દક્ષિણ ગુજરાતમાં શનિ-રવિએ ભારે વરસાદની આગાહી

દક્ષિણ-પશ્ચિમી ચોમાસું ધીરે ધીરે ગુજરાત તરફ આગળ વધી રહ્યું છે. ગુજરાતમાં છેલ્લાં ત્રણ દિવસથી છૂટા છવાયા વરસાદી ઝાપટાં પડી રહ્યા છે પણ હવે ભારે વરસાદની આગાહી કરવામાં આવી છે. હવામાન ખાતાની આગાહી પ્રમાણે દક્ષિણ-પશ્ચિમી ચોમાસું કેરળથી આગળ વધી કર્ણાટકા અને દક્ષિણી મુંબઇ પ્રવેશ કરી દીધો છે. દેશનાં અન્ય ભાગો જેવા કે, દક્ષિણ આંધ્રપ્રદેશ, પશ્ચિમ બંગાળમાં પણ ચોમાસું બેસી ગયું છે.

હવામાન ખાતાની આગાહી મુજબ ગુજરાતમાં ચોમાસુ દક્ષિણથી પ્રવેશ કરશે અને દક્ષિણ ગુજરાતમાં આગામી શનિવાર અને રવિવારના રોજ છુટાછવાયા વિસ્તારોમાં ભારે વરસાદ પડશે. કેરળ પછી હવે કર્ણાટકા, ગોવામાં પણ આગળ વધી રહ્યું છે. આગામી 24 કલાકમાં દેશના ઘણા ભાગોમાં સારો એવો વરસાદ પડશે. આગામી દિવસોમાં આ ચોમાસું મહારાષ્ટ્ર, દક્ષિણ ગુજરાત, મધ્ય પ્રદેશ, છત્તીસગઢ, ઓરિસ્સા, સિક્કિમ અને અન્ય રાજ્યોમાં આગળ વધશે. આવતી કાલથી વરસાદની તીવ્રતામાં વધારો થશે.

વિતેલા સપ્તાહમાં ગઇ તા.2 જૂનની મધરાતે જ્યારે દક્ષિણ ગુજરાતમાં ભયંકર વાવાઝોડું ફુંકાયું હતું એ અંગે હવામાન ખાતાએ કોઇ જ આગાહી કરી ન હતી. અણસાર પણ મળ્યો ન હતો. હવે જ્યારે આગામી વીકએન્ડમાં ભારે વરસાદની આગાહી હવામાન ખાતે એ કરી છે ત્યારે એ સાચી પડે છે કે ફક્ત કાગનો વાઘ પુરવાર થાય છે એ તો સુરતીઓએ અનુભવ કરીને જ જાણવું પડશે.