કૅલિફોર્નિયામાં દુર્ગંધ મારતા ફૂલો જોવા અસંખ્ય સહેલાણીઓ ઊમટી પડ્યા

સાઉથ કૅલિફોર્નિયામાં ઊગતા કૉર્પ્સ નામના ફૂલો પૂરબહારમાં ખીલ્યા હોય ત્યારે એ અતિશય દુર્ગંધ મારતા હોય છે, પરંતુ ગુરુવારે એ જ ફૂલોની ઝલક લેવા હન્ટિન્ગટન લાઇબ્રેરીમાં અસંખ્ય મુલાકાતીઓ ઊમટી પડ્યા હતા.

આ ફૂલોનું હુલામણું નામ ‘સ્ટિન્ક’ છે જેનો અર્થ દુર્ગંધ થાય છે. ગુરુવારે રાત્રે આ ફૂલો અણધારી રીતે સોળે કળાએ ખીલ્યા હતા, એમ હન્ટિન્ગટનનાં મહિલા પ્રવક્તા લિસા બ્લૅકબર્ને કહ્યું હતું અને ઉમેર્યું હતું કે ‘અમે તો એવું ધારીને બેઠાં હતાં કે આ ફૂલો પૂરબહારમાં ખીલવાને હજી થોડા દિવસની વાર છે, પણ આ તો તૈયાર થઈ ગયા એ જોઈને ઘણો આનંદ થઈ રહ્યો છે.’

કૉર્પ્સ ફૂલો પૂરબહારમાં ખીલતાં સામાન્ય રીતે 15 વર્ષનો સમય લાગી જતો હોય છે અને ફક્ત 24 કલાક સુધી જ ખીલેલા રહે છે. આ ફૂલો પૂરેપૂરા ન ખીલે ત્યાં સુધી એના છોડવામાંથી દુર્ગંધ બહાર આવતી નથી. ‘સ્ટિન્ક’ ઉપરાંત ‘સ્ટન્ક’ અને ‘સ્ટૅન્ક’ નામના કૉર્પ્સ ફૂલ પણ થોડા દિવસમાં ખીલવાની સંભાવના છે. આ ફૂલોની ગંધ અતિશય ખરાબ હોવા છતાં મોટી સંખ્યામાં સહેલાણીઓ એને જોવા આવતા હોય છે જેમાં વનસ્પતિ વિજ્ઞાનમાં રુચિ ધરાવનારાઓ ખાસ હોય છે.