‘કપડા પાર્સલ ટ્રેન હોય કે ડ્યૂટી રિમૂવલ’ ટેક્ષટાઇલ ઉદ્યોગ માટે કપડામંત્રી દર્શના જરદોષના ત્વરિત નિર્ણયો અત્યંત લાભપ્રદ

દેશના રાજ્યકક્ષાના કપડા અન રેલવે મંત્રી બન્યા પછી સુરતના સાંસદ દર્શના જરદોષે અનેક ઝડપી નિર્ણયો લઇને કામ કરતી સરકારનો પરચમ લહેરાવ્યો છે. ઇમ્પોર્ટેડ ફિલામેન્ટ યાર્ન પર એન્ટી સબસિડી ડ્યૂટીથી શરૂ કરીને સુરતના કપડા ઉદ્યોગને ખાસ કપડા પાર્સલ ટ્રેન આપવાનું કામ હોય દર્શનાબેન જરદોષે એટલી ઝડપથી કર્યું કે જેની કપડા વિક્રેતાઓને પણ કલ્પના નહીં હોય.

સુરતમાં ઉત્પાદિત ફેબ્રિક તેમજ અન્ય ટેક્ષટાઇલ ઉત્પાદનોને બિહાર સુધી ટ્રાન્સપોર્ટ કરવા માટે રેલવે મંત્રાલયે ખાસ 25 ડબ્બાની પહેલી કપડા પાર્સલ ટ્રેન શિડ્યુલ્ડ કરી હતી જેને ગઇ તા.4 સપ્ટેમ્બર 2021ને શનિવારે ખુદ રેલવે રાજ્યમંત્રી દર્શના જરદોષે લીલીઝંડી આપીને સુરત નજીકના ઉધના રેલવે સ્ટેશનથી બિહાર રવાના કરી હતી.

ટેક્ષટાઇલ સિટી સુરતના કાપડ વિક્રેતાઓને ટ્રાન્સપોર્ટેશનની સુવિધા સસ્તી, ઝડપી અને સુરક્ષિત રીતે મળે એ માટે ખાસ કપડા પાર્સલ ટ્રેન શરુ કરવામાં આવી છે.

પશ્ચિમ રેલવેએ જણાવ્યું કે રેલવે અને કપડા રાજ્યમંત્રી દર્શના જરદોશે શનિવારે સુરતના ઉધના ન્યૂ ગુડ્સ શેડથી પટના નજીક દાનાપુર અને મુઝફ્ફરપુરના રામદયાળુ નગર માટે આ ખાસ ટ્રેનને લીલી ઝંડી બતાવી રવાના કરી હતી. આ દરમિયાન રેલવેના વરિષ્ઠ અધિકારીઓ સહિત સ્થાનિક ધારાસભ્ય અને ફેડરેશન ઓફ સુરત ટેક્સટાઇલ ટ્રેડર્સ એસોસિએશનના પ્રમુખ હાજર રહ્યા હતા.

રેલવે તરફથી જણાવવામાં આવ્યું કે, ઉધના ન્યૂ ગુડ્સ શેડમાં એનએમજી ડબ્બામાં પહેલી વાર કપડા સામગ્રીને લોડ કરવામાં આવી હતી. આ દિશામાં પહેલી વાર કપડા પાર્સલ ટ્રેન ઉધનાથી કપડા સામગ્રી લઇને પટનાના મુઝફ્ફરપુર માટે ચલાવવામાં આવી છે.

આ પહેલા પશ્ચિમ રેલવેના મુંબઇ વિભાગે હાલમાં જ પહેલી વાર 202.4 ટન કપડા સામગ્રીને સુરત પાસે ચલથણથી કોલકાતાના શાલીમાર સુધી પહોંચાડી હતી.