જ્યૂસર, સ્પીકરની અંદર છુપાવીને સોનું લાવનારની દિલ્હી ઍરપોર્ટ પર ધરપકડ

દુબઇથી દિલ્હી આવેલી એક ફ્લાઇટમાં જ્યૂસર, બ્લ્યુ ટૂથના સ્પીકરની અંદર છુપાવીને સોનું લાવનાર એક મુસાફરની નવી દિલ્હીના ઇન્દિરા ગાંધી આંતરરાષ્ટ્રીય હવાઇમથક ખાતે કસ્ટમ્સ અધિકારીઓએ ધરપકડ કરી હતી. મુસાફરની બેગ અને ખાનગી વસ્તુનું બારીકાઇથી ચેકિંગ કરવામાં આવ્યું હતું , જેમાં કુલ ૪૬૨ ગ્રામ સોનું મળી આવ્યું હતું.

જ્યુસર મશીનની મોટર શાફ્ટની અંદર અને બ્લ્યુ ટૂથના સ્પીકરમાં સોનું છુપાવવામાં આવ્યું હતું. વધુ પૂછપરછમાં પ્રવાસીએ તેની અગાઉની દુબઇની 7 ટ્રીપ દરમિયાન ૧.૧૧ કરોડ રૂપિયાની કિંમતનું કુલ ૩.૨ કિલો સોનું લાવ્યો હોવાનું કબૂલ્યું હતું.

દાણચોરીથી સોનું લાવવાના અન્ય એક બનાવમાં પોતાના ગુદા માર્ગમાં છુપાવીને સોનું લાવનાર એક વ્યક્તિની આંતરરાષ્ટ્રીય વિમાની મથકે ધરપકડ કરવામાં આવી હતી. આરોપી શનિવારે બૅંગકોકથી આવ્યો ત્યારે એને આંતરવામાં આવ્યો હતો. તેની ઝડતી લેવામાં આવી હતી અને સોનાના ચાર ટૂકડા તેની પાસેથી કબજે કરવામાં આવ્યા હતા.

બે ટૂકડા તેના પેઈન્ટના ખિસ્સામાં છુપાવવામાં આવ્યા હતા અને બે ટૂકડા તેના ગુદામાર્ગમાં છુપાવવામાં આવ્યા હતા. સોનાનું કુલ વજન ૮૭૦ ગ્રામ હતું અને તેની કિંમત ૨૯.૫૬ લાખ રૂપિયા હતી.