ઇંગ્લૅન્ડમાં ચાલતા વર્લ્ડ કપમાં એકમાત્ર ઑસ્ટ્રેલિયા સેમી ફાઇનલમાં પહોંચ્યું છે. સાઉથ આફ્રિકા, શ્રીલંકા, વેસ્ટ ઇન્ડિઝ અને અફઘાનિસ્તાન સ્પર્ધાની બહાર ફેંકાઈ ગયા છે. સેમી ફાઇનલના બાકીના ત્રણ સ્થાન માટે ભારત, ન્યૂ ઝીલૅન્ડ, ઇંગ્લૅન્ડ, બંગલાદેશ અને પાકિસ્તાન વચ્ચે હરીફાઈ છે.

ભારતે આજની અથવા ૬ જુલાઈની શ્રીલંકા સામેની મૅચ જીતવાની છે. ભારતની મૅચ ધોવાઈ જશે તો એક પૉઇન્ટથી પણ તથા બન્ને હારને પગલે સારું માર્જિન હોવાથી ઊંચા રનરેટથી પણ ભારતને ચાલી જશે.

ન્યૂ ઝીલૅન્ડને પણ એક જ પૉઇન્ટની જરૂર છે. ઇંગ્લૅન્ડ જો ન્યૂ ઝીલૅન્ડ સામે હારશે, પરંતુ બંગલાદેશ જો પાકને હરાવશે તો પણ ઇંગ્લૅન્ડને સેમીનો ચાન્સ રહેશે. પાકિસ્તાને બંગલાદેશને મોટા માર્જિનથી હરાવવું પડશે, જ્યારે બંગલાદેશે સેમીમાં પહોંચવા ભારતને તેમ જ પાકને હરાવવું જ પડશે.

ભારત શનિવારે અહીં અફઘાનિસ્તાનને વર્લ્ડ કપની અત્યંત રસાકસીભરી મૅચની છેલ્લી ઓવરના પાંચમા બૉલમાં ૧૧ રનના માર્જિનથી હરાવીને સેમી ફાઇનલની લગોલગ પહોંચી ગયું હતું. અફઘાનિસ્તાનના મોહંમદ નબી (બાવન રન, ૧૦૫ મિનિટ, પંચાવન બૉલ, એક સિક્સર, ચાર ફોર)એ ભારતીયોના નાકે દમ લાવી દીધો હતો, પરંતુ મોહંમદ શમીએ આ વખતના વર્લ્ડ કપમાં પ્રથમ હૅટ-ટ્રિક લેનાર બોલર તરીકેનું નામ નોંધાવ્યું હતું. તેને ઈજાગ્રસ્ત ભુવનેશ્ર્વરના સ્થાને રમવાનો મોકો મળ્યો હતો અને તેણે એનો પૂરો ફાયદો લીધો હતો.

અફઘાનની ટીમ ૨૨૫ રનના લક્ષ્યાંક સામે ૪૯.૫ ઓવરમાં ૨૧૩ રનના સ્કોર સાથે ઑલઆઉટ થઈ હતી. ભારત મૅચ જીત્યું, પણ અફઘાનિસ્તાનના ખેલાડીઓએ બધાના દિલ જીતી લીધા હતા. વર્લ્ડ કપના ઇતિહાસમાં ભારતનો આ ૫૦મો વિજય હતો.

બુમરાહે ખરા સમયે બે વિકેટ (રહમત શાહ-૩૬ રન અને હશમતુલ્લા શાહિદી-૨૧ રન) લીધી હતી અને તેને મૅન ઑફ ધ મૅચનો અવૉર્ડ અપાયો હતો. બુમરાહે એક પછી એક યૉર્કર ફેંકીને અફઘાનના બૅટ્સમેનોને મુસીબતમાં મૂકી દીધા હતા. શમીએ હૅટ-ટ્રિક લેવાની શરૂઆત સૌથી ડેન્જરસ બૅટ્સમૅન મોહંમદ નબીથી કરી હતી અને પછીના બે બૉલમાં આફતાબ અને મુજીબને ક્લીન બોલ્ડ કર્યા હતા. શમી વન-ડેના વર્લ્ડ કપમાં હૅટ-ટ્રિક લેનાર ચેતન શર્મા પછીનો બીજો ભારતીય છે.

વન-ડેના વર્લ્ડ કપમાં મોહંમદ શમીની હૅટ-ટ્રિક ૧૦મો કિસ્સો હતો. આગલા નવ કિસ્સા આ મુજબના હતા: ચેતન શર્મા (૧૯૮૭ વર્લ્ડ કપ), સક્લેન મુશ્તાક (૧૯૯૯), ચામિન્ડા વાસ (૨૦૦૩), બ્રેટ લી (૨૦૦૩), લસિથ મલિન્ગા (૨૦૦૭) (૪ બૉલમાં ૪ વિકેટ), કીમાર રૉચ (૨૦૧૧), લસિથ મલિન્ગા (૨૦૧૧), સ્ટીવન ફિન (૨૦૧૫), જેપી ડુમિની (૨૦૧૫).

શનિવારે કેદાર જાધવ અને વિજય શંકરને બોલિંગ જ નહોતી આપવામાં આવી.

એક તબક્કે શમી બે વાર કમનસીબ સાબિત થયો હતો. તેના બૉલમાં બૅટ્સમૅન સામે એલબીડબ્લ્યૂની જોરદાર અપીલ થઈ હતી અને બૅટસમૅન આઉટ પણ હતો, પરંતુ ‘પિચિંગ આઉટસાઇડ’ને કારણે થર્ડ અમ્પાયરે નૉટઆઉટ જાહેર કર્યો હતો. શમીની બોલિંગમાં આવું બે વખત બન્યું હતું અને નસીબદાર અફઘાની બૅટ્સમેન બચી ગયા હતા. એકંદરે ભારતની ફીલ્ડિંગ શનિવારે સારી નહોતી.

એ પહેલાં, ભારતે ટૉસ જીતીને બૅટિંગ લીધી હતી અને નબળી શરૂઆત કરી હતી. રોહિત શર્મા પાંચમી ઓવરમાં ૭ રનના ટીમ-સ્કોર પર આઉટ થઈ ગયો હતો. તે ૧૦ બૉલમાં એક રન બનાવી શક્યો હતો. સાથી-ઓપનર લોકેશ રાહુલ પણ લાંબો સમય ક્રીઝ પર નહોતો ટક્યો. અફઘાનિસ્તાન જેવી વર્લ્ડ કપની નવીસવી ટીમ સામે ભારતીય ટીમમાં ફક્ત બે હાફ સેન્ચુરી થઈ હતી. વિરાટે ૬૭ રન અને કેદાર જાધવે ૮૮ મિનિટ સુધી ક્રીઝ પર રહીને બાવન રન બનાવ્યા હતા.

અફઘાનિસ્તાનના ક્રિકેટ ટીમના સભ્યોએ અહીં એક રેસ્ટોરન્ટમાં કરેલી તકરાર માટે પોલીસને બોલાવવામાં આવી હતી.

અફઘાનની ટીમની વર્લ્ડ કપમાં ઈંગ્લેન્ડ સામે અહીં ઓલ્ડ ટ્રેફર્ડ ખાતેની મેચની પૂર્વે સોમવારે રાતે બનેલા આ બનાવ માટે બી. બી. સી.ના જણાવ્યા પ્રમાણે કેટલાક અનામી ખેલાડીઓએ કોઈ વ્યક્તિ દ્વારા તેઓની ઉતારવામાં આવેલ ફિલ્મ માટે વાંધો દર્શાવ્યો હતો અને તેની જોડે ઝઘડો કર્યો હતો.

પણ, મેચ બાદ પત્રકારો જોડેની વાતચીતમાં અફઘાનની ટીમના કેપ્ટન ગુલબદિન નઈબે મામલાને શાંત પાડવાનો પ્રયાસ કરતા કહ્યું હતું કે તેની પાસે આ ઘટનાની વધુ વિગત નથી. “ટીમ અનેે મારા માટે આ કાંઈ મોટી ઘટના નથી, એમ તેણે કહ્યું હતું. અફઘાનિસ્તાનનો આયોજક રાષ્ટ્ર ઈંગ્લેન્ડની ટીમ સામે ૧૫૦ રનથી પરાજય થયો હતો.

આ પહેલા, મંગળવારે ગ્રેટર મેન્ચેસ્ટર પોલીસે બહાર પાડેલા નિવેદનમાં જણાવવામાં આવ્યું હતું કે પોલીસ અધિકારીઓ આ ઘટનાસર સોમવારે સ્થાનિક સમય અનુસાર રાતે ૧૧.૧૫ વાગ્યે મેન્ચેસ્ટરમાં લિવરપૂલ રોડ ખાતે આવેલ અકબર રેસ્ટોરન્ટ ખાતે દોડી આવ્યા હતા.
તે બનાવમાં કોઈને પણ ઈજા થઈ ન હતી તથા કોઈની ધરપકડ કરવામાં આવી નથી અને તપાસ કરાઈ રહી છે.