કોર્ટ સંકુલના 8માં માળેથી મહિલાએ પડતું મૂક્તા કમકમાટીભર્યું મોત

સાસરિયાઓ સામે કેસ ચાલતો હોય, આ માટેની કોર્ટ કાર્યવાહીના સંદર્ભે એક મહિલા શનિવારે કોર્ટ સંકુલમાં આવી હતી. સિમ્પીસિંગ નામની મહિલાએ અગમ્ય કારણોસર કોર્ટ બિલ્ડિંગના નવમા માળેથી પડતું મૂકીને મોત વહાલું કરી દીધું હતું. માથાના ભાગે ગંભીર ઇજા થવાથી તેમજ લોહી વધુ માત્રામાં વહી જવાથી આ મહિલાનું ઘટનાસ્થળે જ કમકમાટીભર્યું મોત થયું હતું. ઘટનાને પગલે સમગ્ર કોર્ટમાં અરેરાટી ફેલાઇ જવા પામી હતી. મહિલાએ કોર્ટ સંકુલમાં કરેલી આત્મહત્યાનો મુદ્દો ભારે ચર્ચાસ્પદ બન્યો હતો.

અઠવાલાઈન્સ ખાતે આવેલી નવી કોર્ટ બિલ્ડીંગમાં આઠમાં માળે પડતું મૂકનાર મહિલાની ઓળખ સિમ્પીસિંગ (ઉ.વ.30) તરીકે થઇ હતી. સિમ્પીસિંગના લગ્ન વિજયસિંગ મુરલીસિંગ નામના વ્યક્તિ સાથે 2015માં થયા હતાં. વિજયસિંગ ઉધના ખાતે બેંકમાં નોકરી કરે છે. જે ડિંડોલી નીલગીરી સર્કલ મયૂરનગર ખાતે રહે છે. સિમ્પીસિંગના પિતા લાલસિંગ સત્યનારાયણ નગર બમરોલી ખાતે રહે છે.

સિમ્પીસિંગના ભાઈએ જણાવ્યું હતું કે, લગ્નના પ્રથમ દિવસે જ તેણીને સાસરિયાએ ઝેર આપવાનો પ્રયત્ન કર્યો હતો. ત્યારબાદ કેસ કર્યો હતો. કેસ પાછો ખેંચવા માટે ધમકીની સાથે દબાણ કરવામાં આવતું હતું. જો કે, સિમ્પીસિંગે ક્યા કારણોસર પડતું મૂક્યું તે અંગે સચોટ કારણ આવ્યું નથી. સિમ્પીસિંગે નવમાં માળેથી કુદી પડતાં તેનું ઘટના સ્થળે મોત નીપજ્યું હતું.