મોટા વરાછા બાંધકામ સાઇટ પર માટી ધસી પડતાં 2ના મોત : 8 દટાયા

સુરતના મોટા વરાછા વિસ્તાર એક કન્સ્ટ્રક્શન સાઇટના અન્ડરગ્રાઉન્ડ પાર્કિંગમાં ખોદકામ દરમિયાન માટી ધસી પડતાં ત્યાં કામ કરી રહેલા 8 મજૂરો દટાય ગયા હતા જેમાંથી ૨ના ઘટના સ્થળે મોત થયા હોવાનું જાણવા મળ્યું છે.

મોટા વરાછા વિસ્તારમાં અબ્રામા નજીક સિલ્વાસા પેરેડાઈઝ નામની નવનિર્મિત બિલ્ડીંગના અંડર ગ્રાઉન્ડ પાર્કિંગમાં ખોદકામ થઈ રહ્યું હતું ત્યારે આ ઘટના બનવા પામી હતી. બનાવ અંગે સમગ્ર વિસ્તારમાં વાયુવેગે વાત પ્રસરતા આસપાસના રહેવાસીઓ ઘટના સ્થળે દોડી આવ્યા હતા.

ચાલુ બાંધકામ ધરાવતી એપાર્ટમેન્ટની કન્સ્ટ્રકશન સાઇટ પર અંડર ગ્રાઉન્ડ પાર્કિંગ માટે ખોદકામ દરમિયાન સિમેન્ટની દિવાલ બનાવવા માટેની કામગીરી કરવામાં આવી રહી હતી. દરમિયાન તાબડતોબ હાથ ધરાયેલી બચાવ કામગીરી દરમિયાન ચાર શ્રમિકોને બહાર કઢાયા હતા. જેમાંથી બેના મોત થઈ ચૂક્યા હતા જ્યારે બેને સારવાર માટે હોસ્પિટલ ખસેડવામાં આવ્યા હતા.

ઘટના સ્થળેથી મળતી માહિતી મુજબ ચાર ફાયર સ્ટેશનની 10થી વધુ ગાડીઓ ઘટનાસ્થળે પહોંચી ગઈ છે અને રેસ્ક્યૂ કામગીરી હાથ ધરવામાં આવી છે. કતારગામ, કોસાડ, મોટા વરાછા, કાપોદ્રા ફાયર સ્ટેશનના અધિકારીઓ અને જવાનો શ્રમિકોને બચાવાની કામગીરી કરી રહ્યા છે. કન્સ્ટ્રક્શન સાઈટ પર લોકોની ભારે ભીડ ઉમટી પડતાં પોલીસ બંદોબસ્ત પણ ગોઠવી દેવામાં આવ્યો હોવાનું જાણવા મળ્યું છે.