હેલ્મેટ પહેરીને સુરતના પોલીસ જવાનોએ લોકોમાં દાખલો બેસાડ્યો

જયેશ બ્રહ્મભટ્ટ 98253 44944

તમામ પોલીસ મથકની બહાર પોલીસ જવાનોની બાઇક, મોપેડ પર હેલ્મેટ જોવા મળતી હતી, માર્ગો પર હેલ્મેટધારી પોલીસો જોવા મળ્યા, નિયમોનું પાલન પોલીસે સ્વયંથી શરૂ કર્યું

આજે તા.16મી સપ્ટેમ્બર 2019થી ગુજરાતમાં નવા ટ્રાફિકના નિયમો ખાસ કરીને દંડનાત્મક જોગવાઇઓમાં વધારાનો અમલ શરૂ કરાયો છે. સામાન્ય લોકોમાં ટ્રાફિકના નવા નિયમોથી એટલી હલચલ મચી ગઇ છે કે લોકો પીયુસી કઢાવવા અને હેલ્મેટ ખરીદવા માટે કતારો લગાડી રહ્યા છે. કારચાલકો સીટબેલ્ટ બાંધીને નીકળ્યા છે.

ખાસ કરીને સામાન્ય લોકોમાં ટ્રાફિકના નવા નિયમો અંગે એટલી દાઝ છે કે ઉત્તર ભારતના રાજ્યોમાં હેલ્મેટ નહીં પહેરતા કે સીટ બેલ્ટ બાંધ્યા વગર પોલીસ જીપ કે ખાનગી વાહનોમાં ફરતા પોલીસ જવાનો કે પોલીસ અધિકારીઓને વિડીયો ઉતારી, ફોટા ક્લીક કરીને લોકોએ સોશ્યલ મિડીયામાં પોલીસ સામે જ ભારે દેકારો મચાવી દીધો છે.

સુરત શહેર પોલીસને સલામ છે કે આજે ટ્રાફિકના નવા નિયમોના પાલનના પહેલા જ દિવસો સ્થાનિક પોલીસ જવાનોએ જડબેસલાક રીતે ટુ વ્હીલ વાહનો ચલાવતી વખતે હેલ્મેટ પહેરીને લોકોમાં દાખલો બેસાડ્યો છે. ઘણાં લોકો એવી પણ ફિરાકમાં હતા કે હેલ્મેટ પહેર્યા વગર કે સીટ બેલ્ટ બાંધ્યા વગર નીકળતા પોલીસ જવાનોના વિડીયો ઉતારીને કે ફોટો ઉતારીને તેમની જ સામે સોશ્યલ મિડીયામાં ઝુંબેશ ચલાવવામાં આવે.

પરંતુ, સુરતના ઇન્ચાર્જ પોલીસ કમિશનર હરેકૃષ્ણ પટેલએ ગઇકાલ તા.15મી સપ્ટેમ્બર 2019ના રોજ પોલીસ જવાનોને ખાસ અપીલ અને તાકીદ બન્ને કરી હતી કે પોલીસ જવાનોએ પોતાનાથી જ ટ્રાફિકના નિયમોનું પાલન કરવાનું છે, લોકો પોલીસને પહેલા આગળ ધરતા હોય છે. ઇન્ચાર્જ સી.પી.ની આ અપીલ કહો કે તાકીદ જબરદસ્ત રીતે કારગત નિવડી છે અને 99 ટકાથી વધુ પોલીસ જવાનો કે જેઓ ટુ વ્હીલ વાહનોનો ઉપયોગ કરી રહ્યા છે તેમણે આજે હેલ્મેટ પહેરીને લોકોને દાખલો બેસાડ્યો છે.

આજે સવારે પોલીસ પરેડ ગ્રાઉન્ડ પર પ્રેક્ટીસ માટે આવતા પોલીસ જવાનોની બાઇક જુઓ કે પોલીસ સ્ટેશનની બહાર પાર્ક કરાયેલા ટુ વ્હીલ વાહનો જુઓ તમામ પર હેલ્મેટ હતી. શહેરના માર્ગો પર ફરતા પોલીસ જવાનોને જોયા ત્યારે પણ અનુભૂતિ થઇ કે સુરતના પોલીસ જવાનોએ સ્વયંથી જ ટ્રાફિકના નવા નિયમોના પાલનની શરૂઆત કરીને પોતાની ટીકાનો એકેય મોકો આપ્યો નહીં.