New Zealand : ટેસ્ટ ક્રિકેટમાં પહેલીવાર No.1

ન્યૂ ઝીલૅન્ડ ૧૯૩૦ની સાલથી (૯૦ વર્ષથી) ટેસ્ટ-ક્રિકેટ રમે છે અને ૧૯૮૭ના વર્ષથી ટેસ્ટ-રૅન્કિંગ જાહેર થાય છે એમ છતાં ન્યૂ ઝીલૅન્ડ ક્યારેય આ રૅન્કિંગમાં નંબર-વન નહોતું થયું, પરંતુ કિવીઓ બુધવારે પહેલી વાર ટેસ્ટમાં પ્રથમ ક્રમે આવ્યા હતા. ક્રાઇસ્ટચર્ચમાં પાકિસ્તાનને બીજી ટેસ્ટમાં એક દાવ, ૧૭૬ રનથી પરાજિત કરીને અને સિરીઝ ૨-૦થી જીતીને ન્યૂ ઝીલૅન્ડે આ અપ્રતિમ સિદ્ધિ હાંસલ કરી છે. આ ઉપલબ્ધિ કૅપ્ટન કેન વિલિયમસનની ડબલ સેન્ચુરીને કારણે સંભવ બની હતી.

ન્યૂ ઝીલૅન્ડ છેલ્લાં ૧૦ વર્ષમાં ટેસ્ટ-ક્રિકેટમાં નંબર-વન થનારો છઠ્ઠો દેશ છે. આ દેશ બે વર્ષથી રૅન્કિંગમાં બીજા સ્થાને હતું અને છેક હવે અવ્વલ થયું છે. ન્યૂ ઝીલૅન્ડ ૧૧૮ પૉઇન્ટ સાથે પ્રથમ ક્રમે, ઑસ્ટ્રેલિયા ૧૧૬ પૉઇન્ટ સાથે બીજે અને ભારત ૧૧૪ પૉઇન્ટ સાથે ત્રીજે છે. ઇંગ્લૅન્ડ (૧૦૬) ચોથા નંબર પર અને સાઉથ આફ્રિકા (૯૬) પાંચમા નંબર પર છે.