શત્રુઘ્નને કૉંગ્રેસમાં જોડાતાની સાથે પટના સાહિબની બેઠક

નેતા-અભિનેતા શત્રુઘ્નસિંહા ભાજપના સ્થાપના દિવસે ગૂડીપડવાના શુભ મુહૂર્તમાં કૉંગ્રેસમાં પ્રવેશ્યા હતા. ભાજપને તેમણે વન મેન શો, ટુ મેન આર્મી ગણાવી હતી. આ કારણસર પાર્ટી છોડી હતી.

કૉંગ્રેસના મહામંત્રી કેસી વેણુગોેપાલે શત્રુઘ્નસિંહાને આવકારતા કહ્યું હતું કે ઉત્તમ રાજકારણી ખોટા પક્ષમાં હતો. કૉંગ્રેસ અધ્યક્ષ રાહુલ ગાંધી સફળ અને કાર્યક્ષમ નેતા છે જે રાષ્ટ્રનો ભાવિ ચહેરો છે. ભાજપમાં વાટાઘાટ માટે કોઈ જગ્યા રહી નહોતી. પક્ષના ટોચના નેતા પોતાના માણસોેનું મૂલ્ય કરતા નહોતા. પક્ષના વરિષ્ઠ નેતાઓને માર્ગદર્શક મંડળમાં મૂકી દેવાયા હતા.

ભાજપમાં લોકશાહીનું સરમુખત્યારશાહીમાં ધીમે ધીમે રૂપાંતર થયું છે. સત્ય બોલવા માટે મને બળવાખોર ગણાયો હતો. શત્રુઘ્નને બિહારના પટના સાહિબથી ટિકિટ મળી છે જેઓ ભાજપના રવિશંકર પ્રસાદનો મુકાબલો કરશે. કૉંગ્રેસમાં પ્રવેશતા તુરંત જ ટિકિટ ફાળવાઈ હતી.

કૉંગ્રેસે અન્ય બેઠકના ઉમેદવાર પણ જાહેર કર્યા હતા. ભાજપના અનુરાગ ઠાકુર સામે હમીરપુરમાં કૉંગ્રેસે રામલાલ ઠાકુરને ઊતાર્યા છે તે ઉપરાંત અન્ય ચાર ઉમેદવારની સાથે કૉંગ્રેસના કુલ ઉમેદવાર 337 થયા છે.