વડા પ્રધાન મોદીના જીવન આધારિત વેબ સિરીઝ હટાવવા ચૂંટણીપંચનો આદેશ

ચૂંટણીની આદર્શ આચારસંહિતાનો હવાલો આપી ચૂંટણીપંચે શનિવારે વડા પ્રધાન મોદીના જીવનઆધારિત વેબસિરીઝ હટાવી દેવા નિર્માતાને આદેશ કર્યો હતો.

‘મોદી-જર્ની ઑફ ઍ કોમન મેન’ (મોદી-એક સામાન્ય માનવીનું જીવન) નામની પાંચ પ્રકરણ ધરાવતી વેબ સિરીઝનું સ્ટિમિંગ (પ્રસારણ) તાત્કાલિક બંધ કરવાનો ચૂંટણીપંચે આદેશ આપ્યો હતો.

ચૂંટણીપંચના સભ્યોએ વેસસિરીઝનું ટ્રેઈલર જોયું હતું. અને તેના આધારે લોકસભા ચૂંટણી ચાલુ છે ત્યાં સુધી બંધ કરવાનો આદેશ આપવામાં આવ્યો છે.

ચૂંટણીપંચે આદેશમાં કહ્યું કે ‘જીવનકથાના સ્વરૂપમાં કોઈના જીવન આધારિત સામગ્રી જે કોઈ પણ રાજકીય પક્ષને લાભ થઈ શકે અથવા ચૂંટણી દરમિયાન બધાને સમાન તક ન આપે તેવી સામગ્રીને આદર્શ આચારસંહિતાના અમલ દરમિયાન દર્શાવવી જોઈએ નહીં.’ચૂંટણીપંચે અગાઉ વડા પ્રધાન મોદીના જીવનઆધારિત ‘પીએમ નરેન્દ્ર મોદી’ દર્શાવવા પર પ્રતિબંધ મૂક્યો હતો.