કુલદીપ યાદવ: ઇન્ટરનેશનલ ક્રિકેટમાં બે હૅટ-ટ્રિક લેનારો પ્રથમ ભારતીય બોલર

રિસ્ટ સ્પિનર કુલદીપ યાદવ આંતરરાષ્ટ્રીય ક્રિકેટમાં બે વખત હૅટ-ટ્રિક લેનારો પ્રથમ ભારતીય બન્યો છે. તેણે ગઈ કાલે અહીં વેસ્ટ ઇન્ડિઝ સામેની બીજી વન-ડેમાં ઉપરાઉપરી ત્રણ બૉલમાં શાઇ હોપ, જેસન હોલ્ડર અને અલ્ઝારી જોસેફની વિકેટ લીધી હતી. ઉત્તર પ્રદેશના કુલદીપે પ્રથમ હૅટ-ટ્રિક ૨૦૧૭ની સાલમાં કોલકતામાં ઑસ્ટ્રેલિયા સામેની મૅચમાં લીધી હતી.

પાકિસ્તાનના વસીમ અકરમ, સક્લેન મુશ્તાક તેમ જ શ્રીલંકાના ચામિન્ડા વાસ અને ન્યૂ ઝીલૅન્ડના ટ્રેન્ટ બૉલ્ટ એવા ચાર બોલરો છે જેમના નામે અગાઉ બે ઇન્ટરનેશનલ હૅટ-ટ્રિક નોંધાઈ હતી. ભારતના અન્ય (એક-એકવાર) હૅટ-ટ્રિક લેનારા બોલરોમાં ચેતન શર્મા, કપિલ દેવ અને મોહંમદ શમીનો સમાવેશ છે.