20મીને શુક્રવારે દેશભરમાં ટ્રકની હડતાળ: ઇવે-બિલ જનરેટ કરવાનું બંધઃ ધંધા-રોજગાર ખોટકાશે

છેલ્લા ઘણા સમયથી ડિઝલના ભા‌વમાં થયેલા એક તરફી વધારા, ટોલ નાકા પર ચાલકો સાથે થતી જોહુકમી, થર્ડ પાર્ટી વીમો સહિતના મુદ્દે દેશભરના ટ્રાન્સપોર્ટરોએ ૨૦મી જુલાઇથી અનિશ્ચિત મુદતની હડતાળ પર જવાની કરાયેલી જાહેરાતને પગલે દેશના ધંધારોજગારને અબજો રૂપિયાની નુકસાની થવાનો અંદાજ છે કેમકે વ્યાપારીઓએ ઇવે બિલ જનરેટ કરવાનું બંધ કરી દીધું છે. આ વખતે હડતાળ અગાઉની જેમ છેલ્લી ઘડીએ સમેટાય જાય તેવી શક્યતાઓ ધૂંધળી જોવા મળતી હોઇ, પરિસ્થિતિ વકરે તેવા એંધાણ પણ મળી રહ્યા છે.

સુરત સમેત દક્ષિણ ગુજરાતમાં ટ્રક હડતાળની ભારે અસર એટલા માટે દેખાશે કેમકે સુરતમાં ટેક્સટાઇલ ઉદ્યોગ તેમજ હજીરા ખાતે આવેલા ઉદ્યોગગૃહોમાંથી રોજેરોજ હજારોની સંખ્યામાં ટ્રકો માલનું વહન કરીને એક સ્થળેથી બીજા સ્થળે જવા માટે નીકળે છે. ટેક્સટાઇલ વેપારીઓથી લઇને હજીરાના ઉદ્યોગગૃહોએ હડતાળના એલાનને પગલે સાવચેતીના અનેક પગલાં ભર્યા છે.

આગામી શુક્રવારે તા. ૨૦ જૂલાઇથી લાખો ટ્રાન્સપોર્ટર્સની હડતાળના અેલાનને પગલે તા.14મી જુલાઇથી જ લાંબા અંતરે રવાના કરવાના માલસામાનને ટ્રાન્સપોર્ટરોએ સ્વીકારવાનું બંધ કર્યું છે. સાથે સાથે વેપારીએ પણ હવે ઇવે-બિલ જનરેટ કરવાનું બંધ કરી દીધું છે. જોકે હજુ સુધી દૂધ, શાકભાજી જેવી પ્રાથમિક જરૂરીયાતની વસ્તુઓ સપ્લાય કરતા વાહનોના સંગઠનો હડતાળમાં જોડાયા હોવાનું જાણી શકાયું નથી પરંતુ જો તેઓ આ હડતાળમાં જોડાય તો ચોક્કસ તંત્ર દોડતું થઇ જાય.

દક્ષિણ ગુજરાતના અગ્રણી ટ્રાન્સપોર્ટર શ્રી ગોવિંદભાઇ ધૂઆએ જણાવ્યું હતું કે ટ્રાન્સપોર્ટરોની પરેશાનીનો પાર રહ્યો નથી. ડીઝલના ભાવમાં સતત વાધારો થઇ રહ્યો છે. ડિઝલ પર સરકાર દ્વારા લેવાતી એક્સાઇઝ ઓછી કરવી જોઇએ. દેશભરમાં ટોલ ફ્રી ભ્રમણ થાય તેવી વ્યવસ્થા અને ઇવે-બિલના મુદ્દે અધિકારીઓની પરેશાની દૂર થાય તો ટ્રાન્સપોર્ટરો ધંધો કરી શકે તેમ છે.