ઓલપાડ-સરોલીના ખેડૂતપુત્ર દિવ્ય એ SSCમાં વગર ટ્યુશને A-1 ગ્રેડ હાંસલ કર્યો

નરથાણ સ્થિત સંસ્કારકુંજ જ્ઞાનપીઠમાં અભ્યાસ કરતા દિવ્ય પટેલની સિદ્ધિએ સમગ્ર તળપદા કોળી પટેલ સમાજનું ગૌરવ વધાર્યું

ઉપરોક્ત તસ્વીર એવા તેજસ્વી તારલાની છે જેણે વગર ટ્યુશને ગુજરાત માધ્યમિક શિક્ષણ બોર્ડમાં એસએસસી એટલે કે ધોરણ 10ની રાજ્યસ્તરની પરીક્ષાઓમાં એ-વન ગ્રેડ પરીણામ હાંસલ કર્યું છે. વિશેષતા એ છે કે દિવ્ય પટેલના પિતા મનીષકુમાર વ્યવસાયે ફુલટાઇમ ખેડૂત છે. તેમની બીજી કોઇ આજીવીકા નથી. ઓલપાડના સરોલી ગામના ખેડૂત અને મૂળ તળપદા કોળી પટેલ સમાજના મનીષભાઇ પટેલે પોતાના દિકરાની સિદ્ધિ બાદ સી.આઇ.એ. લાઇવને જણાવ્યું હતું કે દિવ્યની સિદ્ધિ એટલા માટે નાની સૂની નથી કેમકે આ સિદ્ધિ માટે તેણે કોઇ જ ટ્યુશન કર્યા ન હતા. ફક્ત શાળાકીય શિક્ષણ (સંસ્કારકુંજ જ્ઞાનપીઠ, નરથાણ, સૂરત) સ્કુલના શિક્ષકો, સંચાલકોની હૂંફને કારણે તેમનો પુત્ર આજે એ-વન ગ્રેડ પરીણામ હાંસલ કરી શક્યો છે.

સંસ્કારકુંજ જ્ઞાનપીઠનો પહેલો એ-વન સિતારો

પોતાની શાળાના વિદ્યાર્થી દિવ્ય મનીષકુમાર પટેલે મેળવેલી સિદ્ધિના પ્રતિસાદમાં સંસ્કારકુંજ જ્ઞાનપીઠના સંચાલક પરેશભાઇ પટેલે જણાવ્યું હતું કે તેમની શાળાનો આ પહેલો વિદ્યાર્થી છે જેણે રાજ્યસ્તરે અત્યંત ઓજસ્વી પરફોર્મન્સ થકી શાળાનું નામ રોશન કર્યું છે. દિવ્ય પટેલ વગર ટ્યુશને અભ્યાસ કરી રહ્યો હતો, અમારા માટે એ ગૌરવવંતી બાબત છે. શાળાકીય શિક્ષણના સહારે વિદ્યાર્થી જો આ પ્રકારે અભ્યાસ કરતા હોય તો ટ્યુશનની બદી આપોઆપ દૂર થઇ જશે.