10 વર્ષથી સંતાન માટે ઝૂરતાં દંપતિને એકસાથે 4 બાળકો અવતર્યા

કચ્છના આર્થિક પાટનગર ગાંધીધામમાં દસ-દસ વર્ષથી સંતાન સુખ માટે મથતાં દંપતીને કુદરતે એકસાથે ચાર-ચાર બાળક અવતર્યા છે.
ગાંધીધામમાં રહેતાં ક્રિષ્નાબેન દિપકભાઈ ભાનુશાલીની કૂખે એકસાથે ચાર સંતાનો જન્મ્યાં છે. ક્રિષ્નાબેન અને દિપકભાઈના ઘેર લગ્ન થયા બાદ દસ વર્ષથી પારણું બંધાયું નહોતું. પરંતુ આખરે તેમણે ભુજ અને ગાંધીધામમાં પ્રેક્ટિસ કરતાં ડોક્ટર પાસે સારવાર લેવાનું શરૂ કર્યું હતું.એક બાળકની ઝંખના હતી તેમના પર કુદરતની મહેરબાનીએ ચાર બાળકની ભેટ આપી દીધી.

ગાંધીધામના નર્સિંગ હોમમાં ગાયનેકોલોજીસ્ટ્સ, પેડીયાટ્રીશ્યન્સ અને એનેસ્થેટીસ્ટ સહિતના આઠ તબીબોની ટુકડીએ ક્રિષ્નાબેનની ડિલિવરી કરાવી હતી. જન્મેલાં ચાર બાળકોમાં બે દીકરા છે અને બે દીકરી છે. ચારેય બાળકો તંદુરસ્ત છે પણ તબીબી કારણોસર તેમને ઈન્ક્યુબેટર (કાચની પેટી)માં રખાયાં છે. માતાની તબિયત પણ એકદમ બરાબર હોવાનું જાણવા મળ્યું છે. ક્રિષ્નાબેનની સારવાર અને ડિલિવરી કરાવનારા ડૉ. નરેશ ભાનુશાલીના જણાવ્યા પ્રમાણે સામાન્ય રીતે સ્ત્રીબીજ અને પુરુષબીજના ફલિનીકરણ વખતે જો તેમાં વિભાજન થઈ જતું હોય તો જોડિયાં બાળકો જન્મતાં હોય છે. અલબત્ત, એકસાથે ચાર બાળકો જન્મવાનો કિસ્સો વીસ લાખ ડિલિવરીએ માંડ એકાદવાર નોંધાતો હોય છે.