પેરીસમાં વધુ તોફાનો ફાટી નીકળવાના ભયે એફિલ ટાવર 8-9 ડિસેમ્બરે બંધ

બે દિવસના સરકારવિરોધી મોરચામાં ફરી વાર હિંસા ફાટી નીકળતી રોકવા ફ્રેન્ચ અધિકારીઓએ શનિવાર અને રવિ એમ બે દિવસ માટે એફિલ ટાવર બંધ કરવામાં આવ્યો છે. આજે શનિવાર તા.8મી ડિસેમ્બર 2018ની રાત્રે 12 વાગ્યાથી જ એફિલ ટાવરને સહેલાણીઓ માટે બંધ કરી દેવાતા અનેક પ્રવાસીઓએ મુશ્કેલીનો સામનો કરવો પડી રહ્યો છે.

ફ્રાન્સમાં ખાસ કરીને પેરીસ તેમજ આસપાસના વિસ્તારોમાં સરકાર વિરોધી ફાટી નીકળેલી હિંસાને રોકવા માટે પૅરિસમાં ૧૪ જોખમી વિસ્તારો ઓળખીને લગભગ ૮૦૦૦ પોલીસ દળો તહેનાત કરવામાં આવ્યાં છે. વિરોધકો દ્વારા સ્ટ્રીટ-ફર્નિચર કે બાંધકામની સાઇટ્સ પર હુમલો કરવાની શક્યતાને ધ્યાનમાં રાખીને પૅરિસની પોલીસે ઓળખી કઢાયેલાં સેક્ટર્સમાંથી કાચનાં કન્ટેનર્સ, રેલિંગ્સ અને બિલ્ડિંગ-મશીનનાં સેટઅપ હટાવી દીધાં છે.

છેલ્લા વીક-એન્ડમાં દેશભરમાં ૬૫,૦૦૦ પોલીસોની સામે આ વીક-એન્ડમાં ૮૯,૦૦૦ પોલીસો એકઠા કરવામાં આવ્યા હતા. ગયા અઠવાડિયે થયેલી હિંસામાં ૧૩૦ જણ જખમી થયા હતા તથા ૪૦૦ કરતાં વધુ વ્યક્તિઓની ધરપકડ કરવામાં આવી હતી.

અધિકારીઓએ દેશમાં આ અઠવાડિયાના અંતે યોજાયેલી છ ફ્રેન્ચ લીગ સૉકર મૅચ પણ રદ કરી હતી. ડીઝલની કિંમતમાં તીવþ વધારો થવાને પગલે ૧૭ નવેમ્બરથી શરૂ થયેલી હિંસામાં અત્યાર સુધીમાં ચાર જણ મૃત્યુ પામ્યા છે.