ચિંતા ઉપજાવી છે. સેટેલાઇટ તસવીરો મુજબ, આ ડેમ જેવા બનેલા સરોવરમાં આશરે 20 લાખ ક્યુબિક મીટર પાણી એકઠું થઈ ગયું છે અને આગામી દિવસોમાં વધુ પાણી ઉમેરાવાની ભીતિ છે. જો આ કુદરતી દીવાલ તૂટશે તો નીચાણવાળા વિસ્તારોમાં ફરી એકવાર અચાનક જળપ્રલય આવી શકે છે.
પૂરના કારણે 36થી વધુ પુલો વહી જતાં 90 હજારથી વધુ લોકો અસરગ્રસ્ત થયા છે અને અનેક ગામડાઓનો સંપર્ક સંપૂર્ણપણે કપાઈ ગયો છે. રસ્તાઓ ફરી ચાલુ કરવા નેપાળે ભારત અને ચીન પાસે 42 બેલી બ્રિજ બનાવવા માટે મદદ માંગી છે. હાલ નેપાળી સેનાના 2,300થી વધુ જવાનો સહિત 7,451 સુરક્ષાકર્મીઓ રાહત અને બચાવ કાર્યમાં ખડેપગે તૈનાત છે.
એક 90 વર્ષ પરંપરા કે જે અપ્રતિમ છે નિષ્પક્ષ નિષ્પક્ષ દરરોજ, વહેલી તકે, એક ગતિશીલ સંપાદકીય ટીમ અને ડિસ્ટ્રીબ્યુટર અને બિઝનેસ એસોસિએટ્સનું એક શક્તિશાળી નેટવર્ક, દરરોજ નવ દાયકા જૂની પરંપરા આપે છે. એવી પરંપરા કે જે વિચારો, માહિતી અને સીધા પત્રકારત્વના એક વિશિષ્ટ સંશ્લેષણ છે. દરેક વાર્તામાં અપ્રતિમ અધિકૃતતા અને તટસ્થતાનો સમાવેશ થાય છે, વાચકોને સૌથી વધુ જાણકાર અને વિશ્લેષણાત્મક સમાચાર કવરેજ સાથે સમર્થન આપવું.
